1. Nawˬ laiˉ lawn henˇ-oˬ ve pa taw, chi teˇ hkui hk’aˬ hk’e dawˇ ve le?

G’uiˬ sha ka tiꞈ te taˍ ve co co taiˍ taiˍ ve a shaꞈ, suh peuˬ ve chaw hk’aˬ hk’e k’ai ve, teꞈ tu la ve dawˇ law kuiˬ, Liꞈ hpu hk’aw cawˬ ve awˬ tehˬ ve laiˉ lawn liꞈ chi teˇ k’oˆ hk’aw nawˬ g’a henˇ peuˬ. (Cuˇ yiˍ piˇ ve 9:5; Luˉkaꞈ 23:43; Yoˇhanˬ 5:28, 29; Hpeuꞈ maˍ ve 21:3, 4) Nawˬ Yaˬhoˉvaˬ ve Shaˉhkiˆhkanˍ ve chaw geh hpawnˬ daꞈ kuiˬ lo k’ai chehˇ leh yawˇ hui G’uiˬ sha htaꞈ oˉ k’oˍ pui chehˇ ve cawˇ ve yoˬ tehꞈ nawˬ yonˍ ve yoˬ hehˉ. (Yoˇhanˬ 13:35) Nawˬ Yaˬhoˉvaˬ htaꞈ tanˬ meuˆ daꞈ leh yawˇ ve kanˉ te gaˇ tuˬ yoˬ. ‘Chi  teˇ hkui G’uiˬ sha kanˉ te gaˇ ve k’o, hk’aˬ hk’e te cawˇ ve le?’ Nawˬ chi hk’e dawˇ chehˇ ve yoˬ hehˉ.

2. Aˬ htoꞈ ma te Ehˇtaˍyoˇpiˆ hawˉ hk’aˆ chi teˇ g’aˇ Baˆtiˆsaˬ haꞈ yuˬ gaˇ ve le?

² Yeˍsuˆ awˬ co-e htaˇ, Ehˇtaˍyoˇpiˆ hawˉ hk’aˆ teˇ g’aˇ chi hk’e dawˇ ve yoˬ. Yeˍsuˆ teꞈ tu la peuˬ hk’awꞈ nawˉ maˇ maw sheˍ htaˇ, Yeˍsuˆ ve awˬ laꞈ g’awˇ Hpiˇliˇpuˆ hawˉ hk’aˆ chi teˇ g’aˇ htaꞈ Yeˍsuˆ Meˍsiˉyaꞈ hpehꞈ ve shaˉ hkiˆ hkanˍ maˍ piˇ ve yoˬ. Yawˇ dawˇ cawˇ leh k’oˆ ve, “nyi loˬ, choˬ kaˬ iˉ kaˆ cawˬ ve yoˬ. Ngaˬ Baˆtiˆsaˬ maˇ g’a hkanˍ tuˬ aˬ htoꞈ ma tawˍ taˍ tuˬ cawˬ le?”—Tcuh yaˇ 8:26-36.

3. (a) Yeˍsuˆ awˬ laꞈ g’awˇ htaꞈ aˬ htoꞈ ma te tcuh ve le? (b) Baˆtiˆsaˬ haꞈ yuˬ ve hk’aˬ hk’e g’a te ve le?

³ Liꞈ hpu hk’aw hk’a tawˍ lehˆ k’oˆ taˍ ve, nawˬ Yaˬhoˉvaˬ ve kanˉ te gaˇ ve k’o, Baˆtiˆsaˬ g’a haꞈ yuˬ ve yoˬ. Yeˍsuˆ awˬ laꞈ g’awˇ htaꞈ k’oˆ piˇ ve, ‘nawˬ hui k’ai leh, chaw ceuˬ hk’a peu-eˬ ngaˬ ve awˬ laꞈ g’awˇ hpehꞈ la tuˬ ca te-o. Yawˇ hui htaꞈ Baˆtiˆsaˬ piˇ-oˆ.’ (Maꞈhtehˍ 28:19) Yeˍsuˆ Baˆtiˆsaˬ haꞈ yuˬ ve lehˬ yawˇ henˇ yuˬ tuˬ te maˍ laˇ ve yoˬ. Iˉ kaˆ hpehꞈ pfuhˍ leh oˉ k’oˍ hk’oˆ ngeuˍ pfuhˍ ve ceh maˇ heˆ, yawˇ ve awˬ to hk’a peu-eˬ iˉ kaˆ hk’aw tuˍ keu ve yoˬ. (Maꞈhtehˍ 3:16) Chi beuꞈ teˇ co-e htawˇ, Hkriꞈ yaˇ Baˆtiˆsaˬ haꞈ yuˬ ve k’o, awˬ to hk’a peu-eˬ iˉ kaˆ hk’aw g’a tuˍ keu ve yoˬ.

