1, 2. Yaˬhoˉvaˬ ve awˬ chawˇ a shu le?

Nawˬ hk’aˬ hk’e ve chaw htaꞈ awˬ chawˇ te daꞈ gaˇ ve le? Nawˬ htaꞈ hawˍ daꞈ ve chaw, dawˇ cawˇ ve chaw, awˬ liˇ awˬ hk’aˇ daꞈ ve chaw htaꞈ awˬ chawˇ te daꞈ gaˇ ve yoˬ.

² Yaˬhoˉvaˬ chaw teˇ hpaˍ htaꞈ leuˆ yuˬ leh awˬ chawˇ te daꞈ ve yoˬ. Tawˇ pa haˉ te k’o, Aˍbraˍhanˍ lehˬ Yaˬhoˉvaˬ ve awˬ chawˇ hpehꞈ ve yoˬ. (Iˉsaˍyaˆ 41:8; Yaˍkoˆ 2:23) Yaˬhoˉvaˬ Daˍviˆ htaꞈ kaꞈ dawˇ cawˇ ve yoˬ. Yawˇ k’oˆ ve, Daˍviˆ lehˬ yawˇ “nyi ma cawˇ ve chaw” hpehꞈ ve yoˬ. (Tcuh yaˇ 13:22) Yaˬhoˉvaˬ tcuh kaˍ paˍ Daˍyeˍlaˆ htaꞈ kaꞈ “haꞈ jaˇ ve yoˬ.”—Daˍyeˍlaˆ 9:23.

3. Aˬ htoꞈ ma te Aˍbraˍhanˍ, Daˍviˆ, Daˍyeˍlaˆ Yaˬhoˉvaˬ htaꞈ awˬ chawˇ te daꞈ g’a ve le?

³ Aˍbraˍhanˍ, Daˍviˆ, Daˍyeˍlaˆ hk’aˬ hk’e te Yaˬhoˉvaˬ htaꞈ awˬ chawˇ te daꞈ g’a ve le? Yaˬhoˉvaˬ Aˍbraˍhanˍ htaꞈ k’oˆ piˇ ve, “nawˬ ngaˬ ve tawˇ hkawˇ htaꞈ na yuˬ” ve yoˬ. (Awˬ hkuiˉ puiˍ 22:18) Nyi ma nuˇ nehˬ leh yawˇ hkawˇ na yuˬ ve chaw htaꞈ Yaˬhoˉvaˬ awˬ chawˇ te daꞈ ve yoˬ. Chaw ceuˬ teˇ ceuˬ kaꞈ yawˇ htaꞈ awˬ chawˇ te daꞈ g’a ve yoˬ. Yaˬhoˉvaˬ Iˉsaˍreˍlaˆ chaw htaꞈ k’oˆ piˇ ve, ‘ngaˬ nawˬ hui ve G’uiˬ sha hpehꞈ leh, nawˬ hui ngaˬ ve chaw hpehꞈ la tuˬ, ngaˬ ve tawˇ htaꞈ hk’a dehꞈ na yuˬ-oꞈ.’ (Yeˍraˍmiˆ 7:23) Nawˬ Yaˬhoˉvaˬ htaꞈ awˬ chawˇ te daꞈ gaˇ ve k’o, yawˇ hkawˇ g’a na yuˬ ve yoˬ.

4, 5. Yaˬhoˉvaˬ yawˇ ve awˬ chawˇ htaꞈ hk’aˬ hk’e te nyi haꞈ shaˉ piˇ ve le?

⁴ Liꞈ hpu hk’aw k’oˆ ve, Yaˬhoˉvaˬ “yawˇ htaꞈ ka tiꞈ yeˬ chehˇ ve chaw htaꞈ yawˇ awˬ g’aˇ uiˍ la piˇ” ve yoˬ. (2 Raˍsaˍvanˍ 16:9) Chiˇ  mvuh ve liꞈ 32:8 hk’aw yawˇ ve awˬ chawˇ htaꞈ Yaˬhoˉvaˬ ka tiꞈ te piˇ ve, “nawˬ k’ai cawˇ ve yaꞈ k’aw ngaˬ nawˬ htaꞈ maˍ laˇ leh, dawˇ hk’aˇ piˇ laˇ tuˬ yoˬ.”

