1-3. (a) Yaˬhoˉvaˬ ngaˬ hui htaꞈ daꞈ ve laꞈ shawnˍ peꞈ laˇ ve aˬ htoꞈ ma le? Laꞈ shawnˍ chi ngaˬ hui hkʼaˬ hkʼe te yehˇ yaꞈ la ve le? (b) Ngaˬ hui laꞈ shawnˍ chi hkʼaˬ hkʼe yehˇ cawˇ ve le?

 Awˬ pa yawˇ ve yaˇ yaˇ nehˬ hpehꞈ ve teˇ gʼaˇ htaꞈ sho kuˇ piˇ ve yoˬ. Daꞈ jaˇ ve laꞈ shawnˍ chi ve yawˇ ve yaˇ htaꞈ piˇ htaˇ awˬ pa ha lehˬ jaˇ. Yaꞈ hkʼaˇ, yawˇ ve yaˇ shaˍ tiꞈ maˇ te ve awˬ hkʼaw lo sho kuˇ gʼaꞈ leh shu htaꞈ gʼa guˆ heuˆ leh naˬ ve kʼo, awˬ pa hkʼaˬ hkʼe dawˇ tuˬ le?

² Yaˬhoˉvaˬ “daꞈ ve awˬ bon hkʼa peu˗eˬ” peꞈ laˇ shehˍ hpaˇ hpehꞈ ve yoˬ. (Yaˍkoˆ 1:17) Daꞈ jaˇ ve laꞈ shawnˍ yawˇ peꞈ laˇ ve lehˬ tawˇ yaw puiˉ ve teˇ ceuˬ yoˬ. Tawˇ yaw ve htaꞈ pa taw, ngaˬ hui ve dawˇ hkʼaˇ htaꞈ shu shiˍ hpehꞈ ve yoˬ. Ngaˬ hui tawˇ yaw ve lehˬ shu nyi ma sha la tuˬ ga piˇ gʼa ve yoˬ. Yaꞈ hkʼaˇ, ngaˬ hui tawˇ yaw ve shu luˬ kʼai tuˬ leh shu nyi ma naˬ tuˬ kaꞈ te piˇ gʼa ve yoˬ.

³ Ngaˬ hui ve tawˇ kanˇ paˆ cawˬ jaˇ. Laꞈ shawnˍ chi ngaˬ hui hkʼa dehꞈ yehˇ puiˉ tuˬ, Yaˬhoˉvaˬ maˍ laˇ ve yoˬ. Yawˇ kʼoˆ ve, “nawˬ hui ve mawꞈ kʼaw awˬ hkʼaw lo chaꞈ chiˆ ve tawˇ hkawˇ teˇ peu˗eˬ kaꞈ taˇ tawˆ la piˇ. Yaꞈ hkʼaˇ, gʼa kaˇ ve chaw hui awˬ pon awˬ bon cawˬ tuˬ, shu loˍ chehˇ ve awˬ ceuˬ htaꞈ cawˇ daꞈ ve tawˇ ceh tiˉ yaw leh, shu htaꞈ uiˍ la yeˬ la piˇ puiˉ ve daꞈ ve tawˇ htaꞈ ceh tiˉ yaw˗o.” (Eˇfeˇsuꞈ 4:29) Gʼuiˬ sha peꞈ laˇ ve laꞈ shawnˍ chi ve htaꞈ yehˇ ve awˬ hkʼaw lo yawˇ nyi hkʼaˇ suh tuˬ leh shu htaꞈ awˬ gʼaˇ piˇ gʼa tuˬ, ngaˬ hui hkʼaˬ hkʼe te cawˇ ve teˇ geh nyi sheˍ.

4, 5. Tawˇ naˉ ve liꞈ hkʼaw kʼoˆ taˍ ve hkʼe tawˇ yaw ve kanˇ paˆ hkʼaˬ hkʼe taw cawˬ ve le?

⁴ Tawˇ yaw ve kanˇ paˆ cawˬ ve pa taw, ngaˬ hui aˬ htoꞈ ma kʼoˆ tuˬ, hkʼaˬ hkʼe yaw tuˬ, shaˍ tiꞈ gʼa te ve yoˬ. Tawˇ naˉ ve liꞈ 15:4 hkʼaw kʼoˆ ve, “tawˇ nuˇ lehˍ yaw ve teˇ ceuˬ lehˬ chaw yaˇ htaꞈ a shaꞈ teꞈ piˇ lawˬ ve yoˬ. Yaꞈ hkʼaˇ, hehnˇ chaweh yaw ve tawˇ lehˬ chaw yaˇ ve nyi ma htaꞈ awˬ gʼaˇ nuˇ kʼai piˇ ve yoˬ.” Haw jaˇ htaˇ ngaˬ hui suhˆ cehˬ hawˉ lo gʼaˇ jehˇ gaˇ ve yoˬ. Chi hkʼa shuˍ shuˍ, na sha ve tawˇ yaw ve kʼo, shu ngaˬ hui geh chehˇ gaˇ tuˬ yoˬ. Ngaˬ hui tawˇ yaw ve maˇ na sha ve kʼo, shu nyi ma naˬ tuˬ yoˬ.—Tawˇ naˉ ve 18:21.