4. Nawˬ Baˆtiˆsaˬ haˬ yuˬ htaˇ, shu htaꞈ aˬ htoꞈ ma hpeuꞈ maw piˇ ve le?

⁴ Baˆtiˆsaˬ haꞈ yuˬ ve lehˬ nawˬ G’uiˬ sha htaꞈ awˬ chawˇ te gaˇ leh yawˇ ve kanˉ htaꞈ te gaˇ ve yoˬ tehꞈ, shu htaꞈ hpeuꞈ maw piˇ ve yoˬ. (Chiˇ mvuh ve 40:7, 8) Yaꞈ hk’aˇ, ‘ngaˬ Baˆtiˆsaˬ haꞈ yuˬ gaˇ ve k’o, hk’aˬ hk’e g’a te ve le?’ tehꞈ nawˬ htawˇ dawˇ nawˬ dawˇ te chehˇ ve yoˬ hehˉ.

5. (a) Nawˬ Baˆtiˆsaˬ haꞈ yuˬ g’a hpehꞈ tuˬ, hk’aˬ hk’e g’a te sheˍ ve le? (b) Aˬ htoꞈ ma te hk’aˬ htaˆ kaꞈ hpawnˬ daꞈ kuiˬ lo k’ai ve a yeˇ uiˍ ve le?

⁵ Nawˬ Baˆtiˆsaˬ haꞈ yuˬ g’a hpehꞈ tuˬ, Yaˬhoˉvaˬ leh Yeˍsuˆ  htaꞈ g’a shiˍ daꞈ ve yoˬ. Nawˬ Liꞈ hpu tanˬ henˇ htaˇ, yawˇ huiˉ maˬ htaꞈ tanˬ shiˍ daꞈ la ve yoˬ. (Yoˇhanˬ 17:3 g’aw ve.) Yaꞈ hk’aˇ, chi hk’e ceh maˇ lawꞈ. Liꞈ hpu hk’aw k’oˆ ve, Yaˬhoˉvaˬ ve a loˍ “cuˇ yiˍ maˍ yiˍ” nawˬ hk’a biˇ biˇ shiˍ tuˬ loˍ ve yoˬ. (Kawˇlawˇsehˇ 1:9) Yaˬhoˉvaˬ ve Shaˉhkiˆhkanˍ ve chaw geh hpawnˬ daꞈ kuiˬ lo k’ai ve k’o, Yaˬhoˉvaˬ htaꞈ shiˍ daꞈ meuˆ daꞈ maˇ la tuˬ ga laˇ g’a ve yoˬ. Chi htaꞈ pa taw, Yaˬhoˉvaˬ ve Shaˉhkiˆhkanˍ ve chaw geh hk’aˬ htaˆ kaꞈ hpawnˬ daꞈ kuiˬ lo k’ai cawˇ ve yoˬ.—Heˍbrehˇ 10:24, 25.

6. Nawˬ Baˆtiˆsaˬ haꞈ yuˬ g’a hpehꞈ tuˬ, Liꞈ hpu hk’aw ve awˬ lawn hk’aˬ hk’e taw g’a shiˍ cawˇ ve le?

⁶ Nawˬ Baˆtiˆsaˬ haꞈ yuˬ g’a hpehꞈ tuˬ, Liꞈ hpu hk’aw hk’a peu-eˬ g’a shiˍ ve yoˬ tehꞈ, Yaˬhoˉvaˬ maˇ dawˇ law. Chi hk’a shuˍ, Ehˇtaˍyoˇpiˆ hawˉ hk’aˆ oˇ ve teˇ g’aˇ Baˆtiˆsaˬ haꞈ yuˬ g’a tuˬ hk’a peu-eˬ shiˍ tuˬ, G’uiˬ sha maˇ dawˇ law ve yoˬ. (Tcuh yaˇ 8:30, 31) Awˬ tehˬ k’o, Yaˬhoˉvaˬ ve awˬ lawn ngaˬ hui g’a henˇ tcuhˉ taˍ ve yoˬ. (Cuˇ yiˍ piˇ ve 3:11) Nawˬ Baˆtiˆsaˬ haꞈ yuˬ g’a hpehꞈ tuˬ, Liꞈ hpu hk’aw a yeˇ uiˍ ve awˬ lawn htaꞈ g’a henˇ leh g’a haꞈ yuˬ ve yoˬ.—Heˍbrehˇ 5:12.

