Yaˬhoˉvaˬ Gʼuiˬ sha yehˬ kʼa awˬ hkuiˉ puiˍ tanˬ htaˇ, a shu yawˇ ve yaˇ htaꞈ nyi haꞈ shaˉ tcuh gaˇ ve yoˬ. (Kawˇlawˇsehˇ 3:20) Yaˇ Yaˬhoˉvaˬ Gʼuiˬ sha htaꞈ haꞈ tuˬ maˍ piˇ leh yawˇ uiˍ la kʼo daꞈ ve chaw hpehꞈ la tuˬ, awˬ pa awˬ e ve awˬ vuiˬ hpehꞈ ve yoˬ. (2 Tiˆmoˉseˍ 1:5; 3:15) Nawˬ ve yaˇ paˍ yaˇ miˇ ve dawˇ hkʼaˇ teˇ hpaˍ htaꞈ gʼa shiˍ ve yoˬ. Yaꞈ hkʼaˇ, nawˬ ve te hkʼaˇ teˇ hpaˍ htawˇ a yeˇ uiˍ ve yoˬ. Yaˬhoˉvaˬ Gʼuiˬ sha maˍ laˇ ve tawˇ hkawˇ teˇ hpaˍ htaꞈ nawˬ ve nyi ma hkʼaw lo haꞈ shaˉ taˍ ve kʼo, nawˬ ve yaˇ htaꞈ daꞈ jaˇ ve Gʼuiˬ sha ve tawˇ hkawˇ maˍ piˇ gʼa tuˬ yoˬ. (Chiˇ mvuh ve 40:8)

LIꞈ HPU HKʼAW KʼOˆ VE, “Shu tawˇ yaw ve htaꞈ hkʼa dehꞈ na sheˍ. Tawˇ haˆ haˆ taˇ yaw. Nyi ma haˆ haˆ taˇ zuhˆ.” (Yaˍkoˆ 1:19) Yaˇ nyi ma sha ve awˬ hkʼaw lo nawˬ htaꞈ tawˇ yaw maˍ laˇ tcuh gaˇ ve kʼo, nawˬ yawˇ yaw maˍ laˇ tuˬ ve awˬ lawn htaꞈ awˬ tehˬ awˬ na na gaˇ ve yoˬ tehꞈ, gʼa hpeuꞈ maw piˇ ve yoˬ. Nawˬ oˇ hkʼe te ve kʼo, yawˇ nawˬ htaꞈ tawˇ yaw maˍ laˇ gaˇ tuˬ yoˬ. (Yaˍkoˆ 3:18) Nawˬ tzuhˇ juˆ te laˇ leh deˇ laˇ tuˬ yoˬ tehꞈ dawˇ ve kʼo, yawˇ nawˬ htaꞈ maˇ kʼoˆ maˍ laˇ gaˇ tuˬ yoˬ. Nawˬ yaˇ htaꞈ gʼa yeunˇ hkanˍ piˇ leh nawˬ yawˇ htaꞈ haꞈ ve yoˬ tehꞈ gʼa te maˍ piˇ ve yoˬ. (Maꞈhtehˍ 3:17; 1 Kawˇrenˍhtuˆ 8:1)

NAWˬ TE GʼA VE AWˬ CEUˬ

• Yaˇ nawˬ geh tawˇ yaw daꞈ gaˇ ve kʼo, nawˬ awˬ yanˇ gʼa piˇ ve yoˬ

• Nawˬ yaˇ geh hkʼaˬ htaˆ kaꞈ tawˇ yaw daꞈ cawˇ ve yoˬ. Yaˇ dawˇ haˍ htaˇ ceh tiˉ yaw ve maˇ heˆ

LIꞈ HPU HKʼAW KʼOˆ VE, “Shu maˍ laˇ ve tawˇ htaꞈ hkʼa dehꞈ na yuˬ˗oꞈ. Nawˬ uiˍ la daꞈ la tuˬ yoˬ.” (Tawˇ naˉ ve 16:20) Teˇ pawˆ pawˆ kʼo, nawˬ ve yaˇ kʼoˆ maˍ laˇ gaˇ ve tcuhˉ kuiˬ htaꞈ gʼa na gʼa piˇ ve yoˬ. Yawˇ yaw tawˆ la ve tawˇ hkawˇ lehˬ, awˬ tehˬ kʼo oˇ hkʼe kʼoˆ gaˇ ve maˇ heˆ. Liꞈ hpu hkʼaw kʼoˆ ve, “Nawˬ maˇ yaw hkʼawꞈ piˇ sheˍ htaˇ hkʼa dehꞈ na sheˍ.” (Tawˇ naˉ ve 18:13) Nyi ma haˆ haˆ taˇ zuhˆ. (Tawˇ naˉ ve 19:11)

NAWˬ TE GʼA VE AWˬ CEUˬ

• Nawˬ yaˇ aˬ htoꞈ ma kʼoˆ maˍ laˇ ve htawˇ nawˬ yawˇ htaꞈ taˇ deˇ piˇ

• Nawˬ a shaꞈ yawˇ hui hkʼe leˇ htaˇ nawˬ ve dawˇ hkʼaˇ leh nawˬ heuˆ gaˇ ve awˬ ceuˬ a yeˇ hkʼaˬ ma uiˍ ve htaꞈ coˇ caˇ leh dawˇ nyi sheˍ