⁵ Kanˇ paˆ cawˬ ve canˇ paˍ Saˍtanˍ lehˬ ngaˬ hui htaꞈ G’uiˬ sha awˬ chawˇ maˇ te tcuh gaˇ ve yoˬ. Yaꞈ hk’aˇ, Yaˬhoˉvaˬ ngaˬ hui htaꞈ nyi haꞈ shaˉ gaˇ ve yoˬ. (Chiˇ mvuh ve 55:22 g’aw ve.) Ngaˬ hui Yaˬhoˉvaˬ ve awˬ chawˇ hpehꞈ ve pa taw, nyi ma awˬ tawˬ hk’a gaˬ yawˇ ve kanˉ te ve yoˬ. Ngaˬ hui hk’aˬ hk’e taw tuꞈ hkanˍ ve htawˇ, yawˇ htaꞈ hk’aˬ htaˆ kaꞈ ka tiꞈ yeˬ ve yoˬ. Chiˇ mvuh ve liꞈ bvuhꞈ paˍ k’oˆ ve, “[G’uiˬ sha] ngaˬ awˬ paˇ neˇ lo chehˇ taˍ ve pa taw, aˬ htoꞈ ma teˇ ceuˬ kaꞈ ngaˬ htaꞈ ca yaꞈ la maˇ hpehꞈ.” Ngaˬ hui kaꞈ yawˇ hk’a shuˍ dawˇ ve yoˬ. (Chiˇ mvuh ve 16:8; 63:8) Ngaˬ hui G’uiˬ sha htaꞈ awˬ chawˇ maˇ g’a te tuˬ, Saˍtanˍ hk’aˬ hk’e te ve le?

6. Saˍtanˍ chaw yaˇ htaꞈ venˇ baˆ hk’aˬ hk’e taˍ ve le?

⁶ Awˬ lawn 11 hk’aw Aˍdanˍ Eˇvaꞈ htaꞈ hk’aˬ ve cawˇ maˇ cawˇ ve maˇ dawˇ cheˆ tcuh ve maˇ hteˇ cawˇ tehꞈ Saˍtanˍ Yaˬhoˉvaˬ htaꞈ tanˬ daꞈ leh yawˇ heˍ puiˉ ve tehꞈ she piˇ ve yoˬ. Yawˇbaˆ liꞈ hk’aw k’oˆ maˍ laˇ ve, Saˍtanˍ lehˬ G’uiˬ sha htaꞈ awˬ chawˇ te gaˇ ve chaw teˇ g’aˇ le le htaꞈ kaꞈ venˇ baˆ taˍ ve yoˬ. Saˍtanˍ k’oˆ ve, yawˇ hui G’uiˬ sha htaꞈ haꞈ ve maˇ heˆ, G’uiˬ sha awˬ bon naꞈ piˇ ve pa taw yawˇ ve kanˉ htaꞈ te ve yoˬ. Saˍtanˍ k’awꞈ k’oˆ ve, hk’aˬ ve teˇ g’aˇ kaꞈ G’uiˬ sha htaꞈ hpfuhˆ tuˬ yawˇ te g’a ve yoˬ. Yawˇbaˆ htaꞈ hk’aˬ hk’e te henˇ yuˬ g’a ve le? Yaˬhoˉvaˬ Yawˇbaˆ htaꞈ hk’aˬ hk’e te nyi haꞈ shaˉ piˇ ve le? Teˇ geh nyi sheˍ.

7, 8. (a) Yawˇbaˆ hk’aˬ hk’e ve chaw hpehꞈ ve le? (b) Yawˇbaˆ ve awˬ lawn htaꞈ Saˍtanˍ hk’aˬ hk’e k’oˆ ve le?

