1, 2. (a) Aˬ htoꞈ ma te bon lawˬ ve awˬ hpfuhˇ hk’aˆ jaˇ ve awˬ vuiˬ hpehꞈ ve le? (b) Liꞈ hpu hk’aw bon lawˬ ve awˬ lawn hk’aˬ hk’e k’oˆ taˍ ve htaꞈ aˬ htoꞈ ma te ngaˬ hui shiˍ cawˇ ve le?

Mvuhˇ naw ma htaꞈ tehˆ ve k’o, miˬ guiˬ lehˬ i jaˇ ve yoˬ. Yaˬhoˉvaˬ miˬ guiˬ hk’oˆ nyi ve teˇ yanˇ, chaw ceuˬ teˇ hpaˍ i jaˇ ve pfuhˇ k’oˍ hk’aw iˉ kaˆ teˇ jaˆ ceh tiˉ shuˍ ve yoˬ. (Chiˇ mvuh ve 115:15; Iˉsaˍyaˆ 40:15) Mvuhˇ naw ma htaꞈ tehˆ ve k’o, ngaˬ hui i jaˇ ve htawˇ, Chiˇ mvuh ve liꞈ 145:18, 19 hk’aw k’oˆ ve, ‘Yaˬhoˉvaˬ htaꞈ kuˬ ve chaw hui awˬ paˇ lo yawˇ chehˇ taˍ ve yoˬ. Yawˇ htaꞈ yawˆ yan ve chaw hui htaꞈ yawˇ hui loˍ ve hk’e yawˇ piˇ chehˇ ve yoˬ. Yawˇ hui kuˬ hkawˇ htaꞈ yawˇ na yuˬ leh ponˬ piˇ ve yoˬ.’ Ngaˬ hui lehˬ awˬ hpfuhˇ hk’aˆ jaˇ ve awˬ vuiˬ cawˬ ve yoˬ! Kanˇ paˆ uiˍ ve Hpanˍ shehˍ hpaˇ Yaˬhoˉvaˬ ngaˬ hui awˬ paˇ lo chehˇ gaˇ leh ngaˬ hui bon lawˬ hkawˇ htaꞈ kaꞈ na yuˬ gaˇ ve yoˬ. Bon lawˬ ve teˇ ceuˬ lehˬ Yaˬhoˉvaˬ geh laˬ ve awˬ hpfuhˇ hk’aˆ jaˇ ve awˬ vuiˬ leh daꞈ ve laꞈ shawnˍ hpehꞈ ve yoˬ.

² Yaꞈ hk’aˇ, ngaˬ hui bon lawˬ ve teˇ yanˇ, Yaˬhoˉvaˬ ve a loˍ cawˇ ve ceh tiˉ yawˇ na yuˬ laˇ tuˬ yoˬ. Hk’aˬ hk’e le? Awˬ lawn chi ve htaꞈ Liꞈ hpu hk’aw hk’aˬ hk’e k’oˆ taˍ ve teˇ geh nyi sheˍ.

3. Aˬ htoꞈ ma te Yaˬhoˉvaˬ geh bon lawˬ cawˇ ve le?

³ Yaˬhoˉvaˬ nawˬ htaꞈ yawˇ geh bon lawˬ tcuh gaˇ ve yoˬ. Ngaˬ hui hk’aˬ hk’e te shiˍ ve le? Hpiˇliˇpiˆ liꞈ 4:6, 7 g’aw sheˍ. Hk’aˬ ma ha lehˬ tuˬ cawˬ ve le dawˇ nyi sheˍ. Uiˍ jaˇ mvuh jaˇ ve mvuhˇ naw ma htaꞈ Hpanˍ shehˍ hpaˇ Yaˬhoˉvaˬ lehˬ nawˬ htaꞈ awˬ tehˬ awˬ na a yeˇ yuˬ laˇ leh, nawˬ hk’aˬ hk’e dawˇ ve, aˬ htoꞈ ma g’a hpuˇ ve awˬ lawn yawˇ htaꞈ k’oˆ piˇ tcuh gaˇ ve yoˬ.