7. Liꞈ hpu henˇ ve teˇ ceuˬ nawˬ htaꞈ aˬ htoꞈ ma ga laˇ ve le?

⁷ Liꞈ hpu hk’aw k’oˆ ve, “yonˍ ve teˇ ceuˬ maˇ cawˬ ve k’o, G’uiˬ sha nyi hk’aˇ suh tuˬ te maˇ g’a.” (Heˍbrehˇ 11:6) Chi htaꞈ pa taw, Baˆtiˆsaˬ maˇ haꞈ yuˬ sheˍ htaˇ, yonˍ ve teˇ ceuˬ g’a cawˬ ve yoˬ. Liꞈ hpu hk’aw k’oˆ ve, aˬ sho-eˬ htaˇ Kawˇrenˍhtuˆ venˇ hk’aw chehˇ ve chaw teˇ hpaˍ Yeˍsuˆ ve awˬ laꞈ g’awˇ maˍ ve htaꞈ g’a kaˇ htaˇ, “yonˍ ve awˬ hk’aw lo Baˆtiˆsaˬ hkanˍ yuˬ ve yoˬ.” (Tcuh yaˇ 18:8) Chi hk’a shuˍ shuˍ, G’uiˬ sha ve ka tiꞈ teˇ hpaˍ leh venˇ baˆ leh suh ve htaꞈ Yeˍsuˆ htaiˍ hk’awꞈ laˇ ve htaꞈ nawˬ yonˍ tuˬ, Liꞈ hpu henˇ ve lehˬ nawˬ htaꞈ ga laˇ ve yoˬ.—Yawˇsuˆ 23:14; Tcuh yaˇ 4:12; 2 Tiˆmoˉseˍ 3:16, 17.

8. Nawˬ henˇ chehˇ ve awˬ ceuˬ aˬ htoꞈ ma te shu htaꞈ k’oˆ maˍ piˇ gaˇ ve le?

⁸ Nawˬ Liꞈ hpu maˇ maˇ henˇ leh nawˬ ve a shaꞈ daꞈ la chehˇ ve htaꞈ mawˬ htaˇ, nawˬ yonˍ ve teˇ ceuˬ kaꞈ maˇ la ve yoˬ. Nawˬ henˇ chehˇ ve awˬ ceuˬ shu htaꞈ k’oˆ maˍ piˇ gaˇ ve yoˬ. (Yeˍraˍmiˆ 20:9; 2 Kawˇrenˍhtuˆ 4:13) Nawˬ a shu htaꞈ k’oˆ maˍ piˇ cawˇ ve le?

9, 10. (a) Nawˬ g’a henˇ ve awˬ ceuˬ a shu htaꞈ k’oˆ piˇ tuˬ le? (b) Awˬ viˉ awˬ nyi Hkriꞈ yaˇ awˬ moˍ geh nawˬ hto toˇ gaˇ ve k’o, hk’aˬ hk’e g’a te ve le?

⁹ Nawˬ henˇ chehˇ ve awˬ ceuˬ nawˬ ve yehˬ k’a hk’aw ve chaw, awˬ chawˇ awˬ paˆ, kanˉ te kuiˬ lo k’oˆ maˍ piˇ gaˇ ve yoˬ hehˉ. Nawˬ chi hk’e te gaˇ ve daꞈ ve yoˬ. Yaꞈ hk’aˇ, haꞈ pehnˇ ve awˬ hk’aw lo nawˬ yawˇ hui htaꞈ a yehˉ yehˉ k’oˆ maˍ piˇ cawˇ ve yoˬ. Nawˬ Hkriꞈ yaˇ awˬ moˍ geh hto toˇ gaˇ-aˬ tehꞈ dawˇ ve k’o, Liꞈ hpu maˍ laˇ chehˇ ve chaw htaꞈ k’oˆ piˇ g’a ve yoˬ. Liꞈ hpu hk’aw cawˬ ve awˬ liˇ awˬ hk’aˇ htaꞈ hawˍ daꞈ ve hk’e, nawˬ ve a shaꞈ pa la ve htaꞈ yawˇ maw k’o, nawˬ leh yawˇ nyi haꞈ shaˉ shehˍ hpaˇ 2 g’aˇ geh tawˇ ca yaw daꞈ hpehꞈ ve yoˬ.

