1. G’uiˬ sha ve a loˍ chaw yaˇ htaꞈ hk’aˬ hk’e hpehꞈ tcuh gaˇ ve le?

G’uiˬ sha ve a loˍ chaw yaˇ htaꞈ hpehꞈ tcuh gaˇ ve lehˬ daꞈ jaˇ ve yoˬ. Yawˇ Aˍdanˍ Eˇvaꞈ hawˉ hk’aˆ yaˇ miˇ awˉ lawˉ teˇ ca htaꞈ te hpanˍ taˍ leh, daꞈ jaˇ ve hko hk’aw chehˇ tcuh ve yoˬ. Yawˇ ve a loˍ lehˬ yawˇ huiˉ maˬ yaˇ cawˬ la leh, miˬ guiˬ hk’oˆ Paˍraˍdiˇsuˆ hpehꞈ tuˬ te leh, to nuˇ to shaˆ htaꞈ nyi haꞈ shaˉ tuˬ yoˬ.—Awˬ hkuiˉ puiˍ 1:28; 2:8, 9, 15; K’oˆ maˍ ve awˬ lawn 6 htaꞈ nyi sheˍ.

2. (a) G’uiˬ sha a loˍ cawˇ ve hk’e te tuˬ yoˬ tehꞈ ngaˬ hui hk’aˬ hk’e te yonˍ g’a ve le? (b) G’uiˬ sha hk’aˬ hk’e ve chaw htaꞈ chehˇ tcuh gaˇ ve le? Hk’aˬ maw g’a chehˇ tuˬ le?

² Nawˬ dawˇ k’o, daꞈ jaˇ ve hko hk’aw g’a chehˇ tuˬ awˬ nyi cawˬ-aw laˇ? Yaˬhoˉvaˬ ngaˬ hui htaꞈ k’oˆ laˇ ve, “ngaˬ k’oˆ taˍ ve hk’e, awˬ tehˬ awˬ na hpehꞈ la tuˬ yoˬ.” (Iˉsaˍyaˆ 46:9-11; 55:11) Yawˇ a loˍ htaꞈ te tuˬ, teˇ ceuˬ kaꞈ yawˇ htaꞈ tawˍ taˍ maˇ g’a. Yaˬhoˉvaˬ k’oˆ ve, yawˇ a loˍ cawˇ ve hk’e, “miˬ guiˬ chi htaꞈ shehˇ de lonˉ hpehꞈ” tuˬ te hpanˍ taˍ ve maˇ heˆ. (Iˉsaˍyaˆ 45:18) Yawˇ chaw yaˇ htaꞈ miˬ guiˬ hk’oˆ hk’a zuhˇ chehˇ tcuh gaˇ ve yoˬ. Oˇ kaˬ lo G’uiˬ sha hk’aˬ hk’e ve chaw htaꞈ chehˇ tcuh gaˇ ve le, leh hk’aˬ maw g’a chehˇ tuˬ le? Liꞈ hpu hk’aw k’oˆ ve, “hteˇ ve cawˇ ve chaw hui [na yuˬ ve chaw hui] lehˬ, mvuhˇ miˬ hk’aw co co taiˍ taiˍ g’a chehˇ tuˬ yoˬ.”—Chiˇ mvuh ve 37:29; Hpeuꞈ maˍ ve 21:3, 4.

3. Chaw yaˇ naˬ leh suh ve teˇ yanˇ, nawˬ aˬ htoꞈ ma na hkawˇ cawˬ la ve hehˉ le?

³ Yaꞈ hk’aˇ, chi teˇ hkui chaw yaˇ naˬ ve, suh ve yoˬ. Laiˉ kaˬ k’o, tiˇ pehˍ daꞈ chehˇ ve yoˬ. Awˬ ceuˬ chi hk’a peu-eˬ G’uiˬ sha a loˍ maˇ heˆ. Hk’e k’o, aˬ htoꞈ ma te chi hk’e hpehꞈ ve le? Liꞈ hpu ceh tiˉ k’oˆ maˍ laˇ g’a ve yoˬ.

4, 5. (a) Eˍdenˍ hko hk’aw a shu vuiˬ htaꞈ yehˇ leh Eˇvaꞈ htaꞈ tawˇ yaw piˇ ve le? (b) Hteˇ ve chaw teˇ g’aˇ hk’aˬ hk’e te leh chaw hk’awˇ hpehꞈ la g’a ve le?