⁵ Tawˇ naˉ ve liꞈ 12:18 hkʼaw kʼoˆ ve, “maˇ dawˇ nyi leh yaw ve tawˇ teˇ hpaˍ lehˬ aˉ htaw hkʼa shuˍ shu htaꞈ naˬ piˇ lawˬ ve yoˬ.” Maˇ ha kʼaˉ puiˉ ve tawˇ yaw ve lehˬ shu htaꞈ nyi ma naˬ tuˬ te piˇ leh meuˆ daꞈ ve teˇ ceuˬ htaꞈ te luˬ piˇ ve yoˬ. Shu maˇ ha kʼaˉ puiˉ ve tawˇ yaw laˇ ve pa taw, nawˬ nyi ma naˬ jaw ve yoˬ hehˉ. Tawˇ naˉ ve liꞈ hkʼaw kʼawꞈ kʼoˆ taˍ ve, “cuˇ yiˍ htaꞈ yehˇ leh yaw ve tawˇ lehˬ shu htaꞈ kʼawꞈ na˗e la piˇ gʼa ve yoˬ.” Hkʼa dehꞈ dawˇ nyi leh tawˇ yaw ve lehˬ nyi ma sha la tuˬ te laˇ leh, yonˍ yaꞈ leh awˬ chawˇ maˇ te daꞈ˗o ve chaw htaꞈ kʼawꞈ meuˆ daꞈ la gʼa ve yoˬ. (Tawˇ naˉ ve 16:24 gʼaw sheˍ.) Ngaˬ hui tawˇ yaw ve shu htaꞈ heuˆ la kuiˬ cawˬ ve tehꞈ hkʼaˬ htaˆ kaꞈ dawˇ nawˇ ve kʼo, ngaˬ hui shaˍ tiꞈ te tuˬ yoˬ.

6. Aˬ htoꞈ ma te ngaˬ hui tawˇ yaw ve teˇ ceuˬ yuˬ tiˍ haˍ jaˇ ve le?

⁶ Ngaˬ hui teˇ gʼaˇ le le maˇ biˇ ve chaw hpehꞈ ve pa taw, ngaˬ hui tawˇ yaw ve shaˍ tiꞈ te cawˇ ve yoˬ. “Chaw yaˇ teˇ hpaˍ lehˬ yaˇ nehˬ htaˇ kaꞈ tanˬ leh yawˇ hui ve dawˇ hkʼaˇ teˇ hpaˍ chaꞈ chiˆ jaˇ.” Tawˇ yaw ve lehˬ ngaˬ hui ve nyi ma hkʼaw cawˬ ve awˬ ceuˬ shu htaꞈ hpeuꞈ maw piˇ gʼa ve yoˬ. (Awˬ hkuiˉ puiˍ 8:21; Luˉkaꞈ 6:45) Ngaˬ hui tawˇ yaw ve  teˇ ceuˬ htaꞈ yuˬ tiˍ haˍ jaˇ. (Yaˍkoˆ 3:2-4 gʼaw sheˍ.) Yaꞈ hkʼaˇ, ngaˬ hui shu htaꞈ tawˇ yaw piˇ ve awˬ hkʼaˇ hkʼaˬ htaˆ kaꞈ gʼa coˇ caˇ leh gʼa gu chehˇ ve yoˬ.

7, 8. Ngaˬ hui tawˇ yaw ve Yaˬhoˉvaˬ htaꞈ meuˆ daꞈ ve hkʼaˬ hkʼe heuˆ la gʼa ve le?

⁷ Ngaˬ hui tawˇ yaw ve awˬ ceuˬ Yaˬhoˉvaˬ htaꞈ gʼa kʼoˆ maˍ piˇ ve pa taw, ngaˬ hui tawˇ yaw ve shaˍ tiꞈ gʼa te ve yoˬ. Yaˍkoˆ liꞈ 1:26 hkʼaw kʼoˆ ve, “chaw teˇ gʼaˇ gʼaˇ, oˉ kʼoˍ pui ve awˬ liˇ htaꞈ yawˇ hkʼa dehꞈ te ve tehꞈ dawˇ htawˇ, yawˇ ve ha tehˍ htaꞈ maˇ gʼaˇ ve kʼo, yawˇ awˬ to htaꞈ heˍ chehˇ ve yoˬ. Yawˇ oˉ kʼoˍ pui ve lehˬ hkʼe leˇ hpehꞈ ve yoˬ.” Heˍlaˍsaˆ tawˇ hkawˇ hkʼaw “hkʼe leˇ” kʼoˆ ve htaꞈ “awˬ bon maˇ cawˬ” tehꞈ kʼoˆ gaˇ ve yoˬ. (1 Kawˇrenˍhtuˆ 15:17) Chi htaꞈ pa taw, tawˇ yaw ve shaˍ tiꞈ maˇ te ve kʼo, ngaˬ hui Yaˬhoˉvaˬ htaꞈ meuˆ daꞈ ve luˬ kʼai gʼa ve yoˬ.—Yaˍkoˆ 3:8-10.

