Yaˇ paw la ve teˇ nyi htaˇ, awˬ hpawˇ awˬ miˇ ma ha lehˬ jaˇ tuˬ yoˬ. Awˬ pa awˬ e awˬ suhˉ teˇ hpaˍ lehˬ, a shu yawˇ ve awˬ gʼaˇ awˬ shaˉ hkʼa peu˗eˬ, yaˇ htaꞈ nyi haꞈ shaˉ piˇ tuˬ dawˇ maˇ gaˬ tuˬ yoˬ. Awˬ pa awˬ e hkʼa dehꞈ maˇ gʼa zuhꞈ leh hpehꞈ bawˬ ve pa taw, nawˬ huiˉ maˬ meuˆ daꞈ ve kaꞈ i kʼai ve yoˬ. Nawˬ huiˉ maˬ te jaw ve awˬ ceuˬ htaꞈ gʼa pa leh, yaˇ htaꞈ nyi haꞈ shaˉ tuˬ gʼa ga daꞈ ve yoˬ. Yaꞈ hkʼaˇ, nawˬ ve awˬ ceh htaꞈ taˇ chiˇ baˬ piˇ, Liꞈ hpu hkʼaw cawˬ ve beˆ maˍ laˇ ve tawˇ hkawˇ teˇ hpaˍ nawˬ htaꞈ hkʼaˬ hkʼe te ga laˇ tuˬ le.

LIꞈ HPU HKʼAW KʼOˆ VE, “Haꞈ pehnˇ ve lehˬ, dawˇ zuhˬ gaˇ zuhˬ leh ha kʼaˉ puiˉ ve yoˬ.” Leh haꞈ pehnˇ ve lehˬ, “a shu yawˇ awˬ to awˬ pon maˇ ca puiˉ, nyi ma maˇ zuhˆ puiˉ” ve yoˬ. (1 Kawˇrenˍhtuˆ 13:4, 5) Awˬ e awˬ suhˉ hpehꞈ ve lehˬ, awˬ yaˇ htaꞈ ceh tiˉ a yeˇ yuˬ leh awˬ hpawˇ htaꞈ leunˇ kʼai ve yoˬ. Yaꞈ hkʼaˇ, nawˬ ve awˬ hpawˇ htawˇ a yeˇ yuˬ piˇ tuˬ loˍ ve yoˬ. Nawˬ yeunˇ hkanˍ leh haꞈ pehnˇ ve cawˬ kʼo, nawˬ awˬ pon yawˇ htawˇ a yeˇ uiˍ ve yoˬ tehꞈ shiˍ piˇ gʼa leh yawˇ lehˬ yaˇ htaꞈ gʼa ga nyi haꞈ shaˉ laˇ ve yoˬ.

“Chi hkʼa shuˍ shuˍ, awˬ hpawˇ teˇ hpaˍ˗oˬ, a shu yawˇ ve awˬ miˇ ma geh chehˇ ve awˬ hkʼaw lo, yawˇ awˬ pon dawˇ nyi puiˉ ve nyi ma cawˬ piˇ˗oˆ.” (1 Peˍtruˆ 3:7) Nawˬ ve awˬ miˇ ma lehˬ, awˬ gʼaˇ awˬ shaˉ hkʼa peu˗eˬ yaˇ htaꞈ nyi haꞈ shaˉ tuˬ yoˬ tehꞈ nawˬ gʼa shiˍ ve yoˬ. Nawˬ miˇ ma ve kanˉ chi lehˬ heuˬ jaˇ leh nyi ma maˇ sha la puiˉ ve yoˬ. Teˇ pawˆ pawˆ kʼo, yawˇ nawˬ htaꞈ deˇ laˇ tuˬ yoˬ. Yaꞈ hkʼaˇ, nawˬ lehˬ nyi ma gawˬ lehˍ te˗o. Awˬ lawn kʼo, “Nyi ma nehˬ lehˍ taˍ ve chaw lehˬ, awˬ gʼaˇ uiˍ ve chaw aꞈ kehˉ daꞈ leuˉ ve yoˬ.” (Tawˇ naˉ ve 16:32) Nawˬ yawˇ htaꞈ haꞈ kʼaˉ piˇ leh hkʼaˬ htaˆ kaꞈ ga piˇ cawˇ ve yoˬ. (Tawˇ naˉ ve 14:29)