⁴ Liꞈ hpu hk’aw k’oˆ ve, “Neˇ haiˬ leh Saˍtanˍ” lehˬ G’uiˬ sha ve canˇ paˍ hpehꞈ ve yoˬ. Eˍdenˍ hko hk’aw chehˇ htaˇ, Saˍtanˍ vuiˬ htaꞈ yehˇ leh Eˇvaꞈ htaꞈ tawˇ yaw piˇ ve yoˬ. (Hpeuꞈ maˍ ve 12:9; Awˬ hkuiˉ puiˍ 3:1) Vuiˬ tawˇ yaw chehˇ ve hk’e leˇ yawˇ te piˇ ve yoˬ.—K’oˆ maˍ ve awˬ lawn 7 htaꞈ nyi sheˍ.

⁵ G’uiˬ sha Neˇ haiˬ Saˍtanˍ htaꞈ te hpanˍ taˍ ve laˇ? Maˇ heˆ! Aˍdanˍ Eˇvaꞈ htaꞈ G’uiˬ sha miˬ guiˬ gu teh piˇ htaˇ, mvuhˇ naw ma hk’oˆ chehˇ jaw ve mvuhˇ naw ma tcuh yaˇ teˇ g’aˇ yawˇ nyi ma pa leh Neˇ haiˬ hpehꞈ la ve yoˬ. (Yawˇbaˆ 38:4, 7) Hk’aˬ hk’e te chi hk’e hpehꞈ g’a ve le? Dawˇ nyi sheˍ, hteˇ ve chaw teˇ g’aˇ hk’aˬ hk’e te leh chaw hk’awˇ hpehꞈ la g’a ve le? Yawˇ chaw hk’awˇ hpehꞈ la tuˬ paw la ve maˇ heˆ. Yaꞈ hk’aˇ, shu mawˇ htaꞈ heuˆ gaˇ leh, dawˇ nyi tcuhˉ taˍ ve k’o, shaˬ te shaˬ te yaꞈ gaˇ ve yoˬ. Awˬ yanˇ g’a ve k’o, shu mawˇ htaꞈ hk’awˇ ve yoˬ. Hk’e te leh, chaw hk’awˇ hpehꞈ la ve yoˬ.—Yaˍkoˆ 1:13-15 g’aw ve; K’oˆ maˍ ve awˬ lawn 8 htaꞈ nyi sheˍ.

6. Mvuhˇ naw ma tcuh yaˇ teˇ g’aˇ hk’aˬ hk’e te leh G’uiˬ sha ve canˇ paˍ hpehꞈ la g’a ve le?

⁶ Awˬ lawn chi ve mvuhˇ naw ma tcuh yaˇ oˇ ve teˇ g’aˇ hpehꞈ la ve yoˬ. Yaˬhoˉvaˬ Aˍdanˍ Eˇvaꞈ htaꞈ te hpanˍ peuˬ hk’awꞈ nawˉ, yaˇ “miˬ guiˬ hk’oˆ biˇ la piˇ-oˆ” tehꞈ k’oˆ piˇ ve yoˬ. (Awˬ hkuiˉ puiˍ 1:27, 28) ‘Chaw hk’a peu-eˬ Yaˬhoˉvaˬ htaꞈ oˉ k’oˍ pui ve aꞈ kehˉ ngaˬ htaꞈ oˉ k’oˍ pui cawˇ-aw!’ tehꞈ mvuhˇ naw ma tcuh yaˇ oˇ ve teˇ g’aˇ dawˇ ve yoˬ hehˉ. Yawˇ shaˬ te shaˬ dawˇ leh G’uiˬ sha ve mawˇ htaꞈ heuˆ gaˇ ve yoˬ. Chaw yaˇ yawˇ htaꞈ oˉ k’oˍ pui tcuh gaˇ ve pa taw, Eˇvaꞈ htaꞈ heˍ yuˬ beˬ yuˬ ve yoˬ. (Awˬ hkuiˉ puiˍ 3:1-5 g’aw ve.) Yawˇ lehˬ Neˇ haiˬ Saˍtanˍ, G’uiˬ sha ve canˇ paˍ teˇ g’aˇ hpehꞈ la ve yoˬ.

