Yaˬhoˉvaˬ a Gʼuiˬ sha lehˬ, yehˬ kʼa awˬ hkuiˉ puiˍ tanˬ shehˍ hpaˇ hpehꞈ ve yoˬ. Liꞈ hpu awˬ hkʼaw lo kʼoˆ ve, Yawˇ yaˇ miˇ htaꞈ te hpanˍ peuˬ hkʼawꞈ nawˉ, “yaˇ miˇ chi ve htaꞈ hawˉ hkʼaˆ geh lo shiˍ laˬ ve yoˬ.” Aˍdanˍ ha lehˬ jaˇ leh kʼoˆ ve, “Chi lehˬ ngaˬ ve awˬ muꞈ ku teˇ hpaˍ awˬ hkʼaw lo ve awˬ muꞈ ku, ngaˬ ve awˬ shaˍ awˬ hkʼaw lo ve awˬ shaˍ” hpehꞈ ve yoˬ. (Awˬ hkuiˉ puiˍ 2:22, 23) Chi beuꞈ htawˇ, Yaˬhoˉvaˬ Gʼuiˬ sha lehˬ yehˬ kʼa hkʼaw ha lehˬ dawˇ sha tcuh gaˇ ve yoˬ.

Nawˬ hkehˉ caˇ ve teˇ nyi htaˇ, ha lehˬ dawˇ sha ve awˬ ceuˬ cheh tiˉ cawˬ tuˬ yoˬ tehꞈ dawˇ ve yoˬ. Yaꞈ hkʼaˇ, awˬ tehˬ hpehꞈ chehˇ ve htaꞈ nyi kʼo, awˬ hpawˇ awˬ miˇ ma hkʼaˬ ma haꞈ daꞈ jaˇ ve htawˇ, maˇ cawˇ maˇ hawˍ daꞈ ve awˬ ceuˬ cawˬ la puiˉ ve yoˬ. (1 Kawˇrenˍhtuˆ 7:28) Liꞈ chi teˇ kʼoˆ hkʼaw, Liꞈ hpu htaꞈ cuˇ leh beˆ maˍ laˇ hkawˇ htaꞈ nawˬ gʼaꞈ te ve kʼo, nawˬ ve yehˬ kʼa ha lehˬ dawˇ sha tuˬ yoˬ. (Chiˇ mvuh ve 19:8-11)

LIꞈ HPU HKʼAW KʼOˆ VE, “Awˬ hpawˇ lehˬ yehˬ kʼa htaꞈ sheh kʼai shehˍ hpaˇ hpehꞈ ve yoˬ.” (Eˇfeˇsuꞈ 5:23)

Nawˬ awˬ hpawˇ hpehꞈ ve kʼo, nawˬ miˇ ma htaꞈ a yeˇ yuˬ piˇ leh naˬ taweh maˇ te tuˬ Yaˬhoˉvaˬ Gʼuiˬ sha heuˆ gaˇ ve yoˬ. (1 Peˍtruˆ 3:7) Yaˇ miˇ lehˬ, hawˉ hkʼaˆ awˬ pon keunˍ daꞈ ve awˬ chawˇ hpehꞈ tuˬ te hpanˍ laˇ ve yoˬ. Hkʼe te leh nawˬ ve awˬ miˇ ma htaꞈ haꞈ leh yawˆ yan piˇ tuˬ, Gʼuiˬ sha heuˆ gaˇ ve yoˬ. (Awˬ hkuiˉ puiˍ 2:18) Nawˬ awˬ to htaꞈ haꞈ ve aꞈ kehˉ nawˬ ve awˬ miˇ ma htaꞈ haꞈ leh yawˇ ha lehˬ dawˇ sha ve ceh tiˉ cawˬ hpehꞈ tuˬ te piˇ˗oˆ. (Eˇfeˇsuꞈ 5:25-29)

Nawˬ awˬ miˇ ma hpehꞈ ve kʼo,Yaˬhoˉvaˬ lehˬ nawˬ awˬ hpawˇ htaꞈ yawˆ yan piˇ leh yehˬ kʼa htaꞈ gʼa ga nyi haꞈ shaˉ tcuh gaˇ ve yoˬ. (1 Kawˇrenˍhtuˆ 11:3; Eˇfeˇsuꞈ 5:33) Awˬ hpawˇ dawˇ cheˆ ve awˬ ceuˬ htaꞈ haꞈ yuˬ leh ha lehˬ ha kʼa gʼa gʼaꞈ te cawˇ ve yoˬ. (Kawˇlawˇsehˇ 3:18) Nawˬ oˇ hkʼe te ve kʼo, nawˬ ve awˬ hpawˇ leh Yaˬhoˉvaˬ Gʼuiˬ sha mehˆ gʼuˇ suhˍ awˬ hpfuhˇ hkʼaˆ jaˇ ve awˬ miˇ ma hpehꞈ ve yoˬ. (1 Peˍtruˆ 3:1-6)

NAWˬ TE GʼA VE AWˬ CEUˬ

• Daꞈ ve awˬ hpawˇ awˬ miˇ ma hkʼaˬ hkʼe te leh hpehꞈ gʼa tuˬ le tehꞈ teˇ gʼaˇ leh teˇ gʼaˇ gʼa na nyi daꞈ leh, yehˬ kʼa hkʼaw uiˍ la daꞈ la tuˬ te gʼa ve hkʼe te cawˇ ve yoˬ

