1, 2. Aˬ htoꞈ ma na hkawˇ nawˬ awˬ to htaꞈ na cawˇ ve le? Aˬ htoꞈ ma te chi a yeˇ uiˍ ve le?

G’uiˬ sha htaꞈ oˉ k’oˍ pui chehˇ ve chaw laiˉ g’aˇ G’uiˬ sha nyi bawˬ ve awˬ ceuˬ te leh maˍ chehˇ ve htaꞈ nawˬ Liꞈ hpu henˇ ve teˇ yanˇ g’a shiˍ ve yoˬ. (2 Kawˇrenˍhtuˆ 6:17) Chi htaꞈ pa taw, “Uiˍ ve Baˍbuˍlonˍ” maˇ heˆ heˆ ve bon liˇ hk’aw tawˆ la-o tehꞈ, Yaˬhoˉvaˬ k’oˆ laˇ ve yoˬ. (Hpeuꞈ maˍ ve 18:2, 4) Nawˬ hk’aˬ hk’e te tuˬ le? Ngaˬ hui teˇ g’aˇ le le a shu yawˇ awˬ to htaꞈ na cawˇ ve, ‘G’uiˬ sha haꞈ yuˬ ve oˉ k’oˍ pui ve htaꞈ leuˆ yuˬ gaˇ ve laˇ, maˇ heˆ leh ngaˬ dawˇ cawˇ ve hk’e g’aꞈ te tuˬ laˇ?’

² Maˇ heˆ heˆ ve bon liˇ hk’aw nawˬ tawˆ la leh maˇ caˉ daꞈ ve k’o, daꞈ ve yoˬ. Yaꞈ hk’aˇ, nawˬ te jaw ve chaw liˇ vaˇ liˇ teˇ hpaˍ htaꞈ dawˇ nawˇ chehˇ sheˍ laˇ? Chi beuꞈ chaw yaˇ te chehˇ ve chaw liˇ vaˇ liˇ aˬ htoꞈ ma cawˬ ve le? Awˬ liˇ oˇ ve htaꞈ Yaˬhoˉvaˬ hk’aˬ hk’e dawˇ ve le? Teˇ geh nyi sheˍ.

3. (a) Nawˬ oˉ k’oˍ pui ve awˬ hk’aw lo shaˉ hoꞈ htaꞈ maˇ yehˇ ve k’o, aˬ htoꞈ ma te haˍ jaˇ tehꞈ dawˇ ve le? (b) G’uiˬ sha htaꞈ oˉ k’oˍ pui ve awˬ hk’aw lo shaˉ hoꞈ htaꞈ yehˇ ve Liꞈ hpu hk’aw hk’aˬ hk’e k’oˆ taˍ ve le?

³ Chaw teˇ hpaˍ G’uiˬ sha htaꞈ oˉ k’oˍ pui tuˬ, aˉ hk’aw lo shaˉ hoꞈ teh taˍ ve laiˉ hk’awꞈ gaˬ peuˬ. Nawˬ chi hk’e te jaw ve laˇ? Oˇ hk’e k’o, shaˉ hoꞈ htaꞈ maˇ k’awꞈ yehˇ ve k’o, nyi ma maˇ sha ve yoˬ hehˉ. Yaꞈ hk’aˇ, Yaˬhoˉvaˬ htaꞈ oˉ k’oˍ pui ve awˬ hk’aˇ yawˇ maˍ laˇ ve htaꞈ taˇ leunˇ. Yaˬhoˉvaˬ ngaˬ hui htaꞈ shaˉ hoꞈ maˇ yehˇ tcuh gaˇ tehꞈ, Liꞈ hpu hk’aw hk’a tawˍ lehˆ k’oˆ taˍ ve yoˬ.—Tawˆ  k’ai ve 20:4, 5 g’aw ve; Chiˇ mvuh ve 115:4-8; Iˉsaˍyaˆ 42:8; 1 Yoˇhanˬ 5:21.

