1, 2. Aˬ htoꞈ ma te Liꞈ hpu G’uiˬ sha geh laˬ ve laꞈ shawnˍ hpehꞈ ve le?

Nawˬ ve awˬ chawˇ nawˬ htaꞈ laꞈ shawnˍ peꞈ laˇ ve k’o, nawˬ hk’aˬ hk’e dawˇ tuˬ le? Nawˬ haˆ te hpeuꞈ nyi gaˇ leh, yawˇ nawˬ htaꞈ dawˇ nyi laˇ ve nawˬ ha lehˬ jaˇ ve yoˬ. Nawˬ yawˇ htaꞈ awˬ bon uiˍ jaˇ tehꞈ k’oˆ piˇ tuˬ yoˬ.

² Liꞈ hpu lehˬ G’uiˬ sha peꞈ laˇ ve laꞈ shawnˍ hpehꞈ ve yoˬ. Nawˬ ca maˇ mawˬ ve awˬ lawn Liꞈ hpu hk’aw mawˬ g’a ve yoˬ. Tawˇ pa haˉ te k’o, G’uiˬ sha lehˬ mvuhˇ naw ma, miˬ guiˬ, hawˉ hk’aˆ yaˇ miˇ awˉ lawˉ teˇ ca htaꞈ te hpanˍ ve awˬ lawn k’oˆ laˇ taˍ ve yoˬ. Ngaˬ hui dawˇ haˍ gaˇ haˍ ve g’a hpuˇ htaˇ, ga laˇ g’a ve awˬ hk’aˇ cawˬ ve yoˬ. G’uiˬ sha ve a loˍ miˬ guiˬ chi aꞈ kehˉ daꞈ tuˬ yawˇ te tuˬ ve awˬ hk’aˇ Liꞈ hpu hk’aw ngaˬ hui g’a shiˍ ve yoˬ. Liꞈ hpu lehˬ daꞈ jaˇ ve laꞈ shawnˍ hpehꞈ ve yoˬ!

3. Liꞈ hpu henˇ ve teˇ yanˇ nawˬ aˬ htoꞈ ma awˬ lawn shiˍ tuˬ le?

³ Nawˬ Liꞈ hpu henˇ ve teˇ yanˇ, G’uiˬ sha nawˬ htaꞈ yawˇ ve awˬ chawˇ hpehꞈ tcuh gaˇ ve htaꞈ mawˬ tuˬ yoˬ. Nawˬ yawˇ ve awˬ lawn henˇ maˇ ve k’o, nawˬ yawˇ htaꞈ meuˆ daꞈ ve awˬ chawˇ hpehꞈ la tuˬ yoˬ.

4. Liꞈ hpu htaꞈ caˉ daꞈ ve awˬ ceuˬ nawˬ aˬ htoꞈ ma dawˇ cawˇ ve le?

⁴ Liꞈ hpu lehˬ 2,800 chaw ceuˬ tawˇ hkawˇ hpaˆ yuˬ tawˆ leh laiˉ hinˉ lanˬ k’oˆ yanˍ tawˆ ve yoˬ. Aˬ laˬ hk’e chaw teˇ g’aˇ le le a shu yawˇ ve chaw ceuˬ tawˇ hkawˇ htaꞈ Liꞈ hpu ca g’aw g’a ve yoˬ. Teˇ shinˉ le le, teˇ lanˬ g’aˇ hpaˆ Liꞈ hpu g’a chehˇ ve yoˬ! Liꞈ hpu lehˬ awˬ nu ve liꞈ k’oˆ htaꞈ maˇ shuˍ.

