1. Ngaˬ hui aˬ htoꞈ ma bon lawˬ hkawˇ htaꞈ henˇ tuˬ le?

Yeˍsuˆ ve bon lawˬ hkawˇ htaꞈ chaw laiˉ lanˬ g’aˇ shiˍ ve yoˬ. Bon lawˬ hkawˇ chi ve Yeˍsuˆ awˬ laꞈ g’awˇ htaꞈ maˍ piˇ ve yoˬ. Yawˇ aˬ htoꞈ ma lawˬ ve le? Chi beuꞈ teˇ co-e, bon lawˬ hkawˇ chi aˬ htoꞈ ma te a yeˇ uiˍ sheˍ ve le?

2. Yeˍsuˆ a yeˇ uiˍ ve 3 ceuˬ lawˬ tcuh laˇ ve aˬ htoꞈ ma le?

² Yeˍsuˆ k’oˆ ve, “hk’e te leh, nawˬ hui bon chi hk’e lawˬ-oꞈ. Mvuhˇ naw ma hk’oˆ chehˇ ve ngaˬ hui ve Awˬ pa-oˬ, nawˬ ve awˬ meh htaꞈ yawˆ yan te piˇ lawˬ-oꞈ. Nawˬ ve mvuhˇ miˬ gaˬ la piˇ-oˆ. Mvuhˇ naw ma hk’oˆ lo nawˬ ve a loˍ biˇ ve hk’e, miˬ guiˬ hk’oˆ htaꞈ htawˇ biˇ la piˇ-oˆ.” (Maꞈhtehˍ 6:9-13 g’aw ve.) Yeˍsuˆ 3 ceuˬ chi htaꞈ aˬ htoꞈ ma te lawˬ tcuh laˇ ve le?—K’oˆ maˍ ve awˬ lawn 20 htaꞈ nyi sheˍ.

3. G’uiˬ sha ve mvuhˇ miˬ aˬ htoꞈ ma awˬ lawn g’a henˇ tuˬ le?

³ G’uiˬ sha ve awˬ meh Yaˬhoˉvaˬ meh ve, yawˇ chaw yaˇ htaꞈ a shaꞈ hk’aˬ hk’e teꞈ chehˇ tcuh gaˇ ve, leh miˬ guiˬ htaꞈ hk’aˬ hk’e hpehꞈ tcuh gaˇ ve, chi hk’a peu-eˬ htaꞈ ngaˬ hui g’a henˇ peuˬ. “Nawˬ ve mvuhˇ miˬ gaˬ la piˇ-oˆ” tehꞈ Yeˍsuˆ maˍ piˇ htaˇ, yawˇ aˬ htoꞈ ma k’oˆ gaˇ ve le? G’uiˬ sha ve mvuhˇ miˬ aˬ htoꞈ ma le, aˬ htoꞈ ma te tuˬ le, leh G’uiˬ sha ve awˬ meh htaꞈ hk’aˬ hk’e te yawˆ yan piˇ ve le, ngaˬ hui k’awꞈ g’a henˇ tuˬ yoˬ.

4. G’uiˬ sha ve mvuhˇ miˬ aˬ htoꞈ ma le? A shu Jawˇ mawˇ te ve le?

⁴ G’uiˬ sha ve mvuhˇ miˬ lehˬ mvuhˇ naw ma hk’oˆ cawˬ leh Yaˬhoˉvaˬ Yeˍsuˆ htaꞈ Jawˇ mawˇ te tcuh ve yoˬ. Liꞈ hpu hk’aw k’oˆ ve, Yeˍsuˆ lehˬ “hkunˉ hawˉ hkanˇ awˬ hk’oˆ Hkunˉ hawˉ  hkanˇ hpehꞈ leh, jawˇ mawˇ awˬ hk’oˆ Jawˇ mawˇ hpehꞈ ve yoˬ.” (1 Tiˆmoˉseˍ 6:15) Miˬ guiˬ hk’oˆ uˉ peunˍ chehˇ ve hk’a peu-eˬ aꞈ kehˉ Yeˍsuˆ kanˇ paˆ uiˍ leh uˉ peunˍ ve daꞈ ve yoˬ.