4. (a) Suh peuˬ ve awˬ puˍ awˬ pi htaꞈ aˬ htoꞈ ma te oˉ k’oˍ maˇ pui cawˇ ve le? (b) Suh peuˬ ve chaw htaꞈ taˇ caˉ daꞈ tehꞈ, aˬ htoꞈ ma te Yaˬhoˉvaˬ yawˇ ve chaw htaꞈ k’oˆ piˇ ve le?

⁴ Chaw teˇ hpaˍ suh peuˬ ve awˬ puˍ awˬ pi htaꞈ oˉ k’oˍ pui tuˬ, awˬ yanˇ, awˬ g’aˇ awˬ shaˉ, hpu shi mawˇ jeˬ yehˇ maˇ jaˇ. Yaꞈ hk’aˇ, suh peuˬ ve chaw ngaˬ hui htaꞈ teꞈ chiˉ te laˇ maˇ g’a tehꞈ, g’a shiˍ peuˬ. Yawˇ hui teˇ kaˬ kaˬ ca chehˇ ve maˇ heˆ. Suh peuˬ ve chaw htaꞈ caˉ daꞈ ve teˇ ceuˬ kawˆ tuˬ uiˍ jaˇ. Suh peuˬ ve awˬ viˉ awˬ nyi htaꞈ caˉ daꞈ chehˇ ve maˇ heˆ. Awˬ tehˬ k’o, neˇ htaꞈ caˉ daꞈ chehˇ ve yoˬ. Suh peuˬ ve chaw htaꞈ tawˇ yaw daꞈ ve maˇ k’oˆ, neˇ htaꞈ caˉ daꞈ ve maˇ k’oˆ, taˇ te tehꞈ Yaˬhoˉvaˬ Iˉsaˍreˍlaˆ chaw htaꞈ k’oˆ piˇ ve yoˬ.—Bon maˍ ve 18:10-12; K’oˆ maˍ ve awˬ lawn 26 leh 31 htaꞈ nyi sheˍ.

5. Suh peuˬ ve awˬ puˍ awˬ pi leh shaˉ hoꞈ htaꞈ oˉ k’oˍ maˇ pui tuˬ, aˬ htoꞈ ma teˇ ceuˬ ga laˇ g’a ve le?

⁵ Suh peuˬ ve awˬ puˍ awˬ pi leh shaˉ hoꞈ htaꞈ oˉ k’oˍ maˇ pui tuˬ, aˬ htoꞈ ma teˇ ceuˬ ga laˇ g’a ve le? Nawˬ Liꞈ hpu g’aw leh awˬ lawn oˇ ve htaꞈ Yaˬhoˉvaˬ hk’aˬ hk’e dawˇ ve hk’a dehꞈ g’a dawˇ nyi ve yoˬ. Liꞈ hpu hk’aw k’oˆ ve, awˬ ceuˬ oˇ ve teˇ hpaˍ htaꞈ yawˇ “canˇ jaˇ ve yoˬ.” (Bon maˍ ve 27:15) Yaˬhoˉvaˬ dawˇ ve hk’a shuˍ dawˇ leh yawˇ nyi ma cawˇ ve hk’e oˉ k’oˍ pui tuˬ, teˇ nyi le le yawˇ geh bon lawˬ loˬ. (Iˉsaˍyaˆ 55:9) Nawˬ chi hk’e te ve k’o, maˇ heˆ heˆ ve bon liˇ htaꞈ caˉ daꞈ ve hk’a peu-eˬ te luˬ tuˬ, Yaˬhoˉvaˬ gaˇ laˇ ve yoˬ tehꞈ yonˍ hpehꞈ ve yoˬ.