¹⁰ Nyi haꞈ shaˉ shehˍ hpaˇ nawˬ htaꞈ aˬ htoꞈ ma k’oˆ laˇ tuˬ le? Liꞈ hpu hk’aw a yeˇ uiˍ ve awˬ lawn htaꞈ nawˬ na g’a leh yonˍ ve, Liꞈ hpu hk’aw g’a henˇ ve hk’e a shaꞈ teꞈ kuiˬ lo nawˬ yuˬ yehˇ ve, Yaˬhoˉvaˬ ve Shaˉhkiˆhkanˍ ve chaw nawˬ awˬ tehˬ hpehꞈ gaˇ ve chi teˇ hpaˍ htaꞈ nyi haꞈ shaˉ shehˍ hpaˇ shiˍ tuˬ, yawˇ hui nawˬ geh tawˇ yaw daꞈ tuˬ yoˬ. Nyi haꞈ shaˉ shehˍ hpaˇ lehˬ Hkriꞈ yaˇ awˬ moˍ teˇ g’aˇ le le htaꞈ nyi haꞈ shaˉ tuˬ awˬ vuiˬ cawˬ ve yoˬ. Chi htaꞈ pa taw, nawˬ yawˇ hui htaꞈ tawˇ yaw daꞈ tuˬ taˇ kawˆ. (Tcuh yaˇ 20:28; 1 Peˍtruˆ 5:2, 3) Nawˬ yawˇ hui geh tawˇ yaw daꞈ peuˬ hk’awꞈ nawˉ, awˬ viˉ awˬ nyi Hkriꞈ yaˇ awˬ moˍ geh tanˬ hto toˇ k’ai hpehꞈ maˇ hpehꞈ ve k’oˆ laˇ tuˬ yoˬ.

11. Hkriꞈ yaˇ awˬ moˍ awˬ viˉ awˬ nyi geh maˇ hto toˇ sheˍ awˬ g’uˇ suhˍ htaˇ, aˬ htoꞈ ma te pa tuˬ a yeˇ uiˍ ve le?

 ¹¹ Hkriꞈ yaˇ awˬ moˍ awˬ viˉ awˬ nyi geh hto toˇ hpehꞈ tuˬ teˇ ceuˬ ceuˬ g’a pa sheˍ tehꞈ, nyi haꞈ shaˉ shehˍ hpaˇ k’oˆ laˇ tuˬ yoˬ. Aˬ htoꞈ ma te pa tuˬ a yeˇ uiˍ ve le? Yaˬhoˉvaˬ ve awˬ lawn shu htaꞈ maˍ piˇ htaˇ, ngaˬ hui yawˇ ve awˬ tan te chehˇ ve pa taw, ngaˬ hui ve a shaꞈ teꞈ kuiˬ lo yawˇ htaꞈ yawˆ yan piˇ cawˇ ve yoˬ.—1 Kawˇrenˍhtuˆ 6:9, 10; Gaˍlaˍtiˆ 5:19-21.

12. Aˬ htoꞈ ma te ngaˬ hui teˇ g’aˇ le le dawˇ hpfuhˆ tuˬ loˍ ve le?

¹² Baˆtiˆsaˬ maˇ haꞈ yuˬ sheˍ htaˇ, nawˬ te tuˬ ve laiˉ ceuˬ k’awꞈ cawˬ sheˍ ve yoˬ. Tcuh yaˇ Peˍtruˆ k’oˆ ve, “nawˬ hui ve venˇ baˆ htaꞈ shiˆ baˬ laˇ tuˬ, venˇ baˆ htaꞈ dawˇ hpfuhˆ leh nyi ma k’awꞈ pa-o.” (Tcuh yaˇ 3:19) Dawˇ hpfuhˆ ve tcuhˉ kuiˬ aˬ htoꞈ ma le? Nawˬ te yaꞈ jaw ve awˬ ceuˬ htaꞈ awˬ tehˬ awˬ na nyi ma luˬ ve yoˬ. Tawˇ pa haˉ te k’o, nawˬ pehꞈ ve tzuhˆ ve te jaw ve k’o, maˇ g’a k’awꞈ te tuˬ g’a dawˇ hpfuhˆ ve yoˬ. Nawˬ teꞈ chehˇ ve teˇ co-e cawˇ ve htaꞈ te tuˬ hk’aˬ htaˆ kaꞈ coˇ caˇ ve htawˇ, dawˇ hpfuhˆ tuˬ loˍ sheˍ ve yoˬ. Awˬ lawn k’o, ngaˬ hui teˇ g’aˇ le le te yaꞈ puiˉ ve yoˬ. G’uiˬ sha venˇ baˆ hpehˇ laˇ tuˬ, ngaˬ hui g’a lawˬ ve yoˬ.—Roˉmaꞈ 3:23; 5:12.

