1, 2. Aˬ htoꞈ ma na hkawˇ htaꞈ chaw laiˉ g’aˇ na hk’eh jaˇ ve le?

Yaˇ ehˉ lehˬ na hkawˇ cawˬ maˇ jaˇ ve yoˬ. Nawˬ yawˇ htaꞈ k’oˆ maˍ piˇ-oˬ ve htawˇ, yawˇ k’awꞈ na ve ‘aˬ ma te leh?’ Nawˬ coˇ caˇ leh yawˇ htaꞈ hk’awꞈ piˇ-oˬ ve kaꞈ ‘aˬ ma te leh?’ k’awꞈ na ve yoˬ.

² Ngaˬ hui chaw mawˇ yaˇ nehˬ maˇ k’oˆ, teˇ g’aˇ le le na hkawˇ cawˬ ve yoˬ. Aˬ htoꞈ ma caˇ tuˬ, veuꞈ tuˬ, vuiˬ tuˬ, ngaˬ hui na ve yoˬ. Chi hk’oˆ kaꞈ, a shaꞈ teꞈ kuiˬ leh awˬ g’uˇ suhˍ hpawˇ a yeˇ uiˍ ve na hkawˇ htaꞈ kaꞈ ngaˬ hui na ve yoˬ. Yaꞈ hk’aˇ, hk’awꞈ laˇ hkawˇ htaꞈ ca maˇ mawˬ ve pa taw, chaw teˇ hpaˍ maˇ k’awꞈ g’aꞈ ca ve yoˬ.

3. Na hkawˇ a yeˇ uiˍ ve hk’awꞈ haˍ jaˇ tehꞈ aˬ htoꞈ ma te chaw laiˉ g’aˇ dawˇ ve le?

³ Ngaˬ hui ve na hkawˇ a yeˇ uiˍ ve Liꞈ hpu hk’aw hk’awꞈ laˇ hkawˇ cawˬ-aw laˇ? Chaw teˇ hpaˍ cawˬ ve tehꞈ dawˇ ve yoˬ. Yaꞈ hk’aˇ, Liꞈ hpu lehˬ na g’a tuˬ haˍ jaˇ, saˍ laꞈ leh bon liˇ awˬ hoˉ ceh shiˍ ve yoˬ tehꞈ, yawˇ hui dawˇ ve yoˬ. Chaw teˇ hpaˍ hpaˍ hk’awꞈ laˇ hkawˇ htaꞈ maˇ shiˍ tehꞈ k’oˆ maˇ haˆ. Hk’e k’o, nawˬ hk’aˬ hk’e dawˇ ve le?

4, 5. Nawˬ aˬ htoꞈ ma a yeˇ uiˍ ve na nyi hkawˇ cawˬ ve le? Aˬ htoꞈ ma te hk’awꞈ laˇ hkawˇ htaꞈ g’aˇ hteꞈ ca hpfuhˆ cawˇ ve le?

⁴ Aˬ htoꞈ ma pa taw ngaˬ choˬ kaˬ lo chehˇ taˍ ve le? Suh peuˬ hk’awꞈ nawˉ ngaˬ hk’aˬ hk’e k’ai ve le? G’uiˬ sha hk’aˬ hk’e cawˬ ve le? Na hkawˇ chi teˇ hpaˍ htaꞈ hk’awꞈ laˇ tuˬ nawˬ shiˍ gaˇ ve yoˬ hehˉ. Yeˍsuˆ k’oˆ ve, “lawˬ loˬ. Lawˬ k’o g’a tuˬ yoˬ. Ca loˬ. Ca k’o mawˬ tuˬ yoˬ. Yehˬ miˉ htaꞈ htawˆ loˬ. Htawˆ k’o hpaw laˇ tuˬ yoˬ.” (Maꞈhtehˍ 7:7) Nawˬ yonˍ g’a ve hk’awꞈ laˇ hkawˇ ca mawˬ htaˇ hk’a gaˬ g’aꞈ ca cawˇ ve yoˬ.