NAWˬ TE GʼA VE AWˬ CEUˬ

• Nawˬ awˬ pa hpehꞈ ve kʼo, Tanˇ hkuinˇ sheˍ kʼaw hkui gaˬ ve htawˇ, nawˬ ve awˬ miˇ ma htaꞈ yaˇ gʼa ga nyi haꞈ shaˉ piˇ cawˇ ve yoˬ. Nawˬ ve miˇ yaˇ geh chehˇ ve awˬ yanˇ cawˬ maˇ la tuˬ awˬ nu ve kanˉ htaꞈ te i kʼai cawˇ ve yoˬ

• Nawˬ awˬ e hpehꞈ ve kʼo, nawˬ ve awˬ hpawˇ yaˇ gʼa ga nyi laˇ˗a tehꞈ kʼoˆ laˇ ve kʼo, gʼa ga tcuh loˬ. Yawˇ yaˇ htaꞈ nyi haꞈ shaˉ maˇ puiˉ ve kʼo, taˇ deˇ piˇ yawˇ htaꞈ a yehˉ yehˉ maˍ piˇ ve kʼo yawˇ te gʼa tuˬ yoˬ

LIꞈ HPU HKʼAW KʼOˆ VE, “yawˇ huiˉ maˬ teˇ suhˍ teˇ shaˍ tiˉ hpehꞈ la tuˬ yoˬ.” (Awˬ hkuiˉ puiˍ 2:24) Chi teˇ hkui nawˬ ve yehˬ kʼa awˬ hkʼaw lo chaw awˬ suhˉ teˇ gʼaˇ cawˬ la ve htawˇ awˬ hpawˇ awˬ miˇ ma lehˬ, “teˇ suhˍ teˇ shaˍ” hpehꞈ chehˇ sheˍ ve htaꞈ taˇ leunˇ piˇ. Chi htaꞈ pa taw, coˇ caˇ leh nawˬ huiˉ maˬ haꞈ daꞈ maˇ la tuˬ gʼa te ve yoˬ.

Awˬ miˇ ma lehˬ awˬ hpawˇ teˇ ceuˬ le le ga laˇ ve htaꞈ awˬ bon uiˍ jaˇ tehꞈ kʼoˆ piˇ cawˇ ve yoˬ. Yawˇ nawˬ htaꞈ haꞈ laˇ leh yawˇ te laˇ ve teˇ ceuˬ le le nawˬ awˬ pon awˬ hpfuhˇ hkʼaˆ ve awˬ ceuˬ hpehꞈ ve tehꞈ yaw piˇ ve kʼo, yawˇ awˬ pon “na˗e la piˇ gʼa ve yoˬ.” (Tawˇ naˉ ve 12:18) Awˬ hpawˇ lehˬ, awˬ miˇ ma htaꞈ awˬ hpfuhˇ hkʼaˆ leh hkʼa ma haꞈ lu diˬ ve kʼoˆ maˍ piˇ leh, yawˇ yehˬ kʼa htaꞈ hkʼa dehꞈ nyi haꞈ shaˉ ve htaꞈ chiˇ mvuh piˇ cawˇ ve yoˬ. (Tawˇ naˉ ve 31:10, 28)

“Hkʼaˬ ve teˇ gʼaˇ maˇ kʼoˆ, a shu yawˇ awˬ to awˬ pon gʼa tuˬ taˇ ca. Yaꞈ hkʼaˇ, shu awˬ pon gʼa tuˬ ca˗o.” (1 Kawˇrenˍhtuˆ 10:24) Nawˬ ve awˬ ceh htaꞈ ha lehˬ dawˇ sha piˇ tuˬ, nawˬ huiˉ maˬ coˇ caˇ leh teˇ geh chehˇ tuˬ ve awˬ yanˇ, tawˇ yaw daꞈ ve, chiˇ muvh piˇ ve, teˇ gʼaˇ leh teˇ gʼaˇ htaꞈ na nyi daꞈ ve awˬ yanˇ cawˬ tcuh cawˇ ve yoˬ. A shu yawˇ awˬ to loˍ ve htaꞈ ceh tiˉ taˇ dawˇ nyi, nawˬ ve awˬ ceh loˍ ve htaꞈ kaꞈ gʼa dawˇ nyi piˇ ve yoˬ. Liꞈ hpu hkʼaw kʼoˆ ve, “Awˬ hpawˇ awˬ miˇ teˇ geh zuhꞈ tuˬ, teˇ gʼaˇ leh teˇ gʼaˇ taˇ tawˍ taˍ.” (1 Kawˇrenˍhtuˆ 7:3-5) Awˬ lawn chi ve htaꞈ nawˬ hui nyiˇ gʼaˇ nyi ma hpaw leh hteˇ lehˍ kʼoˆ daꞈ cawˇ ve yoˬ. Nawˬ hui yeunˇ hkanˍ daꞈ leh na gʼa daꞈ ve kʼo, nawˬ nyiˇ gʼaˇ hkʼaˬ htaˆ kaꞈ haꞈ daꞈ chehˇ tuˬ yoˬ.

