1, 2. Chi beuꞈ teˇ co-e, ngaˬ hui g’aˇ va kuiˬ hk’aˬ kaˬ lo ca g’a tuˬ le?

Nawˬ awˬ baˬ hpawˇ lo juˇ toˇ chehˇ ve htaꞈ dawˇ nyi sheˍ. Maˇ jawˬ maˇ hkehˆ ve awˬ hk’aw lo, mvuhˇ naˆ mvuhˇ hoꞈ, mvuhˇ tawˍ mvuhˇ htehˆ, mvuhˇ haw mvuhˇ yeˬ lonˉ laˬ ve yoˬ. Nawˬ mvuhˇ yeˬ maˇ nehˆ kuiˬ lo ca leh haˆ haˆ g’uiˇ k’ai ve yoˬ. Nawˬ oˇ kaˬ lo g’aˇ g’a jehˇ ve ha lehˬ jaˇ!

² Chi hk’a shuˍ shuˍ, miˬ guiˬ chi ve teˇ nyi peuˬ teˇ nyi haiˬ jaˇ. Nawˬ dawˇ ve, ‘ngaˬ g’aˇ va kuiˬ hk’aˬ kaˬ lo ca g’a tuˬ le?’ Chiˇ mvuh ve liꞈ bvuhꞈ paˍ k’oˆ ve, “nawˬ lehˬ ngaˬ htaꞈ haꞈ shaˉ laˇ shehˍ hpaˇ leh, ngaˬ ve G’uiˬ sha hpehꞈ ve yoˬ. Nawˬ htaꞈ ceh tiˉ ngaˬ g’aˇ va ve yoˬ.” (Chiˇ mvuh ve 91:2) Ngaˬ hui dawˇ haˍ gaˇ haˍ ve g’a hpuˇ ve htawˇ, Yaˬhoˉvaˬ ngaˬ hui htaꞈ ga laˇ leh awˬ g’uˇ suhˍ hpawˇ daꞈ ve dawˇ law kuiˬ kaꞈ peꞈ laˇ ve yoˬ.

3. Yaˬhoˉvaˬ ngaˬ hui htaꞈ ga laˇ tcuh gaˇ ve k’o, hk’aˬ hk’e te cawˇ ve le?

³ Yaˬhoˉvaˬ ngaˬ hui htaꞈ hk’aˬ hk’e te haꞈ shaˉ laˇ g’a ve le? Yawˇ lehˬ ngaˬ hui dawˇ haˍ gaˇ haˍ ve hk’a peu-eˬ ga laˇ g’a ve yoˬ. Te luˬ laˇ gaˇ ve chaw aꞈ kehˉ yawˇ kanˇ paˆ cawˬ ve yoˬ. Chi teˇ hkui ngaˬ hui maˇ daꞈ ve awˬ ceuˬ htaꞈ g’a hpuˇ ve htawˇ, awˬ g’uˇ suhˍ hpawˇ Yaˬhoˉvaˬ gu laˇ tuˬ yoˬ tehꞈ, yonˍ g’a ve yoˬ. Liꞈ hpu hk’aw k’oˆ ve, “G’uiˬ sha ve haꞈ pehnˇ ve awˬ hk’aw lo a shu yawˇ awˬ to yeˬ chaweh chehˇ taˍ-oꞈ.” (Yuˇdaꞈ 21) Tuꞈ hkanˍ dawˇ haˍ ve awˬ yanˇ awˬ hk’aw lo Yaˬhoˉvaˬ ga laˇ tcuh gaˇ ve k’o, yawˇ htaꞈ g’a meuˆ daꞈ tcuhˉ taˍ ve yoˬ. Yaꞈ hk’aˇ, ngaˬ hui hk’aˬ hk’e te g’a tuˬ le?

4, 5. Yaˬhoˉvaˬ ngaˬ hui htaꞈ haꞈ ve hk’aˬ hk’e te hpeuꞈ maw laˇ ve le?