5. G’uiˬ sha ve mvuhˇ miˬ hk’aˬ kaˬ lo cawˬ ve le? Mvuhˇ miˬ chi ve aˬ htoꞈ ma htaꞈ uˉ peunˍ tuˬ le?

⁵ Yeˍsuˆ k’awꞈ teꞈ tu la peuˬ 40 nyi hk’awꞈ nawˉ, mvuhˇ naw ma hk’oˆ k’oꞈ-e ve yoˬ. Awˬ hk’awꞈ nawˉ gaˬ leh, Yaˬhoˉvaˬ Yeˍsuˆ htaꞈ G’uiˬ sha ve mvuhˇ miˬ ve Jawˇ mawˇ te tcuh ve yoˬ. (Tcuh yaˇ 2:33) G’uiˬ sha ve mvuhˇ miˬ mvuhˇ naw ma hk’oˆ cawˬ leh miˬ guiˬ hk’oˆ uˉ peunˍ tuˬ yoˬ. (Hpeuꞈ maˍ ve 11:15) G’uiˬ sha ve mvuhˇ miˬ htaꞈ Liꞈ hpu hk’aw “mvuhˇ naw ma mvuhˇ miˬ” tehꞈ k’oˆ ve yoˬ.—2 Tiˆmoˉseˍ 4:18.

6, 7. Aˬ htoꞈ ma te Yeˍsuˆ lehˬ jawˇ mawˇ hk’a peu-eˬ aꞈ kehˉ daꞈ ve le?

⁶ Liꞈ hpu hk’aw k’oˆ ve, Yeˍsuˆ “ceh tiˉ co co taiˍ taiˍ a shaꞈ teꞈ chehˇ” ve pa taw, awˬ kaˍ awˬ nu jawˇ mawˇ aꞈ kehˉ daꞈ ve yoˬ. (1 Tiˆmoˉseˍ 6:16) Uˉ peunˍ shehˍ hpaˇ chaw yaˇ teˇ g’aˇ le le suh puiˉ ve yoˬ. Yaꞈ hk’aˇ, Yeˍsuˆ maˇ suh puiˉ. Yawˇ ngaˬ hui htaꞈ te laˇ ve daꞈ ve teˇ ceuˬ le le lehˬ co co taiˍ taiˍ cawˬ ve yoˬ.

⁷ Liꞈ hpu hk’aw tcuh kaˍ paˍ k’oˆ taˍ ve, “yawˇ ve chaw teˇ hpaˍ htaꞈ uˉ peunˍ tuˬ, G’uiˬ sha lehˬ chaw oˇ ve htaꞈ shiˍ puiˉ ve nyi ma leh cuˇ yiˍ hk’a biˇ piˇ tuˬ yoˬ. Yawˇ lehˬ, G’uiˬ sha ve a loˍ htaꞈ shiˍ leh, G’uiˬ sha htaꞈ kawˆ puiˉ ve chaw hpehꞈ tuˬ yoˬ. Yawˇ lehˬ, G’uiˬ sha ve kanˉ awˬ hk’aw lo ha lehˬ puiˉ ve chaw hpehꞈ leh, g’a kaˇ ve tawˇ htaꞈ ceh na leh suhˉ jehˬ piˇ tuˬ ve maˇ heˆ. Yawˇ lehˬ, haˍ ve g’awˇ ve chaw teˇ hpaˍ htaꞈ hteˇ ve cawˇ ve hk’aw suhˉ jehˬ piˇ tuˬ yoˬ.” (Iˉsaˍyaˆ 11:2-4) Yeˍsuˆ hteˇ ve cawˇ ve leh ha k’aˉ puiˉ ve Jawˇ mawˇ hpehꞈ ve yoˬ. Jawˇ mawˇ chi hk’e leˇ ve htaꞈ nawˬ heuˆ gaˇ ve maˇ heˆ laˇ?