6. Yeˍsuˆ paw ve awˬ nyi pawehˇ te tuˬ, aˬ htoꞈ ma te shu ha pa 12 maˬ 25 nyi htaꞈ leuˆ yuˬ ve le?

⁶ Hkriˆsuhˍmaˆ lehˬ chaw yaˇ te heuˇ jaˇ ve pawehˇ hpehꞈ ve yoˬ. Chaw maˇ-awˍ ve dawˇ ve awˬ nyi chi lehˬ Yeˍsuˆ paw ve awˬ nyi hpehꞈ ve yoˬ. Awˬ tehˬ k’o, Hkriˆsuhˍmaˆ maˇ heˆ heˆ ve oˉ  k’oˍ pui ve htaꞈ caˉ daꞈ ve yoˬ. Liꞈ teˇ k’oˆ hk’aw k’oˆ ve, ha pa 12 maˬ (Diˬseˇbaˬ) 25 nyi htaˇ, Hkriꞈ yaˇ maˇ heˆ ve Roˉmaꞈ chaw mvuhˇ nyi paw ve awˬ nyi pawehˇ te ve yoˬ. Ha pa 12 maˬ 25 nyi Yeˍsuˆ paw ve awˬ nyi maˇ heˆ htawˇ, bon liˇ awˬ hoˉ awˬ naˬ lehˬ Roˉmaꞈ chaw htaꞈ Hkriꞈ yaˇ hpehꞈ la tcuh gaˇ ve pa taw, Yeˍsuˆ paw ve awˬ nyi te ve yoˬ. (Luˉkaꞈ 2:8-12) Yeˍsuˆ ve awˬ laꞈ g’awˇ Hkriˆsuhˍmaˆ maˇ te jaw. Awˬ nu ve liꞈ teˇ k’oˆ hk’aw k’oˆ ve, Yeˍsuˆ paw htaˇ tanˬ leh 200 hk’awꞈ gaˬ ve htawˇ, “Yeˍsuˆ hk’aˬ ve teˇ nyi paw la ve chaw teˇ g’aˇ kaꞈ maˇ shiˍ leh chaw maˇ-awˍ ve awˬ lawn chi htaꞈ a yeˇ maˇ yuˬ.” Yeˍsuˆ suh peuˬ hk’awꞈ nawˉ 300 hk’awꞈ hpaˆ htaˇ, Hkriˆsuhˍmaˆ pawehˇ tanˬ te la ve yoˬ.

7. Aˬ htoꞈ ma te awˬ tehˬ ve Hkriꞈ yaˇ Hkriˆ suhˍ maˆ maˇ te ve le?

⁷ Hkriˆsuhˍmaˆ awˬ nyi, hti caˇ hti dawˬ pawehˇ te ve, laꞈ shawnˍ piˇ daꞈ ve lehˬ lawˇ kiˍ yaˇ geh laˬ ve tehꞈ laiˉ g’aˇ shiˍ ve yoˬ. Tawˇ pa haˉ te k’o, Eˍgaˍlanˍ mvuhˇ miˬ hk’aw leh Aˍmeˬriˆkaꞈ teˇ kaˬ kaˬ lo Hkriˆsuhˍmaˆ lawˇ kiˍ yaˇ geh laˬ ve pa taw, maˇ te tcuh. A shu teˇ g’aˇ Hkriˆsuhˍmaˆ te ve k’o, ciˍ yanˍ ve htaꞈ g’a hkanˍ ve yoˬ. Yaꞈ hk’aˇ, chaw yaˇ Hkriˆsuhˍmaˆ k’awꞈ te la ve yoˬ. Aˬ htoꞈ ma te awˬ tehˬ ve Hkriꞈ yaˇ Hkriˆsuhˍmaˆ maˇ te ve le? Awˬ lawn k’o, yawˇ hui G’uiˬ sha nyi ma cawˇ ve htaꞈ te gaˇ ve yoˬ.

8, 9. Awˉ lawˉ htaˇ ve Hkriꞈ yaˇ aˬ htoꞈ ma te paw ve awˬ nyi pawehˇ maˇ te ve le?

