Yaˬhoˉvaˬ Gʼuiˬ sha ngaˬ hui geh loˍ ve lehˬ, “ka tiꞈ yeˬ ve chaw” hpehꞈ tcuh gaˇ ve yoˬ. (Chiˇ mvuh ve 31:23) Ka tiꞈ yeˬ ve teˇ ceuˬ yehˬ kʼa hkʼaw a yeˇ uiˍ jaˇ. Awˬ lawn kʼo, ka tiꞈ maˇ yeˬ kʼo yonˍ gʼa daꞈ maˇ gʼa. Yehˬ kʼa hkʼaw lo haꞈ daꞈ pehnˇ daꞈ maˇ la tuˬ yonˍ gʼa daꞈ ve teˇ ceuˬ a yeˇ uiˍ jaˇ ve yoˬ.

Chi beuꞈ teˇ co˗e awˬ hpawˇ awˬ miˇ ma ka tiꞈ yeˬ daꞈ ve teˇ ceuˬ lehˬ haˍ ve yoˬ. Nawˬ ve yehˬ kʼa htaꞈ haꞈ shaˉ gʼa tuˬ, nawˬ chi nyiˇ ceuˬ htaꞈ gʼa te ve yoˬ.

LIꞈ HPU HKʼAW KʼOˆ VE, “pehˬ puiˉ fuiˍ puiˉ ve teˇ ceuˬ” cawˬ piˇ˗oˆ. (Hpiˇliˇpiˆ 1:9) Nawˬ ve awˬ hpawˇ awˬ miˇ ma htaꞈ caˉ daꞈ ve lehˬ, awˬ kaˍ awˬ nu aꞈ kehˉ a yeˇ uiˍ ve yoˬ. Awˬ lawn kʼo, yehˬ kʼa lehˬ nawˬ ve a shaꞈ awˬ hkʼaw lo a yeˇ uiˍ jaˇ ve teˇ ceuˬ hpehꞈ ve yoˬ.

Yaˬhoˉvaˬ Gʼuiˬ sha lehˬ, nawˬ ve awˬ ceh htaꞈ a yeˇ yuˬ piˇ leh “ha lehˬ ha kʼa te chehˇ” tcuh gaˇ ve yoˬ. (Cuˇ yiˍ piˇ ve 9:9) Gʼuiˬ sha hkʼa tawˍ lehˆ kʼoˆ taˍ ve, teˇ gʼaˇ leh teˇ gʼaˇ a yeˇ yuˬ daꞈ leh, nawˬ hui nyiˇ gʼaˇ gʼaˇ kaꞈ ha lehˬ tuˬ te daꞈ cawˇ ve yoˬ. (1 Kawˇrenˍhtuˆ 10:24) Yawˇ nawˬ awˬ paˇ lo chehˇ ve awˬ hpfuhˇ hkʼaˆ ve yoˬ tehꞈ, hpeuꞈ maw piˇ cawˇ ve yoˬ.

NAWˬ TE GʼA VE AWˬ CEUˬ

• Hkʼaˬ htaˆ kaꞈ teˇ geh chehˇ ve awˬ hkʼaw lo, nawˬ yawˇ htaꞈ a yeˇ uiˍ ve chaw tehꞈ shawˍ leh a yeˇ yuˬ piˇ cawˇ ve yoˬ

• “Ngaˬ” ve awˬ lawn ceh tiˇ maˇ heˆ, “ngaˬ huiˉ maˬ” ve awˬ lawn hpehꞈ ve yoˬ tehꞈ gʼa dawˇ ve yoˬ

LIꞈ HPU HKʼAW KʼOˆ VE, “yaˇ miˇ htaꞈ nyi leh pehꞈ ve tzuhˆ ve nyi ma cawˬ ve chaw teˇ gʼaˇ le le lehˬ, a shu yawˇ ve nyi ma awˬ hkʼaw lo yaˇ miˇ oˇ ve htaꞈ haˉ chawˇ haˉ paˆ te peuˬ.” (Maꞈhtehˍ 5:28) Chi htaꞈ pa taw, haˉ chawˇ haˉ paˆ te tuˬ ve awˬ lawn htaꞈ dawˇ nyi ve ceh kaꞈ a shu yawˇ ve awˬ ceh htaꞈ ka tiꞈ maˇ yeˬ ve hkʼa shuˍ yoˬ.

Yaˬhoˉvaˬ Gʼuiˬ sha ngaˬ hui htaꞈ kʼoˆ laˇ ve, “Nawˬ hkʼaˬ hkʼe dawˇ ve htaꞈ shaˍ tiꞈ taˍ˗oꞈ.” (Tawˇ naˉ ve 4:23; Yeˍraˍmiˆ 17:9) Oˇ hkʼe te gʼa tuˬ a shu yawˇ ve mehˆ shiˍ htaꞈ gʼa haꞈ shaˉ ve yoˬ. (Maꞈhtehˍ 5:29, 30) Yawˇbaˆ htaꞈ henˇ yuˬ˗oꞈ, yawˇ lehˬ yaˇ miˇ haˉ htaꞈ pehꞈ ve tzuhˆ ve awˬ hkʼaw lo teˇ pawˆ kaꞈ maˇ gʼa kʼawꞈ nyi tuˬ, ka tiꞈ te taˍ peuˬ ve yoˬ. (Yawˇbaˆ 31:1) Awˬ kʼu nyi te taˍ ve awˬ han htaꞈ taˇ nyi, leh nawˬ ve awˬ ceh maˇ heˆ kʼo, awˬ nu ve chaw teˇ gʼaˇ htaꞈ meuˆ daꞈ jaˇ ve taˇ te.

NAWˬ TE GʼA VE AWˬ CEUˬ

• Nawˬ ve awˬ ceh teˇ gʼaˇ htaꞈ ceh tiˉ ka tiꞈ yeˬ ve yoˬ tehꞈ, shu htaꞈ gʼa hpeuꞈ maw piˇ ve yoˬ

• Nawˬ awˬ nu ve chaw htaꞈ meuˆ daꞈ jaˇ ve htaꞈ nawˬ ve awˬ ceh maˇ dawˇ cawˇ ve kʼo, laꞈ haˉ jehˇ leh nawˬ yawˇ ve dawˇ hkʼaˇ htaꞈ gʼa dawˇ nyi piˇ ve yoˬ