1. Ngaˬ hui htaꞈ a shaꞈ peꞈ laˇ shehˍ hpaˇ a shu le?

Yaˬhoˉvaˬ “teꞈ chehˇ ve G’uiˬ sha” hpehꞈ ve yoˬ. (Yeˍraˍmiˆ 10:10) Yawˇ Hpanˍ shehˍ hpaˇ hpehꞈ leh ngaˬ hui htaꞈ a shaꞈ peꞈ laˇ ve yoˬ. Liꞈ hpu hk’aw k’oˆ ve, “awˬ ceuˬ hk’a peu-eˬ htaꞈ nawˬ hpanˍ taˍ ceˍ taˍ leh, nawˬ ve a loˍ htaꞈ pa taw awˬ ceuˬ hk’a peu-eˬ hpehꞈ la leh nawˬ te hpanˍ taˍ ve deˇ deˇ yoˬ.” (Hpeuꞈ maˍ ve 4:11) Yaˬhoˉvaˬ ngaˬ hui htaꞈ a shaꞈ teꞈ chehˇ tcuh gaˇ ve yoˬ. A shaꞈ lehˬ awˬ hpfuhˇ hk’aˆ ve laꞈ shawnˍ hpehꞈ ve yoˬ.—Chiˇ mvuh ve 36:9 g’aw ve.

2. Ngaˬ hui a shaꞈ teꞈ kuiˬ ha lehˬ g’a tuˬ hk’aˬ hk’e g’a te ve le?

² Ngaˬ hui a shaꞈ teꞈ chehˇ hpehꞈ tuˬ, Yaˬhoˉvaˬ loˍ ve awˬ ceuˬ peꞈ laˇ ve yoˬ. (Tcuh yaˇ 17:28) Hk’e ceh tiˉ maˇ heˆ, ngaˬ hui a shaꞈ teꞈ chehˇ ve awˬ hk’aw lo kaꞈ ha lehˬ tcuh gaˇ ve yoˬ. (Tcuh yaˇ 14:15-17) Ngaˬ hui a shaꞈ teꞈ kuiˬ ha lehˬ g’a tuˬ, G’uiˬ sha ve awˬ liˇ tawˇ hkawˇ htaꞈ g’a na yuˬ ve yoˬ.—Iˉsaˍyaˆ 48:17, 18.

3. Kaˍiˉnaˆ Aˍbeˍlaˆ htaꞈ tiˇ pehˍ htaˇ Yaˬhoˉvaˬ hk’aˬ hk’e te ve le?

³ Liꞈ hpu hk’aw maˍ ve ngaˬ hui ve a shaꞈ leh shu ve a shaꞈ Yaˬhoˉvaˬ mehˆ g’uˇ suhˍ awˬ hpfuhˇ hk’aˆ jaˇ ve yoˬ. Tawˇ pa haˉ te k’o, Aˍdanˍ Eˇvaꞈ yaˇ Kaˍiˉnaˆ Aˍbeˍlaˆ cawˬ la ve yoˬ. Kaˍiˉnaˆ Aˍbeˍlaˆ htaꞈ nyi ma zuhˆ htaˇ, Yaˬhoˉvaˬ shaˍ tiꞈ piˇ ve yoˬ. Yaꞈ hk’aˇ, Kaˍiˉnaˆ maˇ na yuˬ, nyi ma k’awꞈ zuhˆ jaˇ leh “yawˇ ve awˬ nyi paˍ Aˍbeˍlaˆ htaꞈ tiˇ pehˍ ve yoˬ.” (Awˬ hkuiˉ puiˍ 4:3-8) Yaˬhoˉvaˬ Kaˍiˉnaˆ htaꞈ suhˉ jehˬ piˇ ve yoˬ. (Awˬ hkuiˉ puiˍ 4:9-11) Chi htaꞈ pa taw, nyi ma zuhˆ leh nyi bawˬ ve teˇ ceuˬ  kawˆ tuˬ uiˍ jaˇ. Awˬ lawn k’o, haiˬ ve htaꞈ te ve chaw hpehꞈ g’a ve yoˬ. Oˇ hk’e ve chaw co co taiˍ taiˍ a shaꞈ maˇ g’a ve yoˬ. (1 Yoˇhanˬ 3:15 g’aw ve.) Yaˬhoˉvaˬ htaꞈ ha lehˬ tcuh gaˇ ve k’o, ngaˬ hui teˇ g’aˇ le le htaꞈ g’a haꞈ ve yoˬ.—1 Yoˇhanˬ 3:11, 12.