⁷ Yawˇbaˆ a shu le? Hawˉ hk’aˆ chi teˇ g’aˇ ponˬ laˬ ve 3,600 hk’awꞈ htaˇ a shaꞈ teꞈ chehˇ ve yoˬ. Yaˬhoˉvaˬ k’oˆ ve, oˇ htaˇ miˬ guiˬ hk’oˆ yawˇ hk’e daꞈ ve chaw teˇ g’aˇ kaꞈ maˇ cawˬ. Yawˇbaˆ G’uiˬ sha htaꞈ yawˆ yan puiˉ leh haiˬ ve awˬ ceuˬ htaꞈ nyi bawˬ ve  yoˬ. (Yawˇbaˆ 1:8) Yawˇ Yaˬhoˉvaˬ ve awˬ tehˬ ve awˬ chawˇ hpehꞈ ve yoˬ.

⁸ Yawˇbaˆ yawˇ awˬ pon ceh tiˉ dawˇ nyi ve pa taw, yawˇ G’uiˬ sha htaꞈ oˉ k’oˍ pui chehˇ ve yoˬ tehꞈ Saˍtanˍ she piˇ ve yoˬ. Saˍtanˍ Yaˬhoˉvaˬ geh yaw ve, “nawˬ lehˬ, yawˇ leh yawˇ ve yehˬ yaˇ k’a yaˇ teˇ hpaˍ htaꞈ maˇ k’oˆ, yawˇ ve mawˇ teˇ hpaˍ htaꞈ maˇ k’oˆ, hk’aˬ htaˆ kaꞈ haꞈ shaˉ piˇ chehˇ ve yoˬ. Yawˇ hk’a te ve kanˉ hk’a peu-eˬ htaꞈ nawˬ awˬ bon naꞈ piˇ chehˇ leh, mvuhˇ miˬ hk’aw yawˇ ve ceˇ caˬ teˇ hpaˍ biˇ la piˇ taˍ ve yoˬ. Yaꞈ hk’aˇ, nawˬ chi beuꞈ yawˇ hk’a cawˬ ve mawˇ hk’a peu-eˬ ve htaꞈ yuˬ baˬ piˇ ve hk’e k’o, yawˇ lehˬ nawˬ htaꞈ hkeu laˇ tuˬ yoˬ.”—Yawˇbaˆ 1:10, 11.

9. Yaˬhoˉvaˬ Saˍtanˍ htaꞈ hk’aˬ hk’e te tcuh ve le?

⁹ Yawˇbaˆ Yaˬhoˉvaˬ mawˇ ceh g’a gaˇ ve pa taw, yawˇ G’uiˬ sha htaꞈ oˉ k’oˍ pui chehˇ ve yoˬ tehꞈ Saˍtanˍ she piˇ ve yoˬ. Saˍtanˍ k’oˆ ve, Yawˇbaˆ Yaˬhoˉvaˬ htaꞈ oˉ k’oˍ maˇ k’awꞈ pui tuˬ yawˇ te g’a ve yoˬ. Yaˬhoˉvaˬ Saˍtanˍ hk’e leˇ maˇ dawˇ. Yaꞈ hk’aˇ, aˬ htoꞈ ma te Yawˇbaˆ G’uiˬ sha htaꞈ awˬ chawˇ te gaˇ ve le tehꞈ Saˍtanˍ shiˍ tuˬ, Yawˇbaˆ luˬ k’ai tuˬ Yaˬhoˉvaˬ Saˍtanˍ htaꞈ te tcuh ve yoˬ.

10. Saˍtanˍ Yawˇbaˆ htaꞈ hk’aˬ hk’e taw te piˇ ve le? Yawˇbaˆ hk’aˬ hk’e k’ai ve le?

¹⁰ Saˍtanˍ Yawˇbaˆ ve ceˇ caˬ hk’a peu-eˬ leh aˬ laˬ hk’e awˬ ceˬ hk’a peu-eˬ htaꞈ te luˬ piˇ ve yoˬ. Yawˇbaˆ teꞈ chiˉ kaꞈ maˇ leuˉ. Chi hk’oˆ kaꞈ, Saˍtanˍ mvuhˇ haw lonˉ meuˆ laˬ piˇ leh Yawˇbaˆ ve yaˇ 10 g’aˇ suh-e ve yoˬ. Yaꞈ hk’aˇ, Yawˇbaˆ Yaˬhoˉvaˬ htaꞈ ka tiꞈ yeˬ chehˇ sheˍ ve yoˬ. Liꞈ hpu hk’aw k’oˆ ve, “chi hk’e hpehꞈ la ve htawˇ, Yawˇbaˆ lehˬ G’uiˬ sha htaꞈ venˇ baˆ maˇ taˍ.”—Yawˇbaˆ 1:12-19, 22.