4. Yaˬhoˉvaˬ geh hk’aˬ htaˆ kaꞈ bon lawˬ ve k’o, nawˬ yawˇ htaꞈ meuˆ daꞈ maˇ laˇ tuˬ hk’aˬ hk’e ga laˇ g’a ve le?

 ⁴ Bon lawˬ ve lehˬ Yaˬhoˉvaˬ htaꞈ meuˆ daꞈ tuˬ ga laˇ ve yoˬ. Awˬ chawˇ geh hk’aˬ htaˆ kaꞈ tawˇ yaw daꞈ chehˇ ve k’o, yawˇ dawˇ haˍ ve dawˇ hk’aˇ htaꞈ g’a shiˍ leh meuˆ daꞈ maˇ la ve yoˬ. Chi lehˬ Yaˬhoˉvaˬ geh bon lawˬ ve hk’a shuˍ yoˬ. Yaˬhoˉvaˬ Liꞈ hpu htaꞈ cuˇ leh yawˇ hk’aˬ hk’e dawˇ ve nawˬ htaꞈ shiˍ tcuh laˇ ve yoˬ. Awˬ g’uˇ shuˍ hpawˇ yawˇ aˬ htoꞈ ma te tuˬ k’oˆ laˇ ve yoˬ. Nawˬ kaꞈ nyi ma hk’aw hk’aˬ hk’e dawˇ ve Yaˬhoˉvaˬ htaꞈ k’oˆ maˍ piˇ hpehꞈ ve yoˬ. Yaˬhoˉvaˬ geh hk’aˬ htaˆ kaꞈ bon lawˬ ve k’o, nawˬ yawˇ htaꞈ meuˆ daꞈ maˇ laˇ tuˬ yoˬ.—Yaˍkoˆ 4:8.

5. Yaˬhoˉvaˬ teˇ g’aˇ le le ve bon lawˬ hkawˇ htaꞈ na yuˬ ve maˇ heˆ tehꞈ, ngaˬ hui hk’aˬ hk’e te shiˍ hpehꞈ ve le?

⁵ Yaˬhoˉvaˬ chaw teˇ g’aˇ le le ve bon lawˬ hkawˇ htaꞈ na yuˬ-aw laˇ? Maˇ na yuˬ. Tcuh kaˍ paˍ Iˉsaˍyaˆ awˬ co-e htaˇ, Yaˬhoˉvaˬ Iˉsaˍreˍlaˆ chaw htaꞈ k’oˆ piˇ ve, “nawˬ hui bon hk’aˬ ma lawˬ ve htawˇ, ngaˬ na yuˬ laˇ tuˬ ve maˇ heˆ. Awˬ lawn k’o, nawˬ hui ve laꞈ sheh lehˬ, venˇ baˆ htaꞈ pa taw chaꞈ chiˆ k’ai peuˬ.” (Iˉsaˍyaˆ 1:15)  Ngaˬ hui htawˇ shaˍ tiꞈ g’a te ve yoˬ. Shaˍ tiꞈ maˇ te k’o, ngaˬ hui Yaˬhoˉvaˬ maˇ dawˇ cawˇ ve awˬ ceuˬ te la g’a leh yawˇ ngaˬ hui bon lawˬ hkawˇ htaꞈ maˇ na yuˬ.

6. Aˬ htoꞈ ma te yonˍ ve cawˬ tuˬ loˍ ve le? Nawˬ yonˍ ve htaꞈ hk’aˬ hk’e te shu g’a shiˍ tuˬ le?

⁶ Ngaˬ hui ve bon lawˬ hkawˇ htaꞈ Yaˬhoˉvaˬ na yuˬ laˇ tcuh gaˇ ve k’o, yawˇ htaꞈ g’a yonˍ ve yoˬ. (Maˍkuˆ 11:24) Tcuh yaˇ Pawˇluꞈ k’oˆ ve, “chaw yaˇ lehˬ, yonˍ ve teˇ ceuˬ maˇ cawˬ ve k’o, G’uiˬ sha nyi hk’aˇ suh tuˬ te maˇ g’a. Awˬ lawn k’o, G’uiˬ sha geh jiˆ k’ai ve chaw lehˬ, G’uiˬ sha cawˬ ve htaꞈ maˇ k’oˆ, yawˇ htaꞈ ca ve chaw hui htaꞈ awˬ bon piˇ ve htaꞈ maˇ k’oˆ, yawˇ g’a yonˍ ve yoˬ.” (Heˍbrehˇ 11:6) Yaꞈ hk’aˇ, yonˍ ve ceh maˇ lawꞈ, teˇ nyi le le yawˇ ve hkawˇ htaꞈ na yuˬ ve yoˬ tehꞈ, g’a te tawˆ la ve yoˬ.—Yaˍkoˆ 2:26 g’aw ve.