4. G’uiˬ sha ve awˬ liˇ tawˇ hkawˇ teˇ hkawˇ a shaꞈ htaꞈ caˉ daꞈ ve awˬ lawn ngaˬ hui htaꞈ aˬ htoꞈ ma maˍ laˇ ve le?

⁴ Ponˬ laˬ ve laiˉ hinˉ hk’awꞈ htaˇ, Yaˬhoˉvaˬ a shaꞈ awˬ hpfuhˇ hk’aˆ ve tehꞈ shawˍ ve pa taw, awˬ liˇ tawˇ hkawˇ 10 hkawˇ Moˉseˍ htaꞈ piˇ ve yoˬ. Teˇ hk’awˇ hk’aw k’oˆ ve, “chaw htaꞈ nawˬ maˇ g’a tiˇ pehˍ.” (Bon maˍ ve 5:17) Chaw teˇ g’aˇ shu htaꞈ tiˇ pehˍ ve k’o, yawˇ kaꞈ tiˇ pehˍ ve htaꞈ g’a hkanˍ ve yoˬ.

5. Yaˇ te shawˆ ve htaꞈ G’uiˬ sha hk’aˬ hk’e dawˇ ve le?

⁵ Yaˇ te shawˆ ve htaꞈ G’uiˬ sha hk’aˬ hk’e dawˇ ve le? G’oˇ peˬ hk’aw ve yaˇ ehˉ ve a shaꞈ htawˇ, Yaˬhoˉvaˬ mehˆ g’uˇ suhˍ awˬ hpfuhˇ hk’aˆ jaˇ. Yaˬhoˉvaˬ Iˉsaˍreˍlaˆ chaw htaꞈ piˇ ve awˬ liˇ tawˇ hkawˇ hk’aw chaw teˇ g’aˇ yaˇ hu ma htaꞈ te naˬ leh yaˇ shawˆ ve k’o, chaw oˇ ve teˇ g’aˇ tiˇ pehˍ ve htaꞈ g’a hkanˍ ve yoˬ. (Tawˆ k’ai ve 21:22, 23 g’aw ve; Chiˇ mvuh ve 127:3.) Yaˇ te shawˆ ve teˇ ceuˬ yaꞈ ve yoˬ tehꞈ, chi ngaˬ hui htaꞈ maˍ laˇ ve yoˬ.—K’oˆ maˍ ve awˬ lawn 28 htaꞈ nyi sheˍ.

6, 7. A shaꞈ awˬ hpfuhˇ hk’aˆ jaˇ tehꞈ ngaˬ hui shawˍ ve htaꞈ Yaˬhoˉvaˬ shiˍ tuˬ, hk’aˬ hk’e g’a te ve le?

⁶ Ngaˬ hui ve a shaꞈ leh shu ve a shaꞈ awˬ hpfuhˇ hk’aˆ jaˇ tehꞈ ngaˬ hui shawˍ ve htaꞈ Yaˬhoˉvaˬ shiˍ tuˬ, hk’aˬ hk’e g’a te ve le? Ngaˬ hui ve a shaꞈ leh shu ve a shaꞈ kawˆ tuˬ cawˬ ve htaꞈ maˇ te. Chi htaꞈ pa taw, ngaˬ hui shuˉ maˇ dawˬ, maˉ laˇ maˇ behˇ, awˬ yeꞈ caˆ puiˉ ve naˆ tsuhˇ maˇ yehˇ. Awˬ lawn k’o, awˬ ceuˬ chi teˇ hpaˍ a shaꞈ htaꞈ kawˆ tuˬ leh suh tuˬ te laˇ g’a ve yoˬ.

