1-3. (a) Aˬ htoꞈ ma te awˬ e yawˇ ve yaˇ daꞈ kehˬ˗oˬ lehˬ naˍ hkʼa dehꞈ chaˬ nyi ve le? (b) Aˬ htoꞈ ma te Yaˬhoˉvaˬ yawˇ ve chaw htaꞈ daꞈ kehˬ tcuh gaˇ ve le?

 Awˬ e teˇ gʼaˇ yaˇ liꞈ henˇ yehˬ lo kʼai tuˬ gu shawˍ piˇ chehˇ ve htaꞈ dawˇ nyi sheˍ. Yawˇ ve yaˇ paˍ iˉ kaˆ hehˉ˗oˬ leh naˍ leh veuꞈ kʼaˇ daꞈ kehˬ leh nyi sha˗oˬ leh naˍ hkʼa dehꞈ chaˬ nyi ve yoˬ. Chi hkʼe te ve lehˬ yawˇ awˬ to chehˇ sha leh awˬ pa awˬ e yaˇ htaꞈ nyi haꞈ shaˉ daꞈ ve htaꞈ shu mawˬ gʼa ve yoˬ.

² Ngaˬ hui ve Awˬ pa Yaˬhoˉvaˬ ngaˬ hui htaꞈ daꞈ kehˬ tcuh gaˇ ve yoˬ. (Chiˇ mvuh ve 18:26) Chi ve lehˬ ngaˬ hui awˬ pon awˬ bon cawˬ ve tehꞈ yawˇ shiˍ ve yoˬ. Ngaˬ hui daꞈ kehˬ ve kʼo, yawˇ htaꞈ yawˆ yan piˇ chehˇ ve yoˬ.—Yeˍsaˍkeˍlaˆ 36:22; 1 Peˍtruˆ 2:12 gʼaw sheˍ.

 ³ Daꞈ kehˬ ve chaw hpehꞈ tuˬ hkʼaˬ hkʼe kʼoˆ gaˇ ve le? Aˬ htoꞈ ma te ngaˬ hui awˬ pon awˬ bon cawˬ ve le? Na hkawˇ chi teˇ hpaˍ htaꞈ dawˇ nyi ve teˇ yanˇ, ngaˬ hui teˇ ceuˬ ceuˬ pa cawˇ ve kʼo, gʼa pa ve yoˬ.

4, 5. (a) Aˬ htoꞈ ma te ngaˬ hui daꞈ kehˬ cawˇ ve le? (b) Yaˬhoˉvaˬ daꞈ kehˬ ve htaꞈ hkʼaˬ hkʼe dawˇ ve yawˇ hpanˍ taˍ ve awˬ ceuˬ ngaˬ hui htaꞈ hkʼaˬ hkʼe maˍ laˇ ve le?

⁴ Ngaˬ hui daꞈ kehˬ ve chaw hpehꞈ tuˬ Yaˬhoˉvaˬ htaꞈ henˇ yuˬ ve yoˬ. (Oˉ kʼoˍ pui ve 11:44, 45) Gʼuiˬ sha “te ve hkʼa shuˍ shuˍ” te gaˇ ve pa taw, ngaˬ hui daꞈ kehˬ gaˇ ve yoˬ.—Eˇfeˇsuꞈ 5:1.

⁵ Yaˬhoˉvaˬ daꞈ kehˬ ve htaꞈ hkʼaˬ hkʼe dawˇ ve tehꞈ yawˇ te hpanˍ taˍ ve awˬ ceuˬ ngaˬ hui htaꞈ maˍ laˇ ve yoˬ. Mvuhˇ haw awˬ shaˉ leh iˉ kaˆ hkʼaˬ htaˆ kaꞈ daꞈ kehˬ tuˬ leh yawˇ hkʼaˇ yawˇ kanˉ te puiˉ tuˬ, Yaˬhoˉvaˬ gu teh taˍ ve yoˬ. (Yeˍraˍmiˆ 10:12) Chaw yaˇ maˇ daꞈ ve mvuhˇ haw awˬ shaˉ te keu ve htawˇ, miˬ guiˬ yawˇ hkʼaˇ yawˇ daꞈ kehˬ tuˬ laiˉ hkʼaˇ te chehˇ ve yoˬ. Tawˇ pa haˉ te kʼo, Yaˬhoˉvaˬ hpanˍ taˍ ve awˬ shehˍ ma mawˬ maˇ gʼa ve htaꞈ mawˬ tuˬ, awˬ hkʼeun htaꞈ gʼa cuˇ leh htawˍ nyi ve yoˬ. I jaˇ ve awˬ shehˍ ma chi ve lehˬ awˬ tawꞈ ma cawˬ ve htaꞈ awˬ tawꞈ ma maˇ cawˬ ve awˬ ceuˬ hpehꞈ kʼai tuˬ te gʼa ve yoˬ. Chi hkʼe te tuˬ awˬ gʼaˇ awˬ shaˉ gʼa yuˬ tawˆ maˇ jaˇ. Chaˬ nyi tehˆ nyi paˍ awˬ shehˍ ma chi htaꞈ yehˇ leh maˇ daꞈ ve mvuhˇ haw awˬ shaˉ pa gʼa ve yoˬ.—Roˉmaꞈ 1:20.