7. (a) Ngaˬ hui Yaˬhoˉvaˬ geh bon lawˬ htaˇ, aˬ htoꞈ ma te nyi ma nuˇ nehˬ te leh yawˆ yan piˇ cawˇ ve le? (b) Nyi ma awˬ tawˬ hk’a gaˬ bon lawˬ ve yoˬ tehꞈ, hk’aˬ hk’e te tawˆ la g’a tuˬ le?

⁷ Ngaˬ hui Yaˬhoˉvaˬ geh bon lawˬ htaˇ, nyi ma nuˇ nehˬ te leh yawˆ yan piˇ cawˇ ve yoˬ. Aˬ htoꞈ ma pa taw le? Dawˇ nyi sheˍ. Jawˇ mawˇ geh tawˇ yaw daꞈ htaˇ, yawˆ yan ve awˬ hk’aw lo yaw ve maˇ heˆ laˇ? Yaˬhoˉvaˬ lehˬ Kanˇ paˆ uiˍ jaˇ mvuh jaˇ ve G’uiˬ sha hpehꞈ ve yoˬ. Ngaˬ hui yawˇ geh tawˇ yaw daꞈ htaˇ, jawˇ mawˇ geh tawˇ yaw daꞈ ve aꞈ kehˉ nyi ma nuˇ nehˬ te leh yawˆ yan cawˇ ve yoˬ. (Awˬ hkuiˉ puiˍ 17:1; Chiˇ mvuh ve 138:6) Chi hk’oˆ kaꞈ, Yaˬhoˉvaˬ geh bon lawˬ htaˇ nyi ma awˬ tawˬ hk’a gaˬ dawˇ ve awˬ lawn yawˇ htaꞈ k’oˆ piˇ cawˇ ve yoˬ. Tawnˇ g’aw ve maˇ te cawˇ.—Maꞈhtehˍ 6:7, 8.

8. Ngaˬ hui teˇ ceuˬ ceuˬ bon lawˬ ve k’o, aˬ htoꞈ ma g’a te ve le?

⁸ Ngaˬ hui bon teˇ ceuˬ ceuˬ lawˬ ve hk’e, ngaˬ hui ve te hk’aˇ dawˇ hk’aˇ hawˍ daꞈ tuˬ, g’a coˇ caˇ ve yoˬ. Tawˇ pa haˉ te k’o, teˇ nyi le le a shaꞈ teꞈ kuiˬ lo loˍ ve htaꞈ Yaˬhoˉvaˬ geh bon lawˬ htaˇ, ngaˬ hui teꞈ chiˉ maˇ te htawˇ, yawˇ peꞈ laˇ ve yoˬ tehꞈ maˇ dawˇ nyi cawˇ leh bawˬ ve taˇ cawˬ piˇ. Yaꞈ hk’aˇ, kaiˬ ve chaw hpehꞈ leh kanˉ maˇ leuˆ cawˇ ve yoˬ. (Maꞈhtehˍ 6:11; 2 Hteˇsaˍlawˇniˆ 3:10) Maˇ heˆ k’o,  ngaˬ hui maˇ g’a te yaꞈ tuˬ, Yaˬhoˉvaˬ geh bon lawˬ ve k’o, ngaˬ hui beˬ ve lawˇ ve cawˬ kuiˬ lo jaw k’ai cawˇ ve yoˬ. (Kawˇlawˇsehˇ 3:5) Chi teˇ hkui bon lawˬ hkawˇ htaꞈ caˉ daꞈ ve na hkawˇ chaw laiˉ g’aˇ shiˍ gaˇ ve htaꞈ teˇ geh nyi sheˍ.