 ⁵ Nawˬ “g’aˇ hteꞈ ca hpfuhˆ ve” k’o, Liꞈ hpu hk’aw hk’awꞈ laˇ hkawˇ mawˬ tuˬ yoˬ. (Tawˇ naˉ ve 2:1-5) Hk’awꞈ laˇ hkawˇ chi teˇ hpaˍ maˇ haˍ. Chi teˇ hpaˍ nawˬ shiˍ ve k’o, chi teˇ hkui ha lehˬ ve a shaꞈ g’a leh, awˬ g’uˇ suhˍ hpawˇ daꞈ jaˇ ve dawˇ law kuiˬ kaꞈ g’a ve yoˬ. Chaw laiˉ g’aˇ htawˇ dawˇ nawˬ dawˇ cawˬ ve na hkawˇ teˇ maˬ htaꞈ teˇ geh nyi sheˍ.

6. Yawˇ hui tuꞈ hkanˍ dawˇ haˍ ve htaꞈ G’uiˬ sha a yeˇ maˇ yuˬ laˇ tehꞈ aˬ htoꞈ ma te chaw teˇ hpaˍ dawˇ ve le?

⁶ Chaw laiˉ g’aˇ dawˇ ve, G’uiˬ sha ngaˬ hui htaꞈ a yeˇ maˇ yuˬ laˇ. G’uiˬ sha a yeˇ yuˬ ve k’o, miˬ guiˬ hk’oˆ chi hk’e maˇ hpehꞈ cawˇ-aw tehꞈ dawˇ ve yoˬ. Maꞈ bawˆ daꞈ ve, nyi bawˬ daꞈ ve, dawˇ haˍ ve teˇ kaˬ le le cawˬ ve yoˬ. Chaw yaˇ naˬ ve gawˬ ve, tuꞈ ve hkanˍ ve g’a hpuˇ leh suh ve yoˬ. Chaw teˇ hpaˍ dawˇ ve, ‘G’uiˬ sha ngaˬ hui htaꞈ a yeˇ yuˬ laˇ ve k’o, aˬ htoꞈ ma te tuꞈ hkanˍ dawˇ haˍ ve cawˬ tcuh ve le?’

7. (a) G’uiˬ sha nyi ma heh ve tehꞈ bon liˇ awˬ hoˉ teˇ hpaˍ hk’aˬ hk’e te maˍ ve le? (b) Aˬ htoꞈ ma te G’uiˬ sha htaꞈ venˇ baˆ maˇ taˍ cawˇ ve le?

⁷ G’uiˬ sha lehˬ nyi ma heh jaˇ tehꞈ, bon liˇ awˬ hoˉ teˇ hpaˍ chaw yaˇ htaꞈ maˍ ve yoˬ. Maˇ daꞈ ve awˬ ceuˬ hpehꞈ la ve teˇ yanˇ, yawˇ hui k’oˆ ve, ‘G’uiˬ sha ve a loˍ hpehꞈ ve yoˬ. Yawˇ chi hk’e hpehꞈ tcuh gaˇ ve yoˬ.’ Chi hk’e k’oˆ ve lehˬ, yawˇ hui G’uiˬ sha htaꞈ venˇ baˆ taˍ chehˇ ve yoˬ. Yaꞈ hk’aˇ, Liꞈ hpu hk’aw k’oˆ ve haiˬ ve awˬ ceuˬ G’uiˬ sha geh laˬ ve maˇ heˆ. Yaˍkoˆ liꞈ 1:13 hk’aw k’oˆ ve, haiˬ ve htaꞈ cuˇ leh chaw yaˇ htaꞈ beˬ tuˬ lawˇ tuˬ G’uiˬ sha maˇ te jaw. “Venˇ baˆ beˬ ve htaꞈ g’a hkanˍ ve teˇ yanˇ, G’uiˬ sha ngaˬ htaꞈ beˬ chehˇ ve yoˬ tehꞈ, teˇ g’aˇ kaꞈ taˇ k’oˆ. Awˬ lawn k’o, haiˬ ve awˬ ceuˬ G’uiˬ sha htaꞈ beˬ maˇ hpehꞈ. Haiˬ ve te tuˬ G’uiˬ sha chaw teˇ g’aˇ htaꞈ kaꞈ maˇ beˬ.” K’oˆ gaˇ ve lehˬ, maˇ daꞈ  ve hpehꞈ la htaˇ G’uiˬ sha maˇ tawˍ ve htawˇ, yawˇ te ve maˇ heˆ. (Yawˇbaˆ 34:10-12 g’aw ve.) Tawˇ pa haˉ htaꞈ nyi sheˍ.