13. “Nyi ma k’awꞈ pa-o” tehꞈ k’oˆ ve aˬ htoꞈ ma k’oˆ gaˇ ve le?

¹³ Te yaꞈ k’ai peuˬ ve htaꞈ nyi ma luˬ ve ceh lawꞈ ve laˇ? Maˇ lawꞈ. Peˍtruˆ k’oˆ ve nawˬ “nyi ma k’awꞈ pa-o.” K’oˆ gaˇ ve lehˬ, yaꞈ nyi tanˬ leh cawˇ ve awˬ ceuˬ htaꞈ te tuˬ, maˇ te yaꞈ tuˬ dawˇ taˍ ve yoˬ. Nawˬ dawˇ nyi sheˍ, nawˬ maˇ k’ai jaw kuiˬ lo kaˇ g’aꞈ k’ai htaˇ, teˇ tawn gaˬ leh yaꞈ k’aw yaꞈ ve yoˬ tehꞈ nawˬ shiˍ la ve yoˬ. Nawˬ hk’aˬ hk’e te tuˬ le? Nawˬ kaˇ a yehˉ yehˉ g’aꞈ leh jehˇ leh k’awꞈ paˍ k’awꞈ la ve yoˬ. Peuˬ hk’awꞈ nawˉ, yaꞈ k’aw awˬ suhˉ te caˆ lo k’awꞈ g’aꞈ k’ai ve yoˬ. Chi hk’a shuˍ shuˍ, nawˬ Liꞈ hpu henˇ ve teˇ yanˇ, te hk’aˇ teˇ hpaˍ, te yaꞈ chehˇ sheˍ ve awˬ ceuˬ  htaꞈ pa tuˬ shiˍ ve yoˬ. Nawˬ maˇ te yaꞈ tuˬ, “nyi ma k’awꞈ pa” leh cawˇ ve awˬ ceuˬ htaꞈ tanˬ te cawˇ ve yoˬ.

14. G’uiˬ sha htaꞈ awˬ to chiˇ aꞈ piˇ ve hk’aˬ hk’e g’a te ve le?

¹⁴ Baˆtiˆsaˬ maˇ haꞈ yuˬ sheˍ htaˇ, nawˬ g’a te cawˇ ve teˇ ceuˬ lehˬ Yaˬhoˉvaˬ htaꞈ awˬ to chiˇ aꞈ piˇ ve yoˬ. K’oˆ gaˇ ve lehˬ, nawˬ bon lawˬ ve awˬ hk’aw lo Yaˬhoˉvaˬ htaꞈ ceh tiˉ oˉ k’oˍ pui leh a shaꞈ teꞈ kuiˬ lo yawˇ ve a loˍ g’aꞈ te tuˬ yoˬ tehꞈ, ka tiꞈ te piˇ ve yoˬ.—Bon maˍ ve 6:15.

15, 16. Aˬ htoꞈ ma te ngaˬ hui G’uiˬ sha htaꞈ awˬ to chiˇ aꞈ piˇ gaˇ ve le?

¹⁵ Yaˬhoˉvaˬ htaꞈ ceh tiˉ oˉ k’oˍ pui tuˬ yoˬ tehꞈ, ka tiꞈ te piˇ ve lehˬ nawˬ haꞈ ve chaw htaꞈ teˇ co-e teˇ geh chehˇ suh tuˬ yoˬ tehꞈ, ka tiꞈ te piˇ ve hk’a shuˍ yoˬ. Hawˉ hk’aˆ leh yaˇ miˇ dawˇ cawˇ daꞈ ve htaꞈ dawˇ nyi sheˍ. Yawˇ yaˇ miˇ oˇ ve htaꞈ maˇ maˇ shiˍ daꞈ la ve k’o, yawˇ yawˇ htaꞈ haꞈ maˇ la leh heuˆ daꞈ tuˬ dawˇ cheˆ ve yoˬ. A shaꞈ teꞈ kuiˬ lo dawˇ cheˆ ve chi a yeˇ uiˍ ve yoˬ tehꞈ shiˍ ve htawˇ, yawˇ htaꞈ haꞈ ve pa taw, te gaˇ ve yoˬ.