⁸ Chaw yaˇ dawˇ cawˇ jaˇ ve pawehˇ lehˬ paw ve awˬ nyi hpehꞈ ve yoˬ. Hkriꞈ yaˇ paw ve awˬ nyi pawehˇ te cawˇ-aw laˇ? Liꞈ hpu hk’aw paw ve awˬ nyi pawehˇ te ve htaꞈ k’oˆ taˍ ve yoˬ. Yaꞈ hk’aˇ, pawehˇ chi ve htaꞈ te ve chaw lehˬ Yaˬhoˉvaˬ htaꞈ oˉ k’oˍ pui ve maˇ heˆ. (Awˬ hkuiˉ puiˍ 40:20; Maˍkuˆ 6:21) Aˬ sho-eˬ htaˇ, maˇ heˆ heˆ ve g’uiˬ sha htaꞈ chiˇ mvuh tuˬ, paw ve awˬ nyi pawehˇ te ve yoˬ. Liꞈ teˇ k’oˆ hk’aw k’oˆ ve, awˉ lawˉ htaˇ ve Hkriꞈ yaˇ dawˇ  ve, “paw ve awˬ nyi pawehˇ te ve lehˬ lawˇ kiˍ yaˇ ve awˬ liˇ hpehꞈ ve yoˬ.”

⁹ Aˬ sho-eˬ htaˇ ve Heˍlaˍsaˆ chaw leh Roˉmaꞈ chaw yonˍ ve, chaw teˇ g’aˇ paw la ve teˇ yanˇ, neˇ teˇ hkeh yawˇ geh chehˇ la leh yawˇ a sha teꞈ chehˇ ve teˇ co-e haꞈ shaˉ piˇ ve yoˬ. Paw ve awˬ nyi liꞈ hk’aw k’oˆ ve, “neˇ oˇ ve teˇ hkeh lehˬ oˇ teˇ nyi ve g’uiˬ sha htaꞈ caˉ daꞈ ve yoˬ.”

10. Aˬ htoꞈ ma te awˬ tehˬ ve Hkriꞈ yaˇ paw ve awˬ nyi pawehˇ maˇ te ve le?

¹⁰ Nawˬ dawˇ k’o, maˇ heˆ heˆ ve bon liˇ htaꞈ caˉ daꞈ ve pawehˇ Yaˬhoˉvaˬ haꞈ yuˬ-aw laˇ? (Iˉsaˍyaˆ 65:11, 12) Yawˇ maˇ haꞈ yuˬ. Chi htaꞈ pa taw, paw ve awˬ nyi pawehˇ maˇ k’oˆ, maˇ heˆ heˆ ve bon liˇ htaꞈ caˉ daꞈ ve awˬ nyi pawehˇ maˇ k’oˆ, ngaˬ hui maˇ te.

11. Chaw teˇ hpaˍ aˬ htoꞈ ma te pawehˇ chi teˇ hpaˍ htaꞈ te chehˇ ve le? Yaꞈ hk’aˇ, a yeˇ uiˍ jaˇ ve teˇ ceuˬ lehˬ aˬ htoꞈ ma le?