6, 7. Yaˬhoˉvaˬ htaꞈ oˉ kʼoˍ pui ve chaw gʼa daꞈ kehˬ ve tehꞈ ngaˬ hui shiˍ tuˬ, Moˉseˍ ve awˬ liˇ tawˇ hkawˇ hkʼaˬ hkʼe ga laˇ ve le?

⁶ Daꞈ kehˬ ve a yeˇ hkʼaˬ hkʼe taw uiˍ ve Moˉseˍ ve awˬ liˇ tawˇ hkawˇ maˍ laˇ ve yoˬ. Tawˇ pa haˉ te kʼo, Yaˬhoˉvaˬ oˉ kʼoˍ pui ve htaꞈ haꞈ yuˬ tuˬ, yawˇ ve chaw awˬ to gʼa daꞈ kehˬ ve yoˬ. Venˇ baˆ htaꞈ yuˬ baˬ ve awˬ nyi htaˇ, paw hkuˇ lonˉ iˉ kaˆ 2 pawˆ gʼa hehˉ ve yoˬ. (Oˉ kʼoˍ pui ve 16:4, 23, 24) Awˬ kaˍ awˬ nu paw hkuˇ maˇ tuˉ tanˇ sheˍ htaˇ,  laꞈ sheh hkui sheh gʼa tsuhˇ ve yoˬ. (Tawˆ kʼai ve 30:17-21; 2 Raˍsaˍvanˍ 4:6) Teˇ pawˆ pawˆ a shu teˇ gʼaˇ daꞈ kehˬ ve htaꞈ caˉ daꞈ ve awˬ liˇ tawˇ hkawˇ maˇ na yuˬ ve kʼo, tiˇ pehˍ ve htaꞈ gʼa hkanˍ ve yoˬ.—Oˉ kʼoˍ pui ve 15:31; Heh puiˉ hkʼaw 19:17-20.

⁷ Chi beuꞈ teˇ co˗e hkʼaˬ hkʼe te tuˬ le? Awˬ liˇ tawˇ hkawˇ chi htaꞈ nyi ve kʼo, ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ shiˍ maˇ la ve yoˬ. (Maˍlaˍhkiˆ 3:6) Gʼuiˬ sha kanˉ te ve chaw gʼa daꞈ kehˬ ve yoˬ tehꞈ, awˬ lawn chi ve hpeuꞈ maw laˇ ve yoˬ. Yaˬhoˉvaˬ ve awˬ liˇ awˬ hkʼaˇ maˇ pa jaw. Chi beuꞈ teˇ co˗e, Yaˬhoˉvaˬ htaꞈ oˉ kʼoˍ pui ve chaw gʼa daꞈ kehˬ ve tehꞈ yawˇ dawˇ law chehˇ sheˍ.—Yaˍkoˆ 1:27.

8. Ngaˬ hui hkʼaˬ hkʼe hpawˇ lo daꞈ kehˬ cawˇ ve le?

⁸ Gʼuiˬ sha mehˆ gʼuˇ suhˍ daꞈ kehˬ ve chaw kʼoˆ ve lehˬ a shu yawˇ awˬ to htaꞈ nyi haꞈ shaˉ ve, veuꞈ kʼaˇ leh yehˬ hkʼaw hkʼaˬ htaˆ kaꞈ daꞈ kehˬ tuˬ te ve ceh maˇ heˆ. Daꞈ kehˬ ve lehˬ ngaˬ hui a shaꞈ teꞈ chehˇ ve hkʼa peu˗eˬ htaꞈ caˉ daꞈ ve yoˬ. Chi ve lehˬ ngaˬ hui ve oˉ kʼoˍ pui ve leh te hkʼaˇ dawˇ hkʼaˇ htaꞈ kʼoˆ gaˇ ve yoˬ. Ngaˬ hui daꞈ kehˬ ve chaw hpehꞈ ve tehꞈ Yaˬhoˉvaˬ shawˍ laˇ tuˬ, a shaꞈ teꞈ kuiˬ teˇ hpawˇ le le gʼa daꞈ kehˬ tcuh ve yoˬ.

9, 10. Oˉ kʼoˍ pui ve awˬ hkʼaw lo daꞈ kehˬ ve aˬ htoꞈ ma htaꞈ kʼoˆ gaˇ ve le?