7. (a) Aˬ htoꞈ ma te Aˍdanˍ leh Eˇvaꞈ g’a suh ve le? (b) Aˬ htoꞈ ma te ngaˬ hui mawˇ leh g’a suh ve le?

⁷ Aˍdanˍ Eˇvaꞈ G’uiˬ sha hkawˇ maˇ na yuˬ leh iˉ shiˍ caˇ ve yoˬ.  (Awˬ hkuiˉ puiˍ 2:17; 3:6) Yawˇ hui Yaˬhoˉvaˬ htaꞈ venˇ baˆ te yaꞈ ve pa taw, Yaˬhoˉvaˬ k’oˆ ve hk’e g’a suh ve yoˬ. (Awˬ hkuiˉ puiˍ 3:17-19) Yawˇ hui ve yaˇ venˇ baˆ yaˇ hpehꞈ leh g’a suh ve yoˬ. (Roˉmaꞈ 5:12 g’aw ve.) Aˬ htoꞈ ma pa taw yawˇ hui ve yaˇ kaꞈ venˇ baˆ yaˇ hpehꞈ la ve, tawˇ pa haˉ chi htaꞈ dawˇ nyi sheˍ. Hkaoˍ monˇ te tuˬ ve awˬ hk’eun awˬ kuiˉ cawˬ ve k’o, hkaoˍ monˇ te tawˆ la ve teˇ maˬ le le awˬ kuiˉ cawˬ ve yoˬ. Aˍdanˍ G’uiˬ sha hkawˇ maˇ na yuˬ ve teˇ yanˇ, venˇ baˆ yaˇ hpehꞈ la ve yoˬ. Ngaˬ hui Aˍdanˍ ve awˬ yaˇ awˬ duˬ hpehꞈ ve pa taw teˇ g’aˇ le le Aˍdanˍ hk’a shuˍ, “awˬ kuiˉ” cawˬ leh venˇ baˆ yaˇ hpehꞈ la ve yoˬ. Ngaˬ hui venˇ baˆ yaˇ hpehꞈ ve pa taw, g’a mawˇ leh g’a suh ve yoˬ.—Roˉmaꞈ 3:23; K’oˆ maˍ ve awˬ lawn 9 htaꞈ nyi sheˍ.

8, 9. (a) Saˍtanˍ lehˬ Aˍdanˍ leh Eˇvaꞈ htaꞈ aˬ htoꞈ ma yonˍ tcuh gaˇ ve le? (b) Aˬ htoꞈ ma te chaw hpfuhˆ htaꞈ Yaˬhoˉvaˬ laꞈ haˉ maˇ tiˇ pehˍ piˇ ve le?

⁸ Aˍdanˍ Eˇvaꞈ G’uiˬ sha hkawˇ htaꞈ maˇ na yuˬ tuˬ heˍ yuˬ htaˇ, Saˍtanˍ Yaˬhoˉvaˬ htaꞈ tanˬ hpfuhˆ ve yoˬ. Yaˬhoˉvaˬ heˍ puiˉ leh, maˇ daꞈ ve uˉ peunˍ shehˍ hpaˇ hpehꞈ leh, chaw yaˇ daꞈ ve awˬ ceuˬ maˇ g’a tcuh gaˇ tehꞈ, Saˍtanˍ Aˍdanˍ Eˇvaꞈ htaꞈ yonˍ tcuh gaˇ ve yoˬ. Saˍtanˍ k’oˆ ve, chaw yaˇ hk’aˬ hk’e te cawˇ ve htaꞈ G’uiˬ sha k’oˆ maˍ laˇ tuˬ maˇ loˍ. Aˍdanˍ Eˇvaꞈ aˬ htoꞈ ma cawˇ maˇ cawˇ ve yawˇ hui hk’aˇ yawˇ hui dawˇ cheˆ g’a ve yoˬ. Oˇ hk’e k’o, Yaˬhoˉvaˬ hk’aˬ hk’e te tuˬ le? Chaw hpfuhˆ htaꞈ tiˇ pehˍ piˇ kaꞈ hpehꞈ ve yoˬ. Yaꞈ hk’aˇ, chi hk’e te k’o Saˍtanˍ heˍ paˍ hpehꞈ ve tehꞈ shiˍ tuˬ laˇ? Maˇ shiˍ.