¹¹ Chaw teˇ hpaˍ shiˍ ve, Hkriˆsuhˍmaˆ leh jehˇ ve awˬ nyi maˇ heˆ heˆ ve bon liˇ hk’aw tawˆ la ve yoˬ. Yaꞈ hk’aˇ, yawˇ hui pawehˇ oˇ ve htaꞈ te chehˇ sheˍ. Pawehˇ oˇ ve lehˬ yehˬ k’a hk’aw teˇ geh chehˇ tuˬ, daꞈ ve awˬ yanˇ shawˍ ve yoˬ. Nawˬ kaꞈ oˇ hk’e dawˇ ve laˇ? Awˬ tehˬ k’o, yehˬ k’a hk’aw hpuˇ daꞈ mawˬ daꞈ leh hti caˇ hti dawˬ ve maˇ yaꞈ. Yaˬhoˉvaˬ yehˬ k’a hpanˍ shehˍ hpaˇ hpehꞈ ve pa taw, yehˬ k’a hk’aw ve chaw htaꞈ meuˆ daꞈ tcuh gaˇ ve yoˬ. (Eˇfeˇsuꞈ 3:14, 15) Yaꞈ hk’aˇ, awˬ suhˍ awˬ shaˍ hpawˇ ve awˬ viˉ awˬ nyi nyi ma cawˇ tuˬ, maˇ heˆ heˆ ve bon liˇ pawehˇ htaꞈ maˇ te cawˇ. Ngaˬ hui Yaˬhoˉvaˬ htaꞈ meuˆ daꞈ ve teˇ ceuˬ awˉ lawˉ g’a dawˇ nyi ve yoˬ. Chi htaꞈ pa taw, tcuh yaˇ Pawˇluꞈ k’oˆ ve, “Jawˇ mawˇ Yeˍsuˆ nyi ma cawˇ ve awˬ ceuˬ htaꞈ nawˬ hui shiˍ la tuˬ te-o.”—Eˇfeˇsuꞈ 5:10.

12. Yaˬhoˉvaˬ maˇ haꞈ yuˬ ve jehˇ ve awˬ nyi pawehˇ te ve hk’aˬ hk’e hpehꞈ ve le?

¹² Pawehˇ teˇ hpaˍ leh jehˇ ve awˬ nyi hk’aˬ kaˬ lo tawˆ la ve a yeˇ maˇ uiˍ tehꞈ, chaw laiˉ g’aˇ dawˇ ve yoˬ. Yaꞈ hk’aˇ, Yaˬhoˉvaˬ oˇ  hk’e maˇ dawˇ. Maˇ heˆ heˆ ve bon liˇ hk’aw tawˆ la ve jehˇ ve awˬ nyi pawehˇ te leh chaw yaˇ leh mvuhˇ miˬ htaꞈ taˍ uiˍ piˇ ve, yawˇ maˇ haꞈ yuˬ. Tawˇ pa haˉ te k’o, Iˉsaˍreˍlaˆ chaw Eˇjiˇtuꞈ mvuhˇ miˬ hk’aw tawˆ la peuˬ hk’awꞈ nawˉ, Eˇjiˇtuꞈ chaw te ve maˇ heˆ heˆ ve bon liˇ htaꞈ caˉ daꞈ ve pawehˇ yawˇ hui henˇ yuˬ ve yoˬ. Yawˇ hui lawˇ kiˍ yaˇ geh laˬ ve pawehˇ oˇ ve lehˬ Yaˬhoˉvaˬ “htaꞈ oˉ k’oˍ pui tuˬ ve awˬ nyi hpehꞈ ve yoˬ” tehꞈ k’oˆ ve yoˬ. Yaˬhoˉvaˬ maˇ haꞈ yuˬ leh yawˇ hui htaꞈ ciˍ yanˍ piˇ ve yoˬ. (Tawˆ k’ai ve 32:2-10) Tcuh kaˍ paˍ Iˉsaˍyaˆ k’oˆ ve, “chaꞈ chiˆ ve mawˇ teˇ hpaˍ htaꞈ taˇ htawˇ.”—Iˉsaˍyaˆ 52:11 g’aw ve.