⁹ Daꞈ kehˬ ve oˉ kʼoˍ pui ve. Ngaˬ hui maˇ heˆ heˆ ve bon liˇ htaꞈ caˉ daꞈ maˇ hpehꞈ. Iˉsaˍreˍlaˆ chaw Baˍbuˍlonˍ mvuhˇ miˬ lo shu ceˬ te chehˇ htaˇ, yawˇ hui awˬ paˇ awˬ kui chehˇ ve chaw maˇ heˆ heˆ ve bon liˇ htaꞈ yonˍ leh pehꞈ ve tzuhˆ ve htaꞈ te ve yoˬ. Iˉsaˍreˍlaˆ chaw gʼa kʼoꞈ˗e leh daꞈ kehˬ ve oˉ kʼoˍ pui ve htaꞈ kʼawꞈ gu tuˬ yoˬ tehꞈ, Iˉsaˍyaˆ gʼuˇ suhˍ htaˇ kaꞈ kʼoˆ taˍ ve yoˬ. Yaˬhoˉvaˬ Iˉsaˍreˍlaˆ chaw htaꞈ kʼoˆ piˇ ve, “nawˬ hui ve awˬ to htaꞈ daꞈ kehˬ tuˬ te leh venˇ hkʼaw tawˆ kʼai loˬ.” Yawˇ hui Gʼuiˬ sha htaꞈ oˉ kʼoˍ pui tuˬ, Baˍbuˍlonˍ  mvuhˇ miˬ lo maˇ heˆ heˆ ve bon liˇ maˍ ve, te hkʼaˇ, chaw liˇ vaˇ liˇ htaꞈ maˇ gʼa pawnˇ daꞈ.—Iˉsaˍyaˆ 52:11.

¹⁰ Chi beuꞈ teˇ co˗e awˬ tehˬ ve Hkriꞈ yaˇ htawˇ, maˇ heˆ heˆ ve bon liˇ htaꞈ maˇ caˉ daꞈ. (1 Kawˇrenˍhtuˆ 10:21 gʼaw sheˍ.) Chaw yaˇ dawˇ cawˇ ve chaw liˇ vaˇ liˇ leh yonˍ hkʼaˇ laiˉ ceuˬ maˇ heˆ heˆ ve bon liˇ geh laˬ ve yoˬ. Tawˇ pa haˉ te kʼo, suh peuˬ hkʼawꞈ nawˉ awˬ ha ku cawˬ sheˍ ve tehꞈ laiˉ kaˬ lo chehˇ ve chaw yonˍ ve yoˬ. Chi htaꞈ pa taw, yawˇ hui yonˍ hkʼaˇ chi ve htaꞈ cuˇ leh chaw liˇ vaˇ liˇ laiˉ ceuˬ te tawˆ ve yoˬ. (Cuˇ yiˍ piˇ ve 9:5, 6, 10) Hkriꞈ yaˇ hui chi teˇ hpaˍ htaꞈ gʼa jaw kʼai ve yoˬ. Chaw liˇ vaˇ liˇ chi hkʼe ve htaꞈ te tuˬ yehˬ kʼa hkʼaw ve chaw ngaˬ hui htaꞈ nyiˉ laˇ ve yoˬ hehˉ. Yaꞈ hkʼaˇ, ngaˬ hui daꞈ kehˬ ve chaw hpehꞈ ve tehꞈ Yaˬhoˉvaˬ shawˍ laˇ tcuh gaˇ ve pa taw, nyiˉ laˇ ve htaꞈ gʼa yeunˇ hkanˍ ve yoˬ.—Tcuh yaˇ 5:29.

11. Daꞈ kehˬ ve te hkʼaˇ hkʼaˬ hkʼe ve htaꞈ kʼoˆ gaˇ ve le?

¹¹ Daꞈ kehˬ ve te hkʼaˇ. Ngaˬ hui daꞈ kehˬ ve chaw hpehꞈ ve tehꞈ Yaˬhoˉvaˬ shawˍ laˇ tuˬ, ngaˬ hui pehꞈ ve tzuhˆ ve teˇ ceuˬ le le htaꞈ gʼa jaw kʼai ve yoˬ. (Eˇfeˇsuꞈ 5:5 gʼaw sheˍ.) Liꞈ hpu hkʼaw Yaˬhoˉvaˬ ngaˬ hui htaꞈ kʼoˆ laˇ ve, “haˉ chawˇ haˉ paˆ te ve htaꞈ jaw kʼai loˬ.” Pehꞈ ve tzuhˆ ve leh haˉ chawˇ haˉ paˆ te ve chaw yawˇ hui maˇ dawˇ hpfuhˆ ve kʼo, “Gʼuiˬ sha ve mvuhˇ miˬ awˬ hkʼaw lo maˇ gʼa loꞈ˗e” tehꞈ yawˇ hkʼa tawˍ lehˆ kʼoˆ taˍ ve yoˬ.—1 Kawˇrenˍhtuˆ 6:9, 10, 18; Kʼoˆ maˍ ve awˬ lawn 22 htaꞈ nyi sheˍ.

12, 13. Aˬ htoꞈ ma te ngaˬ hui ve dawˇ hkʼaˇ gʼa daꞈ kehˬ piˇ ve le?