⁹ Chi htaꞈ pa taw, Yaˬhoˉvaˬ chaw hpfuhˆ htaꞈ laꞈ haˉ maˇ tiˇ pehˍ piˇ. Chaw yaˇ yawˇ hui hk’aˇ yawˇ hui uˉ peunˍ tuˬ, G’uiˬ sha awˬ yanˇ piˇ ve yoˬ. Oˇ hk’e te ve k’o, Saˍtanˍ heˍ shehˍ hpaˇ hpehꞈ leh chaw yaˇ awˬ pon aˬ htoꞈ ma daꞈ jaˇ ve Yaˬhoˉvaˬ shiˍ ve htaꞈ hpeuꞈ maw laˇ ve yoˬ. Awˬ lawn chi ve, awˬ lawn 11 hk’aw g’a shiˍ maˇ la tuˬ yoˬ. Yaꞈ hk’aˇ, Aˍdanˍ Eˇvaꞈ dawˇ cheˆ ve awˬ lawn nawˬ hk’aˬ hk’e dawˇ ve le? Yawˇ huiˉ maˬ Saˍtanˍ hkawˇ yonˍ leh G’uiˬ sha htaꞈ maˇ na yuˬ ve cawˇ-aw laˇ? Biˇ ve a shaꞈ, daꞈ jaˇ ve chehˇ kuiˬ, yawˇ huiˉ maˬ dawˇ cawˇ ve kanˉ, leh cawˬ taˍ ve mawˇ hk’a  peu-eˬ Yaˬhoˉvaˬ piˇ taˍ ve yoˬ. Yaꞈ hk’aˇ, Saˍtanˍ yawˇ huiˉ maˬ htaꞈ teꞈ chiˉ kaꞈ maˇ te piˇ jaw. Nawˬ yawˇ huiˉ maˬ hpehꞈ ve k’o, hk’aˬ hk’e te tuˬ le?

10. Ngaˬ hui dawˇ cheˆ ve a yeˇ uiˍ ve aˬ htoꞈ ma le?

¹⁰ Ngaˬ hui teˇ g’aˇ le le htawˇ chi hk’a shuˍ g’a dawˇ cheˆ leh, ngaˬ hui a shaꞈ htaꞈ heuˆ la kuiˬ cawˬ ve yoˬ. Ngaˬ hui Yaˬhoˉvaˬ hkawˇ na yuˬ tuˬ, yawˇ ngaˬ hui htaꞈ uˉ peunˍ laˇ tuˬ leuˆ yuˬ ve  k’o, Saˍtanˍ heˍ paˍ hpehꞈ ve yoˬ tehꞈ hpeuꞈ maw piˇ g’a ve yoˬ. Maˇ heˆ k’o, Saˍtanˍ ngaˬ hui ve uˉ peunˍ shehˍ hpaˇ hpehꞈ tuˬ, leuˆ yuˬ g’a ve yoˬ. (Chiˇ mvuh ve 73:28; Tawˇ naˉ ve 27:11 g’aw ve.) Miˬ guiˬ yaˇ G’uiˬ sha hkawˇ na yuˬ ve i jaˇ. Awˬ tehˬ k’o, chi beuꞈ miˬ guiˬ chi htaꞈ G’uiˬ sha maˇ uˉ peunˍ. Oˇ hk’e k’o, a shu uˉ peunˍ ve le?

11, 12. (a) Saˍtanˍ Yeˍsuˆ htaꞈ na piˇ ve awˬ lawn, ngaˬ hui aˬ htoꞈ ma shiˍ g’a ve le? (b) Saˍtanˍ miˬ guiˬ chi htaꞈ uˉ peunˍ shehˍ hpaˇ hpehꞈ ve, Liꞈ hpu hk’aˬ teˇ tawn hpeuꞈ maw laˇ ve le?