5. Liꞈ hpu lehˬ, “G’uiˬ sha ve Awˬ ha hpu dawˇ pawnˍ piˇ ve” yoˬ tehꞈ aˬ htoꞈ ma te k’oˆ hpehꞈ ve le?

 ⁵ Liꞈ hpu htaꞈ “G’uiˬ sha ve Awˬ ha hpu dawˇ pawnˍ piˇ” ve yoˬ. (2 Tiˆmoˉseˍ 3:16 g’aw ve.) Yaꞈ hk’aˇ, laiˉ g’aˇ dawˇ ve, ‘Liꞈ hpu lehˬ chaw yaˇ bvuhꞈ taˍ ve maˇ heˆ laˇ, hk’aˬ hk’e te leh G’uiˬ sha geh laˬ g’a ve le?’ Liꞈ hpu hk’aw k’oˆ ve, “daꞈ ve kehˬ ve Awˬ ha hpu yawˇ hui htaꞈ dawˇ pawnˍ piˇ leh, yawˇ hui teˇ caˉ G’uiˬ sha ve tawˇ hkawˇ k’awꞈ yaw ve yoˬ.” (2 Peˍtruˆ 1:21) Chi lehˬ, kanˉ te kuiˬ awˬ hoˉ yawˇ ve awˬ ceˬ htaꞈ liꞈ bvuhꞈ tcuh ve htaꞈ shuˍ ve yoˬ. Liꞈ oˇ ve lehˬ, a shu ve le? Kanˉ te kuiˬ awˬ hoˉ ve yoˬ. Awˬ ceˬ ve maˇ heˆ. Chi hk’a shuˍ shuˍ Liꞈ hpu lehˬ, G’uiˬ sha ve yoˬ. Yawˇ ve dawˇ hk’aˇ htaꞈ bvuhꞈ tcuh ve yoˬ. Bvuhꞈ paˍ ve dawˇ hk’aˇ maˇ heˆ. Liꞈ hpu lehˬ “G’uiˬ sha ve tawˇ hkawˇ awˬ  tehˬ awˬ na hpehꞈ” ve yoˬ.—1 Hteˇsaˍlawˇniˆ 2:13; K’oˆ maˍ ve awˬ lawn 2 htaꞈ nyi sheˍ.

6, 7. Liꞈ hpu cawˇ daꞈ hawˍ daꞈ ve yoˬ tehꞈ aˬ htoꞈ ma te ngaˬ hui k’oˆ hpehꞈ ve le?

⁶ Liꞈ hpu bvuhꞈ ve awˬ yanˇ 1,600 hk’awꞈ yehˇ ve yoˬ. Liꞈ hpu bvuhꞈ paˍ teˇ hpaˍ teˇ g’aˇ teˇ co-e teꞈ chehˇ ve yoˬ. Teˇ g’aˇ g’aˇ k’o, liꞈ henˇ mvuh ve, teˇ hpaˍ k’o maˇ henˇ mvuh. Teˇ g’aˇ lehˬ naˆ tsuhˇ shehˍ hpaˇ hpehꞈ ve yoˬ. Awˬ nu ve chaw k’o, muiˬ caˇ ve chaw, ngaˇ ca paˍ, yawˬ hawˉ paˍ, tcuh kaˍ paˍ, suhˉ jehˬ paˍ, leh jawˇ mawˇ hpehꞈ ve yoˬ. Liꞈ bvuhꞈ paˍ laiˉ g’aˇ cawˬ ve htawˇ, teˇ tawn teˇ ceuˬ k’oˆ taˍ ve maˇ heˆ. Liꞈ hpu hk’a peu-eˬ cawˇ daꞈ hawˍ daꞈ ve yoˬ.

⁷ Liꞈ hpu awˉ lawˉ teˇ tawn lehˬ miˬ guiˬ hk’oˆ tuꞈ hkanˍ dawˇ haˍ ve hk’aˬ hk’e te tawˆ la ve awˬ lawn k’oˆ laˇ taˍ ve yoˬ. Awˬ leh meuˇ teˇ tawn k’o, G’uiˬ sha miˬ guiˬ htaꞈ daꞈ jaˇ nyi sha jaˇ ve hko te leh maˇ daꞈ ve htaꞈ gu tuˬ ngaˬ hui htaꞈ k’oˆ maˍ laˇ ve yoˬ. Liꞈ hpu lehˬ chaw yaˇ ve laiˉ hinˉ hk’awꞈ ve awˬ lawn cawˬ leh G’uiˬ sha ve a loˍ hk’aˬ htaˆ kaꞈ biˇ la chehˇ ve yoˬ tehꞈ, ngaˬ hui htaꞈ hpeuꞈ maˍ laˇ ve yoˬ.