11. (a) Saˍtanˍ Yawˇbaˆ htaꞈ hk’aˬ hk’e k’awꞈ te piˇ ve le? (b) Yawˇbaˆ hk’aˬ hk’e k’ai ve le?

¹¹ Saˍtanˍ maˇ jehˇ sheˍ. Yawˇ G’uiˬ sha htaꞈ tanˬ daꞈ ve, “nawˬ chi beuꞈ yawˇ ve awˬ to htaꞈ naˬ tuˬ te piˇ ve hk’e k’o, yawˇ lehˬ  nawˬ htaꞈ hkeu laˇ tuˬ yoˬ.” Hk’e te leh, Saˍtanˍ Yawˇbaˆ htaꞈ tuꞈ hkanˍ jaˇ ve a naˍ hpehꞈ la piˇ ve yoˬ. (Yawˇbaˆ 2:5, 7) Yaꞈ hk’aˇ, Yawˇbaꞈ Yaˬhoˉvaˬ htaꞈ ka tiꞈ yeˬ chehˇ sheˍ ve yoˬ. Yawˇ k’oˆ ve, ‘ngaˬ suh htaˇ hk’a gaˬ ngaˬ lehˬ G’uiˬ sha htaꞈ ka tiꞈ yeˬ chehˇ tuˬ yoˬ.’—Yawˇbaˆ 27:5.

12. Saˍtanˍ heˍ ve yoˬ tehꞈ shiˍ tuˬ, Yawˇbaˆ hk’aˬ hk’e te ve le?

¹² Saˍtanˍ venˇ baˆ taˍ leh aˬ htoꞈ ma te yawˇ g’a tuˬ g’a hkanˍ ve Yawˇbaˆ maˇ shiˍ. Yaˬhoˉvaˬ haiˬ ve awˬ ceuˬ yawˇ htaꞈ te piˇ ve yoˬ tehꞈ Yawˇbaˆ dawˇ ve yoˬ. (Yawˇbaˆ 6:4; 16:11-14) Yaꞈ hk’aˇ, Yawˇbaˆ Yaˬhoˉvaˬ htaꞈ ka tiꞈ yeˬ chehˇ sheˍ. Yawˇ lehˬ G’uiˬ sha geh awˬ bon g’a ve pa taw, awˬ chawˇ te ve maˇ heˆ. Yawˇ G’uiˬ sha htaꞈ awˬ tehˬ haꞈ ve ngaˬ hui hk’a tawˍ lehˆ g’a mawˬ ve yoˬ. Saˍtanˍ she piˇ ve lehˬ heˍ ve yoˬ.

13. Yawˇbaˆ G’uiˬ sha htaꞈ ka tiꞈ yeˬ ve teˇ yanˇ hk’aˬ hk’e k’ai ve le?

¹³ Mvuhˇ naw ma hk’oˆ hk’aˬ hk’e hpehꞈ ve Yawˇbaˆ maˇ shiˍ ve htawˇ, G’uiˬ sha htaꞈ ka tiꞈ yeˬ chehˇ sheˍ ve pa taw, Saˍtanˍ haiˬ jaˇ leh heˍ puiˉ jaˇ tehꞈ ngaˬ hui g’a shiˍ ve yoˬ. Yaˬhoˉvaˬ lehˬ ka tiꞈ yeˬ ve Yawˇbaˆ htaꞈ awˬ bon naꞈ piˇ ve yoˬ.—Yawˇbaˆ 42:12-17.

14, 15. Saˍtanˍ chaw teˇ g’aˇ le le htaꞈ venˇ baˆ hk’aˬ hk’e taˍ ve le?