¹¹ Awˬ tehˬ awˬ na miˬ guiˬ chi htaꞈ a shu uˉ peunˍ chehˇ ve Yeˍsuˆ shiˍ ve yoˬ. Teˇ pawˆ htaˇ, Saˍtanˍ “miˬ guiˬ hk’oˆ hk’a cawˬ ve mvuhˇ miˬ hk’a peu-eˬ leh mvuhˇ miˬ hk’a peu-eˬ ve awˬ meꞈ awˬ hponˇ yawˇ htaꞈ maw piˇ” leh yawˇ k’oˆ ve, “nawˬ ngaˬ htaꞈ hkui tcuhˉ teh leh oˉ k’oˍ pui laˇ ve k’o, chi hk’a peu-eˬ ngaˬ nawˬ htaꞈ peꞈ laˇ tuˬ yoˬ.” (Maꞈhtehˍ 4:8, 9; Luˉkaꞈ 4:5, 6) Dawˇ nyi sheˍ, ‘miˬ guiˬ chi htaꞈ Saˍtanˍ maˇ uˉ peunˍ ve k’o, Yeˍsuˆ htaꞈ peꞈ piˇ g’a tuˬ hehˉ laˇ?’ Peꞈ piˇ maˇ g’a. Miˬ guiˬ hk’oˆ uˉ peunˍ ve hk’a peu-eˬ Saˍtanˍ ve mawˇ hpehꞈ ve yoˬ.

¹² Nawˬ dawˇ ve lehˬ, ‘Saˍtanˍ miˬ guiˬ chi htaꞈ hk’aˬ hk’e te uˉ peunˍ la g’a ve le? Miˬ guiˬ mvuhˇ naw ma htaꞈ te hpanˍ shehˍ hpaˇ Yaˬhoˉvaˬ Uiˍ jaˇ mvuh jaˇ ve G’uiˬ sha hpehꞈ ve maˇ heˆ laˇ?’ Yoˬ. (Hpeuꞈ maˍ ve 4:11) Yaꞈ hk’aˇ, Yeˍsuˆ Saˍtanˍ htaꞈ “chi miˬ guiˬ ve g’uiˬ sha” tehꞈ kuˬ ve yoˬ. (Yoˇhanˬ 12:31; 14:30; 16:11) Tcuh yaˇ Pawˇluꞈ Neˇ haiˬ Saˍtanˍ htaꞈ “chi miˬ guiˬ ve g’uiˬ sha” tehꞈ kuˬ ve yoˬ. (2 Kawˇrenˍhtuˆ 4:3, 4) Tcuh yaˇ Yoˇhanˬ bvuhꞈ taˍ ve, “miˬ guiˬ hk’a peu-eˬ lehˬ haiˬ ve awˬ shehˍ hpaˇ ve kanˇ paˆ awˬ hawˉ lo chehˇ taˍ” ve yoˬ.—1 Yoˇhanˬ 5:19.

13. Aˬ htoꞈ ma te ngaˬ hui miˬ guiˬ awˬ suhˉ cawˬ la tuˬ loˍ ve le?

¹³ Miˬ guiˬ chi hk’oˆ teˇ nyi aꞈ kehˉ teˇ nyi kawˆ tuˬ uiˍ jaˇ. Maꞈ bawˆ daꞈ ve, maˇ hteˇ ve, heˍ ve, leh haiˬ ve chi teˇ hpaˍ ngaˬ hui  awˬ paˇ lo hk’a biˇ cawˬ ve yoˬ. Chaw yaˇ hk’aˬ ma coˇ caˇ ve htawˇ, gu maˇ g’a. Yaꞈ hk’aˇ, maˇ maw k’o G’uiˬ sha haiˬ ve miˬ guiˬ chi htaꞈ Aˍmaˍgeˍdonˍ hk’aw te luˬ piˇ leh, yawˇ hteˇ ve cawˇ ve miˬ guiˬ awˬ suhˉ k’awꞈ cawˬ la tcuh tuˬ yoˬ.—Hpeuꞈ maˍ ve 16:14-16; K’oˆ maˍ ve awˬ lawn 10 htaꞈ nyi sheˍ.

14. G’uiˬ sha ve mvuhˇ miˬ hk’aw yawˇ a shu htaꞈ Jawˇ mawˇ te tcuh ve le? Yeˍsuˆ ve awˬ lawn Liꞈ hpu hk’aw hk’aˬ hk’e k’oˆ taˍ ve le?