⁴ Yaˬhoˉvaˬ htaꞈ meuˆ daꞈ tcuhˉ taˍ tuˬ, yawˇ ngaˬ hui htaꞈ hk’aˬ ma haꞈ ve g’a dawˇ nyi ve yoˬ. Yaˬhoˉvaˬ ngaˬ hui htaꞈ te laˇ ve awˬ  ceuˬ hk’a peu-eˬ dawˇ nyi sheˍ. G’awˇ hpaꞈ mvuhˬ naweh, to nuˇ to shaˆ hk’a biˇ cawˬ ve daꞈ ve miˬ guiˬ hk’oˆ yawˇ ngaˬ hui htaꞈ chehˇ tcuh laˇ ve yoˬ. Mehˬ ve caˇ tuˬ, kehˬ ve iˉ kaˆ kaꞈ peꞈ laˇ ve yoˬ. Yaˬhoˉvaˬ yawˇ ve awˬ meh leh te hk’aˇ dawˇ hk’aˇ maˍ laˇ tuˬ, Liꞈ hpu peꞈ laˇ ve yoˬ. A yeˇ uiˍ jaˇ ve teˇ ceuˬ lehˬ yawˇ ngaˬ hui htaꞈ haꞈ jaˇ leh yawˇ haꞈ jaˇ ve Yaˇ hpu htaꞈ miˬ guiˬ hk’oˆ peu laˇ leh ngaˬ hui htaiˍ hk’awꞈ laˇ tcuh ve yoˬ. (Yoˇhanˬ 3:16) Chi htaꞈ pa taw, ngaˬ hui awˬ g’uˇ suhˍ hpawˇ daꞈ jaˇ ve dawˇ law kuiˬ cawˬ ve yoˬ.

⁵ Mvuhˇ naw ma hk’oˆ lo Yaˬhoˉvaˬ Meˍsiˉyaꞈ ve mvuhˇ miˬ teh taˍ ve yoˬ. Maˇ maw k’o, uˉ peunˍ ve chi lehˬ tuꞈ hkanˍ ve hk’a peu-eˬ te luˬ piˇ tuˬ yoˬ. Miˬ guiˬ hk’oˆ Paˍraˍdiˇsuˆ hpehꞈ la tcuh leh teˇ g’aˇ le le co co taiˍ taiˍ gawˬ lehˍ chehˇ sha cawˬ sha cawˬ tuˬ yoˬ. (Chiˇ mvuh ve 37:29) Yaˬhoˉvaˬ ngaˬ hui htaꞈ haꞈ ve yoˬ tehꞈ, k’awꞈ hpeuꞈ maw laˇ ve lehˬ chi teˇ hkui ngaˬ hui a shaꞈ teꞈ chehˇ kuiˬ daꞈ jaˇ ve awˬ hk’aˇ maˍ laˇ ve yoˬ. Yawˇ geh bon lawˬ tuˬ kaꞈ kuˬ laˇ leh hk’aˬ htaˆ kaꞈ na yuˬ laˇ ve yoˬ. Ngaˬ hui g’a mawˬ ve, Yaˬhoˉvaˬ ngaˬ hui teˇ g’aˇ le le htaꞈ awˬ tehˬ awˬ na haꞈ ve yoˬ.