13. Nawˬ paw ve awˬ nyi leh pawehˇ teˇ hpaˍ htaꞈ maˇ te-o tehꞈ dawˇ ve k’o, nyi ma shoꞈ shaꞈ tuˬ aˬ htoꞈ ma cawˬ ve le?

¹³ Nawˬ paw ve awˬ nyi leh pawehˇ teˇ hpaˍ htaꞈ maˇ te-o tehꞈ dawˇ ve k’o, nyi ma shoꞈ shaꞈ la tuˬ yoˬ. Tawˇ pa haˉ te k’o, aˬ htoꞈ ma te ngaˬ Hkriˆsuhˍmaˆ pawehˇ hk’aw maˇ te ve le tehꞈ awˬ chawˇ na laˇ ve k’o, ngaˬ hk’aˬ hk’e te tuˬ le? Hkriˆsuhˍmaˆ awˬ nyi htaˇ, awˬ chawˇ laꞈ shawnˍ peꞈ laˇ ve k’o, ngaˬ hk’aˬ hk’e te tuˬ le? Awˬ hpawˇ maˇ heˆ leh awˬ miˇ ma pawehˇ te tcuh gaˇ ve k’o, ngaˬ hk’aˬ hk’e te tuˬ le? Yaˇ htaꞈ paw ve awˬ nyi maˇ te piˇ leh yaˇ nyi ma maˇ g’a luˬ tuˬ, ngaˬ hk’aˬ hk’e te tuˬ le?

14, 15. Pawehˇ te ve awˬ yanˇ hk’aw chaw teˇ g’aˇ awˬ bon naꞈ laˇ leh laꞈ shawnˍ peꞈ laˇ ve k’o, nawˬ hk’aˬ hk’e te tuˬ le?

¹⁴ Nawˬ hk’aˬ hk’e te cawˇ ve k’oˆ cawˇ ve nawˬ shiˍ tuˬ, cuˇ yiˍ lehˬ a yeˇ uiˍ ve yoˬ. Tawˇ pa haˉ te k’o, hk’awꞈ suhˉ gaˬ htaˇ, chehˇ sha cawˬ sha cawˬ piˇ-oˆ tehꞈ shu k’oˆ laˇ ve k’o, maˇ heˆ leh paw ve awˬ nyi htaꞈ awˬ bon naꞈ laˇ ve k’o, awˬ bon uiˍ jaˇ tehꞈ k’oˆ piˇ hpehꞈ ve yoˬ. Maˇ kaˇ paweh te leh juˇ hpaw-e ve maˇ te cawˇ. Yaꞈ hk’aˇ, nawˬ pawehˇ oˇ ve hk’aw aˬ htoꞈ ma te maˇ te ve chaw teˇ g’aˇ shiˍ gaˇ ve k’o, yawˇ htaꞈ k’oˆ maˍ piˇ hpehꞈ ve yoˬ. Yaꞈ hk’aˇ, cuˇ yiˍ htaꞈ yehˇ leh yawˆ yan ve awˬ hk’aw lo nawˬ yawˇ htaꞈ daꞈ lehˍ k’oˆ maˍ piˇ sheˍ. Liꞈ hpu hk’aw k’oˆ ve, “chaw teˇ g’aˇ le le  htaꞈ nawˬ hui hk’aˬ hk’e g’a yaw hk’awꞈ cawˇ ve htaꞈ shiˍ tuˬ, nawˬ hui tawˇ yaw ve teˇ hpaˍ lehˬ, hk’aˬ htaˆ kaꞈ shu awˬ pon cawˇ daꞈ leh na sha ve tawˇ hkawˇ htaꞈ yaw leh, aˉ lehꞈ hkawꞈ taˍ ve hk’e hpehꞈ piˇ-oˆ.” (Kawˇlawˇsehˇ 4:6) Hti caˇ hti dawˬ leh laꞈ shawnˍ piˇ daꞈ ve htaꞈ kaꞈ dawˇ cawˇ ve yoˬ. Yaꞈ hk’aˇ, pawehˇ chi ve awˬ yanˇ hk’aw maˇ heˆ tehꞈ nawˬ yawˇ htaꞈ k’oˆ piˇ hpehꞈ ve yoˬ.