9. Ngaˬ hui a shu geh bon lawˬ cawˇ ve le? Yoˇhanˬ liꞈ 14:6 awˬ hk’aw lo bon lawˬ ve awˬ lawn hk’aˬ hk’e maˍ laˇ ve le?

⁹ Ngaˬ hui a shu geh bon lawˬ cawˇ ve le? “Mvuhˇ naw ma hk’oˆ chehˇ ve ngaˬ hui ve Awˬ pa” geh bon lawˬ-oꞈ tehꞈ, Yeˍsuˆ awˬ laꞈ g’awˇ htaꞈ maˍ piˇ ve yoˬ. (Maꞈhtehˍ 6:9) Yawˇ k’awꞈ k’oˆ ve, “ngaˬ lehˬ yaꞈ k’aw yoˬ. Hteˇ ve cawˇ ve teˇ ceuˬ kaꞈ, co ha teꞈ ve teˇ ceuˬ kaꞈ hpehꞈ ve yoˬ. Ngaˬ htaꞈ maˇ cuˇ k’o, chaw teˇ g’aˇ kaꞈ Awˬ pa geh gaˬ maˇ hpehꞈ.” (Yoˇhanˬ 14:6) Hk’e te leh, Yeˍsuˆ ve awˬ meh awˬ hk’aw lo Yaˬhoˉvaˬ teˇ g’aˇ tiˉ geh bon lawˬ cawˇ ve yoˬ. Chi k’oˆ gaˇ ve lehˬ, Yaˬhoˉvaˬ Yeˍsuˆ htaꞈ daꞈ jaˇ ve aˉ yaˇ piˇ taˍ ve htaꞈ taˍ uiˍ taˍ mvuh piˇ ve yoˬ. Chi hk’e te ve k’o, ngaˬ hui ve bon lawˬ hkawˇ htaꞈ Yaˬhoˉvaˬ na yuˬ tuˬ yoˬ. Chaw yaˇ ve venˇ baˆ leh suh ve htaꞈ htaiˍ hk’awꞈ laˇ tuˬ Yeˍsuˆ miˬ guiˬ hk’oˆ laˬ ve yoˬ tehꞈ, ngaˬ hui henˇ k’ai peuˬ. (Yoˇhanˬ 3:16; Roˉmaꞈ 5:12) Chi hk’oˆ kaꞈ, ngaˬ hui ve venˇ baˆ htaꞈ hpehˇ laˇ tuˬ, Yaˬhoˉvaˬ Yeˍsuˆ htaꞈ paw hkuˇ ve aˉ yaˇ piˇ leh suhˉ jehˬ shehˍ hpaˇ te tcuh ve yoˬ.—Yoˇhanˬ 5:22; Heˍbrehˇ 6:20.

10. Bon lawˬ htaˇ hk’aˬ hk’e te cawˇ ve le? Aˬ htoꞈ ma pa taw le?

¹⁰ Bon lawˬ htaˇ hk’aˬ hk’e te cawˇ ve le? Ngaˬ hui bon lawˬ htaˇ hkui tcuhˉ teh ve, mui ve, huˉ taˍ ve, Yaˬhoˉvaˬ yawˇ maˇ k’oˆ laˇ ve yoˬ. Liꞈ hpu hk’aw k’oˆ ve, Yaˬhoˉvaˬ geh bon lawˬ htaˇ hk’aˬ hk’e te kaꞈ hpehꞈ ve yoˬ. Yaꞈ hk’aˇ, yawˆ yan ve teˇ ceuˬ g’a hpehꞈ piˇ ve yoˬ. (1 Raˍsaˍvanˍ 17:16; Neˍhaˍmiˆ 8:6; Daˍyeˍlaˆ 6:10; Maˍkuˆ 11:25) Yaˬhoˉvaˬ mehˆ g’uˇ suhˍ a yeˇ uiˍ jaˇ ve teˇ ceuˬ lehˬ ngaˬ hui ve nyi ma hk’aw cawˬ ve awˬ ceuˬ yoˬ. Ngaˬ hui bon lawˬ ve awˬ hkawˇ tawˆ ve, nyi ma hk’aw ceh lawˬ ve kaꞈ hpehꞈ ve yoˬ. Bon hk’aˬ kaˬ lo leh hk’aˬ htaˆ lawˬ ve kaꞈ hpehꞈ ve yoˬ. Ngaˬ hui  Yaˬhoˉvaˬ geh bon lawˬ ve teˇ yanˇ, shu maˇ kaˇ htawˇ yawˇ kaˇ ve yoˬ.—Neˍhaˍmiˆ 2:1-6.

