Awˬ lawn 11
Aˬ htoꞈ ma pa taw dawˇ haˍ ve cawˬ maˇ jaˇ ve le?
1, 2. Laiˉ g’aˇ hk’aˬ hk’e dawˇ ve le?
Si-na-miˆ laˇ tsuhˇ g’uiˬ baˇ lonˉ hk’aˆ htaꞈ te luˬ te sheˆ ve yoˬ. Maˇ daꞈ ve chaw naˆ taˆ loꞈ la leh chaw chehˇ kuiˬ lo bawˆ keu ve pa taw, naˬ leh suh maˇ jaˇ ve yoˬ. Yaˇ 5 g’aˇ cawˬ ve awˬ e teˇ g’aˇ awˬ shaˍ diˬ a naˍ hpehꞈ suh-e ve yoˬ.
2 Kawˆ tuˬ uiˍ ve hpehꞈ la htaˇ laiˉ g’aˇ dawˇ ve, “aˬ htoꞈ ma te chi hk’e hpehꞈ la ve le?” Aˬ htoꞈ ma te haiˬ ve leh dawˇ haˍ ve maˇ maˇ cawˬ la ve le tehꞈ laiˉ g’aˇ shiˍ gaˇ ve yoˬ. Nawˬ kaꞈ chi hk’e dawˇ jaw laˇ?
3, 4. (a) Haˍbaˍkuˆ aˬ htoꞈ ma na jaw ve le? (b) Yaˬhoˉvaˬ Haˍbaˍkuˆ htaꞈ hk’aˬ hk’e hk’awꞈ piˇ ve le?
3 Liꞈ hpu hk’aw G’uiˬ sha htaꞈ hk’a dehꞈ yonˍ ve chaw laiˉ g’aˇ kaꞈ chi hk’e na jaw ve yoˬ. Tawˇ pa haˉ te k’o, Tcuh kaˍ paˍ Haˍbaˍkuˆ Yaˬhoˉvaˬ htaꞈ na ve, “aˬ htoꞈ ma pa taw nawˬ ngaˬ htaꞈ tuꞈ hkanˍ dawˇ haˍ ve awˬ ceuˬ chi teˇ hpaˍ htaꞈ mawˬ tcuh laˇ ve le? Luˬ ve sheˆ ve teˇ ceuˬ ngaˬ hui htaꞈ hk’a caw zuhˇ cawˬ chehˇ taˍ ve yoˬ. Teˇ kaˬ le le lo yaꞈ daꞈ jiˆ daꞈ ve leh maˇ cawˇ maˇ hawˍ daꞈ ve hk’a biˇ cawˬ chehˇ taˍ ve yoˬ.”—Haˍbaˍkuˆ 1:3.
4 Haˍbaˍkuˆ liꞈ 2:2, 3 hk’aw G’uiˬ sha Haˍbaˍkuˆ htaꞈ hk’awꞈ piˇ leh awˬ lawn chi hk’a peu-eˬ yawˇ gu tuˬ yoˬ tehꞈ ka tiꞈ te piˇ ve yoˬ. Yaˬhoˉvaˬ chaw yaˇ htaꞈ haꞈ jaˇ. Liꞈ hpu hk’aw k’oˆ ve, “G’uiˬ sha nawˬ hui awˬ pon dawˇ nyi puiˉ” ve yoˬ. (1 Peˍtruˆ 5:7) G’uiˬ sha lehˬ dawˇ haˍ ve htaꞈ ngaˬ hui aꞈ kehˉ maˇ mawˬ gaˇ. (Iˉsaˍyaˆ 55:8, 9) Oˇ hk’e k’o, aˬ htoꞈ ma te miˬ guiˬ hk’oˆ dawˇ haˍ ve cawˬ maˇ jaˇ ve le?
Aˬ htoꞈ ma pa taw dawˇ haˍ ve cawˬ maˇ jaˇ ve le?