¹⁴ Yaˬhoˉvaˬ lehˬ Yeˍsuˆ Hkriꞈ htaꞈ leuˆ yuˬ taˍ leh mvuhˇ naw ma mvuhˇ miˬ hk’aw Jawˇ mawˇ te tcuh ve yoˬ. Liꞈ hpu hk’aw k’oˆ taˍ ve laiˉ hinˉ hk’awꞈ gaˬ peuˬ, Yeˍsuˆ lehˬ, “Gawˬ lehˍ ve Jawˇ mawˇ” hpehꞈ leh yawˇ uˉ peunˍ ve awˬ leh meuˇ maˇ cawˬ. (Iˉsaˍyaˆ 9:6, 7) Yeˍsuˆ awˬ laꞈ g’awˇ htaꞈ mvuhˇ miˬ chi awˬ pon bon lawˬ-oꞈ tehꞈ maˍ piˇ htaˇ yawˇ k’oˆ ve, “nawˬ ve mvuhˇ miˬ gaˬ la piˇ-oˆ. Mvuhˇ naw ma hk’oˆ lo nawˬ ve a loˍ biˇ ve hk’e, miˬ guiˬ hk’oˆ htaꞈ htawˇ biˇ la piˇ-oˆ.” (Maꞈhtehˍ 6:10) G’uiˬ sha ve mvuhˇ miˬ, chi miˬ guiˬ uˉ peunˍ ve awˬ tan te tuˬ yoˬ. Ngaˬ hui awˬ lawn 8 hk’aw g’a henˇ tuˬ yoˬ. (Daˍyeˍlaˆ 2:44 g’aw ve.) G’uiˬ sha ve mvuhˇ miˬ lehˬ miˬ guiˬ chi htaꞈ Paˍraˍdiˇsuˆ k’awꞈ hpehꞈ la piˇ tuˬ yoˬ.—K’oˆ maˍ ve awˬ lawn 11 htaꞈ nyi sheˍ.

15. Miˬ guiˬ awˬ suhˉ aˬ htoꞈ ma le?

¹⁵ Liꞈ hpu hk’aw ka tiꞈ te taˍ ve, ‘mvuhˇ naw ma awˬ suhˉ leh miˬ guiˬ awˬ suhˉ cawˬ la tuˬ ve htaꞈ ngaˬ hui dawˇ law chehˇ leh oˇ kaˬ lo hteˇ ve cawˇ ve awˬ ceuˬ ceh tiˉ cawˬ tuˬ yoˬ.’ (2 Peˍtruˆ 3:13; Iˉsaˍyaˆ 65:17) Laiˉ pawˆ k’o, Liꞈ hpu hk’aw “miˬ guiˬ” k’oˆ ve teˇ yanˇ, chaw yaˇ htaꞈ k’oˆ gaˇ ve yoˬ. (Awˬ hkuiˉ puiˍ 11:1) Chi htaꞈ pa taw, hteˇ ve cawˇ ve “miˬ guiˬ awˬ suhˉ” lehˬ G’uiˬ sha hkawˇ htaꞈ na yuˬ leh G’uiˬ sha awˬ bon naꞈ piˇ ve chaw teˇ g’aˇ le le htaꞈ k’oˆ gaˇ ve yoˬ.

16. Miˬ guiˬ awˬ suhˉ hk’aw chehˇ ve chaw htaꞈ G’uiˬ sha aˬ htoꞈ ma daꞈ ve laꞈ shawnˍ piˇ tuˬ le? Laꞈ shawnˍ chi htaꞈ g’a tuˬ ngaˬ hui aˬ htoꞈ ma te cawˇ ve le?

¹⁶ Yeˍsuˆ ka tiꞈ te taˍ ve, G’uiˬ sha ve miˬ guiˬ awˬ suhˉ hk’aw  chehˇ ve chaw “co tiꞈ ha tiꞈ” g’a tuˬ yoˬ. (Maˍkuˆ 10:30) Ngaˬ hui laꞈ shawnˍ chi htaꞈ g’a tuˬ aˬ htoꞈ ma te cawˇ ve le? Yoˇhanˬ liꞈ 3:16 leh 17:3 g’aw leh hk’awꞈ laˇ hkawˇ htaꞈ ca nyi sheˍ. Miˬ guiˬ hk’oˆ Paˍraˍdiˇsuˆ hk’aw ngaˬ hui ve a shaꞈ hk’aˬ hk’e hpehꞈ ve Liꞈ hpu hk’aw k’oˆ taˍ ve htaꞈ teˇ geh nyi sheˍ.

17, 18. Miˬ guiˬ hk’oˆ teˇ kaˬ le le lo ngaˬ hui hk’aˬ htaˆ kaꞈ gawˬ lehˍ g’a chehˇ leh kawˆ tuˬ maˇ cawˬ tehꞈ hk’aˬ hk’e te shiˍ ve le?