8. Liꞈ hpu mvuhˇ lawn miˬ lawn hpawˇ cawˇ daꞈ ve tawˇ pa haˉ k’oˆ maˍ laˇ sheˍ.

⁸ Liꞈ hpu lehˬ mvuhˇ lawn miˬ lawn henˇ tuˬ ve liꞈ k’oˆ maˇ heˆ. Yaꞈ hk’aˇ, mvuhˇ lawn miˬ lawn htaꞈ tehˆ daꞈ ve k’o, Liꞈ hpu lehˬ hk’aˬ htaˆ kaꞈ cawˇ chehˇ ve yoˬ. G’uiˬ sha geh laˬ ve liꞈ k’oˆ hpehꞈ ve k’o, chi hk’e hpehꞈ cawˇ ve maˇ heˆ laˇ? Tawˇ pa haˉ te k’o, Tawˆ k’ai ve liꞈ hk’aw hk’aˬ hk’e te leh a naˍ maˇ pehˉ k’ai tuˬ, G’uiˬ sha Iˉsaˍreˍlaˆ chaw htaꞈ maˍ piˇ ve yoˬ. Awˬ lawn chi ve a naˍ hk’aˬ hk’e te maˇ nehˉ daꞈ g’a tuˬ, chaw yaˇ maˇ shiˍ sheˍ g’uˇ suhˍ htaˇ bvuhꞈ taˍ ve yoˬ. Miˬ guiˬ chi teꞈ chiˉ kaꞈ maˇ kuˇ taˍ  ve Liꞈ hpu hk’aw maˍ ve, cawˇ ve yoˬ. (Yawˇbaˆ 26:7) Iˉ kaˆ hk’aˬ kaˬ lo laˬ ve leh hk’aˬ kaˬ lo yaꞈ-e ve Liꞈ hpu hk’aw kaꞈ maˍ ve yoˬ.—Cuˇ yiˍ piˇ ve 1:7.

9. Liꞈ hpu bvuhꞈ paˍ ka tiꞈ yeˬ ve pa taw ngaˬ hui aˬ htoꞈ ma shiˍ hpehꞈ ve le?

⁹ Oˇ htaˇ teˇ co-e ve awˬ lawn htaꞈ tehˆ daꞈ ve k’o, Liꞈ hpu lehˬ hk’aˬ htaˆ kaꞈ cawˇ ve yoˬ. Yaꞈ hk’aˇ, liꞈ laiˉ k’oˆ oˇ htaˇ teˇ co-e ve awˬ lawn htaꞈ bvuhꞈ taˍ ve hk’a dehꞈ maˇ cawˇ. Awˬ lawn k’o, liꞈ bvuhꞈ ve chaw ka tiꞈ maˇ yeˬ. Yawˇ ve chaw ceuˬ maꞈ bawˆ maˇ g’aˇ ve teˇ pawˆ pawˆ k’o maˇ bvuhꞈ keu. Yaꞈ hk’aˇ, Liꞈ hpu bvuhꞈ paˍ lehˬ ka tiꞈ yeˬ ve yoˬ. Iˉsaˍreˍlaˆ chaw maꞈ bawˆ maˇ g’aˇ ve awˬ lawn leh, yawˇ hui te yaꞈ ve awˬ lawn kaꞈ bvuhꞈ keu taˍ ve yoˬ. Tawˇ pa haˉ te k’o, Moˉseˍ te yaꞈ jaˇ leh G’uiˬ sha ciˍ yanˍ laˇ ve tehꞈ, Heh puiˉ hk’aw liꞈ hk’aw yawˇ bvuhꞈ taˍ ve yoˬ. (Heh puiˉ hk’aw 20:2-12) Liꞈ hpu bvuhꞈ paˍ ka tiꞈ yeˬ ve pa taw Liꞈ hpu G’uiˬ sha geh laˬ ve tehꞈ, ngaˬ hui shiˍ hpehꞈ ve yoˬ. Hk’e te leh, Liꞈ hpu htaꞈ yonˍ g’a ve yoˬ.