5. Dawˇ haˍ ve g’a hpuˇ htaˇ, chaw laiˉ g’aˇ hk’aˬ hk’e dawˇ ve le? Liꞈ hpu hk’aw hk’aˬ hk’e k’oˆ taˍ ve le?
5 Bon liˇ awˬ hoˉ leh saˍ laꞈ laiˉ g’aˇ maˍ ve, dawˇ haˍ ve g’a hpuˇ htaˇ G’uiˬ sha ve a loˍ yoˬ. Teˇ hpaˍ hpaˍ k’oˆ ve, hpehꞈ la ve awˬ ceuˬ teˇ hpaˍ G’uiˬ sha gu teh taˍ peuˬ leh aˬ ma te chi hk’e hpehꞈ ve ngaˬ hui na maˇ g’a. Chaw mawˇ yaˇ ehˉ maˇ k’oˆ suh ve teˇ yanˇ teˇ g’aˇ g’aˇ k’oˆ ve, G’uiˬ sha a shaꞈ hk’e ceh teꞈ chehˇ tcuh leh mvuhˇ naw ma hk’oˆ shiˍ k’oꞈ-e ve yoˬ. Chi hk’e dawˇ ve maˇ cawˇ. Yaˬhoˉvaˬ maˇ daꞈ ve awˬ ceuˬ htaꞈ maˇ te jaw. Liꞈ hpu hk’aw k’oˆ ve, “kanˇ paˆ uiˍ ve G’uiˬ sha lehˬ, maˇ daꞈ ve kanˉ htaꞈ te tuˬ laˇ?”—Yawˇbaˆ 34:10.
6. Dawˇ haˍ ve mawˬ la hpuˇ la htaˇ, aˬ htoꞈ ma te chaw laiˉ g’aˇ G’uiˬ sha htaꞈ venˇ baˆ taˍ ve le?
6 Miˬ guiˬ hk’oˆ G’uiˬ sha uˉ peunˍ chehˇ ve tehꞈ chaw laiˉ g’aˇ dawˇ ve pa taw, dawˇ haˍ ve mawˬ la hpuˇ la htaˇ, yawˇ hui G’uiˬ sha htaꞈ venˇ baˆ taˍ ve yoˬ. Yaꞈ hk’aˇ, awˬ lawn 3 hk’aw g’a henˇ peuˬ, chi teˇ hkui miˬ guiˬ hk’oˆ Saˍtanˍ uˉ peunˍ chehˇ ve yoˬ.
7, 8. Aˬ htoꞈ ma pa taw miˬ guiˬ hk’oˆ dawˇ haˍ ve cawˬ maˇ jaˇ ve le?
7 Liꞈ hpu hk’aw k’oˆ ve, “miˬ guiˬ hk’a peu-eˬ lehˬ haiˬ ve awˬ shehˍ hpaˇ ve kanˇ paˆ awˬ hawˉ lo chehˇ taˍ” ve yoˬ. (1 Yoˇhanˬ 5:19) Miˬ guiˬ uˉ peunˍ paˍ Saˍtanˍ lehˬ haiˬ jaˇ leh maˇ ha k’aˉ puiˉ. Yawˇ “miˬ guiˬ yaˇ hk’a peu-eˬ htaꞈ heˍ shehˍ hpaˇ hpehꞈ” ve yoˬ. (Hpeuꞈ maˍ ve 12:9) Chaw laiˉ g’aˇ yawˇ htaꞈ henˇ yuˬ ve pa taw, miˬ guiˬ hk’oˆ heˍ ve, nyi bawˬ daꞈ ve, haiˬ ve cawˬ maˇ jaˇ ve yoˬ.
8 Chi hk’oˆ kaꞈ, Aˍdanˍ Eˇvaꞈ G’uiˬ sha htaꞈ hpfuhˆ hk’awꞈ nawˉ, yawˇ ve awˬ yaˇ awˬ duˬ venˇ baˆ yaˇ hpehꞈ la ve yoˬ. Teˇ g’aˇ leh teˇ g’aˇ dawˇ haˍ tuˬ te daꞈ ve yoˬ. Chaw yaˇ yawˇ hui shu awˬ hk’oˆ kanˇ paˆ cawˬ leh shu aꞈ kehˉ daꞈ-aˬ tehꞈ dawˇ ve yoˬ. Yawˇ hui yaꞈ daꞈ jiˆ daꞈ ve, naˬ tuˬ te daꞈ ve, maꞈ te daꞈ ve yoˬ. (Cuˇ yiˍ piˇ ve 4:1; 8:9) Chaw yaˇ dawˇ haˍ ve g’a k’awꞈ hpuˇ ve lehˬ “maˇ daꞈ ve awˬ ceuˬ maˇ dawˇ maˇ gaˇ ve awˬ hk’aw lo teˇ g’aˇ le le hpehꞈ la puiˉ ve yoˬ.” (Cuˇ yiˍ piˇ ve 9:11, MGS) Yawˇ hui chehˇ kuiˬ chehˇ maˇ cawˇ leh awˬ yanˇ maˇ cawˇ daꞈ ve pa taw, maˇ dawˇ maˇ gaˇ ve g’a hpuˇ la ve yoˬ.