¹² Daꞈ kehˬ ve dawˇ hkʼaˇ. Dawˇ hkʼaˇ lehˬ te hkʼaˇ ve awˬ hkuiˉ puiˍ hpehꞈ ve yoˬ. (Maꞈhtehˍ 5:28; 15:18, 19) Dawˇ hkʼaˇ daꞈ kehˬ ve kʼo, te hkʼaˇ htawˇ daꞈ kehˬ ve yoˬ. Ngaˬ hui maˇ biˇ ve chaw hpehꞈ ve pa taw, teˇ pawˆ pawˆ kʼo dawˇ ve yaꞈ kʼai puiˉ ve yoˬ. Ngaˬ hui ve dawˇ hkʼaˇ maˇ cawˇ ve kʼo, laꞈ haˉ gʼa pa ve yoˬ. Chi hkʼe maˇ te ve kʼo, maw la ve teˇ yanˇ ngaˬ hui ve nyi ma maˇ kʼawꞈ daꞈ kehˬ ve yoˬ. Ngaˬ hui teˇ ceuˬ ceuˬ htaꞈ hkʼaˬ htaˆ kaꞈ dawˇ chehˇ ve kʼo, te gaˇ la  tuˬ yoˬ. Ngaˬ hui ve nyi ma hkʼaw daꞈ kehˬ ve dawˇ hkʼaˇ gʼa cawˬ tcuh ve yoˬ. (Hpiˇliˇpiˆ 4:8 gʼaw sheˍ.) Chi htaꞈ pa taw, pehꞈ ve tzuhˆ ve leh haiˬ ve htaꞈ caˉ daꞈ ve pyawˍ ve awˬ ceuˬ gʼa jaw kʼai ve yoˬ. Ngaˬ hui gʼaw ve, nyi ve, kʼoˆ ve awˬ ceuˬ hkʼa dehꞈ gʼa leuˆ yuˬ ve yoˬ.—Chiˇ mvuh ve 19:8, 9.

¹³ Gʼuiˬ sha hkʼaˬ htaˆ kaꞈ haꞈ laˇ tuˬ, oˉ kʼoˍ pui ve hpawˇ maˇ kʼoˆ, te hkʼaˇ maˇ kʼoˆ, dawˇ hkʼaˇ maˇ kʼoˆ, gʼa daꞈ kehˬ piˇ ve yoˬ. Yaꞈ hkʼaˇ, Yaˬhoˉvaˬ mehˆ gʼuˇ suhˍ awˬ to kehˬ lehˍ nyi haꞈ shaˉ ve kaꞈ a yeˇ uiˍ ve yoˬ.

14. Awˬ to kehˬ lehˍ ve cawˬ tuˬ aˬ htoꞈ ma te a yeˇ uiˍ ve le?

¹⁴ Ngaˬ hui awˬ to leh awˬ paˇ awˬ kui cawˬ ve mawˇ kehˬ lehˍ haꞈ shaˉ ve kʼo, ngaˬ hui leh awˬ paˇ awˬ kui chehˇ ve chaw awˬ bon gʼa tuˬ yoˬ. Ngaˬ hui nyi ma sha leh shu kaꞈ ngaˬ hui geh chehˇ gaˇ tuˬ yoˬ. Yaꞈ hkʼaˇ, ngaˬ hui kehˬ lehˍ ve chaw hpehꞈ cawˇ ve teˇ hkʼaˇ kʼawꞈ cawˬ sheˍ. Kehˬ lehˍ ve chaw lehˬ Yaˬhoˉvaˬ awˬ meꞈ awˬ hponˇ cawˬ tuˬ te piˇ ve yoˬ. Chi htaꞈ dawˇ nyi sheˍ. Nawˬ yaˇ ehˉ teˇ gʼaˇ hkʼaˬ htaˆ kaꞈ awˬ to chaꞈ chiˆ ve htaꞈ mawˬ ve kʼo, yawˇ ve awˬ pa awˬ e htaꞈ nawˬ maˇ daꞈ ve hpawˇ dawˇ tuˬ ve maˇ heˆ laˇ? Chi hkʼa shuˍ shuˍ, ngaˬ hui ve awˬ to hkʼaˬ htaˆ kaꞈ maˇ kehˬ ve kʼo, shu Yaˬhoˉvaˬ htaꞈ maˇ daꞈ ve hpawˇ dawˇ tuˬ yoˬ. Pawˇluꞈ kʼoˆ ve, “ngaˬ hui kanˉ te ve htaꞈ shu venˇ baˆ taˍ maˇ hpehꞈ tuˬ, chaw teˇ gʼaˇ kaꞈ hkui htiˇ poˬ tuˬ ve htaꞈ ngaˬ hui a ciˉ kaꞈ maˇ te. Ngaˬ hui lehˬ awˬ tehˬ awˬ na Gʼuiˬ sha ve kanˉ te paˍ hpehꞈ ve htaꞈ shu shiˍ hpehꞈ tuˬ, teˇ ceuˬ le le awˬ hkʼaw lo ngaˬ hui te ve yoˬ.”—2 Kawˇrenˍhtuˆ 6:3, 4.