¹⁴ Yawˇbaˆ g’a hpuˇ ve awˬ ceuˬ ngaˬ hui henˇ yuˬ tuˬ a yeˇ uiˍ ve yoˬ. Chi beuꞈ ngaˬ hui awˬ bon g’a gaˇ ve pa taw, Yaˬhoˉvaˬ kanˉ te chehˇ ve yoˬ tehꞈ, Saˍtanˍ venˇ baˆ taˍ ve yoˬ. Yawˇbaˆ liꞈ 2:4 hk’aw Saˍtanˍ k’oˆ taˍ ve, “chaw teˇ g’aˇ lehˬ a shaꞈ g’a teꞈ chehˇ hpehꞈ tuˬ, yawˇ hk’a cawˬ ve mawˇ hk’a peu-eˬ ve htaꞈ shonˇ k’ai piˇ hpehꞈ ve yoˬ.” Chi htaꞈ pa taw, Saˍtanˍ Yawˇbaˆ htaꞈ ceh tiˉ venˇ baˆ taˍ ve maˇ heˆ. Teˇ g’aˇ le le htaꞈ venˇ baˆ taˍ ve yoˬ. Yawˇbaˆ suh peuˬ hk’awꞈ nawˉ laiˉ ha hk’awꞈ gaˬ ve kaꞈ Saˍtanˍ Yaˬhoˉvaˬ htaꞈ she piˇ leh yawˇ ve kanˉ te ve chaw htaꞈ venˇ baˆ taˍ chehˇ sheˍ. Tawˇ naˉ ve liꞈ 27:11 hk’aw Yaˬhoˉvaˬ k’oˆ ve, “yaˇ paˍ-oˬ, cuˇ yiˍ cawˬ ve chaw hpehꞈ la piˇ-oˆ. Oˇ hk’e hpehꞈ  ve k’o ngaˬ ha lehˬ tuˬ yoˬ. Ngaˬ htaꞈ venˇ baˆ ca ve [she ve] chaw htaꞈ ngaˬ k’awꞈ yaw hk’awꞈ piˇ tuˬ tawˇ cawˬ tuˬ yoˬ.”

¹⁵ Nawˬ Yaˬhoˉvaˬ hkawˇ na yuˬ tuˬ leh yawˇ ve ka tiꞈ yeˬ ve awˬ chawˇ hpehꞈ tuˬ leuˆ yuˬ ve k’o, Saˍtanˍ heˍ ve yoˬ tehꞈ, hpeuꞈ maw piˇ g’a ve yoˬ. Nawˬ laiˉ ceuˬ g’a pa ve htawˇ, G’uiˬ sha htaꞈ awˬ chawˇ te ve awˬ hpfuhˇ hk’awꞈ jaˇ ve yoˬ! Chi hk’e te leuˆ yuˬ ve a yeˇ uiˍ jaˇ. Awˬ lawn k’o Saˍtanˍ k’oˆ ve, a shaꞈ teꞈ kuiˬ dawˇ haˍ ve g’a hpuˇ htaˇ, nawˬ G’uiˬ sha htaꞈ ka tiꞈ yeˬ tuˬ ve maˇ heˆ. Ngaˬ hui G’uiˬ sha htaꞈ ka tiꞈ maˇ yeˬ tuˬ, Saˍtanˍ laiˉ ceuˬ te laˇ ve yoˬ. Yawˇ hk’aˬ hk’e te ve le?

16. (a) Chaw yaˇ Yaˬhoˉvaˬ kanˉ htaꞈ baˬ taˉ tuˬ, Saˍtanˍ aˬ htoꞈ ma awˬ hk’aˇ yehˇ ve le? (b) Nawˬ dawˇ k’o, Saˍtanˍ nawˬ htaꞈ hk’aˬ hk’e te laˇ tuˬ hehˉ le?