⁷ Ngaˬ hui ve awˬ to leh a shaꞈ G’uiˬ sha peꞈ laˇ ve pa taw, yawˇ teꞈ chehˇ tcuh gaˇ ve hk’e teꞈ chehˇ cawˇ ve yoˬ. Chi htaꞈ pa taw, ngaˬ hui ve awˬ to htaꞈ hk’a dehꞈ g’a nyi haꞈ shaˉ ve yoˬ. Hk’e maˇ heˆ k’o, G’uiˬ sha mehˆ g’uˇ suhˍ maˇ daꞈ kehˬ. (Roˉmaꞈ 6:19; 12:1;  2 Kawˇrenˍhtuˆ 7:1) Ngaˬ hui a shaꞈ awˬ hpfuhˇ hk’aˆ jaˇ tehꞈ maˇ shawˍ ve k’o, a shaꞈ peꞈ laˇ shehˍ hpaˇ Yaˬhoˉvaˬ htaꞈ oˉ k’oˍ pui maˇ hpehꞈ. A shaꞈ awˬ hpfuhˇ hk’aˆ jaˇ tehꞈ shawˍ ve k’o, ngaˬ hui maˇ daꞈ ve te hk’aˇ htaꞈ baˬ taˉ cawˇ ve yoˬ. Te haˍ jaˇ ve htawˇ, ngaˬ hui coˇ caˇ ve k’o, Yaˬhoˉvaˬ ga laˇ tuˬ yoˬ.

8. Ngaˬ hui ve a shaꞈ leh shu ve a shaꞈ kawˆ tuˬ maˇ cawˬ tuˬ, hk’aˬ hk’e g’a te ve le?

⁸ A shaꞈ awˬ hpfuhˇ hk’aˆ jaˇ ve laꞈ shawnˍ hpehꞈ ve tehꞈ, ngaˬ hui henˇ peuˬ ve yoˬ. Ngaˬ hui ve a shaꞈ leh shu ve a shaꞈ hk’a dehꞈ haꞈ shaˉ tuˬ, ngaˬ hui coˇ caˇ chehˇ ve yoˬ tehꞈ, Yaˬhoˉvaˬ hk’a dehꞈ shiˍ ve yoˬ. Ngaˬ hui mawˍ htawˍ, kaˇ, ciˇ tuˬ ve teˇ ceuˬ le le htaꞈ g’aꞈ htaˇ, shaˍ tiꞈ g’a te ve yoˬ. Kawˆ tuˬ cawˬ ve leˍ guiˇ tuˬ leh haiˬ ve te ve leˍ guiˇ tuˬ htaꞈ ngaˬ hui g’a jaw k’ai ve yoˬ. (Chiˇ mvuh ve 11:5) Ngaˬ hui ve yehˬ kawˆ tuˬ naˬ tuˬ maˇ cawˬ tuˬ, g’a nyi haꞈ shaˉ ve yoˬ. Yaˬhoˉvaˬ Iˉsaˍreˍlaˆ chaw htaꞈ k’oˆ piˇ ve, “nawˬ yehˬ awˬ suhˉ teˇ maˬ te ve k’o, koˇ caˉ htaꞈ hk’a dehꞈ g’a ko taˍ ve yoˬ. Oˇ hk’e te taˍ ve k’o, chaw teˇ g’aˇ g’aˇ ce suh-e cawˇ ve htawˇ, nawˬ teꞈ chiˉ venˇ baˆ maˇ cawˬ.”—Bon maˍ ve 22:8.

9. To nuˇ to shaˆ htaꞈ ngaˬ hui hk’aˬ hk’e maˇ te piˇ cawˇ ve le?

⁹ To nuˇ to shaˆ ve a shaꞈ kaꞈ Yaˬhoˉvaˬ mehˆ g’uˇ suhˍ awˬ hpfuhˇ hk’aˆ ve yoˬ. To nuˇ to shaˆ htaꞈ dawˆ caˇ tuˬ, yawˇ ngaˬ hui htaꞈ a hkaw-anˬ peꞈ laˇ ve yoˬ. Ngaˬ hui htaꞈ kawˆ tuˬ naˬ tuˬ te laˇ ve k’o, dawˆ pehˍ hpehꞈ ve yoˬ. (Awˬ hkuiˉ puiˍ 3:21; 9:3; Tawˆ k’ai ve 21:28) Yaꞈ hk’aˇ, to nuˇ to shaˆ htaꞈ pyawˍ ve hk’aw tuꞈ hkanˍ tcuh ve, tiˇ pehˍ guiˇ ve te maˇ hpehꞈ.—Tawˇ naˉ ve 12:10.