⁸ Ngaˬ hui aˬ htoꞈ ma kʼoˆ tuˬ, hkʼaˬ hkʼe yaw tuˬ, shaˍ tiꞈ gʼa te ve yoˬ tehꞈ ngaˬ hui hkʼa tawˍ lehˆ mawˬ ve yoˬ. Tawˇ yaw ve laꞈ shawnˍ chi ve htaꞈ yehˇ leh Yaˬhoˉvaˬ nyi ma cawˇ tuˬ, jaw kʼai cawˇ ve tawˇ htaꞈ kaꞈ shiˍ cawˇ ve yoˬ.

9, 10. (a) Laiˉ gʼaˇ hkʼaˬ hkʼe ve tawˇ yaw ve le? (b) Aˬ htoꞈ ma te ngaˬ hui chaꞈ chiˆ ve tawˇ htaꞈ jaw kʼai cawˇ ve le?

⁹ Chi beuꞈ teˇ co˗e, chaw laiˉ gʼaˇ chaꞈ chiˆ ve tawˇ htaꞈ yaw ve yoˬ. Shu hkʼa dehꞈ na gʼa tuˬ oˇ ve tawˇ gʼa yaw ve tehꞈ yawˇ hui dawˇ ve yoˬ. Gʼuiˬ yawˬ tuˬ awˬ han te maˍ ve chaw lehˬ shu gʼuiˬ yawˬ tuˬ chaꞈ chiˆ ve tawˇ yaw ve yoˬ. Tcuh yaˇ Pawˇluꞈ kʼoˆ ve, “nyi ma zuhˆ ve, beuꞈ jaˇ ve, shu htaꞈ naˬ tuˬ te gaˇ ve, shu htaꞈ hkʼaiˉ ve leh, chaꞈ chiˆ ve tawˇ htaꞈ yaw ve, awˬ ceuˬ chi teˇ hpaˍ hkʼa peu˗eˬ htaꞈ baˬ taˉ˗oˆ.” (Kawˇlawˇsehˇ 3:8) Yawˇ kʼawꞈ kʼoˆ ve awˬ tehˬ ve Hkriꞈ yaˇ lehˬ “baˇ daꞈ gʼuiˬ daꞈ ve tawˇ hkawˇ” maˇ yaw cawˇ ve yoˬ.—Eˇfeˇsuꞈ 5:3, 4.

¹⁰ Chaꞈ chiˆ ve tawˇ yaw ve lehˬ Yaˬhoˉvaˬ leh yawˇ htaꞈ haꞈ ve chaw kaꞈ maˇ dawˇ cawˇ. Chi ve lehˬ maˇ daꞈ kehˬ ve yoˬ. Liꞈ hpu hkʼaw kʼoˆ ve, “chaꞈ chiˆ ve htaꞈ te ve” teˇ ceuˬ lehˬ “awˬ suhˍ awˬ shaˍ ve kanˉ” hpehꞈ ve yoˬ. (Gaˍlaˍtiˆ 5:19-21) “Chaꞈ chiˆ ve htaꞈ te ve” lehˬ venˇ baˆ te ve laiˉ ceuˬ htaꞈ caˉ daꞈ ve yoˬ. Chaw teˇ gʼaˇ chaꞈ chiˆ ve tawˇ htaꞈ hkʼaˬ htaˆ kaꞈ yaw chehˇ leh maˇ pa gaˇ ve kʼo, Hkriꞈ yaˇ awˬ moˍ hkʼaw maˇ kʼawꞈ chehˇ tcuh laˇ tuˬ yoˬ hehˉ.—2 Kawˇrenˍhtuˆ 12:21; Eˇfeˇsuꞈ 4:19; Kʼoˆ maˍ ve awˬ lawn 23 htaꞈ nyi sheˍ.

11, 12. (a) Shu htaꞈ ca hkʼaiˉ ve aˬ htoꞈ ma le? (b) Aˬ htoꞈ ma te ngaˬ hui shu ve awˬ lawn maˇ heˆ heˆ she piˇ ve htaꞈ jaw kʼai cawˇ ve le?