6. Yaˬhoˉvaˬ haꞈ pehnˇ ve awˬ hpfuhˇ hk’aˆ jaˇ ve htaꞈ nawˬ hk’aˬ hk’e te hpeuꞈ maw piˇ tuˬ le?

⁶ Yaˬhoˉvaˬ haꞈ pehnˇ ve awˬ hpfuhˇ hk’aˆ jaˇ tehꞈ shawˍ taˍ ve k’o, nawˬ hk’aˬ hk’e te cawˇ ve le? Yawˇ nawˬ htaꞈ te laˇ ve teˇ ceuˬ le le ve bon htaꞈ awˬ bon uiˍ hkawˇ k’oˆ piˇ g’a ve yoˬ. Chi beuꞈ teˇ co-e, chaw maˇ-awˍ ve awˬ bon htaꞈ maˇ shiˍ puiˉ. Yeˍsuˆ miˬ guiˬ hk’oˆ chehˇ htaˇ kaꞈ chi hk’a shuˍ shuˍ hpehꞈ ve yoˬ. Tawˇ pa haˉ te k’o, Yeˍsuˆ hkiˬ tuꞈ paˍ 10 g’aˇ htaꞈ gu na-e piˇ htaˇ, yawˇ htaꞈ awˬ bon uiˍ hkawˇ k’oˆ piˇ ve teˇ g’aˇ ceh tiˉ cawˬ ve yoˬ. (Luˉkaꞈ 17:12-17) Yeˍsuˆ htaꞈ awˬ bon uiˍ jaˇ tehꞈ k’oˆ piˇ ve chaw teˇ g’aˇ hk’a shuˍ, ngaˬ hui kaꞈ Yaˬhoˉvaˬ htaꞈ awˬ bon uiˍ jaˇ tehꞈ k’oˆ piˇ gaˇ ve yoˬ.

7. Ngaˬ hui Yaˬhoˉvaˬ htaꞈ hk’aˬ hk’e taw haꞈ cawˇ ve le?

⁷ Chi hk’oˆ kaꞈ, ngaˬ hui Yaˬhoˉvaˬ htaꞈ haꞈ ve yoˬ tehꞈ hpeuꞈ maw piˇ g’a ve yoˬ. Yeˍsuˆ yawˇ ve awˬ laꞈ g’awˇ htaꞈ k’oˆ piˇ ve, nyi  ma hk’a peu-eˬ, co ha hk’a peu-eˬ leh dawˇ hk’aˇ hk’a peu-eˬ Yaˬhoˉvaˬ htaꞈ g’a haꞈ ve yoˬ. (Maꞈhtehˍ 22:37 g’aw ve.) Chi ve tcuhˉ kuiˬ hk’aˬ hk’e k’oˆ gaˇ ve le?

8, 9. Ngaˬ hui Yaˬhoˉvaˬ htaꞈ haꞈ ve k’o, hk’aˬ hk’e te cawˇ ve le?

⁸ Yaˬhoˉvaˬ htaꞈ haꞈ-aˬ tehꞈ k’oˆ ve ceh lawꞈ-aw laˇ? Maˇ lawꞈ. Ngaˬ hui nyi ma hk’a peu-eˬ, co ha hk’a peu-eˬ, dawˇ hk’aˇ hk’a peu-eˬ Yaˬhoˉvaˬ htaꞈ haꞈ ve k’o, ngaˬ hui g’a te tawˆ la ve yoˬ. (Maꞈhtehˍ 7:16-20) Liꞈ hpu hk’a tawˍ lehˆ maˍ laˇ ve, ngaˬ hui G’uiˬ sha htaꞈ haꞈ ve k’o, yawˇ ve tawˇ hkawˇ htaꞈ na yuˬ tuˬ yoˬ. Chi hk’e te tuˬ maˇ haˍ. Awˬ lawn k’o, “yawˇ piˇ taˍ ve tawˇ hkawˇ teˇ hpaˍ lehˬ, haˍ jaˇ ve teˇ ceuˬ hpehꞈ ve maˇ heˆ.”—1 Yoˇhanˬ 5:3 g’aw ve.

⁹ Ngaˬ hui Yaˬhoˉvaˬ hkawˇ na yuˬ ve k’o, awˬ tehˬ awˬ na dawˇ sha gaˇ sha ve yoˬ. (Iˉsaˍyaˆ 48:17, 18) Ngaˬ hui hk’aˬ hk’e te leh Yaˬhoˉvaˬ htaꞈ meuˆ daꞈ tcuhˉ taˍ g’a tuˬ le? Teˇ geh nyi sheˍ.