8. Yeˍsuˆ teˇ g’aˇ tiˉ uˉ peunˍ ve maˇ heˆ tehꞈ, ngaˬ hui hk’aˬ hk’e te shiˍ ve le?

⁸ Tcuh yaˇ Pawˇluꞈ Tiˆmoˉseˍ htaꞈ k’oˆ piˇ ve, “ngaˬ hui yeunˇ hkanˍ ve k’o, yawˇ geh teˇ geh g’a uˉ peunˍ tuˬ yoˬ.” (2 Tiˆmoˉseˍ 2:12) Liꞈ hpu chi te tawn ngaˬ hui htaꞈ k’oˆ laˇ ve, G’uiˬ sha  chaw yaˇ teˇ hpaˍ htaꞈ leuˆ yuˬ leh G’uiˬ sha ve mvuhˇ miˬ hk’aw Yeˍsuˆ geh uˉ peunˍ tcuh ve yoˬ. Hk’aˬ nyiˇ g’aˇ cawˬ ve le?

9. Yeˍsuˆ geh uˉ peunˍ tuˬ ve chaw hk’aˬ nyiˇ g’aˇ cawˬ ve le? G’uiˬ sha yawˇ hui htaꞈ hk’aˬ htaˆ tanˬ leuˆ yuˬ ve le?

⁹ Awˬ lawn 7 hk’aw g’a henˇ peuˬ ve hk’e, tcuh yaˇ Yoˇhanˬ mawˬ ve, mvuhˇ naw ma hk’oˆ Yeˍsuˆ Jawˇ mawˇ te leh 144,000 g’aˇ kaꞈ jawˇ mawˇ te ve yoˬ. 144,000 g’aˇ a shu le? Yoˇhanˬ k’oˆ ve, yawˇ hui “[Yeˍsuˆ] ve awˬ meh leh yawˇ Awˬ pa ve awˬ meh a shu yawˇ ve naˍ k’aˍ pui htaꞈ bvuhꞈ taˍ” ve yoˬ. Yawˇ hui ‘yawˬ ehˉ hk’a k’ai kuiˬ teˇ kaˬ le le lo awˬ hk’aˇ suh k’ai ve chaw hui hpehꞈ ve yoˬ. Chaw yaˇ hui awˬ hk’aw lo yawˇ hui htaꞈ vuiˬ hk’awꞈ taˍ ve yoˬ.’ (Hpeuꞈ maˍ ve 14:1, 4 g’aw ve.) 144,000 g’aˇ chi lehˬ ka tiꞈ yeˬ ve Hkriꞈ yaˇ hpehꞈ ve yoˬ. Yeˍsuˆ geh “miˬ guiˬ hk’oˆ lo g’a uˉ peunˍ tuˬ,” G’uiˬ sha yawˇ hui htaꞈ leuˆ yuˬ taˍ ve yoˬ. Yawˇ hui suh ve teˇ yanˇ, k’awꞈ teꞈ tu-e leh mvuhˇ naw ma hk’oˆ taˆ-e ve yoˬ. (Hpeuꞈ maˍ ve 5:10) Ka tiꞈ yeˬ ve Hkriꞈ yaˇ 144,000 g’aˇ chi htaꞈ Yaˬhoˉvaˬ tcuh yaˇ awˬ co-e htaˇ tanˬ leuˆ yuˬ ve yoˬ.