9. Yaˬhoˉvaˬ dawˇ haˍ ve cawˬ tcuh ve a yeˇ uiˍ ve awˬ hk’aˇ cawˬ ve tehꞈ, aˬ htoꞈ ma te ngaˬ hui hk’a dehꞈ yonˍ g’a ve le?
9 Dawˇ haˍ ve lehˬ Yaˬhoˉvaˬ geh laˬ ve maˇ heˆ. Maꞈ bawˆ daꞈ ve, awˬ haiˬ te daꞈ ve G’uiˬ sha htaꞈ venˇ baˆ taˍ maˇ hpehꞈ. Miˬ hiˆ ve, mvuhˇ haw mvuhˇ yeˬ lonˉ, iˉ kaˆ htonˍ ve, kawˆ tuˬ uiˍ ve yawˇ geh laˬ ve maˇ heˆ. Yaꞈ hk’aˇ, ‘G’uiˬ sha lehˬ miˬ guiˬ mvuhˇ naw ma hk’oˆ kanˇ paˆ uiˍ jaˇ ve k’o, aˬ htoꞈ ma te yawˇ haiˬ ve awˬ ceuˬ chi teˇ hpaˍ cawˬ tcuh sheˍ ve le?’ nawˬ htawˇ dawˇ nawˬ dawˇ te ve yoˬ hehˉ. Liꞈ hpu hk’aw k’oˆ ve, G’uiˬ sha ngaˬ hui htaꞈ dawˇ nyi puiˉ ve yoˬ. Hk’e kaꞈ, dawˇ haˍ ve cawˬ tcuh ve lehˬ G’uiˬ sha a yeˇ uiˍ ve awˬ hk’aˇ cawˬ tuˬ yoˬ.—1 Yoˇhanˬ 4:8.
Aˬ htoꞈ ma pa taw G’uiˬ sha dawˇ haˍ ve cawˬ tcuh ve le?
10. Saˍtanˍ Yaˬhoˉvaˬ htaꞈ hk’aˬ hk’e te she pfuhˍ piˇ ve le?
10 Eˍdenˍ hko hk’aw Saˍtanˍ lehˬ Aˍdanˍ Eˇvaꞈ htaꞈ heˍ yuˬ ve yoˬ. Yawˇ k’oˆ ve, G’uiˬ sha lehˬ maˇ daꞈ ve uˉ peunˍ shehˍ hpaˇ hpehꞈ ve yoˬ. Yawˇ huiˉ maˬ htaꞈ daꞈ ve teˇ ceuˬ ceuˬ maˇ piˇ tehꞈ, Saˍtanˍ G’uiˬ sha htaꞈ she pfuhˍ piˇ ve yoˬ. Yawˇ huiˉ maˬ Yaˬhoˉvaˬ htaꞈ cuˇ tuˬ maˇ loˍ, Saˍtanˍ yawˇ uˉ peunˍ ve a ciˉ daꞈ-aˬ tehꞈ dawˇ tcuh gaˇ ve yoˬ.—Awˬ hkuiˉ puiˍ 3:2-5; K’oˆ maˍ ve awˬ lawn 27 htaꞈ nyi sheˍ.
11. Aˬ htoꞈ ma a yeˇ uiˍ ve na hkawˇ cawˬ ve le?
11 Aˍdanˍ Eˇvaꞈ Yaˬhoˉvaˬ hkawˇ maˇ na yuˬ leh hpfuhˆ ve yoˬ. Hk’aˬ ve daꞈ maˇ daꞈ ve yawˇ hk’aˇ yawˇ dawˇ cheˆ ve a hkaw-anˬ cawˬ ve tehꞈ yawˇ hui dawˇ ve yoˬ. Yaˬhoˉvaˬ lehˬ ngaˬ hui awˬ pon aˬ htoꞈ ma daꞈ jaˇ ve yawˇ shiˍ leh, yawˇ htaꞈ hpfuhˆ ve chaw hui lehˬ dawˇ yaꞈ ve yoˬ tehꞈ teˇ g’aˇ le le shiˍ tuˬ, yawˇ hk’aˬ hk’e te ve le?
12, 13. (a) Aˬ htoꞈ ma te Yaˬhoˉvaˬ Aˍdanˍ Eˇvaꞈ htaꞈ laꞈ haˉ maˇ te luˬ piˇ ve le? (b) Saˍtanˍ leh chaw yaˇ htaꞈ Yaˬhoˉvaˬ aˬ htoꞈ ma te uˉ peunˍ tcuh ve le?