NAWˬ TE GʼA VE AWˬ CEUˬ

• Nawˬ nyiˇ gʼaˇ tiˉ teˇ geh chehˇ ve awˬ yanˇ cawˬ tuˬ taˇ leunˇ piˇ

• Awˬ hpawˇ awˬ miˇ ma htaꞈ haꞈ ve yoˬ tehꞈ shiˍ tcuh piˇ cawˇ ve yoˬ. Tawˇ pa haˉ te kʼo, liꞈ bvuhꞈ piˇ ve maˇ heˆ kʼo, laꞈ shawnˍ teˇ ceuˬ ceuˬ piˇ hpehꞈ ve yoˬ

LIꞈ HPU HKʼAW KʼOˆ VE, “yaˇ ehˉ hpehꞈ htaˇ kaꞈ daꞈ ve kehˬ ve Liꞈ hpu htaꞈ htawˇ nawˬ shiˍ taˍ ve yoˬ. Liꞈ hpu oˇ ve lehˬ, Yeˍsuˆ Hkriꞈ htaꞈ yonˍ ve awˬ hkʼaw lo nawˬ htaiˍ hkʼawꞈ ve htaꞈ gʼa tuˬ cuˇ yiˍ peꞈ laˇ hpehꞈ ve yoˬ.” (2 Tiˆmoˉseˍ 3:15) Nawˬ ve yaˇ htaꞈ hkʼaˬ hkʼe te maˍ piˇ tuˬ gʼa dawˇ nyi ve yoˬ. Awˬ lawn kʼo, yaˇ ehˉ lehˬ laiˉ ceuˬ htaꞈ henˇ shiˍ gʼa ve yoˬ. Yaˇ gʼoˇ peˬ hkʼaw chehˇ htaˇ kaꞈ yawˇ nawˬ ve awˬ hkawˇ htaꞈ tawnˇ gʼa leh nawˬ hkʼaˬ hkʼe dawˇ ve htaꞈ kaꞈ shiˍ ve yoˬ. Yaˇ maˇ na gʼa ve htawˇ, yaˇ ehˉ htaˇ kaꞈ liꞈ gʼaw maˍ piˇ ve kʼo, yawˇ uiˍ la htaˇ liꞈ gʼaw gaˇ puiˉ tuˬ yoˬ.

Yaˇ ehˉ htaˇ kaꞈ Gʼuiˬ sha ve awˬ lawn kʼoˆ maˍ piˇ leh, yaˇ htaꞈ Yaˬhoˉvaˬ Gʼuiˬ sha geh bon lawˬ maˍ piˇ˗oˆ. (Bon maˍ ve 11:19) Yaˇ geh leˍ guiˇ htaˇ kaꞈ Gʼuiˬ sha ve awˬ lawn kʼoˆ maˍ piˇ gʼa ve yoˬ. (Chiˇ mvuh ve 78:3, 4) Yaˇ uiˍ la kʼo, Yaˬhoˉvaˬ Gʼuiˬ sha yawˇ htaꞈ haꞈ ve shiˍ la leh, Gʼuiˬ sha htaꞈ haꞈ tuˬ henˇ gʼa ve yoˬ.

NAWˬ TE GʼA VE AWˬ CEUˬ

• Nawˬ ve yaˇ htaꞈ maˍ gʼa tuˬ Gʼuiˬ sha geh cuˇ yiˍ lawˬ˗oˆ

• Yaˇ htaꞈ maˍ ve teˇ yanˇ, awˬ lawn teˇ lawn tiˉ teˇ pawˆ peuˬ teˇ pawˆ kʼoˆ maˍ ve kʼo, yaˇ ehˉ htaˇ kaꞈ henˇ shiˍ gʼa ve yoˬ