10. Nawˬ aˬ htoꞈ ma te Yaˬhoˉvaˬ ve awˬ lawn hk’aˬ htaˆ kaꞈ henˇ cawˇ ve le?

¹⁰ Nawˬ Yaˬhoˉvaˬ htaꞈ awˬ chawˇ hk’aˬ hk’e te g’a ve le? Nawˬ Liꞈ hpu henˇ ve teˇ yanˇ, Yaˬhoˉvaˬ htaꞈ shiˍ daꞈ la leh yawˇ htaꞈ meuˆ daꞈ maˇ la ve yoˬ. Aˬ miˍ ceh taˍ ve htaꞈ dawˇ nyi sheˍ. Nawˬ aˬ miˍ toꞈ chehˇ tcuh gaˇ ve k’o, hk’aˬ htaˆ kaꞈ suhˆ g’a chiˇ tuˉ ve yoˬ. Nawˬ Yaˬhoˉvaˬ htaꞈ meuˆ daꞈ ve teˇ ceuˬ aˬ miˍ ceh taˍ ve hk’a shuˍ hpehꞈ ve yoˬ. Nawˬ Yaˬhoˉvaˬ htaꞈ meuˆ daꞈ tcuhˉ taˍ tuˬ, yawˇ ve awˬ lawn hk’aˬ htaˆ kaꞈ g’a henˇ ve yoˬ.—Tawˇ naˉ ve 2:1-5.

11. Nawˬ Liꞈ hpu hk’aˬ htaˆ kaꞈ henˇ ve k’o, aˬ htoꞈ ma awˬ bon g’a ve le?

¹¹ Nawˬ Liꞈ hpu hk’aˬ htaˆ kaꞈ henˇ ve k’o, nawˬ nyi ma hk’aw lo gaˬ ve laiˉ ceuˬ htaꞈ g’a henˇ tuˬ yoˬ. Liꞈ hpu hk’aw ve tcuh kaˍ paˍ tawˇ hkawˇ Yeˍsuˆ awˬ laꞈ g’awˇ 2 g’aˇ htaꞈ k’oˆ maˍ piˇ ve teˇ yanˇ, yawˇ hui hk’aˬ hk’e k’ai ve le? Yawˇ hui k’oˆ ve, “yaꞈ k’aw k’aˉ lo yawˇ ngaˬ huiˉ maˬ htaꞈ tawˇ yaw laˇ leh Liꞈ hpu tcuhˉ kuiˬ hpeuꞈ maˍ laˇ ve teˇ yanˇ, ngaˬ huiˉ maˬ ve nyi ma hk’aw lo geh jaˇ” ve yoˬ.—Luˉkaꞈ 24:32.

12, 13. (a) Ngaˬ hui Yaˬhoˉvaˬ htaꞈ haꞈ ve teˇ ceuˬ hk’aˬ hk’e hpehꞈ la g’a ve le? (b) Yaˬhoˉvaˬ htaꞈ haꞈ ve maˇ i k’ai yawnˇ k’ai tuˬ, aˬ htoꞈ ma g’a te ve le?

 ¹² Yeˍsuˆ ve awˬ laꞈ g’awˇ chi 2 g’aˇ hk’a shuˍ, Liꞈ hpu htaꞈ tanˬ na g’a htaˇ, nawˬ kaꞈ ha lehˬ jaˇ ve yoˬ. Nawˬ chi hk’e dawˇ ve pa taw, Yaˬhoˉvaˬ ve awˬ lawn shiˍ gaˇ leh yawˇ htaꞈ haꞈ ve yoˬ. Ngaˬ hui Yaˬhoˉvaˬ htaꞈ haꞈ ve maˇ i k’ai yawnˇ k’ai tcuh gaˇ ve yoˬ.—Maꞈhtehˍ 24:12.