12 Aˍdanˍ Eˇvaꞈ htaꞈ Yaˬhoˉvaˬ laꞈ haˉ maˇ te luˬ piˇ. Yawˇ huiˉ maˬ htaꞈ yaˇ cawˬ la tcuh ve yoˬ. Aˍdanˍ Eˇvaꞈ ve awˬ yaˇ awˬ duˬ a shu uˉ peunˍ laˇ tuˬ, yawˇ hui hk’aˇ yawˇ hui leuˆ yuˬ tcuh ve yoˬ. Yaˬhoˉvaˬ ve a loˍ lehˬ miˬ guiˬ hk’oˆ biˇ ve chaw hk’a biˇ chehˇ tcuh ve yoˬ. Neˇ haiˬ Saˍtanˍ hk’aˬ ma coˇ caˇ leh tawˍ ve htawˇ, G’uiˬ sha ve a loˍ chi ve biˇ la tuˬ yoˬ.—Awˬ hkuiˉ puiˍ 1:28; Iˉsaˍyaˆ 55:10, 11.
13 Saˍtanˍ mvuhˇ naw ma tcuh yaˇ laiˉ lanˬ g’aˇ mehˆ g’uˇ suhˍ Yaˬhoˉvaˬ htaꞈ tanˬ daꞈ ve yoˬ. (Yawˇbaˆ 38:7; Daˍyeˍlaˆ 7:10) Saˍtanˍ uˉ peunˍ ve leh Yaˬhoˉvaˬ uˉ peunˍ ve teˇ ceuˬ hk’aˬ ve a ciˉ daꞈ ve tehꞈ teˇ g’aˇ le le shiˍ tuˬ, Saˍtanˍ leh chaw yaˇ htaꞈ Yaˬhoˉvaˬ awˬ yanˇ piˇ ve yoˬ. G’uiˬ sha chaw yaˇ htaꞈ maˇ ga piˇ leh, Saˍtanˍ ve kanˇ paˆ awˬ hawˉ lo yawˇ hui hk’aˇ yawˇ hui uˉ peunˍ tcuh ve yoˬ.
14. Awˬ yanˇ ponˬ k’ai ve teˇ yanˇ ngaˬ hui aˬ htoꞈ ma g’a shiˍ ve le?
14 Ponˬ laˬ ve laiˉ hinˉ hk’awꞈ chaw yaˇ yawˇ hui hk’aˇ yawˇ hui laiˉ ceuˬ te uˉ peunˍ ve htawˇ, yawˇ hui te maˇ g’a. Hk’e te leh, Saˍtanˍ ve tawˇ hkawˇ lehˬ heˍ ve tehꞈ g’a mawˬ ve yoˬ. Chaw yaˇ htaꞈ G’uiˬ sha ga laˇ tuˬ loˍ ve yoˬ. Tcuh kaˍ paˍ Yeˍraˍmiˆ k’oˆ taˍ ve hk’e hpehꞈ la ve yoˬ. Yawˇ k’oˆ ve, “G’uiˬ sha-oˬ, awˬ g’uˇ suhˍ hpawˇ hk’aˬ hk’e hpehꞈ la tuˬ ve htaꞈ chaw teˇ g’aˇ kaꞈ shiˍ maˇ hpehꞈ ve htaꞈ ngaˬ shiˍ taˍ ve yoˬ. Chaw yaˇ lehˬ, a shu yawˇ ve a shaꞈ htaꞈ haꞈ shaˉ maˇ g’a.”—Yeˍraˍmiˆ 10:23.
Aˬ htoꞈ ma pa taw Yaˬhoˉvaˬ awˬ yanˇ chi maw maw law ve le?
15, 16. (a) Aˬ htoꞈ ma te Yaˬhoˉvaˬ dawˇ haˍ ve chi maw maw cawˬ tcuh ve le? (b) Saˍtanˍ te taˍ ve awˬ lawn htaꞈ aˬ htoꞈ ma te Yaˬhoˉvaˬ maˇ gu sheˍ ve le?
