Heuˆ daꞈ ve teˇ ceuˬ lehˬ, yehˬ kʼa awˬ suhˉ tanˬ ve yoˬ. Nawˬ hui ve awˬ pa awˬ e htaꞈ haꞈ leh hkʼaˬ ma yawˆ yan ve htawˇ maˇ kʼoˆ, miˇ guiˬ hkʼoˆ lo nawˬ awˬ pon a yeˇ uiˍ jaˇ ve chaw teˇ gʼaˇ lehˬ, nawˬ ve awˬ ceh hpehꞈ ve yoˬ. Chi lehˬ nawˬ huiˉ maˬ ve awˬ pa awˬ e leh awˬ viˉ awˬ nyi teˇ gʼaˇ gʼaˇ maˇ dawˇ cawˇ tuˬ yoˬ. Yaꞈ hkʼaˇ, Gʼuiˬ sha ve awˬ liˇ tawˇ hkawˇ Liꞈ hpu hkʼaw cawˬ ve teˇ hpaˍ nawˬ huiˉ maˬ ve awˬ pa awˬ e leh awˬ viˉ awˬ nyi htaꞈ cawˇ daꞈ hawˍ daꞈ gʼa leh nawˬ ve yehˬ kʼa awˬ suhˉ htaꞈ kaꞈ meuˆ daꞈ gʼa tuˬ ga laˇ gʼa ve yoˬ.

LIꞈ HPU HKʼAW KʼOˆ VE, “nawˬ ve awˬ pa awˬ e htaꞈ yawˆ yawˆ yan yan te˗o.” (Eˇfeˇsuꞈ 6:2) Nawˬ a shaꞈ hkʼaˬ ma gaˬ ve htawˇ maˇ kʼoˆ, a shu yawˇ ve awˬ pa awˬ e htaꞈ gʼa yawˆ yan piˇ ve yoˬ. Yaꞈ hkʼaˇ, nawˬ ve awˬ hpawˇ awˬ miˇ ma htawˇ a shu yawˇ ve awˬ pa awˬ e htaꞈ gʼa nyi haꞈ shaˉ cawˇ ve htaꞈ taˇ leunˇ piˇ. Liꞈ hpu awˬ hkʼaw lo kʼoˆ ve, “Haꞈ pehnˇ ve lehˬ maˇ hkawehˉ puiˉ”. Chi htaꞈ pa taw, nawˬ ve awˬ ceh yawˇ ve awˬ pa awˬ e htaꞈ nyi haꞈ shaˉ piˇ tuˬ awˬ yanˇ yehˇ ve kʼo nawˬ nyi ma taˇ i. (1 Kawˇrenˍhtuˆ 13:4; Gaˍlaˍtiˆ 5:26)

NAWˬ TE GʼA VE AWˬ CEUˬ

• Tawˇ chi hkʼe ve htaꞈ jaw kʼai cawˇ ve yoˬ. “Nawˬ pa nawˬ e hkʼaˬ htaˆ kaꞈ ngaˬ htaꞈ tiˉ taˍ nehˬ laˇ ve yoˬ.” Maˇ hehˆ kʼo, “Ngaˬ aˬ htoꞈ ma teˇ ceuˬ te kʼo kaꞈ yawˇ hui maˇ dawˇ cawˇ jaw”

• Coˇ caˇ leh nawˬ ve awˬ ceh dawˇ ve hkʼe dawˇ nyi piˇ cawˇ ve yoˬ

LIꞈ HPU HKʼAW KʼOˆ VE, “Hawˉ hkʼaˆ lehˬ yawˇ ve awˬ pa awˬ e htaꞈ hpaˆ daꞈ taˉ leh, yawˇ ve awˬ miˇ ma htaꞈ caˉ daꞈ ve awˬ hkʼaw lo yawˇ huiˉ maˬ teˇ suhˍ teˇ shaˍ tiˉ hpehꞈ la tuˬ yoˬ.” (Awˬ hkuiˉ puiˍ 2:24) Nawˬ yehˬ kʼa cawˬ kʼai˗o htawˇ, nawˬ huiˉ maˬ ve awˬ pa awˬ e lehˬ, nawˬ hui htaꞈ dawˇ haˍ leh ga laˇ chehˇ ve yoˬ. Leh yawˇ hui dawˇ ve nawˬ ve yehˬ kʼa awˬ hkʼaw lo hpehꞈ chehˇ ve awˬ lawn htaꞈ shiˍ ve kʼo, ga laˇ gʼa ve yoˬ tehꞈ dawˇ ve yoˬ.

Nawˬ ve yehˬ kʼa hkʼaw ve awˬ lawn awˬ pa awˬ e htaꞈ hkʼaˬ hkʼe ma shiˍ tcuh piˇ tuˬ, nawˬ huiˉ maˬ gʼa jehˬ daꞈ leh yawˇ hui htaꞈ yawˆ yan ve awˬ hkʼaw lo tawˇ nuˇ lehˍ te kʼoˆ piˇ cawˇ ve yoˬ. (Tawˇ naˉ ve 15:1) Nyi ma nuˇ nuˇ nehˬ nehˬ ve leh yeunˇ hkanˍ puiˉ ve teˇ ceuˬ lehˬ, nawˬ huiˉ maˬ ve awˬ viˉ awˬ nyi htaꞈ cawˇ daꞈ hawˍ daꞈ gʼa leh “haꞈ pehnˇ ve awˬ hkʼaw lo teˇ gʼaˇ leh teˇ gʼaˇ yeunˇ hkanˍ daꞈ” gʼa ve yoˬ. (Eˇfeˇsuꞈ 4:2)

NAWˬ TE GʼA VE AWˬ CEUˬ

• Nawˬ ve yehˬ kʼa hkʼaw ve awˬ lawn nawˬ huiˉ maˬ ve awˬ viˉ awˬ nyi htaꞈ hkʼaˬ ma shiˍ tcuh tuˬ ve htaꞈ nawˬ dawˇ haˍ chehˇ ve kʼo, awˬ lawn chi ve nawˬ ve awˬ ceh geh tawˇ yaw daꞈ cawˇ ve yoˬ

• Nawˬ ve yehˬ kʼa leh nawˬ huiˉ maˬ ve awˬ viˉ awˬ nyi hui cawˇ daꞈ hawˍ daꞈ tuˬ nawˬ hui nyiˇ gʼaˇ jehˬ daꞈ cawˇ ve yoˬ