¹³ Nawˬ G’uiˬ sha htaꞈ awˬ chawˇ te daꞈ-oˬ ve k’o, yawˇ htaꞈ haꞈ ve maˇ i k’ai yawnˇ k’ai tuˬ, g’a coˇ caˇ ve yoˬ. Nawˬ Yaˬhoˉvaˬ leh Yeˍsuˆ ve awˬ lawn g’a henˇ tcuhˉ taˍ ve yoˬ. Henˇ k’ai peuˬ ve awˬ lawn maˇ k’oˆ, a shaꞈ teꞈ kuiˬ lo yuˬ yehˇ tuˬ ve awˬ hk’aˇ maˇ k’oˆ, g’a dawˇ nyi ve yoˬ. (Yoˇhanˬ 17:3) Nawˬ Liꞈ hpu g’aw ve teˇ yanˇ, a shu yawˇ awˬ to htaꞈ na nyi sheˍ. ‘Awˬ lawn chi ve Yaˬhoˉvaˬ ve awˬ lawn ngaˬ hui htaꞈ aˬ htoꞈ ma maˍ laˇ ve le? Ngaˬ G’uiˬ sha htaꞈ nyi ma hk’a peu-eˬ leh co ha hk’a peu-eˬ aˬ htoꞈ ma te haꞈ cawˇ ve le?’—1 Tiˆmoˉseˍ 4:15.

14. Ngaˬ hui Yaˬhoˉvaˬ htaꞈ haꞈ leh meuˆ daꞈ tuˬ, bon lawˬ ve hk’aˬ hk’e ga laˇ g’a ve le?

 ¹⁴ Nawˬ teˇ nyi le le haꞈ ve awˬ chawˇ htaꞈ tawˇ yaw daꞈ ve k’o, shaˬ te shaˬ meuˆ daꞈ maˇ la ve yoˬ. Chi hk’a shuˍ shuˍ, nawˬ teˇ nyi le le Yaˬhoˉvaˬ geh bon lawˬ ve k’o, yawˇ htaꞈ shaˬ te shaˬ haꞈ leh meuˆ daꞈ maˇ la ve yoˬ. (1 Hteˇsaˍlawˇniˆ 5:17 g’aw ve.) Bon lawˬ ve lehˬ mvuhˇ naw ma hk’oˆ chehˇ ve ngaˬ hui ve Awˬ pa peꞈ laˇ ve daꞈ ve laꞈ shawnˍ hpehꞈ ve yoˬ. Ngaˬ hui G’uiˬ sha geh hk’aˬ htaˆ kaꞈ bon lawˬ cawˇ ve yoˬ. (Chiˇ mvuh ve 62:8) Ngaˬ hui bon lawˬ ve maˇ tawnˇ g’aw cawˇ. Yaꞈ hk’aˇ, ngaˬ hui hk’aˬ hk’e dawˇ ve yawˇ htaꞈ k’oˆ piˇ cawˇ ve yoˬ. Ngaˬ hui Liꞈ hpu henˇ leh nyi ma awˬ tawˬ hk’a gaˬ bon lawˬ tcuhˉ taˍ ve k’o, Yaˬhoˉvaˬ htaꞈ haꞈ leh meuˆ daꞈ tcuhˉ taˍ tuˬ yoˬ.

15, 16. Hto toˇ ve kanˉ htaꞈ nawˬ hk’a hk’e dawˇ ve le?

¹⁵ Ngaˬ hui Yaˬhoˉvaˬ htaꞈ meuˆ daꞈ tcuhˉ taˍ gaˇ ve k’o, ngaˬ hui ve yonˍ hk’aˇ shu htaꞈ g’a k’oˆ piˇ ve yoˬ. Ngaˬ hui Yaˬhoˉvaˬ ve awˬ lawn shu htaꞈ k’oˆ piˇ ve lehˬ daꞈ jaˇ ve kanˉ hpehꞈ ve yoˬ. (Luˉkaꞈ 1:74) Hkriꞈ yaˇ teˇ g’aˇ le le Yeˍsuˆ awˬ vuiˬ chi teˇ maˬ peꞈ laˇ taˍ ve yoˬ. Chi htaꞈ pa taw, ngaˬ hui teˇ g’aˇ le le G’uiˬ sha ve mvuhˇ miˬ awˬ lawn hto toˇ cawˇ ve yoˬ. Nawˬ hto toˇ chehˇ-aw laˇ?—Maꞈhtehˍ 24:14; 28:19, 20.