¹⁶ Ngaˬ hui G’uiˬ sha htaꞈ awˬ chawˇ maˇ k’awꞈ te tuˬ, Saˍtanˍ laiˉ hk’aˇ yehˇ ve yoˬ. Yawˇ “kuˬ chehˇ ve laˇ caˬ shiˉ hk’a shuˍ shuˍ, shu htaꞈ cheꞈ caˇ tuˬ ca caw nyi toˇ chehˇ ve yoˬ.” (1 Peˍtruˆ 5:8) Chi htaꞈ pa taw, awˬ chawˇ, yehˬ k’a hk’aw, a shu teˇ g’aˇ maˇ k’oˆ Liꞈ hpu henˇ ve leh cawˇ ve awˬ ceuˬ te ve htaꞈ tawˍ laˇ ve k’o, taˇ anˇ. * (Yoˇhanˬ 15:19, 20) Chi hk’oˆ kaꞈ, Saˍtanˍ “awˬ g’euˆ ba ve mvuhˇ naw ma tcuh yaˇ” hk’a shuˍ te ve yoˬ. Ngaˬ hui Yaˬhoˉvaˬ hkawˇ maˇ na yuˬ tuˬ, yawˇ heˍ maˍ ve awˬ hk’aˇ suh g’aꞈ te tcuh laˇ g’a ve yoˬ. (2 Kawˇrenˍhtuˆ 11:14) Ngaˬ hui Yaˬhoˉvaˬ kanˉ htaꞈ baˬ taˉ tuˬ, Saˍtanˍ teˇ hk’aˇ k’awꞈ yehˇ ve lehˬ yawˇ ve kanˉ maˇ te keunˍ tehꞈ dawˇ tcuh laˇ ve yoˬ.—Tawˇ naˉ ve 24:10.

17. Aˬ htoꞈ ma te ngaˬ hui Yaˬhoˉvaˬ hkawˇ na yuˬ ve le?

¹⁷ Ngaˬ hui Yaˬhoˉvaˬ hkawˇ na yuˬ ve k’o, Saˍtanˍ heˍ ve tehꞈ hpeuꞈ maw piˇ g’a ve yoˬ. Aˬ htoꞈ ma ga laˇ g’a ve le? Liꞈ hpu  hk’aw k’oˆ ve, “nawˬ hui ve nyi ma hk’a peu-eˬ, nawˬ hui ve co ha hk’a peu-eˬ, leh nawˬ hui ve awˬ g’aˇ awˬ shaˉ hk’a peu-eˬ, nawˬ hui ve Jawˇ mawˇ G’uiˬ sha htaꞈ haꞈ-oꞈ.” (Bon maˍ ve 6:5) Ngaˬ hui Yaˬhoˉvaˬ htaꞈ haꞈ ve pa taw, yawˇ hkawˇ na yuˬ ve yoˬ. Ngaˬ hui G’uiˬ sha htaꞈ haꞈ maˇ la ve k’o, yawˇ k’oˆ ve hk’a peu-eˬ htaꞈ g’aꞈ te gaˇ tuˬ yoˬ. Tcuh yaˇ Yoˇhanˬ bvuhꞈ taˍ ve, “G’uiˬ sha htaꞈ haꞈ ve tehꞈ k’oˆ ve lehˬ, yawˇ piˇ taˍ ve tawˇ hkawˇ teˇ hpaˍ htaꞈ ngaˬ hui na yuˬ leh te ve htaꞈ k’oˆ ve yoˬ. Chi hk’oˆ kaꞈ, yawˇ piˇ taˍ ve tawˇ hkawˇ teˇ hpaˍ lehˬ, haˍ jaˇ ve teˇ ceuˬ hpehꞈ ve maˇ heˆ.”—1 Yoˇhanˬ 5:3.

18, 19. (a) Yaꞈ ve yoˬ tehꞈ Yaˬhoˉvaˬ shawˍ taˍ ve, aˬ htoꞈ ma le? (b) Ngaˬ hui te maˇ g’a ve awˬ ceuˬ Yaˬhoˉvaˬ maˇ te tcuh laˇ tehꞈ, hk’aˬ hk’e te shiˍ ve le?