10. Awˬ suhˍ lehˬ a shaꞈ hk’a shuˍ hpehꞈ ve yoˬ tehꞈ, ngaˬ hui hk’aˬ hk’e te shiˍ ve le?

¹⁰ Awˬ suhˍ lehˬ a shaꞈ hk’a shuˍ hpehꞈ ve pa taw, daꞈ kehˬ jaˇ tehꞈ Yaˬhoˉvaˬ shawˍ taˍ ve yoˬ. Kaˍiˉnaˆ Aˍbeˍlaˆ htaꞈ tiˇ pehˍ peuˬ hk’awꞈ nawˉ, Yaˬhoˉvaˬ yawˇ htaꞈ k’oˆ piˇ ve, “nawˬ nyi paˍ ve awˬ suhˍ lehˬ, miˬ guiˬ hk’aw chehˇ taˍ leh, ngaˬ htaꞈ kuˬ chehˇ ve  yoˬ.” (Awˬ hkuiˉ puiˍ 4:10) Aˍbeˍlaˆ ve awˬ suhˍ yawˇ ve a shaꞈ hk’a shuˍ hpehꞈ ve pa taw, Yaˬhoˉvaˬ Kaˍiˉnaˆ htaꞈ suhˉ jehˬ piˇ ve yoˬ. Noˉaꞈ awˬ co-e iˉ kaˆ htonˍ peuˬ hk’awꞈ nawˉ, Yaˬhoˉvaˬ k’awꞈ maˍ laˇ ve, awˬ suhˍ lehˬ a shaꞈ hk’a shuˍ hpehꞈ ve yoˬ. Noˉaꞈ ve yehˬ k’a htaꞈ to nuˇ to shaˆ shaˍ caˇ tuˬ, Yaˬhoˉvaˬ a hkaw-anˬ piˇ ve yoˬ. Yawˇ k’oˆ ve, “awˬ ceuˬ oˇ ve hk’a peu-eˬ leh suhˆ hpaꞈ hawˆ hpaꞈ teˇ hpaˍ htaꞈ nawˬ hui caˇ hpehꞈ ve yoˬ. Oˇ ve hk’a peu-eˬ ngaˬ nawˬ hui htaꞈ piˇ laˇ ve yoˬ.” Yaꞈ hk’aˇ, “a shaꞈ teꞈ ve awˬ ceuˬ hpehꞈ ve awˬ suhˍ teˇ ceuˬ htaꞈ awˬ shaˍ geh teˇ geh nawˬ hui maˇ g’a hkawꞈ caˇ.”—Awˬ hkuiˉ puiˍ 1:29; 9:3, 4.

11. Awˬ suhˍ awˬ lawn Iˉsaˍreˍlaˆ chaw htaꞈ Yaˬhoˉvaˬ hk’aˬ hk’e k’oˆ piˇ ve le?

¹¹ Yaˬhoˉvaˬ Noˉaꞈ htaꞈ awˬ suhˍ taˇ caˇ tehꞈ k’oˆ piˇ peuˬ hk’awꞈ nawˉ aˬ laˬ hk’e 800 hk’awꞈ htaˇ, yawˇ ve chaw htaꞈ k’awꞈ k’oˆ piˇ ve, “Iˉsaˍreˍlaˆ chaw, maˇ heˆ k’o yawˇ hui geh ca chehˇ la taˍ ve chaw hk’aˬ ve teˇ g’aˇ maˇ k’oˆ, caˇ hpehꞈ ve shaˍ leh ngaˆ teˇ hkeh hkeh htaꞈ yuˬ g’a ve k’o, awˬ suhˍ htaꞈ miˬ guiˬ hk’aw g’a duˇ tuˍ ve yoˬ.” Yawˇ k’awꞈ k’oˆ piˇ ve, “awˬ suhˍ teˇ ceuˬ taˇ caˇ.” (Oˉ k’oˍ pui ve 17:13, 14) Yaˬhoˉvaˬ yawˇ ve chaw htaꞈ awˬ suhˍ daꞈ kehˬ jaˇ tehꞈ shawˍ tcuh gaˇ ve yoˬ. Yawˇ hui to nuˇ to shaˆ shaˍ caˇ hpehꞈ ve yoˬ. Yaꞈ hk’aˇ, awˬ suhˍ htaꞈ caˇ maˇ hpehꞈ. To nuˇ to shaˆ dawˆ caˇ htaˇ, awˬ suhˍ jeꞈ hk’aw g’a duˇ tuˍ ve yoˬ.