¹⁶ Tcuh yaˇ Pawˇluꞈ hto toˇ ve kanˉ htaꞈ “uiˍ jaˇ daꞈ jaˇ” leh “awˬ hpfuhˇ hk’aˆ jaˇ” tehꞈ shawˍ ve yoˬ. (2 Kawˇrenˍhtuˆ 4:7) Yaˬhoˉvaˬ ve awˬ lawn leh yawˇ ve a loˍ shu htaꞈ k’oˆ piˇ ve lehˬ a yeˇ uiˍ jaˇ ve kanˉ hpehꞈ ve yoˬ. Chi lehˬ Yaˬhoˉvaˬ ve kanˉ te tuˬ awˬ hk’aˇ teˇ hk’aˇ hpehꞈ leh nawˬ te ve awˬ ceuˬ awˬ hpfuhˇ hk’aˆ jaˇ tehꞈ yawˇ shawˍ taˍ ve yoˬ. (Heˍbrehˇ 6:10) Hto toˇ ve lehˬ nawˬ awˬ to leh g’a kaˇ ve chaw awˬ pon awˬ bon cawˬ ve yoˬ. Nawˬ leh yawˇ hui Yaˬhoˉvaˬ htaꞈ meuˆ daꞈ g’a leh co co taiˍ taiˍ a shaꞈ g’a tuˬ yoˬ. (1 Kawˇrenˍhtuˆ 15:58 g’aw ve.) Chi aꞈ kehˉ dawˇ sha gaˇ sha ve kanˉ aˬ htoꞈ ma cawˬ sheˍ ve le?

17. Aˬ htoꞈ ma te hto toˇ ve kanˉ haˆ haˆ g’a te ve le?

 ¹⁷ Hto toˇ ve kanˉ lehˬ haˆ haˆ g’a te ve yoˬ. Ngaˬ hui “bon hkawˇ hk’a dehꞈ maˍ piˇ” cawˇ ve yoˬ. (2 Tiˆmoˉseˍ 4:2) G’uiˬ sha ve mvuhˇ miˬ awˬ lawn chaw yaˇ kaˇ tuˬ loˍ ve yoˬ. Liꞈ hpu hk’aw k’oˆ ve, “kawˆ tuˬ uiˍ jaˇ ve G’uiˬ sha ve awˬ nyi gaˬ la paˇ neˇ ve yoˬ.” Miˬ guiˬ leh ve awˬ yanˇ tinˍ taˍ ve hk’e gaˬ la tuˬ yoˬ! (Zeˍhpaˍniˆ 1:14; Haˍbaˍkuˆ 2:3) Maˇ maw k’o, Yaˬhoˉvaˬ lehˬ Saˍtanˍ ve haiˬ ve miˬ guiˬ htaꞈ te luˬ piˇ tuˬ yoˬ. Maˇ te luˬ piˇ sheˍ htaˇ, Yaˬhoˉvaˬ htaꞈ oˉ k’oˍ pui ve shu leuˆ yuˬ g’a tuˬ, ngaˬ hui shaˍ tiꞈ g’a ca piˇ ve yoˬ.