10. Aˬ htoꞈ ma te Liꞈ hpu hk’aw beˆ maˍ laˇ hkawˇ ngaˬ hui htaꞈ ga laˇ g’a ve le?

¹⁰ “Liꞈ hpu hk’a peu-eˬ lehˬ, G’uiˬ sha ve Awˬ ha hpu dawˇ pawnˍ piˇ ve htaꞈ pa taw . . . maˍ piˇ ve, venˇ baˆ hpeuꞈ maˍ piˇ ve, k’awꞈ daꞈ la piˇ” ve yoˬ. (2 Tiˆmoˉseˍ 3:16, 17) Liꞈ hpu hk’aw beˆ maˍ laˇ hkawˇ chi beuꞈ teˇ co-e ngaˬ hui htaꞈ ga laˇ g’a ve yoˬ. Yaˬhoˉvaˬ ngaˬ hui htaꞈ hpanˍ taˍ laˇ ve pa taw, ngaˬ hui hk’aˬ hk’e dawˇ ve yawˇ shiˍ ve yoˬ. Ngaˬ hui awˬ to aꞈ kehˉ yawˇ shiˍ leh, ngaˬ hui htaꞈ ha lehˬ tcuh gaˇ ve yoˬ. Ngaˬ hui awˬ pon daꞈ ve maˇ daꞈ ve htaꞈ yawˇ shiˍ ve yoˬ.

11, 12. (a) Maꞈhtehˍ liꞈ kaˇ nanˉ uiˍ 5 te leh 7 hk’a gaˬ Yeˍsuˆ aˬ htoꞈ ma daꞈ ve beˆ maˍ laˇ ve le? (b) Liꞈ hpu hk’aw ngaˬ hui aˬ htoꞈ ma henˇ g’a ve le?

¹¹ Maꞈhtehˍ liꞈ kaˇ nanˉ uiˍ 5 te leh 7 hk’a gaˬ, ngaˬ hui ha lehˬ g’a tuˬ, shu geh chehˇ g’a tuˬ, bon lawˬ tuˬ, leh hpu shi  yehˇ tuˬ ve awˬ hk’aˇ Yeˍsuˆ daꞈ ve beˆ maˍ laˇ hkawˇ chi htaꞈ ngaˬ hui ca g’a ve yoˬ. Beˆ maˍ laˇ hkawˇ chi 2,000 hk’awꞈ gaˬ peuˬ ve htawˇ, chi beuꞈ hk’a gaˬ kaꞈ yuˬ yehˇ g’a sheˍ ve yoˬ.

¹² Ngaˬ hui yehˬ k’a hk’aw ha lehˬ dawˇ sha tuˬ, kanˉ te daꞈ ve chaw hpehꞈ tuˬ, shu geh gawˬ lehˍ chehˇ tuˬ Liꞈ hpu hk’aw Yaˬhoˉvaˬ ngaˬ hui htaꞈ maˍ laˇ ve yoˬ. Ngaˬ hui hk’aˬ hk’e ve chaw hpehꞈ ve, hk’aˬ kaˬ lo chehˇ ve, aˬ htoꞈ ma awˬ lawn g’a hpuˇ ve maˇ k’oˆ, Liꞈ hpu hk’aw maˍ laˇ ve awˬ hk’aˇ lehˬ, ngaˬ hui htaꞈ hk’aˬ htaˆ kaꞈ ga laˇ g’a ve yoˬ.—Iˉsaˍyaˆ 48:17 g’aw ve; K’oˆ maˍ ve awˬ lawn 3 htaꞈ nyi sheˍ.

13. Baˍbuˍlonˍ venˇ htaꞈ hpehꞈ la tuˬ ve awˬ ceuˬ Iˉsaˍyaˆ hk’aˬ hk’e k’oˆ taˍ ve le?

¹³ Liꞈ hpu hk’aw tcuh kaˍ paˍ tawˇ hkawˇ laiˉ hkawˇ awˬ tehˬ biˇ la peuˬ. Tawˇ pa haˉ te k’o, Baˍbuˍlonˍ venˇ te luˬ tuˬ tcuh kaˍ paˍ Iˉsaˍyaˆ k’oˆ taˍ ve yoˬ. (Iˉsaˍyaˆ 13:19) Shu venˇ chi htaꞈ hk’aˬ hk’e te g’aˇ k’ai tuˬ, yawˇ k’oˆ taˍ ve yoˬ. Venˇ chi uiˍ jaˇ ve lanˇ venˇ cawˬ leh iˉ kaˆ g’uiˬ ma caw hoˆ taˍ ve yoˬ. Yaꞈ hk’aˇ, Iˉsaˍyaˆ k’oˆ taˍ ve, iˉ kaˆ g’uiˬ ma fiˍ k’ai leh yehˬ miˉ hpaw baˬ taˍ laˇ tuˬ yoˬ. Bawˆ daꞈ tuˬ ve maˇ heˆ. Baˍbuˍlonˍ venˇ htaꞈ g’aˇ tuˬ ve chaw Kuˇruˆ meh ve yoˬ.—Iˉsaˍyaˆ 44:27–45:2 g’aw ve; K’oˆ maˍ ve awˬ lawn 4 htaꞈ nyi sheˍ.