10. Yaˬhoˉvaˬ Yeˍsuˆ leh 144,000 g’aˇ htaꞈ uˉ peunˍ tcuh ve lehˬ, aˬ htoꞈ ma pa taw daꞈ ve le?

¹⁰ Yaˬhoˉvaˬ ngaˬ hui htaꞈ haꞈ leh dawˇ nyi puiˉ ve pa taw, Yeˍsuˆ geh uˉ peunˍ tuˬ, yawˇ chaw yaˇ htaꞈ leuˆ yuˬ ve yoˬ. Yeˍsuˆ daꞈ ve jawˇ mawˇ hpehꞈ leh ngaˬ hui htaꞈ a yeˇ te laˇ ve yoˬ. Chaw yaˇ ve a shaꞈ teꞈ hk’aˇ leh chaw yaˇ aˬ htoꞈ ma g’a tuꞈ hkanˍ ve yawˇ shiˍ ve yoˬ. Pawˇluꞈ k’oˆ ve, Yeˍsuˆ ‘ngaˬ hui awˬ g’aˇ nuˇ ve teˇ yanˇ, maˇ ha k’aˉ puiˉ ve maˇ heˆ. Ngaˬ hui hk’a shuˍ shuˍ beˬ ve lawˇ ve teˇ ceuˬ le le htaꞈ yawˇ g’a hkanˍ jaw ve yoˬ.’ (Heˍbrehˇ 4:15; 5:8) Yeˍsuˆ geh uˉ peunˍ ve chaw 144,000 g’aˇ htawˇ, maˇ biˇ ve chaw yaˇ hpehꞈ jaw ve yoˬ. Maˇ biˇ ve leh naˬ ve gawˬ ve hk’aˬ hk’e k’ai ve yawˇ hui shiˍ ve yoˬ. Chi htaꞈ pa taw ngaˬ hui yonˍ g’a ve, Yeˍsuˆ leh 144,000 g’aˇ ngaˬ hui dawˇ hk’aˇ leh tuꞈ hkanˍ ve htaꞈ shiˍ ve yoˬ.

11. G’uiˬ sha ve a loˍ biˇ la piˇ-oˆ tehꞈ, aˬ htoꞈ ma te Yeˍsuˆ awˬ laꞈ g’awˇ htaꞈ bon lawˬ maˍ piˇ ve le?

¹¹ G’uiˬ sha ve a loˍ mvuhˇ naw ma hk’oˆ biˇ la piˇ tuˬ, Yeˍsuˆ awˬ laꞈ g’awˇ htaꞈ bon lawˬ maˍ piˇ ve yoˬ. Aˬ htoꞈ ma pa taw le? Awˬ lawn 3 hk’aw ngaˬ hui g’a henˇ ve, Saˍtanˍ Yaˬhoˉvaˬ htaꞈ hpfuhˆ ve yoˬ. Saˍtanˍ leh yawˇ hk’aˇ suh g’aꞈ yuˬ ve ka tiꞈ maˇ yeˬ ve mvuhˇ naw ma tcuh yaˇ hui htaꞈ Yaˬhoˉvaˬ mvuhˇ naw ma hk’oˆ teˇ tcuhˉ teˇ yanˇ chehˇ tcuh ve yoˬ. Mvuhˇ naw ma tcuh yaˇ teˇ hpaˍ hpaˍ G’uiˬ sha ve a loˍ maˇ g’aꞈ te ve pa taw, mvuhˇ naw ma hk’oˆ G’uiˬ sha ve a loˍ maˇ biˇ. Awˬ lawn 10 hk’aw Saˍtanˍ leh yawˇ ve tcuh yaˇ ve awˬ lawn maˇ maˇ g’a henˇ tuˬ yoˬ.

12. Hpeuꞈ maˍ ve liꞈ 12:10 hk’aw a yeˇ uiˍ ve 2 ceuˬ k’oˆ taˍ ve aˬ htoꞈ ma le?

¹² Liꞈ hpu hk’aw k’oˆ ve, G’uiˬ sha ve mvuhˇ miˬ hk’aw Yeˍsuˆ Jawˇ mawˇ tanˬ te ve maˇ maw htaˇ, yawˇ Saˍtanˍ htaꞈ bawˆ daꞈ ve yoˬ. (Hpeuꞈ maˍ ve 12:7-10 g’aw ve.) Hpeuꞈ maˍ ve liꞈ 12:10 hk’aw a yeˇ uiˍ ve 2 ceuˬ k’oˆ taˍ ve yoˬ. G’uiˬ sha ve mvuhˇ miˬ ve Jawˇ mawˇ Yeˍsuˆ tanˬ uˉ peunˍ leh, Saˍtanˍ htaꞈ miˬ guiˬ hk’oˆ g’aꞈ ce la ve yoˬ. Chi 2 ceuˬ awˬ tehˬ hpehꞈ la peuˬ.