8, 9. Dawˇ haˍ ve g’a hpuˇ htaˇ, aˬ htoꞈ ma te G’uiˬ sha htaꞈ venˇ baˆ maˇ taˍ cawˇ ve le? Tawˇ pa haˉ k’oˆ maˍ laˇ sheˍ.

⁸ Awˬ pa awˬ e geh chehˇ taˍ ve yaˇ paˍ teˇ g’aˇ htaꞈ dawˇ nyi sheˍ. Awˬ pa lehˬ yawˇ htaꞈ haꞈ jaˇ leh hk’a dehꞈ dawˇ cheˆ puiˉ tuˬ maˍ piˇ ve yoˬ. Oˇ ve hk’awꞈ nawˉ, yawˇ awˬ pa hkawˇ maˇ na gaˇ leh yehˬ hk’aw tawˆ-e ve yoˬ. Yawˇ maˇ daꞈ ve te leh dawˇ haˍ ve laiˉ ceuˬ g’a hpuˇ ve yoˬ. Yawˇ yehˬ hk’aw tawˆ-e ve awˬ pa maˇ tawˍ ve pa taw, yawˇ g’a hpuˇ ve awˬ ceuˬ awˬ pa htaꞈ venˇ baˆ taˍ hpehꞈ-aw laˇ? Taˍ maˇ hpehꞈ! (Luˉkaꞈ 15:11-13) Awˬ pa chi teˇ g’aˇ hk’a shuˍ, chaw yaˇ G’uiˬ sha ve hkawˇ maˇ na gaˇ leh maˇ daꞈ ve te htaˇ, yawˇ maˇ tawˍ. Chi htaꞈ pa taw, maˇ daꞈ ve awˬ ceuˬ hpehꞈ la htaˇ, G’uiˬ sha te ve maˇ heˆ tehꞈ tawnˇ taˍ cawˇ ve yoˬ. G’uiˬ sha htaꞈ venˇ baˆ taˍ ve lehˬ maˇ cawˇ ve yoˬ.

⁹ Aˬ htoꞈ ma te maˇ daꞈ ve awˬ ceuˬ G’uiˬ sha cawˬ tcuh sheˍ ve, liꞈ chi teˇ k’oˆ awˬ lawn 11 hk’aw Liꞈ hpu hk’aˬ hk’e k’oˆ taˍ ve htaꞈ mawˬ tuˬ yoˬ. Yaꞈ hk’aˇ, G’uiˬ sha ngaˬ hui htaꞈ haꞈ leh dawˇ haˍ ve yawˇ geh tawˆ la ve maˇ heˆ tehꞈ yonˍ g’a ve yoˬ. Awˬ tehˬ k’o, yawˇ teˇ g’aˇ ceh tiˉ ngaˬ hui htaꞈ ga laˇ g’a ve yoˬ.—Iˉsaˍyaˆ 33:2.

10. Chaw yaˇ te taˍ ve maˇ daꞈ ve htaꞈ G’uiˬ sha gu tuˬ yoˬ tehꞈ aˬ htoꞈ ma te ngaˬ hui yonˍ g’a ve le?

¹⁰ G’uiˬ sha lehˬ daꞈ kehˬ jaˇ ve yoˬ. (Iˉsaˍyaˆ 6:3) Yawˇ te ve teˇ ceuˬ le le yaꞈ kuiˬ maˇ cawˬ, daꞈ kehˬ leh daꞈ jaˇ ve yoˬ. Chi htaꞈ pa taw, ngaˬ hui yawˇ htaꞈ g’aˇ va g’a ve yoˬ. Chaw yaˇ G’uiˬ sha htaꞈ maˇ shuˍ daꞈ. Teˇ pawˆ pawˆ k’o, yawˇ hui te yaꞈ ve yoˬ. Daꞈ jaˇ ve uˉ peunˍ paˍ htawˇ, chaw yaˇ te taˍ ve maˇ daꞈ ve hk’a peu-eˬ htaꞈ gu tuˬ kanˇ paˆ maˇ cawˬ. Teˇ g’aˇ kaꞈ G’uiˬ sha hk’a shuˍ kanˇ paˆ maˇ cawˬ. Chaw yaˇ te taˍ ve maˇ daꞈ ve htaꞈ G’uiˬ sha gu g’a leh gu tuˬ yoˬ. Yawˇ haiˬ ve hk’a peu-eˬ htaꞈ co co taiˍ taiˍ yuˬ baˬ tuˬ yoˬ.—Chiˇ mvuh ve 37:9-11 g’aw ve.