¹⁶ Nawˬ Yaˬhoˉvaˬ htaꞈ shiˍ daꞈ la ve teˇ yanˇ, yawˇ htaꞈ haꞈ leh yawˇ ve kanˉ htaꞈ te gaˇ tuˬ yoˬ. Hk’e te leh, bon lawˬ ve awˬ hk’aw lo Yaˬhoˉvaˬ ve kanˉ te tuˬ nawˬ yawˇ htaꞈ ka tiꞈ te piˇ gaˇ ve yoˬ. Liꞈ hpu hk’aw k’oˆ ve, Yeˍsuˆ awˬ hk’aˇ suh g’aꞈ te gaˇ ve chaw “a shu yawˇ ve a loˍ htaꞈ baˬ taˉ” ve yoˬ. (Maˍkuˆ 8:34) Chi ve aˬ htoꞈ ma k’oˆ gaˇ ve le? K’oˆ gaˇ ve lehˬ, a shaꞈ teꞈ kuiˬ lo Yaˬhoˉvaˬ hkawˇ na yuˬ ve teˇ ceuˬ a yeˇ uiˍ jaˇ. A shu yawˇ awˬ to te gaˇ ve hk’e te ve aꞈ kehˉ Yaˬhoˉvaˬ ve a loˍ htaꞈ te ve a yeˇ uiˍ jaˇ ve yoˬ.—1 Peˍtruˆ 4:2 g’aw ve.

17. Aˬ htoꞈ ma te chaw teˇ hpaˍ Yaˬhoˉvaˬ htaꞈ awˬ to maˇ chiˇ aꞈ piˇ ve le?

¹⁷ Chaw teˇ hpaˍ ka tiꞈ te taˍ ve hk’e maˇ te g’a ve htaꞈ kawˆ ve pa taw, Yaˬhoˉvaˬ htaꞈ awˬ to maˇ chiˇ aꞈ piˇ ve yoˬ. Yawˇ hui  Yaˬhoˉvaˬ htaꞈ nyi ma maˇ luˬ tcuh gaˇ. Teˇ hpaˍ hpaˍ dawˇ ve, Yaˬhoˉvaˬ htaꞈ awˬ to maˇ chiˇ aꞈ piˇ ve k’o, te yaꞈ htaˇ kaꞈ yawˇ ciˍ yanˍ laˇ ve htaꞈ kawˆ tuˬ maˇ loˍ.

18. Yaˬhoˉvaˬ yawˇ nyi ma luˬ tuˬ te piˇ ve htaꞈ aˬ htoꞈ ma te ngaˬ hui kawˆ tuˬ maˇ loˍ ve le?

¹⁸ Nawˬ Yaˬhoˉvaˬ htaꞈ haꞈ ve k’o, yawˇ nyi ma luˬ tuˬ te piˇ ve htaꞈ kawˆ tuˬ maˇ loˍ. Yawˇ htaꞈ ka tiꞈ te piˇ taˍ ve hk’e, haꞈ shaˉ g’a tuˬ g’aˇ hteꞈ g’a coˇ caˇ ve yoˬ. (Cuˇ yiˍ piˇ ve 5:4; Kawˇlawˇsehˇ 1:10) Chi hk’oˆ kaꞈ, Yaˬhoˉvaˬ ve a loˍ g’aꞈ te tuˬ haˍ jaˇ tehꞈ, nawˬ maˇ dawˇ ve yoˬ. Tcuh yaˇ Yoˇhanˬ bvuhꞈ taˍ ve, “G’uiˬ sha htaꞈ haꞈ ve tehꞈ k’oˆ ve lehˬ, yawˇ piˇ taˍ ve tawˇ hkawˇ teˇ hpaˍ htaꞈ ngaˬ hui na yuˬ leh te ve htaꞈ k’oˆ ve yoˬ. Chi hk’oˆ kaꞈ, yawˇ piˇ taˍ ve tawˇ hkawˇ teˇ hpaˍ lehˬ, haˍ jaˇ ve teˇ ceuˬ hpehꞈ ve maˇ heˆ.”—1 Yoˇhanˬ 5:3.