13. Saˍtanˍ htaꞈ g’aꞈ tawˆ peuˬ hk’awꞈ nawˉ, mvuhˇ naw ma hk’oˆ hk’aˬ hk’e k’ai ve le?

¹³ Mvuhˇ naw ma hk’oˆ Saˍtanˍ leh yawˇ ve tcuh yaˇ htaꞈ g’aꞈ tawˆ peuˬ hk’awꞈ nawˉ, ka tiꞈ yeˬ ve mvuhˇ naw ma tcuh yaˇ ha lehˬ ve yoˬ. Liꞈ hpu hk’aw k’oˆ ve, “mvuhˇ naw ma leh mvuhˇ naw ma yaˇ teˇ hpaˍ-oˬ, ha lehˬ chehˇ-oˆ.” (Hpeuꞈ maˍ ve 12:12) Chi teˇ hkui mvuhˇ naw ma tcuh yaˇ te g’aˇ le le G’uiˬ sha ve a loˍ htaꞈ g’aꞈ te ve pa taw, oˇ kaˬ lo gawˬ lehˍ cawˬ leh cawˇ daꞈ hawˍ daꞈ ve yoˬ.

14. Saˍtanˍ htaꞈ g’aꞈ tawˆ piˇ ve teˇ yanˇ, miˬ guiˬ hk’oˆ hk’aˬ hk’e k’ai ve le?

¹⁴ Yaꞈ hk’aˇ, chaw yaˇ miˬ guiˬ hk’oˆ haiˬ ve htaꞈ g’a hpuˇ chehˇ ve yoˬ. “Awˬ lawn k’o, neˇ haiˬ lehˬ yawˇ ve awˬ yanˇ a ciˉ ceh tiˉ cawˬ ve htaꞈ yawˇ shiˍ ve pa taw, nyi ma zuhˆ jaˇ ve awˬ hk’aw lo  yawˇ nawˬ hui geh gaˬ la peuˬ.” (Hpeuꞈ maˍ ve 12:12) Saˍtanˍ beuꞈ jaˇ ve yoˬ. Yawˇ htaꞈ mvuhˇ naw ma hk’oˆ g’aꞈ tawˆ piˇ leh maˇ maw k’o, te luˬ piˇ tuˬ yoˬ tehꞈ, yawˇ shiˍ ve yoˬ. Miˬ guiˬ yaˇ htaꞈ dawˇ haˍ tuˬ leh tuꞈ ve hkanˍ ve te piˇ ve yoˬ.

15. Miˬ guiˬ hk’oˆ G’uiˬ sha ve a loˍ aˬ htoꞈ ma le?

¹⁵ Yaˇ hk’aˇ, miˬ guiˬ hk’oˆ G’uiˬ sha ve a loˍ maˇ pa. Yawˇ chaw yaˇ htaꞈ miˬ guiˬ hk’oˆ Paˍraˍdiˇsuˆ hk’aw co co taiˍ taiˍ chehˇ tcuh gaˇ sheˍ ve yoˬ. (Chiˇ mvuh ve 37:29) G’uiˬ sha ve mvuhˇ miˬ hk’aˬ hk’e te tuˬ le?

16, 17. Daˍyeˍlaˆ liꞈ 2:44 hk’aw G’uiˬ sha ve mvuhˇ miˬ awˬ lawn aˬ htoꞈ ma k’oˆ laˇ ve le?

¹⁶ Daˍyeˍlaˆ liꞈ 2:44 hk’aw tcuh kaˍ paˍ k’oˆ taˍ ve, “awˬ yanˇ oˇ ve hk’aw, mvuhˇ naw ma G’uiˬ sha lehˬ, mvuhˇ miˬ lonˉ teˇ peˆ k’awꞈ cawˬ la piˇ tuˬ yoˬ. Mvuhˇ miˬ chi ve awˬ g’aˇ uiˍ jaˇ leh, awˬ nu ve mvuhˇ miˬ teˇ hpaˍ htaꞈ te luˬ te sheˆ piˇ tuˬ yoˬ.” Tcuh kaˍ paˍ tawˇ hkawˇ chi ve G’uiˬ sha ve mvuhˇ miˬ awˬ lawn aˬ htoꞈ ma k’oˆ laˇ ve le?