11. Ngaˬ hui aˬ htoꞈ ma awˬ lawn lawˬ hpehꞈ ve le?

¹¹ Ngaˬ hui aˬ htoꞈ ma awˬ lawn lawˬ hpehꞈ ve le? Yaˬhoˉvaˬ nyi ma cawˇ ve k’o, ngaˬ hui aˬ htoꞈ ma kaꞈ lawˬ hpehꞈ ve yoˬ. Liꞈ hpu hk’aw k’oˆ ve, “yawˇ ve a loˍ cawˇ ve hk’e ngaˬ hui teˇ ceuˬ ceuˬ lawˬ ve k’o, yawˇ na yuˬ tuˬ yoˬ.” (1 Yoˇhanˬ 5:14) Ngaˬ hui a shu yawˇ ve awˬ lawn lawˬ hpehꞈ-aw laˇ? Hpehꞈ ve yoˬ. Yaˬhoˉvaˬ geh bon lawˬ ve lehˬ awˬ chawˇ meuˆ daꞈ ve geh tawˇ yaw daꞈ ve hk’e hpehꞈ cawˇ ve yoˬ. Nyi ma hk’aw cawˬ ve awˬ lawn hk’a peu-eˬ ngaˬ hui Yaˬhoˉvaˬ htaꞈ k’oˆ piˇ g’a ve yoˬ. (Chiˇ mvuh ve 62:8) Cawˇ ve htaꞈ te g’a tuˬ, G’uiˬ sha geh awˬ ha hpu lawˬ g’a ve yoˬ. (Luˉkaꞈ 11:13) Chi hk’oˆ kaꞈ, cawˇ ve htaꞈ dawˇ cheˆ g’a tuˬ, Yaˬhoˉvaˬ geh cuˇ yiˍ lawˬ g’a leh tuꞈ ve hkanˍ ve htaꞈ yeunˇ hkanˍ g’aˇ tuˬ, awˬ g’aˇ kaꞈ lawˬ g’a ve yoˬ. (Yaˍkoˆ 1:5) Ngaˬ hui ve venˇ baˆ htaꞈ hpehˇ laˇ tuˬ, Yaˬhoˉvaˬ geh lawˬ cawˇ ve yoˬ. (Eˇfeˇsuˆ 1:3, 7) Shu awˬ pon kaꞈ lawˬ piˇ cawˇ ve yoˬ. Yehˬ k’a hk’aw ve chaw leh awˬ viˉ awˬ nyi Hkriꞈ yaˇ awˬ moˍ awˬ pon lawˬ piˇ g’a ve yoˬ.—Tcuh yaˇ 12:5; Kawˇlawˇsehˇ 4:12.

12. Ngaˬ hui bon lawˬ ve awˬ hk’aw lo a yeˇ uiˍ jaˇ ve aˬ htoꞈ ma awˬ lawn le?

¹² Ngaˬ hui bon lawˬ ve awˬ hk’aw lo a yeˇ uiˍ jaˇ ve aˬ htoꞈ ma awˬ lawn le? Yaˬhoˉvaˬ ve awˬ lawn leh yawˇ ve a loˍ yoˬ. Yawˇ ngaˬ hui htaꞈ te laˇ ve teˇ ceuˬ le le awˬ bon uiˍ jaˇ tehꞈ k’oˆ piˇ cawˇ ve yoˬ. (1 Raˍsaˍvanˍ 29:10-13) Chi hk’e k’oˆ tuˬ a yeˇ uiˍ jaˇ. Awˬ lawn k’o, Yeˍsuˆ miˬ guiˬ hk’oˆ chehˇ htaˇ bon chi hk’e lawˬ tuˬ, yawˇ awˬ laꞈ g’awˇ htaꞈ maˍ piˇ ve yoˬ. (Maꞈhtehˍ 6:9-13 g’aw ve) Yawˇ k’oˆ ve, chaw teˇ g’aˇ le le mehˆ g’uˇ suhˍ G’uiˬ sha ve awˬ meh htaꞈ yawˆ yan te tuˬ, awˉ lawˉ bon lawˬ cawˇ ve yoˬ. Chi hk’oˆ kaꞈ, G’uiˬ sha ve mvuhˇ miˬ uˉ peunˍ la tuˬ leh miˬ guiˬ hk’oˆ yawˇ ve a loˍ biˇ la tuˬ, bon g’a lawˬ ve yoˬ. A yeˇ uiˍ ve chi teˇ hpaˍ htaꞈ bon lawˬ peuˬ hk’awꞈ nawˉ, ngaˬ hui loˍ ve awˬ ceuˬ htaꞈ kaꞈ lawˬ hpehꞈ ve yoˬ tehꞈ, Yeˍsuˆ k’oˆ ve yoˬ. Ngaˬ hui Yaˬhoˉvaˬ ve awˬ lawn leh  yawˇ ve a loˍ awˉ lawˉ bon lawˬ ve teˇ yanˇ, aˬ htoꞈ ma teˇ ceuˬ a yeˇ uiˍ jaˇ ve hpeuꞈ maw piˇ ve yoˬ.