11. Nawˬ tuꞈ hkanˍ htaˇ G’uiˬ sha hk’aˬ hk’e dawˇ ve le?

¹¹ Miˬ guiˬ hk’oˆ hpehꞈ chehˇ ve leh nawˬ g’a hpuˇ chehˇ ve htaꞈ G’uiˬ sha mawˬ htaˇ, yawˇ hk’aˬ hk’e dawˇ ve le? Liꞈ hpu hk’aw k’oˆ ve, G’uiˬ sha lehˬ “cawˇ ve awˬ ceuˬ htaꞈ haꞈ” ve yoˬ. (Chiˇ mvuh ve 37:28) Hk’aˬ ve cawˇ maˇ cawˇ ve yawˇ a yeˇ yuˬ jaˇ ve yoˬ. Chaw yaˇ tuꞈ hkanˍ ve htaꞈ yawˇ nyi bawˬ jaˇ. Aˬ sho-eˬ htaˇ miˬ guiˬ hk’oˆ haiˬ ve hk’a biˇ cawˬ ve htaꞈ G’uiˬ sha mawˬ ve teˇ yanˇ, yawˇ “dawˇ haˍ ve yoˬ.” (Awˬ hkuiˉ puiˍ 6:5, 6) G’uiˬ sha maˇ pa puiˉ. (Maˍlaˍhkiˆ 3:6) Liꞈ hpu hk’aw k’oˆ ve, G’uiˬ sha nawˬ awˬ pon dawˇ nyi laˇ puiˉ ve yoˬ.—1 Peˍtruˆ 5:7 g’aw ve.

12, 13. (a) Aˬ htoꞈ ma te ngaˬ hui shu htaꞈ haꞈ leh dawˇ nyi puiˉ ve le? Miˬ guiˬ hk’oˆ tuꞈ hkanˍ dawˇ haˍ ve htaꞈ ngaˬ hui hk’aˬ hk’e dawˇ ve le? (b) Tuꞈ hkanˍ dawˇ haˍ ve leh maˇ hteˇ maˇ cawˇ ve htaꞈ G’uiˬ sha yuˬ baˬ tuˬ nawˬ hk’aˬ hk’e te yonˍ g’a ve le?

¹² Liꞈ hpu hk’aw k’oˆ ve, G’uiˬ sha ngaˬ hui htaꞈ yawˇ ve awˬ hoꞈ awˬ han hk’a shuˍ te hpanˍ taˍ ve yoˬ. (Awˬ hkuiˉ puiˍ 1:26) K’oˆ gaˇ ve lehˬ, yawˇ hk’a shuˍ daꞈ ve te hk’aˇ dawˇ hk’aˇ ngaˬ hui cawˬ ve yoˬ. Chaw teˇ g’aˇ maˇ te yaꞈ ve htawˇ, g’a tuꞈ hkanˍ ve htaꞈ nawˬ mawˬ htaˇ, nyi ma naˬ-aˬ laˇ? G’uiˬ sha lehˬ nawˬ aꞈ kehˉ nyi ma naˬ jaˇ ve yoˬ! Ngaˬ hui hk’aˬ hk’e te shiˍ ve le?

¹³ Liꞈ hpu hk’aw k’oˆ ve, “G’uiˬ sha lehˬ haꞈ pehnˇ ve teˇ ceuˬ hpehꞈ ve yoˬ.” (1 Yoˇhanˬ 4:8) G’uiˬ sha haꞈ pehnˇ ve pa taw, yawˇ teˇ ceuˬ le le te ve yoˬ. G’uiˬ sha haꞈ puiˉ ve pa taw, ngaˬ hui htawˇ haꞈ puiˉ ve yoˬ. Dawˇ nyi sheˍ. Nawˬ kanˇ paˆ cawˬ ve k’o, miˬ guiˬ hk’oˆ tuꞈ hkanˍ dawˇ haˍ ve leh maˇ hteˇ maˇ cawˇ ve htaꞈ yuˬ baˬ tuˬ laˇ? Yuˬ baˬ tuˬ yoˬ. Awˬ lawn k’o, nawˬ chaw yaˇ htaꞈ haꞈ ve yoˬ. G’uiˬ sha kanˇ paˆ uiˍ jaˇ leh, ngaˬ hui htaꞈ haꞈ ve pa taw, tuꞈ hkanˍ dawˇ haˍ ve leh maˇ hteˇ maˇ cawˇ ve hk’a peu-eˬ htaꞈ yuˬ baˬ tuˬ yoˬ. Liꞈ k’oˆ chi hk’aw awˬ g’uˇ suhˍ lo cawˬ taˍ ve awˬ han G’uiˬ sha ve ka tiꞈ hk’a peu-eˬ awˬ tehˬ hpehꞈ la tuˬ, nawˬ  yonˍ g’a ve yoˬ! Yaꞈ hk’aˇ, nawˬ yonˍ g’a tuˬ G’uiˬ sha ve awˬ lawn shiˍ maˇ la tuˬ loˍ ve yoˬ.