¹⁷ Awˉ lawˉ teˇ ceuˬ lehˬ tcuh kaˍ paˍ k’oˆ ve, “awˬ yanˇ oˇ ve hk’aw,” Guiˬ sha ve mvuhˇ miˬ tanˬ uˉ peunˍ ve yoˬ. K’oˆ gaˇ ve lehˬ miˬ guiˬ hk’oˆ awˬ kaˍ awˬ nu ve chaw uˉ peunˍ chehˇ sheˍ htaˇ, G’uiˬ sha ve mvuhˇ miˬ tanˬ uˉ peunˍ ve yoˬ. Nyiˇ ceuˬ teˇ ceuˬ lehˬ G’uiˬ sha ve mvuhˇ miˬ co co taiˍ taiˍ uˉ peunˍ tuˬ yoˬ. Mvuhˇ miˬ chi ve awˬ tan awˬ nu ve mvuhˇ miˬ te maˇ g’a. Shehˆ ceuˬ teˇ ceuˬ lehˬ G’uiˬ sha ve mvuhˇ miˬ miˬ guiˬ hk’oˆ ve mvuhˇ miˬ hk’a peu-eˬ htaꞈ bawˆ leh g’aˇ tuˬ yoˬ. Oˇ ve hk’awꞈ nawˉ, Guiˬ sha ve mvuhˇ miˬ ceh tiˉ miˬ guiˬ hk’oˆ uˉ peunˍ tuˬ yoˬ. Chaw yaˇ daꞈ jaˇ ve mvuhˇ miˬ cawˬ tuˬ yoˬ.

18. G’uiˬ sha ve mvuhˇ miˬ leh miˬ guiˬ hk’oˆ ve mvuhˇ miˬ awˬ leh meuˇ ve maꞈ aˬ htoꞈ ma meh ve le?

¹⁸ G’uiˬ sha ve mvuhˇ miˬ miˬ guiˬ chi hk’oˆ maˇ uˉ peunˍ sheˍ g’uˇ suhˍ htaˇ, aˬ htoꞈ ma hpehꞈ la tuˬ le? Awˬ leh meuˇ ve maꞈ Aˍmaˍgeˍdonˍ tanˬ-a yoˬ te htaˇ, neˇ hui “Kanˇ paˆ uiˍ ve G’uiˬ sha  ve awˬ nyi uiˍ ve teˇ nyi awˬ hk’aw lo maꞈ bawˆ tuˬ awˬ pon, miˬ guiˬ hk’oˆ teˇ kaˬ le le lo chehˇ ve hkunˉ hawˉ hkanˇ teˇ hpaˍ htaꞈ hpawnˬ daꞈ piˇ lawˬ” tuˬ yoˬ. G’uiˬ sha ve mvuhˇ miˬ leh chaw yaˇ uˉ peunˍ ve hk’a peu-eˬ bawˆ daꞈ tuˬ yoˬ.—Hpeuꞈ maˍ ve 16:14, 16; K’oˆ maˍ ve awˬ lawn 10 htaꞈ nyi sheˍ.

19, 20. Aˬ htoꞈ ma pa taw G’uiˬ sha ve mvuhˇ miˬ cawˬ tuˬ loˍ ve le?

¹⁹ Aˬ htoꞈ ma pa taw G’uiˬ sha ve mvuhˇ miˬ cawˬ tuˬ loˍ ve le? I-oˬ ve kaꞈ 3 hk’aˇ cawˬ ve yoˬ. Teˇ hk’aˇ lehˬ ngaˬ hui venˇ baˆ cawˬ ve pa taw naˬ leh g’a suh ve yoˬ. Yaꞈ hk’aˇ, Liꞈ hpu hk’aw k’oˆ ve, G’uiˬ sha ve mvuhˇ miˬ ngaˬ hui htaꞈ co co taiˍ taiˍ a shaꞈ peꞈ laˇ g’a ve yoˬ. Yoˇhanˬ liꞈ 3:16 hk’aw k’oˆ ve, “G’uiˬ sha miˬ guiˬ yaˇ htaꞈ haꞈ jaˇ ve pa taw, yawˇ ve Yaˇ hpu tiˍ piˇ laˇ ve yoˬ. Hk’e te leh, Yaˇ hpu htaꞈ hk’a yonˍ ve chaw hk’a peu-eˬ maˇ g’a luˬ maˇ g’a sheˆ ve awˬ hk’oˆ kaꞈ, co tiꞈ ha tiꞈ htaꞈ g’a ve yoˬ.”

