Ngaˬ hui coˇ caˇ leh yehˬ kʼa awˬ hkʼaw lo ha lehˬ dawˇ sha ve cawˬ tuˬ te daꞈ jaˇ˗oˬ ve htawˇ, maˇ dawˇ maˇ gaˇ ve awˬ ceuˬ ngaˬ hui ha lehˬ dawˇ sha ve htaꞈ yuˬ hpaˆ laˇ puiˉ tuˬ yoˬ. (Cuˇ yiˍ piˇ ve 9:11) Ngaˬ hui dawˇ haˍ gaˇ haˍ ve awˬ lawn cawˬ la ve teˇ yanˇ, ngaˬ hui htaꞈ haꞈ ve Gʼuiˬ sha lehˬ yawˇ ga laˇ tuˬ yoˬ. Nawˬ Liꞈ hpu hkʼaw cawˬ ve awˬ ceuˬ htaꞈ gʼaꞈ te chehˇ ve kʼo, nawˬ gʼa hpuˇ ve awˬ lawn hkʼaˬ ma hehnˇ jaˇ ve htawˇ, nawˬ leh nawˬ ve yehˬ kʼa lehˬ dawˇ haˍ gaˇ haˍ jaˇ ve awˬ nyi awˬ haˉ oˇ ve htaꞈ ponˬ kʼai gʼa tuˬ yoˬ.

LIꞈ HPU HKʼAW KʼOˆ VE, “Gʼuiˬ sha nawˬ hui awˬ pon dawˇ nyi puiˉ ve pa taw, nawˬ hui ve dawˇ haˍ dawˇ hkiˉ tuˬ hkʼa peu˗eˬ yawˇ htaꞈ chiˇ aꞈ piˇ˗oˆ.” (1 Peˍtruˆ 5:7) Gʼuiˬ sha htaꞈ pa taw, nawˬ dawˇ haˍ gaˇ haˍ ve htaꞈ gʼa hpuˇ ve maˇ heˆ tehꞈ hkʼaˬ htaˆ kaꞈ dawˇ nawˇ tcuhˉ taˍ cawˇ ve yoˬ. (Yaˍkoˆ 1:13) Nawˬ Gʼuiˬ sha awˬ paˇ lo jiˆ kʼai ve kʼo, yawˇ nawˬ htaꞈ ga laˇ tuˬ daꞈ jaˇ ve awˬ hkʼaˇ beˆ maˍ laˇ tuˬ yoˬ. (Iˉsaˍyaˆ 41:10) “Nawˬ hui ve dawˇ haˍ tuˬ hkʼa peu˗eˬ yawˇ htaꞈ hto piˇ˗oˆ.” (Chiˇ mvuh ve 62:8)

Nawˬ teˇ nyi le le Liꞈ hpu gʼaw leh henˇ chehˇ ve kʼo, nawˬ awˬ gʼaˇ gʼa leh, Gʼuiˬ sha Yaˬhoˉvaˬ ga laˇ ve awˬ hkʼaˇ “gʼa tuꞈ gʼa hkanˍ ve hkʼa peu˗eˬ awˬ hkʼaw lo yawˇ ngaˬ hui htaꞈ dawˇ sha” laˇ tuˬ ve htaꞈ gʼa mawˬ tuˬ yoˬ. (2 Kawˇrenˍhtuˆ 1:3; Roˉmaꞈ 15:4) “Gʼuiˬ sha lo laˬ ve, chaw yaˇ hui ca dawˇ maˇ gaˬ ve ha lehˬ dawˇ sha ve teˇ ceuˬ” cawˬ tuˬ yawˇ ka tiꞈ te laˇ ve yoˬ. (Hpiˇliˇpiˆ 4:6, 7, 13)

NAWˬ TE GʼA VE AWˬ CEUˬ

• Ha lehˬ dawˇ sha gʼa tuˬ Yaˬhoˉvaˬ Gʼuiˬ sha geh bon lawˬ˗oˆ

• Nawˬ aˬ htoꞈ ma te gʼa ve htaꞈ dawˇ nyi leh daꞈ jaˇ ve teˇ ceuˬ htaꞈ leuˆ te˗o

LIꞈ HPU HKʼAW KʼOˆ VE, “Cuˇ yiˍ cawˬ ve chaw lehˬ, hkʼaˬ htaˆ kaꞈ henˇ yuˬ gaˇ puiˉ ve nyi ma cawˬ ve yoˬ.” (Tawˇ naˉ ve 18:15) Yehˬ kʼa hkʼaw chehˇ ve chaw teˇ gʼaˇ le le heuˆ gaˇ ve awˬ ceuꞈ htaꞈ chaˬ nyi cawˇ ve yoˬ. Nawˬ awˬ lawn oˇ ve htaꞈ shiˍ˗oˬ ve htawˇ, tawˇ yaw daꞈ ve awˬ hkʼaw lo hkʼa dehꞈ gʼa na piˇ ve yoˬ. (Tawˇ naˉ ve 20:5)