13. Ngaˬ hui bon lawˬ ve hk’aˬ hk’e taw zuhˬ cawˇ ve le?

¹³ Ngaˬ hui bon lawˬ ve hk’aˬ hk’e taw zuhˬ cawˇ ve le? Liꞈ hpu hk’aw maˇ k’oˆ laˇ taˍ. Ngaˬ hui bon lawˬ ve zuhˬ ve ngeh ve kaꞈ cawˬ ve yoˬ. Tawˇ pa haˉ te k’o, awˍ maˇ caˇ sheˍ htaˇ, bon chi suhˉ-ehˍ lawˬ ve yoˬ. Ngaˬ hui Yaˬhoˉvaˬ htaꞈ chiˇ mvuh gaˇ ve maˇ heˆ leh dawˇ haˍ dawˇ hkiˉ ve k’oˆ piˇ gaˇ ve k’o, zuhˬ chaweh kaꞈ lawˬ g’a ve yoˬ. (1 Saˍmo-eˍlaˆ 1:12, 15) Yaꞈ hk’aˇ, Yeˍsuˆ awˬ co-e  htaˇ chaw teˇ hpaˍ te ve hk’a shuˍ, shu dawˇ cawˇ laˇ tuˬ bon zuhˬ chaweh lawˬ ve ngaˬ hui maˇ te gaˇ. (Luˉkaꞈ 20:46, 47) Oˇ hk’e te lawˬ ve htaꞈ Yaˬhoˉvaˬ maˇ dawˇ cawˇ. Yaˬhoˉvaˬ awˬ pon a yeˇ uiˍ ve bon lawˬ ve lehˬ nyi ma hk’aw tawˆ la ve te ceuˬ hpehꞈ ve yoˬ.

14. Ngaˬ hui bon hk’aˬ nyiˇ pawˆ lawˬ cawˇ ve le? Awˬ lawn chi ve Yaˬhoˉvaˬ ve awˬ lawn hk’aˬ hk’e maˍ laˇ ve le?

¹⁴ Ngaˬ hui bon hk’aˬ nyiˇ pawˆ lawˬ cawˇ ve le? Yaˬhoˉvaˬ geh hk’aˬ htaˆ kaꞈ bon lawˬ-oꞈ tehꞈ yawˇ kuˬ laˇ ve yoˬ. Liꞈ hpu hk’aw k’oˆ ve, ngaˬ hui “bon lawˬ leh shaw taˍ-oꞈ.” Leh “bon lawˬ tcuhˉ taˍ-oꞈ.” (Maꞈhtehˍ 26:41; Roˉmaꞈ 12:12; 1 Hteˇsaˍlawˇniˆ 5:17) Yaˬhoˉvaˬ hk’aˬ htaˆ kaꞈ na yuˬ laˇ gaˇ ve yoˬ. Yawˇ ve haꞈ pehnˇ ve leh yawˇ teˇ ceuˬ le le peꞈ laˬ ve pa taw, ngaˬ hui teˇ nyi le le yawˇ htaꞈ awˬ bon uiˍ jaˇ tehꞈ, k’oˆ piˇ g’a ve yoˬ. Ngaˬ hui awˬ g’aˇ, beˆ maˍ laˇ hkawˇ, nyi ma sha tuˬ loˍ ve teˇ yanˇ, yawˇ geh bon lawˬ g’a ve yoˬ. Yaˬhoˉvaˬ geh bon lawˬ ve teˇ ceuˬ awˬ hpfuhˇ hk’aˆ ve awˬ vui hpehꞈ ve tehꞈ dawˇ ve k’o, hk’aˬ htaˆ kaꞈ bon lawˬ cawˇ ve yoˬ.

15. Bon lawˬ peuˬ htaˇ, aˬ htoꞈ ma te “a menˬ” tehꞈ k’oˆ cawˇ ve le?

 ¹⁵ Bon lawˬ peuˬ htaˇ, aˬ htoꞈ ma te “a menˬ” tehꞈ k’oˆ cawˇ ve le? “A menˬ” k’oˆ ve tcuhˉ kuiˬ lehˬ “awˬ tehˬ awˬ na oˇ hk’e hpehꞈ piˇ-oˆ.” Ngaˬ hui a menˬ k’oˆ htaˇ, nyi ma hk’aw tawˆ la ve bon lawˬ ve hk’e hpehꞈ piˇ-oˆ tehꞈ k’oˆ gaˇ ve yoˬ. (Chiˇ mvuh ve 41:13) Liꞈ hpu hk’aw k’oˆ ve, chaw teˇ g’aˇ ngaˬ hui awˬ pon bon lawˬ laˇ ve k’o, bon lawˬ ve hk’e hpehꞈ tuˬ awˬ hkawˇ tawˆ ve maˇ k’oˆ, nyi ma hk’aw ceh k’oˆ ve maˇ k’oˆ, “a menˬ” tehꞈ k’oˆ cawˇ ve yoˬ.—1 Raˍsaˍvanˍ 16:36; 1 Kawˇrenˍhtuˆ 14:16.