¹¹ Shu luˬ kʼai tuˬ ca hkʼaiˉ ve htaꞈ kaꞈ ngaˬ hui jaw kʼai cawˇ ve yoˬ. Ngaˬ hui teˇ gʼaˇ leh teˇ gʼaˇ ve awˬ lawn shiˍ gaˇ leh awˬ chawˇ leh yehˬ kʼa ve awˬ lawn kʼoˆ daꞈ ve yoˬ. Awˉ lawˉ htaˇ ve Hkriꞈ yaˇ htawˇ, yawˇ hui ve awˬ viˉ awˬ nyi htaꞈ ga piˇ tuˬ, awˬ viˉ awˬ nyi hkʼaˬ hkʼe hpehꞈ chehˇ ve htaꞈ yawˇ hui shiˍ gaˇ ve yoˬ. (Eˇfeˇsuꞈ 6:21, 22; Kawˇlawˇsehˇ 4:8, 9) Yaꞈ hkʼaˇ, shaˍ tiꞈ maˇ te ve kʼo, shu ve awˬ lawn kʼoˆ daꞈ ve lehˬ shu htaꞈ hkʼaiˉ ve hpehꞈ la gʼa ve yoˬ. Hkʼaiˉ daꞈ ve oˇ ve htaꞈ ngaˬ hui kʼawꞈ caˉ kʼoˆ ve kʼo, shu maˇ shiˍ  keunˍ maˇ shiˍ cawˇ ve maˇ heˆ heˆ ve awˬ lawn ngaˬ hui kʼoˆ chehˇ ve yoˬ hehˉ. Ngaˬ hui shaˍ tiꞈ maˇ te ve kʼo, maˇ daꞈ ve kʼoˆ ve chi lehˬ shu htaꞈ maˇ heˆ heˆ she piˇ ve teˇ ceuˬ hpehꞈ la gʼa ve yoˬ. Yeˍsuˆ maˇ cawˇ ve awˬ ceuˬ htaꞈ te ve yoˬ tehꞈ Hpaˍriˍsehˇ hui she piˇ ve yoˬ. (Maꞈhtehˍ 9:32-34; 12:22-24) Maˇ heˆ heˆ ve she piˇ ve lehˬ shu ve awˬ meh luˬ tuˬ te piˇ ve, tawˇ gʼawˬ daꞈ leh nyi ma naˬ tuˬ te ve, meuˆ daꞈ ve luˬ kʼai tuˬ te ve yoˬ.—Tawˇ naˉ ve 26:20.

¹² Yaˬhoˉvaˬ ngaˬ hui tawˇ yaw ve hkʼaw shu htaꞈ ga piˇ leh awˬ gʼaˇ piˇ tcuh gaˇ ve yoˬ. Awˬ chawˇ hpehꞈ ve htaꞈ canˇ paˍ kʼawꞈ hpehꞈ la piˇ ve maˇ heˆ. Yaˬhoˉvaˬ lehˬ “awˬ chawˇ chawˇ yaꞈ daꞈ tuˬ te piˇ ve chaw” htaꞈ canˇ ve yoˬ. (Tawˇ naˉ ve 6:16-19) Neˇ haiˬ Saˍtanˍ lehˬ maˇ heˆ heˆ she shehˍ hpaˇ awˉ lawˉ teˇ gʼaˇ hpehꞈ ve yoˬ. Yawˇ Yaˬhoˉvaˬ htaꞈ she piˇ ve yoˬ. (Hpeuꞈ maˍ ve 12:9, 10) Chi beuꞈ teˇ co˗e, teˇ gʼaˇ leh teˇ gʼaˇ heˍ daꞈ ve lehˬ a hkʼe leˇ ceh hpehꞈ ve yoˬ. Awˬ ceuˬ chi teˇ hpaˍ Hkriꞈ yaˇ awˬ moˍ hkʼaw maˇ cawˬ cawˇ. (Gaˍlaˍtiˆ 5:19-21) Chi htaꞈ pa taw, ngaˬ hui tawˇ yaw tuˬ hkʼaˬ htaˆ kaꞈ shaˍ tiꞈ gʼa te leh, maˇ yaw sheˍ htaˇ awˉ lawˉ gʼa dawˇ nyi ve yoˬ. Shu ve awˬ lawn ngaˬ hui maˇ ca kʼoˆ sheˍ htaˇ, a shu yawˇ awˬ to htaꞈ na nyi cawˇ ve yoˬ. ‘Ngaˬ ca kʼoˆ tuˬ ve awˬ lawn chi awˬ tehˬ hpehꞈ ve laˇ? Ca kʼoˆ piˇ ve kʼo daꞈ˗aˬ laˇ? Awˬ bon cawˬ˗aw laˇ? Chaw oˇ ve teˇ gʼaˇ ve awˬ lawn ngaˬ kʼoˆ chehˇ ve yawˇ htaꞈ kaˇ tcuh haˆ˗aw laˇ? Chaw teˇ gʼaˇ ngaˬ ve awˬ lawn htaꞈ ca kʼoˆ ve kʼo, ngaˬ hkʼaˬ hkʼe dawˇ tuˬ le?’—1 Hteˇsaˍlawˇniˆ 4:12 gʼaw sheˍ.