15 Aˬ htoꞈ ma te Yaˬhoˉvaˬ dawˇ haˍ ve chi maw maw cawˬ tcuh ve le? Aˬ htoꞈ ma te dawˇ haˍ tuˬ htaꞈ Yaˬhoˉvaˬ maˇ gu ve le? Saˍtanˍ uˉ peunˍ maˇ g’a tehꞈ shiˍ tuˬ, awˬ yanˇ g’a yehˇ ve yoˬ. Chaw yaˇ laiˉ ceuˬ te uˉ peunˍ ve htawˇ, daꞈ la maˇ g’a. Cuˇ yiˍ maˍ yiˍ awˬ suhˉ uiˍ la mvuh la ve htawˇ, maˇ hteˇ maˇ cawˇ ve, haˍ g’awˇ ve, awˬ haiˬ te daꞈ ve, maꞈ bawˆ daꞈ ve oˇ htaˇ aꞈ kehˉ cawˬ maˇ jaˇ. G’uiˬ sha ngaˬ hui htaꞈ maˇ ga laˇ k’o, a shu yawˇ hk’aˇ yawˇ uˉ peunˍ maˇ g’a tehꞈ, hk’a tawˍ lehˆ g’a mawˬ ve yoˬ.
16 Yaꞈ hk’aˇ, Saˍtanˍ te taˍ ve awˬ lawn htaꞈ Yaˬhoˉvaˬ maˇ gu sheˍ. Yawˇ ga piˇ ve k’o, yawˇ Saˍtanˍ hpawˇ chehˇ ve hk’a shuˍ yoˬ. Chi hk’oˆ kaꞈ, chaw yaˇ a shu yawˇ hk’aˇ yawˇ uˉ peunˍ g’a ve yoˬ tehꞈ yawˇ hui dawˇ tuˬ yoˬ. Chi lehˬ awˬ tehˬ maˇ heˆ ve pa taw, Yaˬhoˉvaˬ ga piˇ maˇ hpehꞈ. Yawˇ maˇ heˍ puiˉ.—Heˍbrehˇ 6:18.
17, 18. Saˍtanˍ te taˍ ve luˬ ve sheˆ ve hk’a peu-eˬ htaꞈ Yaˬhoˉvaˬ hk’aˬ hk’e te tuˬ le?
17 Saˍtanˍ leh chaw yaˇ hpfuhˆ ve pa taw, luˬ ve sheˆ ve hk’a peu-eˬ htaꞈ Yaˬhoˉvaˬ gu g’a-aw laˇ? G’uiˬ sha maˇ gu g’a ve teˇ ceuˬ kaꞈ maˇ cawˬ. Saˍtanˍ tanˬ daꞈ ve hk’a peu-eˬ hk’aˬ teˇ yanˇ gu cawˇ ve Yaˬhoˉvaˬ shiˍ ve yoˬ. Oˇ ve hk’awꞈ nawˉ, awˉ lawˉ htaˇ miˬ guiˬ hk’oˆ Paˍraˍdiˇsuˆ hpehꞈ cawˇ ve hk’e Yaˬhoˉvaˬ te tuˬ yoˬ. “Tuˍ hpfuh awˬ hk’aw lo” chehˇ ve chaw hk’a peu-eˬ k’awꞈ teꞈ tu la tuˬ yoˬ. (Yoˇhanˬ 5:28, 29) Chaw teˇ g’aˇ kaꞈ k’awꞈ naˬ leh suh ve maˇ cawˬ-o. Saˍtanˍ te taˍ ve luˬ ve sheˆ ve hk’a peu-eˬ Yeˍsuˆ gu tuˬ yoˬ. Yaˬhoˉvaˬ Yeˍsuˆ htaꞈ “neˇ haiˬ ve kanˉ teˇ hpaˍ htaꞈ te luˬ” tcuh tuˬ yoˬ. (1 Yoˇhanˬ 3:8) Yaˬhoˉvaˬ ngaˬ hui awˬ pon yeunˇ hkanˍ laˇ ve awˬ bon uiˍ jaˇ. Ngaˬ hui yawˇ htaꞈ g’a shiˍ daꞈ leh yawˇ htaꞈ uˉ peunˍ tcuh gaˇ ve yoˬ tehꞈ, dawˇ cheˆ g’a tuˬ awˬ yanˇ peꞈ laˇ ve pa taw yoˬ. (2 Peˍtruˆ 3:9, 10 g’aw ve.) Chi teˇ hkui ngaˬ hui dawˇ haˍ ve g’a hpuˇ ve htawˇ, yeunˇ hkanˍ g’aˇ tuˬ yawˇ ga laˇ ve yoˬ.—Yoˇhanˬ 4:23; 1 Kawˇrenˍhtuˆ 10:13 g’aw ve.