12. Hkriꞈ yaˇ awˬ suhˍ htaꞈ hk’aˬ hk’e shawˍ ve le?

¹² Yeˍsuˆ suh peuˬ hk’awꞈ nawˉ maˇ maw htaˇ, tcuh yaˇ leh Yeˍruˆsaˍlehnˍ venˇ lo Hkriꞈ yaˇ awˬ moˍ hk’aw nyi haꞈ shaˉ paˍ teˇ hpaˍ hpawnˬ daꞈ ve yoˬ. G’uiˬ sha Iˉsaˍreˍlaˆ chaw htaꞈ awˬ liˇ tawˇ hkawˇ piˇ jaw ve hk’a peu-eˬ htaꞈ g’a g’aꞈ te sheˍ laˇ tehꞈ, teˇ geh chaˬ nyi ve yoˬ. (Tcuh yaˇ 15:28, 29 g’aw ve; 21:25.) Awˬ suhˍ awˬ hpfuhˇ hk’aˆ jaˇ tehꞈ Yaˬhoˉvaˬ shawˍ sheˍ leh daꞈ kehˬ jaˇ tehꞈ Hkriꞈ yaˇ hui kaꞈ shawˍ cawˇ sheˍ ve htaꞈ yawˇ hui na g’a tuˬ, Yaˬhoˉvaˬ ga piˇ ve yoˬ. Awˉ lawˉ htaˇ ve Hkriꞈ yaˇ awˬ suhˍ leh awˬ suhˍ maˇ yuˬ tawˆ ve shaˍ maˇ caˇ. Yawˇ hui caˇ ve k’o, shaˉ hoꞈ htaꞈ oˉ k’oˍ pui ve, haˉ chawˇ haˉ paˆ te ve hk’a shuˍ venˇ baˆ uiˍ  ve yoˬ. Oˇ htaˇ tanˬ leh awˬ tehˬ ve Hkriꞈ yaˇ awˬ suhˍ maˇ caˇ. Chi beuꞈ hk’aˬ hk’e k’ai le? Chi beuꞈ kaꞈ awˬ suhˍ daꞈ kehˬ jaˇ tehꞈ Yaˬhoˉvaˬ shawˍ tcuh gaˇ ve yoˬ.

13. Aˬ htoꞈ ma te Hkriꞈ yaˇ awˬ suhˍ maˇ keu ve le?

¹³ Hkriꞈ yaˇ hui awˬ suhˍ keu hpehꞈ-aw laˇ? Maˇ hpehꞈ. Awˬ suhˍ taˇ caˇ tehꞈ Yaˬhoˉvaˬ ngaˬ hui htaꞈ k’oˆ laˇ ve yoˬ. Tzuhˬ taˇ dawˬ tehꞈ naˆ tsuhˇ shehˍ hpaˇ nawˬ htaꞈ k’oˆ laˇ k’o, nawˬ awˬ to hk’aw juˆ keu tuˬ laˇ? Maˇ juˆ keu! Chi hk’a shuˍ shuˍ, awˬ suhˍ maˇ caˇ tcuh laˇ ve k’o, ngaˬ hui awˬ suhˍ kaꞈ maˇ keu ve yoˬ.—K’oˆ maˍ ve awˬ lawn 29 htaꞈ nyi sheˍ.

14, 15. Hkriꞈ yaˇ a shaꞈ awˬ hpfuhˇ hk’aˆ jaˇ tehꞈ shawˍ ve leh Yaˬhoˉvaˬ hkawˇ na yuˬ ve hk’aˬ hk’e taw a yeˇ uiˍ ve le?

¹⁴ Nawˬ awˬ suhˍ maˇ keu k’o suh tuˬ yoˬ tehꞈ, naˆ tsuhˇ shehˍ hpaˇ k’oˆ laˇ ve k’o, nawˬ hk’aˬ hk’e te tuˬ le? G’uiˬ sha ve awˬ liˇ tawˇ hkawˇ awˬ suhˍ awˬ lawn na yuˬ tuˬ, a shu yawˇ hk’aˇ yawˇ g’a dawˇ cheˆ ve yoˬ. Hkriꞈ yaˇ lehˬ a shaꞈ G’uiˬ sha peꞈ laˇ ve laꞈ shawnˍ awˬ hpfuhˇ hk’aˆ jaˇ tehꞈ shawˍ ve yoˬ. Hk’e te leh, awˬ suhˍ maˇ keu ve awˬ kaˍ awˬ nu teˇ hk’aˇ gu laˇ tuˬ g’aꞈ ca ve yoˬ.