18. Aˬ htoꞈ ma te ngaˬ hui awˬ tehˬ ve Hkriꞈ yaˇ hui geh teˇ geh Yaˬhoˉvaˬ yawˇ htaꞈ oˉ k’oˍ pui cawˇ ve le?

¹⁸ Ngaˬ hui leh awˬ tehˬ ve Hkriꞈ yaˇ hui htaꞈ Yaˬhoˉvaˬ yawˇ htaꞈ oˉ k’oˍ pui tcuh gaˇ ve yoˬ. Liꞈ hpu hk’aw k’oˆ ve, “teˇ g’aˇ leh teˇ g’aˇ haꞈ pehnˇ ve nyi ma cawˬ leh, daꞈ ve kanˉ teˇ hpaˍ htaꞈ te tuˬ, shu htaꞈ dawˇ nyi leh awˬ g’aˇ piˇ-a veuˬ. Chaw teˇ hpaˍ teˇ geh hpawnˬ daꞈ ve teˇ ceuˬ htaꞈ baˬ taˉ peuˬ. Nawˬ hui oˇ hk’e taˇ te. Yaꞈ hk’aˇ, awˬ nyi oˇ ve teˇ nyi gaˬ la paˇ neˇ ve htaꞈ nawˬ hui shiˍ ve pa taw, leuˉ leh awˬ g’aˇ piˇ daꞈ chehˇ-oˆ.” (Heˍbrehˇ 10:24, 25) Ngaˬ hui teˇ pawˆ le le hpawnˬ daꞈ kuiˬ lo k’ai cawˇ ve yoˬ. Ngaˬ hui hpawnˬ daꞈ htaˇ, teˇ g’aˇ leh teˇ g’aˇ awˬ g’aˇ piˇ daꞈ g’a ve yoˬ.

19. Ngaˬ hui awˬ viˉ awˬ nyi Hkriꞈ yaˇ htaꞈ haꞈ tuˬ, hk’aˬ hk’e g’a te ve le?

¹⁹ Nawˬ hpawnˬ daꞈ-e ve k’o, Yaˬhoˉvaˬ htaꞈ oˉ k’oˍ pui tuˬ, daꞈ ve awˬ chawˇ hpuˇ daꞈ tuˬ yoˬ. G’uiˬ sha htaꞈ oˉ k’oˍ pui ve awˬ viˉ awˬ nyi hawˉ hk’aˆ yaˇ miˇ htaꞈ g’a mawˬ daꞈ tuˬ yoˬ. Nawˬ hk’a shuˍ, yawˇ hui kaꞈ maˇ biˇ ve chaw hpehꞈ leh te yaꞈ puiˉ ve yoˬ. Chi htaꞈ pa taw, yawˇ hui te yaꞈ ve k’o, nawˬ venˇ baˆ hpehꞈ piˇ cawˇ ve yoˬ. (Kawˇlawˇsehˇ 3:13 g’aw ve.) Awˬ viˉ awˬ nyi htaꞈ daꞈ hpawˇ g’a nyi ve yoˬ. Nawˬ chi hk’e te ve k’o, yawˇ hui htaꞈ haꞈ leh Yaˬhoˉvaˬ htaꞈ meuˆ da maˇ la ve yoˬ.

20, 21. “Awˬ tehˬ awˬ na yeˬ ve a shaꞈ” hk’aˬ hk’e le?

²⁰ Yaˬhoˉvaˬ lehˬ yawˇ ve awˬ chawˇ teˇ g’aˇ le le htaꞈ daꞈ jaˇ ve a  shaꞈ teꞈ chehˇ tcuh gaˇ ve yoˬ. Liꞈ hpu hk’aw maˍ laˇ ve, chi teˇ hkui ve a shaꞈ lehˬ awˬ g’uˇ suhˍ hpawˇ ve a shaꞈ htaꞈ peun daꞈ jaˇ ve yoˬ.

²¹ Awˬ g’uˇ suhˍ hpawˇ lo ngaˬ hui 70, 80 hk’awꞈ ceh tiˉ g’a teꞈ chehˇ tuˬ ve maˇ heˆ. Paˍraˍdiˇsuˆ hk’aw ngaˬ hui chehˇ sha cawˬ sha leh gawˬ lehˍ co co taiˍ taiˍ g’a teꞈ chehˇ tuˬ yoˬ. Chi lehˬ Liꞈ hpu hk’aw “awˬ tehˬ awˬ na yeˬ ve a shaꞈ” tehꞈ k’oˆ taˍ ve yoˬ. Ngaˬ hui htaꞈ awˬ tehˬ awˬ na yeˬ ve a shaꞈ chi ve peꞈ laˇ tuˬ yoˬ tehꞈ, Yaˬhoˉvaˬ ka tiꞈ te taˍ ve yoˬ. Yaꞈ hk’aˇ, a shaꞈ chi htaꞈ “vawˆ taˍ” tuˬ, ngaˬ hui chi teˇ hkui te g’a ve hk’e teˇ ceuˬ le le te cawˇ ve yoˬ.—1 Tiˆmoˉseˍ 6:12, 19.