13, 14. (a) Maˇ shawˍ maˇ caˆ kʼoˆ ve shu htaꞈ hkʼaˬ hkʼe heuˆ la gʼa ve le? (b) Ca kʼoˆ toˇ ve aˬ htoꞈ ma htaꞈ kʼoˆ gaˇ ve le? Aˬ htoꞈ ma te Hkriꞈ yaˇ hui chi hkʼe maˇ te cawˇ ve le?

¹³ Teˇ pawˆ pawˆ kʼo, ngaˬ hui kʼoˆ peuˬ hkʼawꞈ nawˉ, nyi ma luˬ ve yoˬ. Yaꞈ hkʼaˇ, ngaˬ hui shu ve awˬ lawn ca kʼoˆ ve chaw leh maˇ ha kʼaˉ puiˉ ve tawˇ yaw ve chaw maˇ hpehꞈ gaˇ. Nyi ma naˬ tuˬ te piˇ ve tawˇ ngaˬ hui ve mawꞈ kʼaw  hkʼaw maˇ tawˆ la tcuh cawˇ. Pawˇluꞈ kʼoˆ ve, “shu htaꞈ nyi ma naˬ ve, shu htaꞈ beuꞈ ve, shu htaꞈ nyi ma zuhˆ ve, shu htaꞈ deˇ daꞈ yaꞈ daꞈ ve leh, shu htaꞈ maˇ shawˍ maˇ caˆ kʼoˆ ve, chi hkʼa peu˗eˬ htaꞈ baˬ taˍ˗oˆ. Shu htaꞈ naˬ tuˬ te gaˇ ve teˇ ceuˬ le le htaꞈ htawˇ baˬ taˉ˗oˆ.” (Eˇfeˇsuꞈ 4:31) Awˬ kaˍ awˬ nu Liꞈ hpu teˇ kʼoˆ hkʼaw kʼoˆ ve, “shu htaꞈ maˇ shawˍ maˇ caˆ kʼoˆ ve” lehˬ “haiˬ ve tawˇ,” “shu nyi ma naˬ tuˬ te piˇ ve tawˇ,” leh “hkʼa mvuhˇ hkʼa na kʼoˆ ve tawˇ” chi teˇ hpaˍ htaꞈ kʼoˆ gaˇ ve yoˬ. Shu htaꞈ maˇ shawˍ maˇ caˆ kʼoˆ ve lehˬ shu ve awˬ meꞈ awˬ hponˇ htaꞈ te luˬ leh yawˇ awˬ bon maˇ cawˬ tehꞈ dawˇ tuˬ te piˇ ve yoˬ. Yaˇ ehˉ lehˬ chaw mawˇ aꞈ kehˉ nyi ma luˬ puiˉ ve yoˬ. Chi htaꞈ pa taw, ngaˬ hui tawˇ yaw ve hkʼaw yawˇ hui nyi ma maˇ luˬ tuˬ, shaˍ tiꞈ te gaˇ ve yoˬ.—Kawˇlawˇsehˇ 3:21.

¹⁴ Liꞈ hpu ngaˬ hui htaꞈ shaˍ tiꞈ peꞈ laˇ ve, maˇ shawˍ maˇ caˆ kʼoˆ ve haiˬ ve awˬ ceuˬ teˇ ceuˬ lehˬ shu ve awˬ lawn ca kʼoˆ toˇ ve yoˬ. Ca kʼoˆ toˇ ve kʼoˆ ve lehˬ coˇ caˇ leh shu luˬ kʼai tuˬ maˇ shawˍ maˇ caˆ te chehˇ ve htaꞈ kʼoˆ gaˇ ve yoˬ. Chaw teˇ gʼaˇ yawˇ ve awˬ hpawˇ awˬ miˇ ma maˇ heˆ leh yawˇ ve yaˇ htaꞈ chi hkʼe te piˇ chehˇ ve kʼo, sheˉ lai jaˇ! Awˬ tehˬ kʼo, chaw teˇ gʼaˇ shu ve awˬ lawn hkʼaˬ htaˆ kaꞈ ca kʼoˆ toˇ chehˇ leh maˇ pa gaˇ ve kʼo, Hkriꞈ yaˇ awˬ moˍ hkʼaw maˇ kʼawꞈ gʼa chehˇ ve yoˬ. (1 Kawˇrenˍhtuˆ 5:11-13; 6:9, 10) Chaꞈ chiˆ ve tawˇ, heˍ ve tawˇ, maˇ ha kʼaˉ puiˉ ve tawˇ ngaˬ hui yaw ve kʼo, Yaˬhoˉvaˬ htaꞈ leh shu htaꞈ meuˆ daꞈ ve teˇ ceuˬ ngaˬ hui te luˬ chehˇ ve yoˬ tehꞈ ngaˬ hui gʼa henˇ laˬ peuˬ ve yoˬ.