¹⁷ Haiˬ ve, maꞈ bawˆ daꞈ ve maˇ k’awꞈ cawˬ. Miˬ guiˬ hk’oˆ haiˬ ve chaw teˇ g’aˇ kaꞈ k’awꞈ cawˬ tuˬ ve maˇ heˆ. (Chiˇ mvuh ve 37:10, 11) G’uiˬ sha lehˬ “miˬ guiˬ hk’oˆ lo bawˆ daꞈ chaw daꞈ ve hk’a peu-eˬ htaꞈ yawˇ . . . te luˬ piˇ” tuˬ yoˬ. (Chiˇ mvuh ve 46:9; Iˉsaˍyaˆ 2:4) Miˬ guiˬ hk’oˆ G’uiˬ sha htaꞈ haꞈ leh yawˇ ve hkawˇ htaꞈ na yuˬ ve chaw hk’a biˇ chehˇ taˍ leh, dawˇ sha gawˬ lehˍ co co taiˍ taiˍ cawˬ tuˬ yoˬ.—Chiˇ mvuh ve 72:7.

¹⁸ Yaˬhoˉvaˬ ve chaw kawˆ tuˬ maˇ cawˬ. Oˇ htaˇ teˇ co-e Iˉsaˍreˍlaˆ chaw G’uiˬ sha hkawˇ na yuˬ htaˇ, G’uiˬ sha haꞈ shaˉ piˇ ve pa taw kawˆ tuˬ maˇ cawˬ. (Oˉ k’oˍ pui ve 25:18, 19) Paˍraˍdiˇsuˆ hk’aw ngaˬ hui teꞈ chiˉ kawˆ tuˬ maˇ cawˬ. Ngaˬ hui hk’aˬ htaˆ kaꞈ gawˬ lehˍ ceh tiˉ g’a chehˇ tuˬ yoˬ!—Iˉsaˍyaˆ 32:18; Miˆhkaˍ 4:4 g’aw ve.

19. G’uiˬ sha ve miˬ guiˬ awˬ suhˉ hk’aw caˇ tuˬ dawˬ tuˬ hk’a lawꞈ cawˬ tuˬ yoˬ tehꞈ ngaˬ hui hk’aˬ hk’e te shiˍ ve le?

¹⁹ Caˇ tuˬ dawˬ tuˬ hk’a lawꞈ cawˬ tuˬ yoˬ. “Mvuhˇ miˬ awˬ hk’aw lo caˬ shiˍ hk’a biˇ cawˬ la piˇ-oˆ.” (Chiˇ mvuh ve 72:16) Yaˬhoˉvaˬ ‘G’uiˬ sha ngaˬ hui htaꞈ awˬ bon naꞈ laˇ leh, miˬ guiˬ lehˬ awˬ shiˍ awˬ nu teˇ hpaˍ htaꞈ tawˆ la piˇ tuˬ yoˬ.’—Chiˇ mvuh ve 67:6, 7.

20. Miˬ guiˬ hk’oˆ Paˍraˍdiˇsuˆ hpehꞈ la tuˬ yoˬ tehꞈ ngaˬ hui hk’aˬ hk’e te shiˍ ve le?

²⁰ Miˬ guiˬ hk’a peu-eˬ Paˍraˍdiˇsuˆ hpehꞈ la tuˬ yoˬ. Chaw yaˇ daꞈ jaˇ ve yehˬ leh hko cawˬ la tuˬ yoˬ. (Iˉsaˍyaˆ 65:21-24; Hpeuꞈ maˍ ve 11:18 g’aw ve.) Miˬ guiˬ hk’a peu-eˬ daꞈ jaˇ ve  Eˍdenˍ hko hpehꞈ jaw ve hk’e, k’awꞈ hpehꞈ la tuˬ yoˬ. Ngaˬ hui loˍ ve hk’a peu-eˬ Yaˬhoˉvaˬ peꞈ laˇ tuˬ yoˬ. Liꞈ hpu hk’aw k’oˆ ve, “yawˇ hui nyi hk’aˇ suh htaˇ hk’a gaˬ, yawˇ hui loˍ ve awˬ ceuˬ teˇ hpaˍ htaꞈ nawˬ piˇ chehˇ ve yoˬ.”—Chiˇ mvuh ve 145:16.