Nawˬ haꞈ ve chaw suh˗e ve kʼo hkʼaˬ hkʼe te tuˬ le. Hawˬ ve lehˬ maˇ yaꞈ, tawnˇ gʼa˗aw laˇ, Yeˍsuˆ htawˇ “mehˆ gʼuiˬ yaꞈ la ve yoˬ.” (Yoˇhanˬ 11:35; Cuˇ yiˍ piˇ ve 3:4) Hkʼa dehꞈ gʼaˇ jehˇ leh zuhꞈ bvuhˆ ve teˇ ceuˬ a yeˇ uiˍ ve yoˬ. (Cuˇ yiˍ piˇ ve 4:6) Awˬ lawn kʼo, dawˇ haˍ gaˇ haˍ ve awˬ ceuˬ htaꞈ gu gʼa tuˬ awˬ gʼaˇ cawˬ la tuˬ yoˬ.

NAWˬ TE GʼA VE AWˬ CEUˬ

• Nawˬ ve yehˬ kʼa awˬ hkʼaw lo, hkʼaˬ htaˆ kaꞈ tawˇ yaw daꞈ cawˇ ve yoˬ. Awˬ lawn kʼo, dawˇ haˍ gaˇ haˍ ve awˬ lawn cawˬ la ve teˇ yanˇ, yawˇ hui nawˬ geh tawˇ yaw daꞈ haˆ tuˬ yoˬ

• Nawˬ hkʼe leˇ gʼa hpuˇ chehˇ ve chaw geh tawˇ yaw daꞈ˗oꞈ

LIꞈ HPU HKʼAW KʼOˆ VE, “Awˬ chawˇ teˇ hpaˍ lehˬ, teˇ gʼaˇ htaꞈ teˇ gʼaˇ haꞈ daꞈ puiˉ ve yoˬ. Teˇ gʼaˇ loˍ htaˇ teˇ gʼaˇ maˇ ga daꞈ ve kʼo, awˬ viˉ awˬ nyi hpehꞈ ve htawˇ aˬ htoꞈ ma tcuhˉ kuiˬ cawˬ le.” (Tawˇ naˉ ve 17:17) Nawˬ ve awˬ chawˇ teˇ hpaˍ lehˬ nawˬ htaꞈ ga laˇ gaˇ ve yoˬ hehˉ. Yaꞈ hkʼaˇ, nawˬ htaꞈ hkʼaˬ hkʼe te ga laˇ tuˬ yawˇ maˇ shiˍ. Chi htaꞈ pa taw awˬ tehˬ kʼo, nawˬ aˬ htoꞈ ma heuˆ gaˇ ve htaꞈ taˇ faˉ, yawˇ hui htaꞈ kʼoˆ piˇ cawˇ ve yoˬ. (Tawˇ naˉ ve 12:25) Liꞈ hpu hkʼaw cawˬ ve cuˇ yiˍ shiˍ ve chaw teˇ hpaˍ geh ga laˇ tuˬ lawˬ cawˇ ve yoˬ. Yawˇ hui Liꞈ hpu htaꞈ cuˇ leh kʼoˆ maˍ laˇ ve tawˇ hkawˇ lehˬ, nawˬ htaꞈ ga laˇ gʼa tuˬ yoˬ. (Yaˍkoˆ 5:14)

Nawˬ Gʼuiˬ sha htaꞈ yonˍ ve chaw geh awˬ chawˇ te leh, Gʼuiˬ sha ka tiꞈ te laˇ ve awˬ lawn htaꞈ gʼaˇ va ve kʼo, ga laˇ tuˬ loˍ ve hkʼe gʼa tuˬ yoˬ. Nawˬ hkʼe leˇ gʼa hpuˇ chehˇ ve chaw htaꞈ awˬ gʼaˇ awˬ shaˉ htehˍ piˇ ve kʼo, nawˬ htawˇ awˬ gʼaˇ gʼa tuˬ yoˬ. Nawˬ Yaˬhoˉvaˬ Gʼuiˬ sha leh yawˇ ka tiꞈ te taˍ laˇ ve awˬ ceuˬ htaꞈ hkʼaˬ hkʼe te yonˍ ve awˬ lawn yawˇ hui htaꞈ kʼoˆ maˍ piˇ˗oˆ. Ga piˇ tuˬ loˍ ve chaw teˇ hpaˍ htaꞈ hkʼaˬ htaˆ kaꞈ ga piˇ leh, nawˬ htaꞈ haꞈ leh ga laˇ gaˇ ve chaw teˇ hpaˍ htaꞈ taˇ hpaˆ daꞈ chehˇ. (Tawˇ naˉ ve 18:1; 1 Kawˇrenˍhtuˆ 15:58)

NAWˬ TE GʼA VE AWˬ CEUˬ

• Nawˬ awˬ chawˇ geh tawˇ yaw daꞈ leh yawˇ nawˬ htaꞈ ga laˇ tcuh˗oꞈ

• Nawˬ loˍ ve hkʼe kʼoˆ piˇ˗oꞈ