15, 16. Ngaˬ hui awˬ to kehˬ lehˍ cawˬ tuˬ aˬ htoꞈ ma gʼa te ve le?

¹⁵ Ngaˬ hui ve awˬ to leh veuꞈ kʼaˇ. Ngaˬ hui teˇ nyi le le awˬ to kehˬ lehˍ tuˬ te cawˇ ve yoˬ. Tawˇ pa haˉ te kʼo, ngaˬ hui hkʼaˬ htaˆ kaꞈ iˉ kaˆ hehˉ ve yoˬ. Te gʼa ve kʼo, iˉ kaˆ teˇ nyi le le hehˉ cawˇ ve yoˬ. Ngaˬ hui awˍ chiˇ maˇ te sheˍ  htaˇ, awˍ maˇ caˇ sheˍ htaˇ, leh aˉ kʼaꞈ yehˬ kʼai peuˬ hkʼawꞈ nawˉ, sha pehˍ yehˇ leh laꞈ sheh hkʼa dehꞈ gʼa tsuhˇ ve yoˬ. Laꞈ sheh tsuhˇ ve i ve awˬ lawn hpehꞈ ve htawˇ, awˬ pfuhˇ ma leh a naˍ maˇ pehˉ kʼai tuˬ chi hkʼe te ve ga piˇ maˇ jaˇ. A shaꞈ htaꞈ haꞈ shaˉ tuˬ kaꞈ ga piˇ gʼa ve yoˬ. Aˉ kʼaꞈ yehˬ maˇ cawˬ ve htawˇ, maˇ chaꞈ chiˆ tuˬ te ve awˬ hkʼaˇ cawˬ ve yoˬ. Aˬ sho˗eˬ htaˇ Iˉsaˍreˍlaˆ chaw aˉ kʼaꞈ yehˬ maˇ cawˬ. Chi htaꞈ pa taw, chaw chehˇ kuiˬ leh iˉ kaˆ cawˬ kuiˬ vuiˇ kuiˬ lo miˬ kʼoˍ gʼa duˇ leh yaˆ beh taˉ ve yoˬ.—Bon maˍ ve 23:12, 13.

¹⁶ Ngaˬ hui ve veuꞈ kʼaˇ lehˬ daꞈ jaˇ ve, awˬ hpfuhˇ hkʼaˆ ve, leh awˬ suhˉ awˬ suhˉ tawˆ la ve veuꞈ kaˇ hpehꞈ tuˬ maˇ loˍ. Yaꞈ hkʼaˇ, nyi sha leh kehˬ ve veuꞈ kʼaˇ gʼa hpehꞈ ve yoˬ. (1 Tiˆmoˉseˍ 2:9, 10 gʼaw sheˍ.) Ngaˬ hui veuꞈ kʼaˇ veuꞈ ve hkʼaˬ htaˆ kaꞈ Yaˬhoˉvaˬ ve awˬ meꞈ awˬ hponˇ tawˆ la tuˬ te piˇ gaˇ ve yoˬ.—Tiˇtuˆ 2:10.

17. Aˬ htoꞈ ma te ngaˬ hui ve yehˬ leh awˬ paˇ awˬ kui cawˬ ve awˬ ceuˬ hkʼaˬ htaˆ kaꞈ kehˬ lehˍ tuˬ cawˬ cawˇ ve le?

 ¹⁷ Ngaˬ hui ve yehˬ leh awˬ paˇ awˬ kui cawˬ ve awˬ ceuˬ. Ngaˬ hui hkʼaˬ kaˬ lo chehˇ ve htawˇ maˇ kʼo, ngaˬ hui ve yehˬ kehˬ lehˍ cawˬ cawˇ ve yoˬ. Ngaˬ hui hpawnˬ daꞈ kuiˬ lo leh hto toˇ kuiˬ lo kʼai htaˇ, kaˇ, mawˍ htawˍ, shu kuˇ, awˬ kaˍ awˬ nu ciˉ tuˬ ve kaꞈ kehˬ lehˍ gʼa cawˬ piˇ ve yoˬ. Ngaˬ hui hto toˇ htaˇ, daꞈ jaˇ kehˬ jaˇ ve Paˍraˍdiˇsuˆ hko hkʼaw ve a shaꞈ awˬ lawn shu htaꞈ maˍ piˇ chehˇ ve pa taw yoˬ. (Luˉkaꞈ 23:43; Hpeuꞈ maˍ ve 11:18) Chi teˇ hkui ngaˬ hui ve yehˬ leh awˬ paˇ awˬ kui cawˬ ve awˬ ceuˬ htaꞈ kehˬ lehˍ tuˬ cawˬ ve kʼo, daꞈ kehˬ jaˇ ve miˬ guiˬ awˬ suhˉ hkʼaw ngaˬ hui chehˇ tuˬ gu hehnˇ taˍ ve tehꞈ hpeuꞈ maw piˇ ve yoˬ.