16. Yaˬhoˉvaˬ ngaˬ hui ve bon lawˬ hkawˇ htaꞈ hk’awꞈ laˇ-aw laˇ? K’oˆ maˍ laˇ sheˍ.

¹⁶ Ngaˬ hui ve bon lawˬ hkawˇ htaꞈ Yaˬhoˉvaˬ hk’awꞈ laˇ-aw laˇ? Hk’awꞈ laˇ ve yoˬ. Liꞈ hpu hk’aw k’oˆ ve, Yaˬhoˉvaˬ lehˬ “bon lawˬ hkawˇ htaꞈ na yuˬ laˇ ve yoˬ.” (Chiˇ mvuh ve 65:2) Chaw laiˉ lanˬ g’aˇ nyi ma awˬ tawˬ hk’a gaˬ bon lawˬ htaˇ, Yaˬhoˉvaˬ na yuˬ ve yoˬ. Yawˇ hui htaꞈ hk’awꞈ piˇ tuˬ, yawˇ laiˉ hk’aˇ yehˇ ve yoˬ.

17. Yaˬhoˉvaˬ mvuhˇ naw ma tcuh yaˇ leh miˬ guiˬ hk’oˆ yawˇ ve kanˉ te ve chaw htaꞈ cuˇ leh bon lawˬ hkawˇ htaꞈ hk’aˬ hk’e hk’awꞈ laˇ ve le?

¹⁷ Yaˬhoˉvaˬ mvuhˇ naw ma tcuh yaˇ leh yawˇ ve kanˉ te ve chaw htaꞈ cuˇ leh bon lawˬ hkawˇ htaꞈ hk’awꞈ laˇ ve yoˬ. (Heˍbrehˇ 1:13, 14) Chaw laiˉ g’aˇ Liꞈ hpu hk’a dehꞈ na g’a tuˬ, G’uiˬ sha htaꞈ shiˍ daꞈ tuˬ, bon lawˬ ve yoˬ. Yawˇ hui bon lawˬ peuˬ hk’awꞈ nawˉ maˇ maw maw, Yaˬhoˉvaˬ ve Shaˉhkiˆhkanˍ ve chaw laˬ ve yoˬ. Awˬ lawn chi hk’e ve laiˉ pawˆ hpehꞈ la jaw peuˬ. Liꞈ hpu hk’aw k’oˆ ve, miˬ guiˬ hk’oˆ teˇ kaˬ le le “ha lehˬ ve bon hkawˇ” hto toˇ chehˇ ve htaꞈ mvuhˇ naw ma tcuh yaˇ kaꞈ kanˉ te chehˇ ve yoˬ. (Hpeuꞈ maˍ ve 14:6 g’aw ve.) Chi hk’oˆ kaꞈ, ngaˬ hui laiˉ g’aˇ tuꞈ hkanˍ dawˇ haˍ ve htaꞈ ga laˇ tuˬ, Yaˬhoˉvaˬ geh bon lawˬ jaw ve yoˬ. Maˇ maw maw gaˬ leh awˬ viˉ awˬ nyi Hkriꞈ yaˇ ca ga laˇ ve yoˬ.—Tawˇ naˉ ve 12:25; Yaˍkoˆ 2:16.

18. Yaˬhoˉvaˬ awˬ ha hpu leh Liꞈ hpu htaꞈ cuˇ ve awˬ hk’aw lo ngaˬ hui ve bon lawˬ hkawˇ htaꞈ hk’aˬ hk’e hk’awꞈ laˇ ve le?