14. G’uiˬ sha aˬ htoꞈ ma meh ve le? Yawˇ awˬ meh htaꞈ yehˇ cawˇ ve tehꞈ ngaˬ hui hk’aˬ hk’e te shiˍ ve le?

¹⁴ Nawˬ chaw teˇ g’aˇ g’aˇ htaꞈ awˬ chawˇ te daꞈ gaˇ ve k’o, awˉ lawˉ htaˇ aˬ htoꞈ ma k’oˆ piˇ tuˬ le? Nawˬ ve awˬ meh yoˬ. G’uiˬ sha awˬ meh cawˬ-aw laˇ? Yawˇ lehˬ G’uiˬ sha, maˇ heˆ k’o, Jawˇ mawˇ G’uiˬ sha meh ve yoˬ tehꞈ, saˍ laꞈ laiˉ g’aˇ maˍ ve yoˬ. Yaꞈ hk’aˇ, chi lehˬ yawˇ ve awˬ meh maˇ heˆ, “hkunˉ hawˉ hkanˇ” leh “hk’aˆ sheh” hk’a shuˍ aˉ yaˇ ceh hpehꞈ ve yoˬ. Yawˇ Yaˬhoˉvaˬ meh ve tehꞈ G’uiˬ sha ngaˬ hui htaꞈ k’oˆ laˇ taˍ ve yoˬ. Chiˇ mvuh ve liꞈ 83:18 (Miˬ guiˬ awˬ suhˉ yuˬ tawˆ ve Liꞈ hpu) hk’aw k’oˆ ve, “Yaˬhoˉvaˬ meh ve G’uiˬ sha nawˬ teˇ g’aˇ ceh tiˉ uiˍ jaˇ mvuh jaˇ leh miˬ guiˬ hk’a peu-eˬ htaꞈ uˉ peunˍ chehˇ ve yoˬ tehꞈ, yawˇ hui htaꞈ shiˍ piˇ lawˬ-oꞈ.” Laˇhuˍ ve Liꞈ hpu Hpeuꞈ maˍ ve liꞈ 19:6 hk’aw Haˍleˍluˇyaˬ k’oˆ ve G’uiˬ sha ve awˬ meh chi suhˉ-ehˍ cawˬ taˍ ve yoˬ. K’oˆ gaˇ ve lehˬ, Yaˬ htaꞈ chiˇ mvuh-o. Awˬ tehˬ k’o, Liꞈ hpu bvuhꞈ paˍ teˇ hpaˍ G’uiˬ sha ve awˬ meh laiˉ hinˉ pawˆ bvuhꞈ taˍ ve yoˬ. Yaˬhoˉvaˬ nawˬ htaꞈ yawˇ ve awˬ meh shiˍ leh yehˇ tcuh gaˇ ve yoˬ. Nawˬ yawˇ ve awˬ chawˇ hpehꞈ g’a tuˬ, G’uiˬ sha lehˬ yawˇ ve awˬ meh nawˬ htaꞈ k’oˆ laˇ ve yoˬ.

15. Yaˬhoˉvaˬ ve awˬ meh tcuhˉ kuiˬ hk’aˬ hk’e cawˬ ve le?

 ¹⁵ G’uiˬ sha ve awˬ meh Yaˬhoˉvaˬ k’oˆ ve tcuhˉ kuiˬ a yeˇ uiˍ jaˇ ve yoˬ. K’oˆ gaˇ ve, G’uiˬ sha ka tiꞈ te taˍ ve hk’a peu-eˬ leh yawˇ dawˇ taˍ ve hk’e te biˇ g’a ve yoˬ. Aˬ htoꞈ ma teˇ ceuˬ htawˇ yawˇ htaꞈ tawˍ maˇ g’a. Awˬ meh chi ve Yaˬhoˉvaˬ ceh tiˉ cawˬ g’a ve yoˬ. *

16, 17. Aˉ yaˇ chi teˇ hpaˍ aˬ htoꞈ ma k’oˆ gaˇ ve le, (a) “Kanˇ paˆ uiˍ ve”? (b) “Co co taiˍ taiˍ G’uiˬ sha”? (c) “Te hpanˍ shehˍ hpaˇ”?