¹⁸ Yaꞈ ve yoˬ tehꞈ Yaˬhoˉvaˬ shawˍ taˍ ve, aˬ htoꞈ ma le? “ Yaˬhoˉvaˬ canˇ ve awˬ ceuˬ htaꞈ canˇ-oˆ” awˇ ceˍ awˇ fa hk’aw nyi sheˍ. Yaˬhoˉvaˬ canˇ ve awˬ ceuˬ chi teˇ hpaˍ teꞈ chiˉ maˇ heˆ hehˉ tehꞈ nawˬ dawˇ jaw ve yoˬ. Yaꞈ hk’aˇ, nawˬ Liꞈ hpu g’aw leh hk’a dehꞈ dawˇ nyi ve k’o, Yaˬhoˉvaˬ hkawˇ na yuˬ ve lehˬ cuˇ yiˍ cawˬ  ve yoˬ tehꞈ shiˍ la tuˬ yoˬ. Teˇ ceuˬ ceuˬ g’a pa ve yoˬ tehꞈ, nawˬ kaꞈ shiˍ la tuˬ yoˬ hehˉ. Pa haˍ jaˇ ve htawˇ nawˬ te ve k’o, nawˬ ha lehˬ dawˇ sha g’a leh G’uiˬ sha ve ka tiꞈ yeˬ ve awˬ chawˇ hpehꞈ g’a ve yoˬ. (Iˉsaˍyaˆ 48:17, 18) Naw hk’aˬ hk’e te pa g’a ve le?

¹⁹ Ngaˬ hui te maˇ g’a ve awˬ ceuˬ Yaˬhoˉvaˬ maˇ te tcuh laˇ jaw. (Bon maˍ ve 30:11-14) Yawˇ lehˬ awˬ tehˬ ve awˬ chawˇ hpehꞈ leh ngaˬ hui awˬ to aꞈ kehˉ yawˇ shiˍ ve yoˬ. Ngaˬ hui ve awˬ g’aˇ nuˇ kuiˬ, awˬ g’aˇ uiˍ kuiˬ htaꞈ kaꞈ shiˍ ve yoˬ. (Chiˇ mvuh ve 103:14) Tcuh yaˇ Pawˇluꞈ awˬ g’aˇ peꞈ laˇ leh k’oˆ ve, “G’uiˬ sha htawˇ, ka tiꞈ yeˬ leh, nawˬ hui hkanˍ maˇ g’a ve beˬ ve lawˇ ve htaꞈ g’a hpuˇ tuˬ, yawˇ a hkaw-anˬ maˇ piˇ. Yaꞈ hk’aˇ, beˬ ve lawˇ ve htaꞈ hpuˇ htaˇ, nawˬ hui hkanˍ hpehꞈ tuˬ, ponˬ ve yaꞈ k’aw htaꞈ yawˇ gu taˍ tuˬ yoˬ.” (1 Kawˇrenˍhtuˆ 10:13) Cawˇ ve htaꞈ te tuˬ, Yaˬhoˉvaˬ ngaˬ hui htaꞈ hk’aˬ htaˆ kaꞈ awˬ g’aˇ piˇ laˇ tuˬ yoˬ. Nyiˉ laˇ ve htaꞈ g’a hpuˇ htaˇ, nawˬ yeunˇ hkanˍ g’aˇ tuˬ “uiˍ jaˇ daꞈ jaˇ ve kanˇ paˆ” peꞈ laˇ tuˬ yoˬ. (2 Kawˇrenˍhtuˆ 4:7) Yaˬhoˉvaˬ Pawˇluꞈ htaꞈ laiˉ pawˆ ga piˇ peuˬ hk’awꞈ nawˉ Pawˇluꞈ k’oˆ ve, “ngaˬ htaꞈ awˬ g’aˇ  awˬ shaˉ peꞈ laˇ shehˍ hpaˇ htaꞈ cuˇ ve awˬ hk’aw lo, hk’a peu-eˬ htaꞈ ngaˬ te puiˉ te hpehꞈ ve yoˬ.”—Hpiˇliˇpiˆ 4:13.