18. Aˬ htoꞈ ma te ngaˬ hui ve oˉ kʼoˍ pui kuiˬ kehˬ lehˍ cawˬ tuˬ loˍ ve le?

¹⁸ Ngaˬ hui ve oˉ kʼoˍ pui kuiˬ. Oˉ kʼoˍ pui kuiˬ, Gʼuiˬ sha ve mvuhˇ miˬ Hpawnˬ daꞈ kuiˬ yehˬ, hpawnˬ daꞈ lonˉ te kuiˬ, hkʼaˬ htaˆ kaꞈ kehˬ lehˍ gʼa cawˬ piˇ ve yoˬ. Chi hkʼe te ve lehˬ daꞈ kehˬ ve a yeˇ uiˍ ve tehꞈ ngaˬ hui hpeuꞈ maw piˇ chehˇ ve yoˬ. Shu Gʼuiˬ sha ve mvuhˇ miˬ Hpawnˬ daꞈ kuiˬ yehˬ lo awˉ lawˉ teˇ pawˆ laˬ htaˇ, kehˬ lehˍ cawˬ ve htaꞈ mawˬ ve yoˬ. Chi htaꞈ pa taw, Yaˬhoˉvaˬ awˬ meꞈ awˬ hponˇ gʼa ve yoˬ. Ngaˬ hui Hkriꞈ yaˇ awˬ moˍ hkʼaw teˇ gʼaˇ hpehꞈ ve pa taw, ngaˬ hui teˇ gʼaˇ le le hpawnˬ daꞈ kuiˬ yehˬ gʼa nyi haꞈ shaˉ leh daꞈ kehˬ tuˬ gʼa te ve yoˬ.—2 Raˍsaˍvanˍ 34:10.

19. Ngaˬ hui aˬ htoꞈ ma maˇ te cawˇ ve le?

¹⁹ Maˇ daꞈ kehˬ ve te hkʼaˇ hkʼa peu˗eˬ hkʼaˬ hkʼe cawˬ ve Liꞈ hpu hkʼaw maˇ kʼoˆ taˍ ve htawˇ, chi teˇ hpaˍ htaꞈ Yaˬhoˉvaˬ hkʼaˬ hkʼe dawˇ ve ngaˬ hui shiˍ tuˬ, Liꞈ hpu hkʼaw awˬ liˇ awˬ hkʼaˇ maˍ laˇ ve yoˬ. Shuˉ dawˬ ve, tzuhˬ leh naˆ tsuhˇ dawˬ maˇ ve chi teˇ hpaˍ Gʼuiˬ sha ngaˬ hui htaꞈ maˇ te tcuh gaˇ. Ngaˬ hui Gʼuiˬ sha ve awˬ chawˇ hpehꞈ ve kʼo, chi hkʼe maˇ te. Aˬ htoꞈ ma pa taw le? A shaꞈ awˬ hpfuhˇ hkʼaˆ jaˇ ve laꞈ shawnˍ hpehꞈ ve pa taw yoˬ. Maˇ daꞈ kehˬ ve  te hkʼaˇ lehˬ a shaꞈ ngeh tuˬ, maˇ chehˇ sha puiˉ tuˬ te laˇ ve, leh awˬ paˇ awˬ kui chehˇ ve chaw htaꞈ te luˬ ve yoˬ. Chehˇ sha puiˉ tuˬ, chaw laiˉ gʼaˇ maˇ daꞈ ve te hkʼaˇ htaꞈ pa ve yoˬ. Yaꞈ hkʼaˇ, ngaˬ hui Yaˬhoˉvaˬ ve awˬ chawˇ hpehꞈ leh yawˇ htaꞈ haꞈ ve pa taw, maˇ daꞈ kehˬ ve te hkʼaˇ htaꞈ pa ve yoˬ. Yaˇ miˇ teˇ gʼaˇ kʼoˆ ve, “Yaˬhoˉvaˬ ngaˬ htaꞈ ga laˇ ve pa taw, maˇ daꞈ ve te hkʼaˇ htaꞈ pa gʼa leh a shaꞈ teꞈ kuiˬ lo daꞈ la ve yoˬ. . . . Ngaˬ dawˇ ve ngaˬ hkʼaˇ ngaˬ pa tuˬ, te maˇ gʼa taˬ.” Chaw teˇ gʼaˇ maˇ daꞈ ve te hkʼaˇ htaꞈ pa tuˬ, Liꞈ hpu hkʼaw ve awˬ liˇ awˬ hkʼaˇ 5 hkʼaˇ cawˬ ve chi ga piˇ gʼa ve yoˬ. Teˇ geh nyi sheˍ.

20, 21. Yaˬhoˉvaˬ ngaˬ hui htaꞈ hkʼaˬ hkʼe ve te hkʼaˇ pa tcuh gaˇ ve le?