19. Yaˬhoˉvaˬ htaꞈ awˬ to chiˇ aꞈ piˇ tuˬ, aˬ htoꞈ ma te nawˬ kawˆ tuˬ maˇ loˍ ve le?

¹⁹ Nawˬ teˇ ceuˬ le le daꞈ peuˬ-oˬ htaˇ hehꞈ, Yaˬhoˉvaˬ htaꞈ awˬ to chiˇ aꞈ piˇ-a tehꞈ dawˇ tuˬ maˇ loˍ. Ngaˬ hui maˇ te g’a ve awˬ ceuˬ yawˇ maˇ dawˇ law. (Chiˇ mvuh ve 103:14) Nawˬ cawˇ ve htaꞈ te tuˬ, yawˇ ga laˇ tuˬ yoˬ. (Iˉsaˍyaˆ 41:10) Nawˬ Yaˬhoˉvaˬ htaꞈ nyi ma awˬ tawˬ hk’a gaˬ g’aˇ va ve k’o, “yawˇ nawˬ htaꞈ cawˇ ve yaꞈ k’aw beˆ maˍ laˇ tuˬ yoˬ.”—Tawˇ naˉ ve 3:5, 6.

20. Yaˬhoˉvaˬ htaꞈ awˬ to chiˇ aꞈ piˇ peuˬ hk’awꞈ nawˉ, nawˬ aˬ htoꞈ ma te hpehꞈ ve le?

²⁰ Nawˬ dawˇ ve Yaˬhoˉvaˬ htaꞈ awˬ to chiˇ aꞈ piˇ yanˇ gaˬ-oˬ laˇ? Yaˬhoˉvaˬ htaꞈ awˬ to chiˇ aꞈ piˇ peuˬ hk’awꞈ nawˉ, Baˆtiˆsaˬ haꞈ yuˬ g’a ve yoˬ.

21, 22. Nawˬ yonˍ ve teˇ ceuˬ “mawꞈ k’aw hkanˍ yuˬ ve” hk’aˬ htaˆ le?

²¹ Nawˬ Baˆtiˆsaˬ haꞈ yuˬ gaˇ ve k’o, hk’aˬ hk’e te tuˬ le? Nawˬ ve Hkriꞈ yaˇ awˬ moˍ hk’aw nyi haꞈ shaˉ paˍ awˬ moˍ ve kanˉ caˉ  daꞈ paˍ htaꞈ g’a k’oˆ piˇ ve yoˬ. Nawˬ Yaˬhoˉvaˬ htaꞈ awˬ to chiˇ aꞈ piˇ-oˬ, Baˆtiˆsaˬ haꞈ yuˬ gaˇ ve yoˬ tehꞈ k’oˆ piˇ sheˍ. Yawˇ nyi haꞈ shaˉ paˍ teˇ hpaˍ htaꞈ k’oˆ piˇ leh Liꞈ hpu hk’aw a yeˇ uiˍ ve awˬ lawn yawˇ hui nawˬ htaꞈ hpfuhˆ na laˇ ve yoˬ. Nawˬ Baˆtiˆsaˬ haꞈ yuˬ hpehꞈ ve htaꞈ yawˇ hui mawˬ ve k’o, shawˉ teˇ pawˆ hpawnˬ daꞈ lonˉ hk’aw Baˆtiˆsaˬ haꞈ yuˬ hpehꞈ ve yoˬ tehꞈ k’oˆ laˇ tuˬ yoˬ. Oˇ kaˬ lo Baˆtiˆsaˬ haꞈ yuˬ ve tcuhˉ kuiˬ bon maˍ laˇ tuˬ yoˬ. Bon maˍ paˍ nawˬ htaꞈ na hkawˇ 2  hkawˇ na laˇ tuˬ yoˬ. Nawˬ hk’awꞈ piˇ htaˇ yonˍ ve teˇ ceuˬ “mawꞈ k’aw hkanˍ yuˬ ve” yoˬ.—Roˉmaꞈ 10:10.

²² Oˇ ve hk’awꞈ nawˉ, nawˬ Baˆtiˆsaˬ haꞈ yuˬ ve yoˬ. Awˬ to hk’a peu-eˬ iˉ kaˆ hk’aw tuˍ keu ve yoˬ. Nawˬ Baˆtiˆsaˬ haꞈ yuˬ htaˇ, Yaˬhoˉvaˬ htaꞈ awˬ to chiˇ aꞈ piˇ-oˬ tehꞈ, chaw teˇ g’aˇ le le g’a shiˍ  ve yoˬ. Chi teˇ hkui nawˬ Yaˬhoˉvaˬ ve Shaˉhkiˆhkanˍ ve chaw teˇ g’aˇ hpehꞈ la ve yoˬ.