14, 15. Iˉsaˍyaˆ k’oˆ taˍ ve hk’e awˬ tehˬ awˬ na hk’aˬ hk’e te biˇ la ve le?

¹⁴ Tcuh kaˍ paˍ tawˇ hkawˇ 200 hk’awꞈ bvuhꞈ peuˬ hk’awꞈ nawˉ, Baˍbuˍlonˍ htaꞈ maꞈ moˍ lonˉ ca bawˆ la ve yoˬ. A shu awˬ hoˉ hpehꞈ ve le? Tcuh kaˍ paˍ k’oˆ taˍ ve hk’e, Paˇshaˇ ve jawˇ mawˇ Kuˇruˆ hpehꞈ ve yoˬ. Yaꞈ hk’aˇ, Kuˇruˆ ve maꞈ yaˇ Baˍbuˍlonˍ venˇ lo loꞈ-e g’a tuˬ laˇ?

¹⁵ Oˇ teˇ haˉ Baˍbuˍlonˍ chaw hti caˇ hti dawˬ chehˇ ve yoˬ. Uiˍ jaˇ ve lanˇ venˇ leh iˉ kaˆ g’uiˬ ma cawˬ ve pa taw, kawˆ tuˬ maˇ  cawˬ tehꞈ, yawˇ hui dawˇ ve yoˬ. Venˇ awˬ baˬ hpawˇ lo, Kuˇruˆ leh yawˇ ve maꞈ yaˇ g’uiˬ hk’aˇ duˇ shawˍ chehˇ ve yoˬ. Iˉ kaˆ yawnˇ k’ai leh Paˇshaˇ maꞈ yaˇ hkanˍ k’ai g’a ve yoˬ. Yaꞈ hk’aˇ, Baˍbuˍlonˍ ve lanˇ venˇ uiˍ jaˇ ve htaꞈ yawˇ hui hk’aˬ hk’e te loꞈ-e gaˬ tuˬ le? Tcuh kaˍ paˍ k’oˆ taˍ ve hk’e, venˇ yehˬ miˉ hpaw baˬ ve pa taw, maˇ bawˆ daꞈ ve htawˇ g’aˇ ve yoˬ.

16. (a) Baˍbuˍlonˍ htaꞈ hpehꞈ la tuˬ Iˉsaˍyaˆ aˬ htoꞈ ma k’oˆ taˍ ve le? (b) Iˉsaˍyaˆ k’oˆ taˍ ve hk’e hpehꞈ la ve yoˬ tehꞈ ngaˬ hui hk’aˬ hk’e te shiˍ ve le?

 ¹⁶ Iˉsaˍyaˆ k’oˆ taˍ ve Baˍbuˍlonˍ venˇ lo “chaw teˇ g’aˇ kaꞈ k’awꞈ chehˇ tuˬ ve maˇ heˆ.” (Iˉsaˍyaˆ 13:20) Awˬ tehˬ hpehꞈ-aw laˇ? Luˬ k’ai taˍ ve Baˍbuˍlonˍ venˇ lehˬ, Behˇdehˆ venˇ, Iˬraˆ mvuhˇ miˬ awˬ hawˉ hpawˇ 80 kiˇ loˇ hk’e taw vuiˇ daꞈ ve yoˬ. Chi teˇ hkui hk’a gaˬ, chaw teˇ g’aˇ kaꞈ oˇ kaˬ lo maˇ chehˇ. Yaˬhoˉvaˬ miˬ shiˆ htaꞈ yuˬ leh “Baˍbuˍlonˍ mvuhˇ miˬ htaꞈ shiˆ baˬ piˇ” ve yoˬ.—Iˉsaˍyaˆ 14:22, 23.