¹⁵ Ngaˬ hui chehˇ sha cawˬ sha gaˇ leh maˇ suh gaˇ. Yaꞈ hk’aˇ, a shaꞈ G’uiˬ sha awˬ pon awˬ hpfuhˇ hk’aˆ ve pa taw, ngaˬ hui awˬ suhˍ maˇ keu. A shaꞈ ponˬ tuˬ Yaˬhoˉvaˬ hkawˇ maˇ na yuˬ ve ngaˬ hui maˇ te gaˇ. Ngaˬ hui ve a shaꞈ aꞈ kehˉ Yaˬhoˉvaˬ hkawˇ na yuˬ ve a yeˇ uiˍ ve yoˬ. Yeˍsuˆ k’oˆ ve, ‘a shu yawˇ ve a shaꞈ htaꞈ ponˬ piˇ gaˇ ve k’o, yawˇ ve a shaꞈ shonˇ tuˬ yoˬ. Ngaˬ awˬ pon a shaꞈ shonˇ ve k’o, yawˇ ve a shaꞈ htaꞈ k’awꞈ g’a tuˬ yoˬ.’ (Maꞈhtehˍ 16:25) Yaˬhoˉvaˬ ngaˬ hui htaꞈ haꞈ ve pa taw, yawˇ hkawˇ na yuˬ gaˇ ve yoˬ. Ngaˬ hui awˬ pon aˬ htoꞈ ma daꞈ jaˇ ve yawˇ ceh tiˉ shiˍ ve yoˬ. A shaꞈ awˬ hpfuhˇ hk’aˆ leh daꞈ kehˬ jaˇ tehꞈ ngaˬ hui htawˇ, Yaˬhoˉvaˬ hk’a shuˍ nyi ve yoˬ.—Heˍbrehˇ 11:6.

16. Aˬ htoꞈ ma pa taw G’uiˬ sha kanˉ te ve chaw yawˇ hkawˇ na yuˬ ve le?

¹⁶ G’uiˬ sha ve awˬ liˇ tawˇ hkawˇ awˬ suhˍ awˬ lawn yawˇ ve kanˉ te ve ka tiꞈ yeˬ ve chaw hk’a dehꞈ na yuˬ ve yoˬ. Yawˇ hui awˬ  suhˍ maˇ caˇ leh awˬ suhˍ kaꞈ maˇ keu. * Yaꞈ hk’aˇ, yawˇ hui awˬ suhˍ maˇ keu ve awˬ kaˍ awˬ nu teˇ hk’aˇ gu laˇ tuˬ g’aꞈ ca ve yoˬ. Awˬ lawn k’o, G’uiˬ sha a shaꞈ peꞈ laˇ shehˍ hpaˇ hpehꞈ ve pa taw, aˬ htoꞈ ma teˇ ceuˬ daꞈ jaˇ ve yawˇ shiˍ ve yoˬ tehꞈ, yawˇ hui yonˍ ve yoˬ. Nawˬ kaꞈ chi hk’a shuˍ yonˍ-aw laˇ?