23. “Awˬ pa, Yaˇ hpu leh daꞈ ve kehˬ ve Awˬ ha hpu awˬ meh awˬ hawˉ lo” Baˆtiˆsaˬ haꞈ yuˬ ve tcuhˉ kuiˬ hk’aˬ hk’e le?

²³ Yeˍsuˆ yawˇ ve awˬ laꞈ g’awˇ htaꞈ k’oˆ piˇ ve, “Awˬ pa, Yaˇ hpu leh daꞈ ve kehˬ ve Awˬ ha hpu awˬ meh awˬ hawˉ lo” Baˆtiˆsaˬ g’a haꞈ yuˬ ve yoˬ. (Maꞈhtehˍ 28:19 g’aw ve.) Chi ve tcuhˉ kuiˬ aˬ htoꞈ ma le? K’oˆ gaˇ ve lehˬ, Yaˬhoˉvaˬ ve kanˇ paˆ maˇ k’oˆ, Yeˍsuˆ G’uiˬ sha ve a loˍ te ve maˇ k’oˆ, G’uiˬ sha ve a loˍ biˇ la tuˬ awˬ ha hpu htaꞈ yehˇ ve maˇ k’oˆ, nawˬ haꞈ yuˬ ve yoˬ.—Chiˇ mvuh ve 83:18; Maꞈhtehˍ 28:18; Gaˍlaˍtiˆ 5:22, 23; 2 Peˍtruˆ 1:21.

24, 25. (a) Baˆtiˆsaˬ haꞈ yuˬ ve tcuhˉ kuiˬ aˬ htoꞈ ma le? (b) Awˬ leh meuˇ teˇ lawn hk’aw aˬ htoꞈ ma henˇ tuˬ le?

²⁴ Baˆtiˆsaˬ haꞈ yuˬ htaˇ, awˬ nu ve tcuhˉ kuiˬ kaꞈ k’awꞈ cawˬ sheˍ. Nawˬ awˬ to hk’a peu-eˬ iˉ kaˆ hk’aw tuˍ keu htaˇ, k’oˆ gaˇ ve lehˬ a shaꞈ teꞈ hk’aˇ awˬ piˍ htaꞈ baˬ taˉ ve yoˬ. Nawˬ iˉ kaˆ hk’aw tawˆ la htaˇ, k’oˆ gaˇ ve lehˬ G’uiˬ sha ve a loˍ g’aꞈ te tuˬ a shaꞈ teꞈ hk’aˇ awˬ suhˉ htaꞈ tanˬ te ve yoˬ. Yaꞈ nyi tanˬ leh Yaˬhoˉvaˬ ve kanˉ htaꞈ te tuˬ yoˬ tehꞈ, hpeuꞈ maw piˇ ve yoˬ. Chaw yaˇ htaꞈ maˇ k’oˆ, kanˉ htaꞈ maˇ k’oˆ, chaw yaˇ ve kanˉ hk’aˇ htaꞈ maˇ k’oˆ, awˬ to chiˇ aꞈ piˇ ve maˇ heˆ. Yaˬhoˉvaˬ htaꞈ nawˬ ve a shaꞈ chiˇ aꞈ piˇ ve yoˬ.

²⁵ Nawˬ awˬ to chiˇ aꞈ piˇ ve lehˬ G’uiˬ sha htaꞈ meuˆ daꞈ maˇ la g’a ve yoˬ. (Chiˇ mvuh ve 25:14) Yaꞈ hk’aˇ, Baˆtiˆsaˬ haꞈ yuˬ peuˬ k’o, ponˬ ve maˇ heˆ. Tcuh yaˇ Pawˇluꞈ bvuhꞈ taˍ ve, “nawˬ hui a shu yawˇ awˬ to htaiˍ hk’awꞈ ve htaꞈ g’a tuˬ, kawˆ ve cheˇ ve awˬ hk’aw lo g’aˇ hteꞈ te-o.” (Hpiˇliˇpiˆ 2:12) Baˆtiˆsaˬ haꞈ yuˬ ve teˇ ceuˬ awˬ hkuiˉ puiˍ tanˬ ve ceh tiˉ hpehꞈ ve yoˬ. Yaꞈ hk’aˇ, nawˬ Yaˬhoˉvaˬ htaꞈ meuˆ daꞈ maˇ la tuˬ, hk’aˬ hk’e te g’a ve le? Awˬ leh meuˇ teˇ lawn hk’aw hkawꞈ laˇ tuˬ yoˬ.