 ¹⁸ Yaˬhoˉvaˬ awˬ ha hpu htaꞈ yehˇ leh ngaˬ hui ve bon lawˬ hkawˇ htaꞈ hk’awꞈ laˇ ve yoˬ. Ngaˬ hui hpehꞈ bawˬ dawˇ haˍ ve htaꞈ yeunˇ hkanˍ g’aˇ tuˬ, Yaˬhoˉvaˬ geh bon lawˬ ve teˇ yanˇ, yawˇ awˬ ha hpu htaꞈ yehˇ leh beˆ maˍ laˇ leh awˬ g’aˇ peꞈ laˇ ve yoˬ. (2 Kawˇrenˍhtuˆ 4:7) Ngaˬ hui bon lawˬ hkawˇ htaꞈ hk’awꞈ laˇ tuˬ, ngaˬ hui cuˇ yiˍ cawˬ ve awˬ hk’aw lo dawˇ cheˆ g’a tuˬ, Yaˬhoˉvaˬ Liꞈ hpu htaꞈ yehˇ leh ga laˇ ve yoˬ. Ngaˬ hui Liꞈ hpu g’aw ve teˇ yanˇ, hpehꞈ bawˬ dawˇ haˍ ve htaꞈ gu tuˬ, Liꞈ hpu awˬ tawn htaꞈ mawˬ ve yoˬ. Chi hk’oˆ kaꞈ, Yaˬhoˉvaˬ hpawnˬ daꞈ kuiˬ lo awˬ viˉ awˬ nyi htaꞈ cuˇ leh Liꞈ hpu hk’aw ve dawˇ hk’aˇ piˇ tcuh ve yoˬ. Maˇ heˆ leh ngaˬ hui hpehꞈ chehˇ ve htaꞈ cawˇ daꞈ ve awˬ lawn Liꞈ hpu hk’aw k’oˆ maˍ laˇ tuˬ, Yaˬhoˉvaˬ nyi haꞈ shaˉ shehˍ hpaˇ htaꞈ cuˇ ve yoˬ.—Gaˍlaˍtiˆ 6:1.

19. Chaw teˇ hpaˍ hpaˍ aˬ htoꞈ ma te Yaˬhoˉvaˬ bon lawˬ hkawˇ htaꞈ maˇ hk’awꞈ laˇ tehꞈ dawˇ ve le?

¹⁹ Teˇ pawˆ pawˆ ngaˬ hui dawˇ ve, aˬ htoꞈ ma te Yaˬhoˉvaˬ ngaˬ hui ve bon lawˬ hkawˇ htaꞈ maˇ hk’awꞈ laˇ ve le? Ngaˬ hui ve bon lawˬ hkawˇ htaꞈ hk’aˬ htaˆ, hk’aˬ hk’e hk’awꞈ laˇ cawˇ ve yawˇ shiˍ ve yoˬ tehꞈ taˇ leunˇ. Ngaˬ hui aˬ htoꞈ ma loˍ ve htaꞈ kaꞈ yawˇ shiˍ ve yoˬ. Ngaˬ hui awˬ tehˬ awˬ na loˍ leh G’uiˬ sha htaꞈ awˬ tehˬ awˬ na yonˍ ve htaꞈ yawˇ shiˍ tuˬ, teˇ pawˆ pawˆ k’o, bon g’a lawˬ tcuhˉ taˍ ve yoˬ. (Luˉkaꞈ 11:5-10) Teˇ pawˆ pawˆ k’o, ngaˬ hui dawˇ ve hk’e Yaˬhoˉvaˬ hk’awꞈ laˇ ve maˇ heˆ. Tawˇ pa haˉ te k’o, tuꞈ hkanˍ ve awˬ lawn ngaˬ hui Yaˬhoˉvaˬ geh bon lawˬ ve htawˇ, awˬ lawn chi htaꞈ gu tuˬ yawˇ maˇ ga laˇ. Yaꞈ hk’aˇ, ngaˬ hui yeunˇ hkanˍ g’aˇ tuˬ, yawˇ awˬ g’aˇ peꞈ laˇ ve yoˬ.—Hpiˇliˇpiˆ 4:13 g’aw ve.

20. Aˬ htoꞈ ma te ngaˬ hui Yaˬhoˉvaˬ geh bon lawˬ tcuhˉ taˍ cawˇ ve le?

²⁰ Yaˬhoˉvaˬ geh bon lawˬ ve lehˬ ngaˬ hui awˬ pon awˬ hpfuhˇ hk’aˆ ve awˬ vuiˬ hpehꞈ ve yoˬ! Yawˇ na yuˬ laˇ tuˬ yoˬ tehꞈ ngaˬ hui yonˍ g’a ve yoˬ. (Chiˇ mvuh ve 145:18) Nyi ma awˬ tawˬ hk’a gaˬ Yaˬhoˉvaˬ geh bon lawˬ tcuhˉ taˍ ve k’o, yawˇ htaꞈ meuˆ daꞈ maˇ laˇ tuˬ yoˬ.