17. Yaˬhoˉvaˬ Iˉsaˍreˍlaˆ chaw htaꞈ awˬ suhˍ te hk’aˇ tiˉ yehˇ tcuh ve aˬ htoꞈ ma le?

¹⁷ Moˉseˍ ve awˬ liˇ tawˇ hkawˇ hk’aw Yaˬhoˉvaˬ Iˉsaˍreˍlaˆ chaw htaꞈ k’oˆ piˇ ve, “a shaꞈ teꞈ ve awˬ ceuˬ hk’a peu-eˬ lehˬ, awˬ suhˍ htaꞈ pa taw teꞈ chehˇ ve yoˬ. Chi htaꞈ pa taw, G’uiˬ sha lehˬ chaw yaˇ teˇ hpaˍ ve venˇ baˆ g’a ponˬ tuˬ [venˇ baˆ hpehˇ laˇ tuˬ], awˬ suhˍ hk’a peu-eˬ ve htaꞈ tuˉ tanˇ kuiˬ hk’oˆ lo ngeuˍ pfuhˍ tcuh taˍ ve yoˬ.” (Oˉ k’oˍ pui ve 17:11) Iˉsaˍreˍlaˆ chaw venˇ baˆ te yaꞈ htaˇ, Yaˬhoˉvaˬ venˇ baˆ hpehˇ piˇ tuˬ, to nuˇ to shaˆ g’a tuˉ tanˇ piˇ ve yoˬ. Paw hkuˇ to nuˇ to shaˆ ve awˬ suhˍ yuˬ leh bon yehˬ hk’aw tuˉ tanˇ kuiˬ hk’oˆ lo ngeuˍ pfuhˍ ve yoˬ. Yaˬhoˉvaˬ Iˉsaˍreˍlaˆ chaw htaꞈ awˬ suhˍ chi te hk’aˇ ceh tiˉ yehˇ tcuh ve yoˬ.

18. Yeˍsuˆ a shaꞈ tanˇ laˇ ve ngaˬ hui hk’aˬ hk’e ve awˬ bon g’a ve le?

¹⁸ Yeˍsuˆ miˬ guiˬ hk’oˆ laˬ leh ngaˬ hui ve venˇ baˆ htaꞈ hpehˇ laˇ tuˬ, yawˇ ve a shaꞈ tanˇ laˇ ve yoˬ. Hk’e te leh, to nuˇ to shaˆ htaꞈ tuˉ tanˇ tuˬ maˇ loˍ. (Maꞈhtehˍ 20:28; Heˍbrehˇ 10:1) Yeˍsuˆ ve a shaꞈ awˬ hpfuhˇ hk’aˆ jaˇ ve pa taw, Yaˬhoˉvaˬ yawˇ htaꞈ mvuhˇ naw ma hk’oˆ k’awꞈ teꞈ tu la piˇ peuˬ hk’awꞈ nawˉ, Yaˬhoˉvaˬ chaw yaˇ htaꞈ co co taiˍ taiˍ a shaꞈ peꞈ laˇ g’a ve yoˬ.—Yoˇhanˬ 3:16; Heˍbrehˇ 9:11, 12; 1 Peˍtruˆ 1:18, 19.

19. Tcuh yaˇ liꞈ 20:26, 27 hk’aw ngaˬ hui htaꞈ hk’aˬ hk’e beˆ maˍ laˇ ve le?

¹⁹ Yaˬhoˉvaˬ ngaˬ hui htaꞈ a shaꞈ peꞈ laˇ ve awˬ bon uiˍ jaˇ ve  yoˬ! Yeˍsuˆ htaꞈ yonˍ ve k’o, co co taiˍ taiˍ a shaꞈ teꞈ chehˇ g’a tuˬ yoˬ tehꞈ, ngaˬ hui shu htaꞈ k’oˆ piˇ gaˇ ve yoˬ. Ngaˬ hui shu htaꞈ haꞈ leh hk’aˬ hk’e te leh a shaꞈ g’a tuˬ k’oˆ maˍ piˇ ve yoˬ. (Yeˍsaˍkeˍlaˆ 3:17-21) Oˇ hk’e te k’o, Pawˇluꞈ k’oˆ ve hk’e ngaˬ hui htawˇ k’oˆ g’a ve yoˬ. “Hk’e te leh, nawˬ hui hk’a peu-eˬ ve awˬ suhˍ htaꞈ ngaˬ ponˬ ve yoˬ tehꞈ, yaꞈ nyi ngaˬ nawˬ hui htaꞈ shaˉ hkiˆ hkanˍ ve yoˬ. Awˬ lawn k’o G’uiˬ sha ve a loˍ hk’a peu-eˬ nawˬ hui htaꞈ maˍ laˇ tuˬ ngaˬ maˇ jaw k’ai.” (Tcuh yaˇ 20:26, 27) Yaˬhoˉvaˬ ve awˬ lawn leh a shaꞈ awˬ hpfuhˇ hk’aˆ jaˇ tehꞈ ngaˬ hui shu htaꞈ k’oˆ piˇ ve k’o, ngaˬ hui a shaꞈ awˬ hpfuhˇ hk’aˆ jaˇ tehꞈ shawˍ leh awˬ suhˍ htaꞈ taˍ uiˍ ve tehꞈ hpeuꞈ maw piˇ g’a ve yoˬ.