21. Chaw yaˇ leh to nuˇ to shaˆ teˇ geh gawˬ lehˍ chehˇ tuˬ yoˬ tehꞈ ngaˬ hui hk’aˬ hk’e te shiˍ ve le?

²¹ Chaw yaˇ leh to nuˇ to shaˆ teˇ geh gawˬ lehˍ chehˇ tuˬ yoˬ. To nuˇ to shaˆ chaw yaˇ htaꞈ maˇ yaꞈ. Yaˇ ehˉ kawˆ tuˬ maˇ k’awꞈ cawˬ. Chi beuꞈ teˇ co-e kawˆ tuˬ cawˬ ve to nuˇ to shaˆ teˇ hpaˍ htaꞈ teˇ geh chehˇ ve htawˇ, kawˆ tuˬ maˇ cawˬ.—Iˉsaˍyaˆ 11:6-9; 65:25 g’aw ve.

22. Naˬ ve gawˬ ve chaw htaꞈ Yeˍsuˆ hk’aˬ hk’e te piˇ tuˬ le?

²² Naˬ ve gawˬ ve maˇ k’awꞈ cawˬ. Yeˍsuˆ miˬ guiˬ hk’oˆ chehˇ htaˇ, chaw laiˉ g’aˇ htaꞈ gu na-e piˇ ve yoˬ. (Maꞈhtehˍ 9:35; Maˍkuˆ 1:40-42; Yoˇhanˬ 5:5-9) Yawˇ G’uiˬ sha ve mvuhˇ miˬ hk’aw Jawˇ mawˇ te leh uˉ peunˍ htaˇ, chaw yaˇ hk’a peu-eˬ htaꞈ gu na-e piˇ leh, chaw teˇ g’aˇ kaꞈ ‘naˬ ve gawˬ ve htaꞈ g’a k’awꞈ hk’anˇ tuˬ ve maˇ heˆ.’—Iˉsaˍyaˆ 33:24; 35:5, 6.

23. Suh peuˬ ve chaw htaꞈ G’uiˬ sha hk’aˬ hk’e te piˇ tuˬ le?

²³ Suh peuˬ ve chaw k’awꞈ teꞈ tu la tuˬ yoˬ. G’uiˬ sha ka tiꞈ te taˍ ve, suh peuˬ ve chaw laiˉ lanˬ g’aˇ k’awꞈ teꞈ tu la piˇ tuˬ yoˬ. “Hteˇ ve chaw kaꞈ maˇ hteˇ ve chaw kaꞈ k’awꞈ teꞈ tu la” tuˬ yoˬ.—Yoˇhanˬ 5:28, 29 g’aw ve; Tcuh yaˇ 24:15.

24. Paˍraˍdiˇsuˆ hk’aw g’a chehˇ ve htaꞈ nawˬ hk’aˬ hk’e dawˇ ve le?

²⁴ Ngaˬ hui teˇ g’aˇ le le dawˇ cheˆ g’a ve yoˬ. Yaˬhoˉvaˬ ve awˬ lawn henˇ leh yawˇ htaꞈ oˉ k’oˍ pui tuˬ, leuˆ yuˬ g’a ve yoˬ. Maˇ heˆ k’o, ngaˬ hui te gaˇ ve hk’e leuˆ yuˬ kaꞈ hpehꞈ ve yoˬ. Yaˬhoˉvaˬ ve kanˉ htaꞈ te tuˬ leuˆ yuˬ ve k’o, ngaˬ hui daꞈ jaˇ ve awˬ g’uˇ suhˍ hpawˇ cawˬ tuˬ yoˬ. Suh-e yoˬ te ve hawˉ hk’aˆ teˇ g’aˇ Yeˍsuˆ geh lawˬ htaˇ, Yeˍsuˆ yawˇ htaꞈ ka tiꞈ te piˇ ve, “nawˬ ngaˬ geh teˇ geh Paˍraˍdiˇsuˆ awˬ hk’aw lo g’a chehˇ tuˬ yoˬ.” (Luˉkaꞈ 23:43) Yeˍsuˆ Hkriꞈ ve awˬ lawn leh G’uiˬ sha ve daꞈ jaˇ ve ka tiꞈ htaꞈ Yeˍsuˆ te biˇ la tuˬ awˬ hk’aˇ htaꞈ teˇ geh henˇ sheˍ.