22. (a) “Awˬ tehˬ awˬ na yeˬ ve a shaꞈ teꞈ ve teˇ ceuˬ htaꞈ vawˆ taˍ” tuˬ, ngaˬ hui hk’aˬ hk’e te g’a tuˬ le? (b) Aˬ htoꞈ ma te ngaˬ hui co co taiˍ taiˍ a shaꞈ maˇ g’a keunˍ ve le?

²² “Awˬ tehˬ awˬ na yeˬ ve a shaꞈ teꞈ ve teˇ ceuˬ htaꞈ vawˆ taˍ” tuˬ, ngaˬ hui hk’aˬ hk’e te g’a tuˬ le? Ngaˬ hui “daꞈ ve kanˉ maˇ chaweh” g’a te ve yoˬ. (1 Tiˆmoˉseˍ 6:18) K’oˆ gaˇ ve lehˬ, Liꞈ hpu hk’aw ngaˬ hui g’a henˇ ve aw ceuˬ teˇ hpaˍ htaꞈ a shaꞈ teꞈ kuiˬ lo g’a yuˬ yehˇ ve yoˬ. Yaꞈ hk’aˇ, ngaˬ hui te puiˉ te hpehꞈ ve pa taw, awˬ tehˬ awˬ na yeˬ ve a shaꞈ g’a ve maˇ heˆ. Hk’aˬ hk’e taw te daꞈ ve htawˇ, ngaˬ hui awˬ tehˬ awˬ na yeˬ ve a shaꞈ maˇ g’a keunˍ. Yaꞈ hk’aˇ, “G’uiˬ sha ve awˬ bon” htaꞈ pa taw, a shaꞈ chi ve htaꞈ g’a ve yoˬ. (Roˉmaꞈ 5:15) Mvuhˇ naw ma hk’oˆ chehˇ ve ngaˬ hui ve Awˬ pa Yaˬhoˉvaˬ lehˬ ka tiꞈ yeˬ ve chaw teˇ g’aˇ le le htaꞈ laꞈ shawnˍ chi ve peꞈ laˇ gaˇ ve yoˬ.

23. Chi teˇ hkui kaꞈ nawˬ cawˇ ve yaꞈ k’aw htaꞈ aˬ htoꞈ ma te g’a leuˆ yuˬ ve le?

²³ A shu yawˇ awˬ to htaꞈ na nyi sheˍ. ‘Ngaˬ G’uiˬ sha haꞈ yuˬ ve awˬ hk’aˇ hk’aw oˉ k’oˍ pui chehˇ-aw laˇ?’ Nawˬ teˇ ceuˬ ceuˬ pa cawˇ ve k’o, haˆ pa tuˬ loˍ ve yoˬ. Ngaˬ hui Yaˬhoˉvaˬ htaꞈ g’aˇ va leh yawˇ ve hkawˇ na yuˬ tuˬ teˇ ceuˬ le le te ve k’o, yawˇ ngaˬ hui ve g’aˇ va kuiˬ hpehꞈ tuˬ yoˬ. Saˍtanˍ ve haiˬ ve miˬ guiˬ awˬ leh meuˇ ve awˬ yanˇ awˬ hk’aw lo Yaˬhoˉvaˬ ka tiꞈ yeˬ ve chaw htaꞈ yawˇ nyi haꞈ shaˉ piˇ tuˬ yoˬ. Oˇ ve hk’awꞈ nawˉ, Yaˬhoˉvaˬ ka tiꞈ te  taˍ ve hk’e Paˍraˍdiˇsuˆ hk’aw co co taiˍ taiˍ yawˇ ngaˬ hui htaꞈ chehˇ tcuh laˇ tuˬ yoˬ. Chi teˇ hkui kaꞈ nawˬ cawˇ ve yaꞈ k’aw htaꞈ leuˆ yuˬ ve k’o, awˬ tehˬ awˬ na yeˬ ve a shaꞈ g’a tuˬ yoˬ!