15. Meuˆ daꞈ ve teˇ ceuˬ uiˍ la yeˬ la piˇ gʼa tuˬ, hkʼaˬ hkʼe ve tawˇ yaw cawˇ ve le?

¹⁵ Ngaˬ hui tawˇ yaw ve laꞈ shawnˍ chi htaꞈ Yaˬhoˉvaˬ nyi hkʼaˇ suh tuˬ hkʼaˬ hkʼe te gʼa tuˬ le? Hkʼaˬ hkʼe yaw cawˇ maˇ yaw cawˇ ve tawˇ Liꞈ hpu hkʼaw hkʼa tawˍ lehˆ maˇ kʼoˆ  taˍ laˇ ve htawˇ, Liꞈ hpu hkʼaw kʼoˆ ve, “shu htaꞈ uiˍ la yeˬ la piˇ puiˉ ve daꞈ ve tawˇ htaꞈ ceh tiˉ yaw˗o.” (Eˇfeˇsuꞈ 4:29) Shu htaꞈ uiˍ la yeˬ la piˇ puiˉ ve daꞈ ve tawˇ lehˬ ha kʼaˉ puiˉ leh awˬ tehˬ hpehꞈ ve yoˬ. Yaˬhoˉvaˬ ngaˬ hui htaꞈ tawˇ yaw ve awˬ hkʼaw lo shu htaꞈ ga piˇ leh awˬ gʼaˇ piˇ tcuh gaˇ ve yoˬ. Chi hkʼe te tuˬ maˇ sha ve yoˬ hehˉ. Maˇ daꞈ ve tawˇ leh maˇ ha kʼaˉ puiˉ ve tawˇ yaw ve aꞈ kehˉ awˬ bon cawˬ ve tawˇ yaw tuˬ gʼa coˇ caˇ ve yoˬ. (Tiˇtuˆ 2:8) Ngaˬ hui tawˇ yaw leh shu htaꞈ awˬ gʼaˇ piˇ gʼa ve awˬ hkʼaˇ teˇ geh nyi sheˍ.

16, 17. (a) Aˬ htoꞈ ma te ngaˬ hui shu htaꞈ chiˇ mvuh piˇ cawˇ ve le? (b) Ngaˬ hui a shu htaꞈ chiˇ mvuh piˇ gʼa ve le?

¹⁶ Yaˬhoˉvaˬ leh Yeˍsuˆ shu htaꞈ chiˇ mvuh piˇ puiˉ jaˇ. Ngaˬ hui yawˇ huiˉ maˬ htaꞈ henˇ yuˬ gaˇ ve yoˬ. (Maꞈhtehˍ 3:17; 25:19-23; Yoˇhanˬ 1:47) Ngaˬ hui shu htaꞈ chiˇ mvuh piˇ ve kʼo, yawˇ awˬ gʼaˇ gʼa tuˬ yoˬ. Kʼoˆ gaˇ ve lehˬ chaw oˇ ve teˇ gʼaˇ htaꞈ hkʼa dehꞈ dawˇ nyi piˇ leh a yeˇ te piˇ ve yoˬ. Tawˇ naˉ ve liꞈ 15:23 hkʼaw kʼoˆ ve, “cawˇ ve tawˇ htaꞈ ca gʼa ve teˇ ceuˬ lehˬ hkʼaˬ ma ha lehˬ tuˬ cawˬ ve le?” Ngaˬ hui kanˉ te kaiˬ jaˇ leh awˬ hpfuhˇ hkʼaˆ jaˇ tehꞈ nyi ma awˬ tawˬ hkʼa gaˬ shu chiˇ mvuh laˇ ve kʼo, ngaˬ hui awˬ gʼaˇ gʼa ve yoˬ.—Maꞈhtehˍ 7:12 gʼaw sheˍ; Kʼoˆ maˍ ve awˬ lawn 27 htaꞈ nyi sheˍ.