17. G’uiˬ sha ve ka tiꞈ hk’a peu-eˬ htaꞈ aˬ htoꞈ ma pa taw ngaˬ hui yonˍ g’a ve le?

¹⁷ Liꞈ hpu hk’aw tcuh kaˍ paˍ tawˇ hkawˇ laiˉ hkawˇ awˬ tehˬ biˇ la ve pa taw, awˬ g’uˇ suhˍ hpawˇ Liꞈ hpu hk’aw k’oˆ taˍ ve awˬ lawn htaꞈ ngaˬ hui yonˍ g’a ve yoˬ. Yaˬhoˉvaˬ miˬ guiˬ chi htaꞈ daꞈ jaˇ nyi sha jaˇ ve hko hpehꞈ tcuh tuˬ ka tiꞈ te taˍ ve htaꞈ haꞈ shaˉ chehˇ ve tehꞈ, ngaˬ hui yonˍ g’a ve yoˬ. (Heh puiˉ hk’aw  23:19 g’aw ve.) “Maˇ heˍ puiˉ ve G’uiˬ sha aˬ sho-eˬ htaˇ kaꞈ k’oˆ taˍ ve co tiꞈ ha tiꞈ htaꞈ” ngaˬ hui dawˇ law hpehꞈ ve yoˬ.—Tiˇtuˆ 1:3. *

18. “G’uiˬ sha ve tawˇ hkawˇ” htaꞈ Pawˇluꞈ hk’aˬ hk’e k’oˆ maˍ laˇ ve le?

¹⁸ Liꞈ hpu awˬ nu ve liꞈ k’oˆ htaꞈ peun daꞈ ve yoˬ tehꞈ ngaˬ hui g’a henˇ laˬ peuˬ. Mvuhˇ lawn miˬ lawn leh oˇ htaˇ teˇ co-e ve awˬ lawn htaꞈ tehˆ daꞈ ve k’o, Liꞈ hpu hk’aw hk’aˬ htaˆ kaꞈ cawˇ ve yoˬ. Liꞈ hpu hk’aw daꞈ ve beˆ maˍ laˇ hkawˇ leh, biˇ la peuˬ ve tcuh kaˍ paˍ tawˇ hkawˇ laiˉ hkawˇ cawˬ ve yoˬ. Yaꞈ hk’aˇ, Liꞈ hpu chi aꞈ kehˉ te g’a sheˍ. Tcuh yaˇ Pawˇluꞈ bvuhꞈ taˍ ve, “G’uiˬ sha ve tawˇ hkawˇ lehˬ, teꞈ chehˇ leh kanˇ paˆ cawˬ ve yoˬ.” Chi lehˬ aˬ htoꞈ ma k’oˆ gaˇ ve le?—Heˍbrehˇ 4:12 g’aw ve.

19, 20. (a) Nawˬ hk’aˬ hk’e ve chaw hpehꞈ ve htaꞈ shiˍ tuˬ Liꞈ hpu hk’aˬ hk’e ga laˇ g’a ve le? (b) Liꞈ hpu lehˬ daꞈ jaˇ ve laꞈ shawnˍ hpehꞈ ve yoˬ tehꞈ shawˍ taˍ ve k’o, nawˬ hk’aˬ hk’e te cawˇ ve le?

¹⁹ Liꞈ hpu nawˬ ve a shaꞈ pa g’a ve yoˬ. Nawˬ awˬ tehˬ awˬ na hk’aˬ hk’e ve chaw hpehꞈ ve shiˍ tuˬ, leh nawˬ ve dawˇ hk’aˇ hk’a peu-eˬ shiˍ tuˬ ga laˇ g’a ve yoˬ. Tawˇ pa haˉ te k’o, ngaˬ hui G’uiˬ sha htaꞈ haꞈ ve tehꞈ dawˇ ve yoˬ. Yaꞈ hk’aˇ, yawˇ htaꞈ awˬ tehˬ haꞈ ve k’o, Liꞈ hpu k’oˆ taˍ ve hk’e g’a g’aꞈ te ve yoˬ.

²⁰ Liꞈ hpu lehˬ G’uiˬ sha geh laˬ ve yoˬ. Yawˇ nawˬ htaꞈ Liꞈ hpu g’aw ve, henˇ ve, haꞈ tcuh gaˇ ve yoˬ. Laꞈ shawnˍ chi ve awˬ hpfuhˇ hk’aˆ jaˇ tehꞈ shawˍ leh henˇ tcuhˉ taˍ cawˇ ve yoˬ. Oˇ hk’e k’o, chaw yaˇ awˬ pon G’uiˬ sha dawˇ law taˍ ve htaꞈ nawˬ shiˍ tuˬ yoˬ. Awˬ lawn chi ve awˬ g’uˇ suhˍ teˇ lawn hk’aw henˇ tuˬ yoˬ.