 ¹⁶ Chiˇ mvuh ve liꞈ 83:18 (MGS) hk’aw g’aw k’ai peuˬ ve hk’e Yaˬhoˉvaˬ “teˇ g’aˇ ceh tiˉ uiˍ jaˇ mvuh jaˇ” ve yoˬ. Hpeuꞈ maˍ ve liꞈ 15:3 awˬ hk’aw lo k’oˆ ve, “kanˇ paˆ uiˍ ve Jawˇ mawˇ G’uiˬ sha-oˬ, nawˬ ve kanˉ teˇ hpaˍ lehˬ uiˍ jaˇ daꞈ jaˇ ve yoˬ.” Kanˇ paˆ uiˍ ve Jawˇ mawˇ aˉ yaˇ chi aˬ htoꞈ ma k’oˆ gaˇ ve le? Mvuhˇ naw ma miˬ naˆ ma hk’a peu-eˬ hk’aw Yaˬhoˉvaˬ kanˇ paˆ uiˍ jaˇ ve yoˬ tehꞈ k’oˆ gaˇ ve yoˬ. Chiˇ mvuh ve liꞈ 90:2 hk’aw “co co taiˍ taiˍ G’uiˬ sha” k’oˆ taˍ ve hk’e, yawˇ hk’aˬ htaˆ kaꞈ teꞈ chehˇ taˍ ve yoˬ. Chi lehˬ anˇ tuˬ cawˬ jaˇ!

¹⁷ Yaˬhoˉvaˬ ceh tiˉ te hpanˍ shehˍ hpaˇ hpehꞈ ve yoˬ. Hpeuꞈ maˍ ve liꞈ 4:11 hk’aw k’oˆ ve, “ngaˬ hui ve Jawˇ mawˇ G’uiˬ sha-oˬ, nawˬ lehˬ awˬ meꞈ awˬ hponˇ teˇ ceuˬ, yawˆ yan ve teˇ ceuˬ leh kanˇ paˆ teˇ ceuˬ htaꞈ g’a keunˍ ve yoˬ. Awˬ lawn k’o, awˬ ceuˬ hk’a peu-eˬ htaꞈ nawˬ hpanˍ taˍ ceˍ taˍ leh, nawˬ ve a loˍ htaꞈ pa taw awˬ ceuˬ hk’a peu-eˬ hpehꞈ la leh nawˬ te hpanˍ taˍ ve deˇ deˇ  yoˬ.” Yoˬ, mvuhˇ naw ma tcuh yaˇ, meuꞈ keu shiˍ, iˉ shiˍ, ngaˇ leh awˬ kaˍ awˬ nu hk’a peu-eˬ Yaˬhoˉvaˬ te hpanˍ taˍ ve yoˬ!

18. G’uiˬ sha htaꞈ awˬ chawˇ te maˇ g’a tehꞈ aˬ htoꞈ ma te chaw teˇ hpaˍ dawˇ ve le? Liꞈ hpu hk’aw hk’aˬ hk’e k’oˆ taˍ ve le?

¹⁸ Yaˬhoˉvaˬ ve te hk’aˇ dawˇ hk’aˇ htaꞈ chaw teˇ hpaˍ g’aw ve teˇ yanˇ, yawˇ hui kawˆ leh dawˇ ve ‘G’uiˬ sha lehˬ kanˇ paˆ uiˍ jaˇ, aˉ yaˇ uiˍ jaˇ, chehˇ vuiˇ jaˇ. Yawˇ ngaˬ htaꞈ a yeˇ yuˬ laˇ tuˬ ve maˇ heˆ.’ Yaꞈ hk’aˇ, G’uiˬ sha ngaˬ hui htaꞈ chi hk’e dawˇ tcuh gaˇ ve laˇ? Maˇ heˆ. Yaˬhoˉvaˬ ngaˬ hui awˬ paˇ lo jiˆ laˬ gaˇ ve yoˬ. Liꞈ hpu hk’aw k’oˆ ve, G’uiˬ sha lehˬ “ngaˬ hui hk’aˬ ve teˇ g’aˇ htaꞈ htawˇ vuiˇ daꞈ ve maˇ heˆ.” (Tcuh yaˇ 17:27) G’uiˬ sha nawˬ htaꞈ yawˇ geh meuˆ daꞈ tcuh gaˇ ve yoˬ. Yawˇ ka tiꞈ te taˍ ve, “yawˇ nawˬ hui geh jiˆ laˬ tuˬ yoˬ.”—Yaˍkoˆ 4:8.