¹⁵ Chaw teˇ g’aˇ nawˬ htaꞈ laꞈ shawnˍ peꞈ laˇ ve k’o, nawˬ hk’aˬ hk’e te cawˇ ve le? Awˬ liˇ chi hk’e ve Liꞈ hpu hk’aw maˇ cawˬ. Yaꞈ hk’aˇ, Liꞈ hpu hk’aw k’oˆ ve, venˇ baˆ taˍ tuˬ maˇ cawˬ ve nyi ma cawˬ tuˬ, ngaˬ hui loˍ ve yoˬ. (1 Tiˆmoˉseˍ 1:18, 19) Nawˬ pawehˇ oˇ ve htaꞈ maˇ te ve tehꞈ chaw teˇ g’aˇ g’aˇ maˇ shiˍ ve yoˬ hehˉ. Maˇ heˆ leh, “nawˬ pawehˇ oˇ ve htaꞈ maˇ te, ngaˬ shiˍ-a. Ngaˬ nawˬ htaꞈ laꞈ shawnˍ peꞈ laˇ gaˇ ve” tehꞈ k’oˆ laˇ tuˬ yoˬ. Laꞈ shawnˍ oˇ ve htaꞈ haꞈ yuˬ maˇ haꞈ yuˬ tuˬ, nawˬ g’a dawˇ cheˆ ve yoˬ. Nawˬ hk’aˬ hk’e dawˇ cheˆ ve htawˇ, venˇ baˆ taˍ tuˬ maˇ cawˬ ve nyi ma cawˬ tuˬ loˍ ve yoˬ. Yaˬhoˉvaˬ htaꞈ meuˆ daꞈ ve teˇ ceuˬ luˬ k’ai tuˬ, ngaˬ hui maˇ te gaˇ.

16. Yehˬ yaˇ k’a yaˇ pawehˇ htaꞈ te gaˇ ve k’o, nawˬ hk’aˬ hk’e te tuˬ le?

¹⁶ Yehˬ yaˇ k’a yaˇ pawehˇ htaꞈ te gaˇ ve k’o, nawˬ hk’aˬ hk’e te tuˬ le? Yawˇ hui htaꞈ taˇ tawˍ piˇ. Awˬ lawn k’o, aˬ htoꞈ ma te tuˬ yawˇ hui kaꞈ dawˇ cheˆ tuˬ a hkaw-anˬ cawˬ ve yoˬ. Nawˬ dawˇ cheˆ ve htaꞈ yawˆ yan laˇ tcuh gaˇ ve hk’a shuˍ, yawˇ hui dawˇ cheˆ ve htaꞈ nawˬ g’a na g’a ve yoˬ. (Maꞈhtehˍ 7:12 g’aw ve.) Yaꞈ hk’aˇ, pawehˇ oˇ ve awˬ yanˇ hk’aw yehˬ yaˇ k’a yaˇ geh nawˬ htaꞈ chehˇ tcuh gaˇ ve k’o, nawˬ hk’aˬ hk’e te tuˬ le? Cawˇ ve awˬ hk’aw lo dawˇ cheˆ g’a tuˬ, bon lawˬ ve hk’aw Yaˬhoˉvaˬ ga laˇ tuˬ lawˬ cawˇ ve yoˬ. Aˬ htoꞈ ma te ve htaꞈ shiˍ tuˬ, beˆ maˍ laˇ hkawˇ htaꞈ chaˬ nyi cawˇ ve yoˬ. Nawˬ aˬ htoꞈ ma te ve maˇ k’oˆ, hk’aˬ htaˆ kaꞈ Yaˬhoˉvaˬ nyi ma cawˇ tuˬ te ve taˇ leunˇ.

17. Shu ve yehˬ k’a pawehˇ te ve htaꞈ nawˬ ve yaˇ mawˬ leh maˇ hkawehˉ leh nyi ma maˇ luˬ tuˬ, nawˬ hk’aˬ hk’e te tuˬ le?