²⁰ “Haꞈ ve chaw teˇ hpaˍ˗oˬ, ngaˬ hui lehˬ ka tiꞈ tawˇ hkawˇ chi teˇ hpaˍ htaꞈ gʼa taˍ ve pa taw, ngaˬ hui ve awˬ to leh nyi ma htaꞈ chaꞈ chiˆ tuˬ te ve teˇ ceuˬ le le htaꞈ tsuhˇ baˬ leh, Gʼuiˬ sha htaꞈ kawˆ leh yawˆ yan ve awˬ hkʼaw lo daꞈ ve kehˬ ve teˇ ceuˬ htaꞈ biˇ la piˇ˗a veuˬ.” (2 Kawˇrenˍhtuˆ 7:1) Ngaˬ hui ve awˬ to leh nyi ma htaꞈ te luˬ laˇ ve maˇ daꞈ kehˬ ve te hkʼaˇ hkʼa peu˗eˬ Yaˬhoˉvaˬ ngaˬ hui htaꞈ pa tcuh gaˇ ve yoˬ.

²¹ Aˬ htoꞈ ma te ngaˬ hui ‘chaꞈ chiˆ tuˬ te laˇ ve hkʼa peu˗eˬ htaꞈ tsuhˇ baˬ’ gaˇ ve le? 2 Kawˇrenˍhtuˆ liꞈ 6:17, 18 hkʼaw Yaˬhoˉvaˬ ngaˬ hui htaꞈ kʼoˆ laˇ ve, “chaꞈ chiˆ ve teˇ ceuˬ htaꞈ taˇ htawˇ.” Oˇ ve hkʼawꞈ nawˉ yawˇ ka tiꞈ te laˇ ve, “ngaˬ nawˬ hui htaꞈ haꞈ yuˬ laˇ tuˬ yoˬ. Ngaˬ lehˬ nawˬ hui ve awˬ pa hpehꞈ leh nawˬ hui htawˇ ngaˬ ve yaˇ paˍ yaˇ miˇ teˇ hpaˍ hpehꞈ tuˬ yoˬ.” Maˇ daꞈ kehˬ tuˬ te laˇ ve hkʼa peu˗eˬ htaꞈ ngaˬ hui maˇ te ve kʼo, awˬ pa yaˇ htaꞈ haꞈ ve hkʼe Yaˬhoˉvaˬ ngaˬ hui htaꞈ haꞈ tuˬ yoˬ.

22-25. Ngaˬ hui maˇ daꞈ kehˬ ve te hkʼaˇ htaꞈ maˇ te tuˬ, Liꞈ hpu hkʼaw aˬ htoꞈ ma ve awˬ liˇ awˬ hkʼaˇ ga laˇ ve le?

²² “Nawˬ ve nyi ma hkʼa peu˗eˬ, nawˬ ve co ha hkʼa peu˗eˬ leh nawˬ ve dawˇ hkʼaˇ hkʼa peu˗eˬ nawˬ ve Jawˇmawˇ Gʼuiˬ sha htaꞈ gʼa haꞈ ve yoˬ.” (Maꞈhtehˍ 22:37)  Awˬ liˇ tawˇ hkawˇ chi ve a yeˇ uiˍ jaˇ. (Maꞈhtehˍ 22:38) Ngaˬ hui Yaˬhoˉvaˬ htaꞈ haꞈ cawˇ ve yoˬ. A shaꞈ ngeh tuˬ leh uˉ nawꞈ nehˆ luˬ tuˬ te laˇ ve awˬ ceuˬ htaꞈ leuˆ te ve kʼo, hkʼaˬ hkʼe te Yaˬhoˉvaˬ htaꞈ hkʼa dehꞈ haꞈ gʼa tuˬ le? Chi htaꞈ pa taw, ngaˬ hui yawˇ peꞈ laˇ ve a shaꞈ htaꞈ taˍ uiˍ ve tehꞈ hpeuꞈ maw piˇ tuˬ, te gʼa ve hkʼe teˇ ceuˬ le le te ve yoˬ.

²³ “[Yaˬhoˉvaˬ] lehˬ chaw hkʼa peu˗eˬ htaꞈ a shaꞈ teꞈ piˇ leh teˇ ceuˬ le le piˇ ve yoˬ.” (Tcuh yaˇ 17:24, 25) Nawˬ ve awˬ chawˇ awˬ hpfuhˇ hkʼaˆ jaˇ ve laꞈ shawnˍ peꞈ laˇ ve kʼo, nawˬ gʼawˆ baˬ leh te luˬ tuˬ laˇ? A shaꞈ lehˬ Yaˬhoˉvaˬ peꞈ laˇ ve awˬ hpfuhˇ hkʼaˆ jaˇ ve laꞈ shawnˍ hpehꞈ ve yoˬ. Laꞈ shawnˍ chi gʼa ve ngaˬ hui ha lehˬ jaˇ. Chi htaꞈ pa taw, Gʼuiˬ sha awˬ meꞈ awˬ hponˇ gʼa tuˬ, ngaˬ hui a shaꞈ teꞈ chehˇ gaˇ ve yoˬ.—Chiˇ mvuh ve 36:9.