20. Ngaˬ hui aˬ htoꞈ ma te hk’aˇ htaꞈ henˇ yuˬ cawˇ ve le? Aˬ htoꞈ ma te oˇ hk’e g’a te ve le?

²⁰ Ngaˬ hui Yaˬhoˉvaˬ htaꞈ awˬ chawˇ te gaˇ ve k’o, yaꞈ ve yoˬ tehꞈ Yaˬhoˉvaˬ shawˍ taˍ ve htaꞈ maˇ k’awꞈ te ve ceh tiˉ maˇ lawꞈ. (Roˉmaꞈ 12:9) G’uiˬ sha ve awˬ chawˇ lehˬ yawˇ haꞈ ve htaꞈ kaꞈ g’a haꞈ ve yoˬ. Awˬ lawn chi ve Chiˇ mvuh ve liꞈ 15:1-5 (g’aw ve) hk’aw k’oˆ taˍ ve yoˬ. Yaˬhoˉvaˬ ve awˬ chawˇ “haꞈ pehnˇ ve, ha lehˬ ve, dawˇ sha ve, dawˇ zuhˬ gaˇ zuhˬ ve, ha k’aˉ ve, shu awˬ pon daꞈ ve htaꞈ te ve, ka tiꞈ yeˬ ve, nyi ma nuˇ nehˬ ve leh, a shu yawˇ awˬ to htaꞈ g’aˇ puiˉ ve” chi teˇ hpaˍ g’a henˇ yuˬ ve yoˬ.—Gaˍlaˍtiˆ 5:22, 23.

21. G’uiˬ sha haꞈ ve te hk’aˇ nawˬ hk’aˬ hk’e te cawˬ g’a tuˬ le?

²¹ Daꞈ ve te hk’aˇ chi teˇ hpaˍ htaꞈ nawˬ hk’aˬ hk’e te cawˬ g’a tuˬ le? Yaˬhoˉvaˬ haꞈ ve htaꞈ shiˍ tuˬ nawˬ hk’aˬ htaˆ kaꞈ Liꞈ hpu g’a henˇ ve yoˬ. (Iˉsaˍyaˆ 30:20, 21) Oˇ hk’e te k’o, Yaˬhoˉvaˬ htaꞈ haꞈ maˇ la leh yawˇ ve hkawˇ na yuˬ gaˇ tuˬ yoˬ.

22. Nawˬ Yaˬhoˉvaˬ hkawˇ na yuˬ ve k’o, aˬ htoꞈ ma g’a tuˬ le?

²² Nawˬ teˇ ceuˬ ceuˬ g’a pa ve lehˬ veuꞈ k’aˇ awˬ piˍ k’ehˆ baˬ leh awˬ suhˉ veuꞈ ve htaꞈ tehˆ daꞈ g’a ve yoˬ. Liꞈ hpu hk’aw k’oˆ ve, nawˬ “awˬ piˍ ve awˬ liˇ awˬ hk’aˇ” htaꞈ g’a k’ehˆ baˬ leh “awˬ suhˉ htaꞈ” g’a veuꞈ deh ve yoˬ. (Kawˇlawˇsehˇ 3:9, 10) Yaˬhoˉvaˬ hkawˇ na yuˬ leh pa tuˬ maˇ sha ve htawˇ, yawˇ ka tiꞈ te laˇ ve, “awˬ bon” maˇ maˇ naꞈ laˇ tuˬ yoˬ. (Chiˇ mvuh ve 19:11) Nawˬ Yaˬhoˉvaˬ hkawˇ na yuˬ tuˬ leuˆ yuˬ leh Saˍtanˍ heˍ ve yoˬ tehꞈ hpeuꞈ maw piˇ loˬ. Awˬ g’uˇ suhˍ hpawˇ laꞈ shawnˍ g’a gaˇ ve pa taw, Yaˬhoˉvaˬ kanˉ htaꞈ te ve maˇ heˆ. Yawˇ htaꞈ hk’a dehꞈ haꞈ ve pa taw yoˬ. Chi hk’e te ve k’o, nawˬ G’uiˬ sha ve awˬ tehˬ ve awˬ chawˇ hpehꞈ g’a tuˬ yoˬ!