²⁰ Nyiˇ hk’aˇ lehˬ ngaˬ hui awˬ paˇ lo haiˬ ve chaw, heˍ ve chaw, haˉ chaw haˉ paˆ te ve chaw cawˬ maˇ jaˇ ve yoˬ. Ngaˬ hui haiˬ ve hk’a peu-eˬ htaꞈ te luˬ maˇ g’a. Yaꞈ hk’aˇ, maˇ dawˇ hpfuhˆ ve chaw Aˍmaˍgeˍdonˍ hk’aw G’uiˬ sha te luˬ piˇ tuˬ yoˬ. (Chiˇ mvuh ve 37:10 g’aw ve.) Shehˆ hk’aˇ lehˬ chaw yaˇ uˉ peunˍ ve maˇ yeˬ, haiˬ jaˇ, leh maˇ hteˇ maˇ cawˇ te ve yoˬ. Chaw yaˇ G’uiˬ sha maˍ ve htaꞈ g’aꞈ te tuˬ yawˇ hui maˇ ga piˇ. Liꞈ hpu hk’aw k’oˆ ve, “chaw teˇ hpaˍ hpaˍ kanˇ paˆ cawˬ leh teˇ hpaˍ hpaˍ yawˇ hui awˬ hawˉ lo g’a hkanˍ chehˇ taˍ ve yoˬ.”—Cuˇ yiˍ piˇ ve 8:9.

21. G’uiˬ sha ve a loˍ miˬ guiˬ hk’oˆ biˇ la tuˬ, G’uiˬ sha ve mvuhˇ miˬ hk’aˬ hk’e te tuˬ le?

²¹ Aˍmaˍgeˍdonˍ maꞈ peuˬ hk’awꞈ nawˉ, G’uiˬ sha ve mvuhˇ miˬ miˬ guiˬ hk’oˆ G’uiˬ sha ve a loˍ htaꞈ biˇ la piˇ tuˬ yoˬ. Tawˇ pa haˉ te k’o, G’uiˬ sha ve mvuhˇ miˬ Saˍtanˍ leh neˇ hui htaꞈ te luˬ piˇ tuˬ yoˬ. (Hpeuꞈ maˍ ve 20:1-3) Oˇ teˇ yanˇ gaˬ k’o, chaw teˇ g’aˇ kaꞈ maˇ naˬ maˇ suh. Htaiˍ hk’awꞈ laˇ ve pa taw, G’uiˬ sha htaꞈ ka tiꞈ yeˬ ve chaw hk’a peu-eˬ Paˍraˍdiˇsuˆ hk’aw co co taiˍ taiˍ  g’a teꞈ chehˇ tuˬ yoˬ. (Hpeuꞈ maˍ ve 22:1-3) Mvuhˇ miˬ chi ve G’uiˬ sha ve awˬ meh htaꞈ kaꞈ yawˆ yan piˇ tuˬ yoˬ. Awˬ lawn k’o mvuhˇ miˬ chi ve uˉ peunˍ htaˇ, chaw yaˇ hk’a peu-eˬ Yaˬhoˉvaˬ awˬ meh htaꞈ chiˇ mvuh tuˬ yoˬ.—K’oˆ maˍ ve awˬ lawn 21 htaꞈ nyi sheˍ.

22. Miˬ guiˬ hk’oˆ chehˇ htaˇ leh teꞈ tu la peuˬ hk’awꞈ nawˉ teˇ pawˆ tiˉ Yeˍsuˆ Jawˇ mawˇ maˇ g’a te tehꞈ, hk’aˬ hk’e te shiˍ ve le?