18 Yaˬhoˉvaˬ Uˉ peunˍ shehˍ hpaˇ hpehꞈ ve yoˬ tehꞈ ngaˬ hui leuˆ yuˬ tuˬ yawˇ maˇ nyiˉ laˇ. Yaˬhoˉvaˬ chaw yaˇ yawˇ hk’aˇ yawˇ leuˆ yuˬ g’a ve a hkaw-anˬ peꞈ laˇ ve yoˬ. Laꞈ shawnˍ chi ve hk’aˬ hk’e cawˬ ve le?
Nawˬ leuˆ yuˬ ve a hkaw-anˬ htaꞈ hk’aˬ hk’e te yehˇ tuˬ le?
19. Yaˬhoˉvaˬ aˬ htoꞈ ma daꞈ jaˇ ve laꞈ shawnˍ peꞈ laˇ ve le? Laꞈ shawnˍ chi g’a ve aˬ htoꞈ ma te ha lehˬ cawˇ ve le?
19 Yaˬhoˉvaˬ laꞈ shawnˍ chi ve peꞈ laˇ ve pa taw, ngaˬ hui to nuˇ to shaˆ htaꞈ maˇ shuˍ daꞈ. To nuˇ to shaˆ lehˬ hk’a dehꞈ maˇ dawˇ nyi puiˉ. Yaꞈ hk’aˇ, chaw yaˇ a shaꞈ hk’aˬ hk’e teꞈ chehˇ tuˬ leh Yaˬhoˉvaˬ nyi hk’aˇ suh tuˬ te piˇ laˇ maˇ te piˇ laˇ, leuˆ yuˬ g’a ve yoˬ. (Tawˇ naˉ ve 30:24) Chi hk’oˆ kaꞈ, ngaˬ hui lehˬ tcuh piˇ ve ceh te puiˉ ve caꞈ hk’eun htaꞈ maˇ shuˍ. Ngaˬ hui hk’aˬ hk’e ve chaw hpehꞈ gaˇ ve, awˬ chawˇ hk’aˬ hk’e ve htaꞈ te gaˇ ve, a shaꞈ hk’aˬ hk’e teꞈ chehˇ gaˇ ve leuˆ yuˬ g’a ve yoˬ. Yaˬhoˉvaˬ ngaˬ hui a shaꞈ teꞈ kuiˬ ha lehˬ tcuh gaˇ ve yoˬ.
20, 21. Chi teˇ hkui nawˬ leuˆ yuˬ g’a ve daꞈ jaˇ ve aˬ htoꞈ ma le?
20 Yaˬhoˉvaˬ ngaˬ hui yawˇ htaꞈ haꞈ tcuh gaˇ ve yoˬ. (Maꞈhtehˍ 22:37, 38) Awˬ pa teˇ g’aˇ yawˇ ve yaˇ “ngaˬ pa htaꞈ haꞈ jaˇ” tehꞈ nyi ma hk’aw tawˆ la leh k’oˆ piˇ htaˇ, awˬ pa ha lehˬ ve hk’a shuˍ, Yaˬhoˉvaˬ kaꞈ ha lehˬ ve yoˬ. Yaˬhoˉvaˬ kanˉ te tuˬ laˇ maˇ te tuˬ laˇ yawˇ ngaˬ hui htaꞈ leuˆ yuˬ tcuh laˇ ve yoˬ. Saˍtanˍ, Aˍdanˍ, Eˇvaꞈ lehˬ Yaˬhoˉvaˬ hpawˇ chehˇ tuˬ maˇ leuˆ yuˬ. Nawˬ aˬ htoꞈ ma htaꞈ leuˆ yuˬ tuˬ le?
21 Nawˬ leuˆ yuˬ ve a hkaw-anˬ cawˬ ve htaꞈ yehˇ leh Yaˬhoˉvaˬ htaꞈ oˉ k’oˍ pui-o. Chaw laiˉ lanˬ g’aˇ yawˇ nyi hk’aˇ suh tuˬ te piˇ ve leuˆ yuˬ leh Saˍtanˍ hpawˇ maˇ chehˇ ve yoˬ. (Tawˇ naˉ ve 27:11) Dawˇ haˍ ve maˇ cawˬ ve miˬ guiˬ awˬ suhˉ hk’aw chehˇ tuˬ, chi teˇ hkui nawˬ aˬ htoꞈ ma g’a te ve le? Awˬ g’uˇ suhˍ teˇ lawn hk’aw henˇ tuˬ yoˬ.