²⁴ “Nawˬ awˬ to htaꞈ haꞈ ve hkʼe, nawˬ awˬ paˇ awˬ kui chehˇ ve chaw htaꞈ gʼa haꞈ ve yoˬ.” (Maꞈhtehˍ 22:39) Maˇ daꞈ kehˬ ve te hkʼaˇ a shu yawˇ awˬ to htaꞈ te luˬ ve ceh tiˉ maˇ heˆ. Awˬ paˇ awˬ kui chehˇ ve chaw htaꞈ kaꞈ te luˬ ve yoˬ. Yawˇ hui ngaˬ hui haꞈ jaˇ ve chaw hpehꞈ ve yoˬ. Tawˇ pa haˉ te kʼo, yehˬ hkʼaw chaw teˇ gʼaˇ shuˉ dawˬ ve kʼo, mvuhˇ hkawˇ shuˉ gʼa gʼawˬ keu ve pa taw, yehˬ hkʼaw ve chaw maˇ chehˇ sha puiˉ ve yoˬ. Yaꞈ hkʼaˇ, maˇ daꞈ kehˬ ve te hkʼaˇ htaꞈ ngaˬ hui maˇ te ve kʼo, ngaˬ hui awˬ paˇ awˬ kui chehˇ ve chaw htaꞈ haꞈ ve tehꞈ hpeuꞈ maw piˇ chehˇ ve yoˬ.—1 Yoˇhanˬ 4:20, 21.

²⁵ “Yawˇ hui lehˬ jawˇ mawˇ leh uˉ peunˍ shehˍ hpaˇ teˇ hpaˍ awˬ hawˉ lo chehˇ leh yawˇ hui ve hkawˇ htaꞈ na yuˬ tuˬ maˇ kʼoˆ, daꞈ ve kanˉ teˇ ceuˬ le le htaꞈ te tuˬ awˬ pon gu taˍ hehnˇ taˍ tuˬ maˇ kʼoˆ, yawˇ hui htaꞈ hkʼa dehꞈ dawˇ nawˇ piˇ˗oˆ.” (Tiˇtuˆ 3:1) Laiˉ mvuhˇ miˬ lo naˆ tsuhˇ teˇ ceuˬ ceuˬ htaꞈ gʼawˆ teh leh yehˇ ve kʼo, mvuhˇ miˬ ve awˬ liˇ htaꞈ yaꞈ ve yoˬ. Mvuhˇ miˬ uˉ peunˍ paˍ ve kanˇ paˆ htaꞈ yawˆ yan˗o tehꞈ Yaˬhoˉvaˬ kʼoˆ laˇ ve pa taw, ngaˬ hui mvuhˇ miˬ ve awˬ liˇ htaꞈ ngaˬ hui na yuˬ ve yoˬ.—Roˉmaꞈ 13:1.

26. (a) Ngaˬ hui oˉ kʼoˍ pui ve htaꞈ Yaˬhoˉvaˬ haꞈ yuˬ laˇ tuˬ, hkʼaˬ hkʼe gʼa te ve le? (b) Gʼuiˬ sha mehˆ gʼuˇ suhˍ kehˬ lehˍ cawˬ ve kʼo, aˬ htoꞈ ma te a shaꞈ teꞈ kuiˬ daꞈ jaˇ ve le?

 ²⁶ Ngaˬ hui Yaˬhoˉvaˬ htaꞈ awˬ chawˇ te gaˇ ve kʼo, teˇ ceuˬ ceuˬ gʼa pa ve tehꞈ ngaˬ hui shiˍ ve yoˬ hehˉ. Oˇ hkʼe kʼo, laꞈ haˉ te cawˇ ve yoˬ. Maˇ daꞈ kehˬ ve te hkʼaˇ htaꞈ pa tuˬ maˇ sha ve htawˇ, pa gʼa ve yoˬ! Yaˬhoˉvaˬ ga laˇ tuˬ yoˬ tehꞈ yawˇ ka tiꞈ te laˇ ve yoˬ. Yawˇ kʼoˆ ve, “ngaˬ [Yaˬhoˉvaˬ] lehˬ nawˬ hui ve Gʼuiˬ sha hpehꞈ leh nawˬ hui daꞈ la tuˬ maˍ laˇ shehˍ hpaˇ leh nawˬ hui kʼai cawˇ ve yaꞈ kʼaw htaꞈ beˆ maˍ laˇ shehˍ hpaˇ hpehꞈ ve yoˬ.” (Iˉsaˍyaˆ 48:17) Ngaˬ hui coˇ caˇ leh hkʼaˬ htaˆ kaꞈ kehˬ lehˍ cawˬ ve kʼo, Gʼuiˬ sha awˬ meꞈ awˬ hponˇ gʼa tuˬ yoˬ tehꞈ ngaˬ hui hkʼa dehꞈ yonˍ gʼa ve yoˬ.