²² Yeˍsuˆ awˬ laꞈ g’awˇ htaꞈ bon lawˬ maˍ piˇ ve, “nawˬ ve mvuhˇ miˬ gaˬ la piˇ-oˆ.” Yawˇ bon chi hk’e te lawˬ htaˇ, mvuhˇ miˬ chi maˇ cawˬ sheˍ. Yeˍsuˆ Jawˇ mawˇ te g’a tuˬ, Yaˬhoˉvaˬ yawˇ ve mvuhˇ miˬ awˉ lawˉ g’a teh ve yoˬ. Yeˍsuˆ mvuhˇ naw ma hk’oˆ taˆ-e htaˇ, teˇ pawˆ tiˉ Jawˇ mawˇ g’a te ve laˇ? Maˇ g’a te. Yeˍsuˆ teˇ tcuhˉ g’a law sheˍ. Yeˍsuˆ teꞈ tu la ve maˇ maw sheˍ htaˇ, Peˍtruˆ leh Pawˇluꞈ Chiˇ mvuh ve liꞈ 110:1 htaꞈ cuˇ leh Yeˍsuˆ ve awˬ lawn k’oˆ maˍ laˇ ve yoˬ. Tcuh kaˍ paˍ tawˇ hkawˇ chi ve hk’aw Yaˍhoˉvaˬ k’oˆ taˍ ve, “nawˬ ve canˇ paˍ teˇ hpaˍ htaꞈ nawˬ  ve hkui sheh awˬ hawˉ lo ngaˬ taˍ htaˇ hk’a gaˬ, ngaˬ ve laꞈ sha paˉ lo mui chehˇ-oˆ.” (Tcuh yaˇ 2:32-35; Heˍbrehˇ 10:12, 13) Yaˬhoˉvaˬ yawˇ htaꞈ Jawˇ mawˇ te tcuh htaˇ hk’a gaˬ, Yeˍsuˆ awˬ yanˇ hk’aˬ maw g’a law ve le?

23. (a) Jawˇ mawˇ Yeˍsuˆ tanˬ uˉ peunˍ ve hk’aˬ teˇ hk’awꞈ le? (b) Awˬ lawn 9 hk’aw ngaˬ hui aˬ htoꞈ ma henˇ tuˬ le?

²³ 1914 hk’awꞈ maˇ gaˬ la sheˍ laiˉ hk’awꞈ htaˇ, i ve Hkriꞈ yaˇ awˬ moˍ teˇ moˍ Liꞈ hpu henˇ leh na g’a ve, awˬ hk’awꞈ oˇ ve lehˬ a yeˇ uiˍ ve yoˬ. 1914 hk’awꞈ htaˇ tanˬ leh Liꞈ hpu hk’aw tcuh kaˍ paˍ k’oˆ taˍ ve hk’e, miˬ guiˬ hk’oˆ lo hpehꞈ la ve yoˬ. Oˇ teˇ hk’awꞈ Jawˇ mawˇ Yeˍsuˆ tanˬ uˉ peunˍ ve yoˬ. (Chiˇ mvuh ve 110:2) Oˇ ve hk’awꞈ nawˉ maˇ maw, Saˍtanˍ htaꞈ miˬ guiˬ hk’oˆ g’aꞈ ce la leh chi teˇ hkui “yawˇ ve awˬ yanˇ a ciˉ ceh tiˉ” cawˬ ve yoˬ. (Hpeuꞈ maˍ ve 12:12) Chi lehˬ Liꞈ hpu hk’aw k’oˆ ve awˬ leh meuˇ ve awˬ yanˇ hpehꞈ ve yoˬ. Ngaˬ hui awˬ yanˇ oˇ ve hk’aw chehˇ taˍ leh maˇ maw k’o, G’uiˬ sha ve mvuhˇ miˬ lehˬ miˬ guiˬ hk’oˆ G’uiˬ sha ve a loˍ htaꞈ te biˇ la piˇ tuˬ yoˬ. Awˬ lawn 9 hk’aw hk’a dehꞈ g’a henˇ tuˬ yoˬ.—K’oˆ maˍ ve awˬ lawn 22 htaꞈ nyi sheˍ.