• Yeunˇ hkanˍ daꞈ˗oꞈ. Awˬ lawn kʼo, teˇ gʼaˇ leh teˇ gʼaˇ ha lehˬ ve awˬ hkʼaˇ shiˍ la tuˬ awˬ yanˇ gʼa yehˇ ve yoˬ

LIꞈ HPU HKʼAW KʼOˆ VE, nawˬ hui teˇ gʼaˇ leh teˇ gʼaˇ awˬ pon awˬ bon cawˬ tuˬ gʼa dawˇ nyi ve yoˬ. (Hpiˇliˇpiˆ 2:3, 4) A shu yawˇ ve awˬ hpawˇ awˬ miˇ ma htaꞈ awˬ hpfuhˇ hkʼaˆ jaˇ ve mawˇ tehꞈ shawˍ leh gʼa haꞈ shaˉ ve yoˬ. Yaˬhoˉvaˬ Gʼuiˬ sha lehˬ, ngaˬ hui teˇ gʼaˇ le le htaꞈ “nyi ma nuˇ nehˬ” cawˬ tcuh gaˇ ve yoˬ. (2 Tiˆmoˉseˍ 2:24) “Maˇ dawˇ nyi leh yaw ve tawˇ teˇ hpaˍ lehˬ, aˉ htaw hkʼa shuˍ shu htaꞈ naˬ piˇ lawˬ gʼa ve yoˬ. Yaꞈ hkʼaˇ, cuˇ yiˍ cawˬ ve awˬ hkʼaw lo yaw ve tawˇ lehˬ, shu htaꞈ kʼawꞈ na˗e la piˇ gʼa ve yoˬ.” Chi htaꞈ pa taw, tawˇ maˇ yaw sheˍ htaˇ, hkʼa dehꞈ gʼa dawˇ nyi ve yoˬ. (Tawˇ naˉ ve 12:18) Gʼuiˬ sha ve daꞈ kehˬ ve awˬ ha hpu htaꞈ pa taw, ha kʼaˉ puiˉ ve leh haꞈ pehnˇ ve awˬ hkʼaw lo tawˇ yaw daꞈ gʼa hpehꞈ tuˬ ga laˇ ve yoˬ. (Gaˍlaˍtiˆ 5:22, 23; Kawˇlawˇsehˇ 4:6)

NAWˬ TE GʼA VE AWˬ CEUˬ

• Maˇ cawˇ maˇ hawˍ daꞈ ve awˬ lawn kʼoˆ daꞈ htaˇ, teˇ gʼaˇ kʼoˆ ve htaꞈ na leh nyi ma gawˬ lehˍ cawˬ tuˬ Yaˬhoˉvaˬ geh bon gʼa lawˬ ve yoˬ

• Aˬ htoꞈ ma yaw tuˬ hkʼaˬ hkʼe kʼoˆ tuˬ hkʼa dehꞈ dawˇ nyi sheˍ

LIꞈ HPU HKʼAW KʼOˆ VE, heuˆ daꞈ peuˬ kʼo, nawˬ huiˉ maˬ “teˇ suhˍ teˇ shaˍ tiˉ hpehꞈ” ve yoˬ. (Maꞈhtehˍ 19:5) Yaꞈ hkʼaˇ, nawˬ huiˉ maˬ nyiˇ gʼaˇ hpehꞈ chehˇ sheˍ, awˬ lawn teˇ lawn lawn kʼo dawˇ hkʼaˇ peun daꞈ kuiˬ cawˬ ve yoˬ. Chi htaꞈ pa taw, teˇ gʼaˇ leh teˇ gʼaˇ ve dawˇ hkʼaˇ hawˍ daꞈ leh na gʼa daꞈ tuˬ gʼa henˇ shiˍ daꞈ ve yoˬ. (Hpiˇliˇpiˆ 2:2) Aˬ htoꞈ ma awˬ lawn teˇ ceuˬ htaꞈ dawˇ cheˆ ve teˇ yanˇ, cawˇ daꞈ hawˍ daꞈ tuˬ awˉ lawˉ gʼa jehˬ daꞈ ve yoˬ. Liꞈ hpu hkʼaw kʼoˆ ve, “Daꞈ ve dawˇ hkʼaˇ htaꞈ ca˗o. Nawˬ uiˍ la daꞈ la tuˬ yoˬ.” (Tawˇ naˉ ve 20:18) Awˬ hpawˇ awˬ miˇ ma a shaꞈ teꞈ kuiˬ a yeˇ uiˍ ve awˬ lawn htaꞈ dawˇ cheˆ ve teˇ yanˇ, Liꞈ hpu hkʼaw ve awˬ liˇ awˬ hkʼaˇ htaꞈ yuˬ yehˇ sheˍ. (Tawˇ naˉ ve 8:32, 33)

NAWˬ TE GʼA VE AWˬ CEUˬ

• Nawˬ hkʼaˬ hkʼe dawˇ ve kʼaoˍ maˍ piˇ˗o, kʼoˆ piˇ ve ceh tiˉ maˇ heˆ

• Teˇ ceuˬ ceuˬ te tuˬ maˇ dawˇ cheˆ sheˍ htaˇ, awˉ lawˉ gʼa jehˬ daꞈ ve yoˬ