¹⁷ Nawˬ shu htaꞈ daꞈ ve hpawˇ nyi puiˉ ve kʼo, nyi ma awˬ tawˬ hkʼa gaˬ chiˇ mvuh piˇ tuˬ sha ve yoˬ. Tawˇ pa haˉ te kʼo, Hkriꞈ yaˇ awˬ moˍ hkʼaw awˬ viˉ awˬ nyi teˇ gʼaˇ yawˇ ve awˬ vuiˬ htaꞈ hkʼa dehꞈ gu hehnˇ taˍ ve maˇ heˆ leh teˇ gʼaˇ hpawnˬ daꞈ htaˇ coˇ caˇ leh laꞈ sheh chiˇ leh hkʼawꞈ ve htaꞈ nawˬ gʼa mawˬ ve yoˬ hehˉ. Yaˇ ehˉ yaˇ nehˬ liꞈ henˇ yehˬ lo awˬ tehˬ yonˍ ve htaꞈ haꞈ shaˉ ve maˇ heˆ leh chaw mawˇ teˇ gʼaˇ hkʼaˬ htaˆ kaꞈ hto toˇ chehˇ ve yoˬ. Yawˇ hui te ve awˬ ceuˬ awˬ hpfuhˇ hkʼaˆ jaˇ tehꞈ kʼoˆ piˇ ve htaꞈ loˍ ve yoˬ hehˉ. Awˬ hpawˇ yawˇ ve awˬ miˇ ma htaꞈ haꞈ leh awˬ hpfuhˇ hkʼaˆ jaˇ tehꞈ kʼoˆ piˇ tuˬ a yeˇ uiˍ ve yoˬ. (Tawˇ naˉ ve 31:10, 28)  Suhˆ cehˬ mvuhˇ cha iˉ kaˆ loˍ ve hkʼe, ngaˬ hui teˇ gʼaˇ le le awˬ hpfuhˇ cawˬ ve chaw hpehꞈ ve yoˬ tehꞈ shu htaꞈ mawˬ tcuh gaˇ ve yoˬ. Yaˇ ehˉ htawˇ awˬ tehˬ awˬ na chi hkʼe ve htaꞈ heuˆ gaˇ ve yoˬ. Yawˇ hui coˇ caˇ leh daꞈ ve awˬ liˇ awˬ hkʼaˇ te ve htaꞈ gʼaꞈ nyi leh chiˇ mvuh piˇ cawˇ ve yoˬ. Ngaˬ hui oˇ hkʼe te ve kʼo, yawˇ hui haꞈ hanˉ leh cawˇ ve htaꞈ caˉ leh kʼawꞈ te gaˇ tuˬ yoˬ.

18, 19. Aˬ htoꞈ ma te ngaˬ hui coˇ caˇ leh shu htaꞈ awˬ gʼaˇ piˇ cawˇ ve le? Ngaˬ hui hkʼaˬ hkʼe te gʼa tuˬ le?

¹⁸ Ngaˬ hui shu htaꞈ awˬ gʼaˇ piˇ ve kʼo, Yaˬhoˉvaˬ htaꞈ henˇ yuˬ chehˇ ve yoˬ. Yaˬhoˉvaˬ “nyi ma nuˇ nuˇ nehˬ nehˬ cawˬ ve chaw” hui htaꞈ “awˬ gʼaˇ awˬ shaˉ piˇ chehˇ ve yoˬ.” (Iˉsaˍyaˆ 57:15) “Awˬ gʼaˇ piˇ daꞈ” leh “nyi ma i puiˉ ve chaw  teˇ hpaˍ htaꞈ awˬ gʼaˇ piˇ˗oˆ” tehꞈ Yaˬhoˉvaˬ ngaˬ hui htaꞈ kʼoˆ laˇ ve yoˬ. (1 Hteˇsaˍlawˇniˆ 5:11, 14) Ngaˬ hui chi hkʼe te coˇ caˇ chehˇ ve htaꞈ yawˇ mawˬ ve kʼo, yawˇ ha lehˬ ve yoˬ.

¹⁹ Hkriꞈ yaˇ awˬ moˍ hkʼaw nyi ma i puiˉ leh awˬ gʼaˇ nuˇ puiˉ ve chaw htaꞈ nawˬ mawˬ ve yoˬ hehˉ. Yawˇ hui htaꞈ nawˬ hkʼaˬ hkʼe te ga piˇ gʼa tuˬ le? Nawˬ yawˇ gʼa hpuˇ chehˇ ve htaꞈ ga piˇ maˇ gʼa ve yoˬ hehˉ. Yaꞈ hkʼaˇ, nawˬ yawˇ htaꞈ dawˇ haˍ ve tehꞈ kʼoˆ piˇ gʼa ve yoˬ. Tawˇ pa haˉ te kʼo, yawˇ nawˬ geh teˇ ceuˬ ceuˬ te tuˬ jehˬ piˇ gʼa ve yoˬ. Nawˬ Liꞈ hpu teˇ tawn htaꞈ gʼaw leh awˬ gʼaˇ piˇ leh bon teˇ geh lawˬ hpehꞈ ve yoˬ. (Chiˇ mvuh ve 34:18; Maꞈhtehˍ 10:29-31) Awˬ viˉ awˬ nyi awˬ tehˬ awˬ na yawˇ htaꞈ haꞈ ve yoˬ tehꞈ nawˬ kʼoˆ piˇ gʼa ve yoˬ. (1 Kawˇrenˍhtuˆ 12:12-26; Yaˍkoˆ 5:14, 15) Nawˬ  kʼoˆ ve hkʼe awˬ tehˬ awˬ na yonˍ ve tehꞈ hpeuꞈ mawˬ piˇ sheˍ.—Tawˇ naˉ ve 12:25 gʼaw sheˍ.