19. (a) Nawˬ G’uiˬ sha htaꞈ awˬ chawˇ hk’aˬ hk’e te daꞈ g’a tuˬ le? (b) Yaˬhoˉvaˬ ve te hk’aˇ dawˇ hk’aˇ nawˬ dawˇ cawˇ jaˇ ve hk’aˬ ve teˇ ceuˬ le?

¹⁹ Nawˬ G’uiˬ sha htaꞈ awˬ chawˇ hk’aˬ hk’e te g’a tuˬ le? Yeˍsuˆ k’oˆ ve, “co tiꞈ ha tiꞈ teˇ ceuˬ lehˬ, awˬ tehˬ awˬ na ve G’uiˬ sha nawˬ teˇ g’aˇ tiˉ htaꞈ maˇ k’oˆ, nawˬ peu laˇ ve Yeˍsuˆ Hkriꞈ htaꞈ maˇ k’oˆ, yawˇ hui shiˍ ve teˇ ceuˬ hpehꞈ ve yoˬ.” (Yoˇhanˬ 17:3) Nawˬ henˇ tcuhˉ taˍ ve k’o, Yaˬhoˉvaˬ leh Yeˍsuˆ htaꞈ shiˍ maˇ la leh, awˬ g’uˇ suhˍ hpawˇ co co taiˍ taiˍ a shaꞈ g’a hpehꞈ tuˬ yoˬ. Tawˇ pa haˉ te k’o, “G’uiˬ sha lehˬ, haꞈ pehnˇ ve teˇ ceuˬ hpehꞈ ve” yoˬ tehꞈ, ngaˬ hui g’a henˇ k’ai peuˬ ve yoˬ. (1 Yoˇhanˬ 4:16) Yaꞈ hk’aˇ, yawˇ daꞈ ve te hk’aˇ dawˇ hk’aˇ laiˉ ceuˬ cawˬ sheˍ ve yoˬ. Liꞈ hpu hk’aw k’oˆ ve, Yaˬhoˉvaˬ lehˬ “ha k’aˉ puiˉ leh awˬ bon te piˇ puiˉ ve G’uiˬ sha hpehꞈ leh, nyi ma dawˇ zuhˬ gaˇ zuhˬ ve G’uiˬ sha, haꞈ pehnˇ uiˍ leh ka tiꞈ yeˬ ve G’uiˬ sha hpehꞈ ve yoˬ.” (Tawˆ k’ai ve 34:6) Yaˬhoˉvaˬ “venˇ baˆ hpehˇ piˇ leh, daꞈ ve awˬ bon naꞈ piˇ ve” G’uiˬ sha hpehꞈ ve yoˬ. (Chiˇ mvuh ve 86:5) G’uiˬ sha lehˬ yeunˇ hkanˍ puiˉ leh ka tiꞈ yeˬ ve yoˬ. (2 Peˍtruˆ 3:9; 1 Kawˇrenˍhtuˆ 1:9) Nawˬ Liꞈ hpu g’aw ve k’o, yawˇ daꞈ ve te hk’aˇ dawˇ hk’aˇ htaꞈ shiˍ maˇ la tuˬ yoˬ.

20-22. (a) Ngaˬ hui G’uiˬ sha htaꞈ maˇ mawˬ ve htawˇ yawˇ htaꞈ hk’aˬ hk’e te meuˆ daꞈ g’a tuˬ le? (b) Chaw teˇ g’aˇ g’aˇ nawˬ htaꞈ Liꞈ hpu maˇ henˇ tcuh gaˇ ve k’o, hk’aˬ hk’e te tuˬ le?