LIꞈ HPU HKʼAW KʼOˆ VE, “Yaˇ paˍ˗oˬ, nawˬ pa nawˬ e kʼoˆ maˍ laˇ ve tawˇ teˇ hpaˍ htaꞈ hkʼa dehꞈ na yuˬ˗oꞈ.” (Tawˇ naˉ ve 1:8) Yaˇ nawˬ ve tawˇ hkawˇ htaꞈ na yuˬ leh nawˬ htaꞈ yawˆ yan laˇ tuˬ maˍ piˇ cawˇ ve yoˬ. Awˬ lawn kʼo, yaˇ htaꞈ maˍ tuˬ Yaˬhoˉvaˬ Gʼuiˬ sha awˬ pa awˬ e htaꞈ awˬ vuiˬ piˇ taˍ ve yoˬ. (Eˇfeˇsuꞈ 6:1-3) Awˬ pa awˬ e “nyi ma teˇ shiˍ tiˉ te leh, dawˇ hkʼaˇ teˇ hkʼa tiˉ” maˇ cawˬ ve kʼo yaˇ nyi shiˍ ve yoˬ. (1 Kawˇrenˍhtuˆ 1:10) Awˬ pa awˬ e dawˇ hkʼaˇ maˇ shuˍ daꞈ ve teˇ yanˇ, yaˇ mehˆ gʼuˇ suhˍ lo tawˇ taˇ gʼawˬ daꞈ. Awˬ lawn kʼo, yaˇ nawˬ hui htaꞈ maˇ yawˆ yan la ve yoˬ.

NAWˬ TE GʼA VE AWˬ CEUˬ

• Nawˬ hui ve yaˇ htaꞈ hkʼaˬ hkʼe te maˍ tuˬ ve awˬ hkʼaˇ jehˬ daꞈ cawˇ ve yoˬ

• Nawˬ nyiˇ gʼaˇ yaˇ htaꞈ maˍ tuˬ awˬ hkʼaˇ maˇ shuˍ daꞈ ve kʼo, aˬ htoꞈ ma pa taw nawˬ awˬ ceh oˇ hkʼe dawˇ ve le tehꞈ, coˇ caˇ leh dawˇ nyi cawˇ ve yoˬ

LIꞈ HPU HKʼAW KʼOˆ VE, “Yaˇ ehˉ teˇ gʼaˇ hkʼaˬ hkʼe a shaꞈ teꞈ cawˇ ve awˬ hkʼaˇ beˆ maˍ piˇ˗oˆ.” (Tawˇ naˉ ve 22:6) Nawˬ hui yaˇ htaꞈ maˍ ve daꞈ ve awˬ hkʼaˇ shiˍ tuˬ, nawˬ hui hkʼaˇ nawˬ hui shiˍ la maˇ gʼa. Yaꞈ hkʼaˇ, awˬ pa awˬ e yaˇ htaꞈ hkʼaˬ hkʼe te maˍ piˇ tuˬ ve awˬ hkʼaˇ gʼa gu ve yoˬ. (Chiˇ mvuh ve 127:4; Tawˇ naˉ ve 29:17) Yaˇ htaꞈ maˍ ve lehˬ dawˆ ve ceh tiˉ maˇ heˆ. Yaˬ hkʼaˇ, aˬ htoꞈ ma pa taw yehˬ kʼa awˬ hkʼaw lo awˬ liˇ awˬ hkʼaˇ teh ve tcuhˉ kuiˬ gʼa kʼoˆ maˍ piˇ ve yoˬ. (Tawˇ naˉ ve 28:7) Chi hkʼoˆ kaꞈ, Yaˬhoˉvaˬ Gʼuiˬ sha ve awˬ liˇ tawˇ hkawˇ htaꞈ haꞈ leh tcuhˉ kuiˬ htaꞈ shiˍ tuˬ gʼa maˍ piˇ ve yoˬ. (Chiˇ mvuh ve 1:2) Chi hkʼe te ve kʼo, yaˇ lehˬ daꞈ ve maˇ daꞈ ve htaꞈ dawˇ shiˍ puiˉ la tuˬ yoˬ. (Heˍbrehˇ 5:14)

NAWˬ TE GʼA VE AWˬ CEUˬ

• Nawˬ ve yaˇ Gʼuiˬ sha htaꞈ gʼaˇ va tuˬ, Gʼuiˬ sha awˬ tehˬ cawˬ ve yoˬ tehꞈ yaˇ yonˍ gʼa tuˬ ga piˇ cawˇ ve yoˬ

• En teu nehꞈ leh awn lai hkʼaw nyi ma htaꞈ chaꞈ chiˆ gʼa ve awˬ ceuˬ htaꞈ fuiˍ daꞈ pehˬ daꞈ gʼa leh jaw kʼai gʼa tuˬ yaˇ htaꞈ gʼa ga piˇ ve yoˬ. Pehꞈ hkʼaˇ zuhˆ hkʼaˇ hkʼaw maˇ loꞈ˗e tuˬ kaꞈ gʼa maˍ ve yoˬ