 ¹⁷ Shu ve yehˬ k’a pawehˇ te ve htaꞈ nawˬ ve yaˇ mawˬ leh maˇ hkawehˉ leh nyi ma maˇ luˬ tuˬ, nawˬ hk’aˬ hk’e te tuˬ le? Awˬ kaˍ awˬ nu awˬ yanˇ htaˇ, laꞈ shawnˍ piˇ hpehꞈ ve yoˬ. Nawˬ yaˇ htaꞈ piˇ g’a ve daꞈ jaˇ ve laꞈ shawnˍ lehˬ nawˬ ve awˬ yanˇ leh nawˬ ve haꞈ pehnˇ ve hpehꞈ ve yoˬ.

18. Aˬ htoꞈ ma te ngaˬ hui hpawnˬ daꞈ cawˇ ve le?

¹⁸ Yaˬhoˉvaˬ nyi ma cawˇ tuˬ, maˇ heˆ heˆ ve bon liˇ, maˇ heˆ heˆ ve bon liˇ htaꞈ caˉ daꞈ ve pawehˇ, chaw liˇ vaˇ liˇ hk’a peu-eˬ htaꞈ ngaˬ hui maˇ g’a caˉ daꞈ. Yaꞈ hk’aˆ, awˬ tehˬ oˉ k’oˍ pui ve kaꞈ g’a te cawˇ ve yoˬ. Ngaˬ hui hk’aˬ hk’e te g’a tuˬ le? Hk’aˬ htaˆ kaꞈ Hkriꞈ yaˇ hui geh g’a hpawnˬ daꞈ ve yoˬ. (Heˍbrehˇ 10:24, 25 g’aw ve.) Yaˬhoˉvaˬ htaꞈ oˉ k’oˍ pui ve hk’aw hpawnˬ daꞈ ve a yeˇ uiˍ jaˇ. (Chiˇ mvuh ve 22:22; 122:1) Hpawnˬ daꞈ kuiˬ lo awˬ viˉ awˬ nyi htaꞈ mawˬ daꞈ leh tawˇ yaw daꞈ htaˇ, awˬ g’aˇ g’a ve yoˬ.—Roˉmaꞈ 1:12.

19. Liꞈ hpu hk’aw awˬ tehˬ ve awˬ lawn shu htaꞈ k’oˆ piˇ ve aˬ htoꞈ ma te a yeˇ uiˍ ve le?

¹⁹ Awˬ tehˬ oˉ k’oˍ pui ve htaꞈ leuˆ yuˬ tuˬ, teˇ ceuˬ g’a k’awꞈ te ve yoˬ. Nawˬ Liꞈ hpu hk’aw g’a henˇ ve awˬ ceuˬ shu htaꞈ g’a k’oˆ maˍ piˇ ve yoˬ. Miˬ guiˬ hk’oˆ haiˬ ve laiˉ ceuˬ hpehꞈ la chehˇ ve htaꞈ chaw laiˉ g’aˇ dawˇ haˍ ve yoˬ. Chi hk’e dawˇ chehˇ ve chaw htaꞈ nawˬ shiˍ daꞈ ve yoˬ hehˉ. Awˬ g’uˇ suhˍ hpawˇ daꞈ jaˇ ve dawˇ law kuiˬ yawˇ hui htaꞈ k’oˆ maˍ piˇ sheˍ. Nawˬ Hkriꞈ yaˇ hui geh hpawnˬ daꞈ leh Liꞈ hpu hk’aw awˬ tehˬ ve awˬ lawn shu htaꞈ k’oˆ maˍ piˇ ve k’o, maˇ heˆ heˆ ve bon liˇ leh chaw liˇ vaˇ liˇ htaꞈ maˇ caˉ daꞈ gaˇ-o tehꞈ nawˬ dawˇ tuˬ yoˬ. Yaˬhoˉvaˬ haꞈ yuˬ ve oˉ k’oˍ pui ve htaꞈ nawˬ leuˆ yuˬ ve k’o, nawˬ ha lehˬ ve yoˬ. Nawˬ chi hk’e te coˇ caˇ ve htaꞈ G’uiˬ sha awˬ bon naꞈ laˇ tuˬ yoˬ.—Maˍlaˍhkiˆ 3:10.