 ²⁰ Nawˬ G’uiˬ sha htaꞈ maˇ mawˬ ve k’o, hk’aˬ hk’e te meuˆ daꞈ g’a tuˬ le? (Yoˇhanˬ 1:18; 4:24; 1 Tiˆmoˉseˍ 1:17) Liꞈ hpu hk’aw Yaˬhoˉvaˬ ve awˬ lawn nawˬ g’aw ve k’o, yawˇ htaꞈ awˬ tehˬ awˬ na shiˍ daꞈ tuˬ yoˬ. (Chiˇ mvuh ve 27:4; Roˉmaꞈ 1:20) Nawˬ Yaˬhoˉvaˬ ve awˬ lawn maˇ maˇ henˇ ve k’o, yawˇ htaꞈ haꞈ maˇ la tuˬ yoˬ.

²¹ Yaˬhoˉvaˬ ngaˬ hui ve awˬ pa hpehꞈ ve htaꞈ nawˬ na g’a tuˬ yoˬ. (Maꞈhtehˍ 6:9) Yawˇ ngaˬ hui htaꞈ a shaꞈ peꞈ laˇ ve yoˬ. Awˬ pa yaˇ htaꞈ haꞈ ve hk’a shuˍ, yawˇ ngaˬ hui htaꞈ haꞈ leh daꞈ jaˇ ve a shaꞈ teꞈ chehˇ tcuh gaˇ ve yoˬ. (Chiˇ mvuh ve 36:9) Liꞈ hpu hk’aw maˍ laˇ ve, nawˬ Yaˬhoˉvaˬ htaꞈ awˬ chawˇ te daꞈ g’a ve yoˬ. (Yaˍkoˆ 2:23) Dawˇ nyi sheˍ, nawˬ ve awˬ chawˇ lehˬ mvuhˇ naw ma miˬ naˆ ma te hpanˍ shehˍ hpaˇ hpehꞈ ve yoˬ!

²² Chaw teˇ g’aˇ g’aˇ nawˬ htaꞈ Liꞈ hpu maˇ henˇ tcuh gaˇ ve yoˬ hehˉ. Nawˬ yonˍ hk’aˇ pa k’ai la ve htaꞈ kawˆ ve yoˬ. Yaꞈ hk’aˇ, Yaˬhoˉvaˬ htaꞈ awˬ chawˇ maˇ te tuˬ te laˇ ve k’o, nawˬ maˇ na yuˬ cawˇ ve yoˬ. Awˬ lawn k’o, yawˇ lehˬ daꞈ jaˇ ve awˬ chawˇ hpehꞈ ve yoˬ.

23, 24. (a) Nawˬ na hkawˇ htaꞈ aˬ htoꞈ ma te na tcuhˉ taˍ cawˇ ve le? (b) Awˬ g’uˇ suhˍ teˇ lawn hk’aw ngaˬ hui aˬ htoꞈ ma henˇ tuˬ le?

²³ Nawˬ Liꞈ hpu henˇ ve teˇ yanˇ, maˇ na g’a ve awˬ lawn cawˬ tuˬ yoˬ. Yaꞈ hk’aˇ, na hkawˇ htaꞈ na hpehꞈ leh ga laˇ tuˬ lawˬ ve taˇ yaꞈ taw. Yeˍsuˆ k’oˆ ve, ngaˬ hui yaˇ ehˉ hk’a shuˍ nyi ma g’a nuˇ nehˬ ve yoˬ. (Maꞈhtehˍ 18:2-4) Yaˇ ehˉ na hkawˇ cawˬ maˇ jaˇ. Hk’awꞈ laˇ hkawˇ htaꞈ G’uiˬ sha nawˬ htaꞈ shiˍ tcuh gaˇ ve yoˬ. Hk’e te leh, nawˬ g’a henˇ ve awˬ lawn awˬ tehˬ hpehꞈ ve yoˬ tehꞈ yonˍ g’a tuˬ, Liꞈ hpu hk’a dehꞈ henˇ sheˍ.—Tcuh yaˇ 17:11 g’aw ve.

²⁴ Yaˬhoˉvaˬ ve awˬ lawn henˇ ve daꞈ jaˇ ve teˇ hk’aˇ lehˬ, Liꞈ hpu henˇ ve yoˬ. Liꞈ hpu awˬ nu ve liꞈ k’oˆ htaꞈ hk’aˬ hk’e te peun daꞈ ve, awˬ g’uˇ suhˍ teˇ lawn hk’aw mawˬ tuˬ yoˬ.