20, 21. Beˆ maˍ laˇ hkawˇ htaꞈ na yuˬ tuˬ, aˬ htoꞈ ma ga laˇ ve le?

²⁰ Ngaˬ hui beˆ maˍ piˇ ve daꞈ ve kʼo, shu awˬ gʼaˇ gʼa ve yoˬ. Ngaˬ hui teˇ gʼaˇ le le maˇ biˇ ve chaw hpehꞈ ve pa taw, teˇ pawˆ pawˆ kʼo beˆ maˍ laˇ tuˬ loˍ ve yoˬ. Tawˇ naˉ ve liꞈ 19:20 hkʼaw kʼoˆ ve, “nawˬ lehˬ shu dawˇ hkʼaˇ piˇ laˇ ve htaꞈ na leh henˇ yuˬ gaˇ puiˉ ve nyi ma cawˬ la ve kʼo, nawˬ cuˇ yiˍ cawˬ la tuˬ yoˬ.” Beˆ maˍ ve lehˬ nyi haꞈ shaˉ shehˍ hpaˇ ve awˬ vuiˬ ceh tiˉ maˇ heˆ. Awˬ pa awˬ e kaꞈ yaˇ htaꞈ gʼa beˆ maˍ piˇ ve yoˬ. (Eˇfeˇsuꞈ 6:4) Awˬ viˉ awˬ nyi yaˇ miˇ kaꞈ beˆ maˍ piˇ daꞈ gʼa ve yoˬ. (Tiˇtuˆ 2:3-5) Ngaˬ hui awˬ viˉ awˬ nyi htaꞈ haꞈ ve pa taw, yawˇ nyi ma maˇ sha tuˬ maˇ te piˇ gaˇ. Ngaˬ hui htaꞈ aˬ htoꞈ ma ga laˇ gʼa ve le?

²¹ Shu daꞈ ve awˬ hkʼaˇ htaꞈ yehˇ leh beˆ maˍ laˇ htaˇ, nawˬ na yuˬ sha ve maˇ heˆ laˇ? Aˬ htoꞈ ma pa taw le? Chaw oˇ ve teˇ gʼaˇ nawˬ awˬ pon awˬ tehˬ awˬ na dawˇ nyi ve tehꞈ nawˬ shiˍ ve pa taw yoˬ. Yawˇ nawˬ htaꞈ haꞈ ve yoˬ tehꞈ nawˬ shiˍ tuˬ, yawˇ ha kʼaˉ ve tawˇ yaw laˇ ve yoˬ. (Kawˇlawˇsehˇ 4:6) Chi hkʼoˆ kaꞈ, yawˇ Liꞈ hpu htaꞈ cuˇ leh beˆ maˍ laˇ ve yoˬ hehˉ. (2 Tiˆmoˉseˍ 3:16) Ngaˬ hui shu htaꞈ beˆ maˍ piˇ ve teˇ yanˇ, Liꞈ hpu htaꞈ cuˇ cawˇ ve yoˬ. Ngaˬ hui hkʼe leˇ shu dawˇ tuˬ maˇ nyiˉ piˇ cawˇ leh, ngaˬ hui ve dawˇ hkʼaˇ cawˇ ve tehꞈ shu dawˇ tuˬ, Liꞈ hpu htaꞈ maˇ yehˇ yaꞈ cawˇ. Shu ngaˬ hui htaꞈ beˆ maˍ laˇ ve awˬ hkʼaˇ tawnˇ taˍ ve kʼo, ngaˬ hui kaꞈ shu htaꞈ hkʼa dehꞈ beˆ maˍ piˇ puiˉ tuˬ yoˬ.

22. Tawˇ yaw ve laꞈ shawnˍ chi ve htaꞈ nawˬ hkʼaˬ hkʼe yehˇ cawˇ ve le?

²² Tawˇ yaw ve lehˬ Gʼuiˬ sha peꞈ laˇ ve laꞈ shawnˍ hpehꞈ ve yoˬ. Ngaˬ hui yawˇ htaꞈ haꞈ ve kʼo, laꞈ shawnˍ chi ve htaꞈ cawˇ ve awˬ hkʼaw lo yehˇ tuˬ yoˬ. Tawˇ yaw ve lehˬ daꞈ ve leh maˇ daꞈ ve hpawˇ kanˇ paˆ cawˬ ve htaꞈ tawnˇ taˍ sheˍ. Chi htaꞈ pa taw, ngaˬ hui te gʼaˇ le le te gʼa ve hkʼe, shu awˬ gʼaˇ cawˬ la tuˬ tawˇ yaw cawˇ ve yoˬ.