1. Ngaˬ hui mvuhˇ naw ma tcuh yaˇ ve awˬ lawn aˬ htoꞈ ma te shiˍ tuˬ loˍ ve le?

Ngaˬ hui Yaˬhoˉvaˬ htaꞈ shiˍ daꞈ-oˬ. Chi teˇ hkui yawˇ ve yehˬ k’a mvuhˇ naw ma tcuh yaˇ htaꞈ k’awꞈ shiˍ daꞈ tcuh gaˇ ve yoˬ. Liꞈ hpu hk’aw yawˇ hui htaꞈ “mvuhˇ naw yaˇ” tehꞈ k’oˆ taˍ ve yoˬ. (Yawˇbaˆ 38:7) Yawˇ hui aˬ htoꞈ ma kanˉ te ve le? Yawˇ hui aˬ sho-eˬ htaˇ chaw yaˇ htaꞈ hk’aˬ hk’e ga piˇ ve le? Chi teˇ hkui yawˇ hui ngaˬ hui htaꞈ ga laˇ g’a-aw laˇ?—K’oˆ maˍ ve awˬ lawn 8 htaꞈ nyi sheˍ.

2. Mvuhˇ naw ma tcuh yaˇ hk’aˬ kaˬ lo laˬ ve le? G’uiˬ sha mvuhˇ naw ma tcuh yaˇ hk’aˬ ma ma hpanˍ ve le?

² Mvuhˇ naw ma tcuh yaˇ hk’aˬ kaˬ lo laˬ ve le? Kawˇlawˇsehˇ liꞈ 1:16 hk’aw k’oˆ ve, Yaˬhoˉvaˬ Yeˍsuˆ htaꞈ hpanˍ peuˬ hk’awꞈ nawˉ, “mvuhˇ naw ma hk’oˆ leh miˬ guiˬ hk’oˆ ve awˬ ceuˬ” htaꞈ hpanˍ ve yoˬ. Yawˇ mvuhˇ naw ma tcuh yaˇ hk’aˬ nyiˇ g’aˇ hpanˍ ve le? Liꞈ hpu hk’aw k’oˆ ve laiˉ ha lanˬ g’aˇ hpanˍ taˍ ve yoˬ.—Chiˇ mvuh ve 103:20; Hpeuꞈ maˍ ve 5:11.

3. Mvuhˇ naw ma tcuh yaˇ ve awˬ lawn Yawˇbaˆ liꞈ 38:4-7 hk’aw aˬ htoꞈ ma k’oˆ taˍ ve le?

³ Liꞈ hpu hk’aw k’oˆ ve, Yaˬhoˉvaˬ miˬ guiˬ leh chaw yaˇ htaꞈ maˇ hpanˍ sheˍ g’uˇ suhˍ mvuhˇ naw ma tcuh yaˇ htaꞈ hpanˍ leh mvuhˇ naw ma hk’oˆ chehˇ tcuh ve yoˬ. G’uiˬ sha miˬ guiˬ htaꞈ hpanˍ htaˇ mvuhˇ naw ma tcuh yaˇ hk’aˬ hk’e dawˇ ve le? Yawˇbaˆ liꞈ hk’aw k’oˆ ve, yawˇ hui ha lehˬ jaˇ ve yoˬ. Oˇ htaˇ, yawˇ hui meuˆ daꞈ ve yehˬ k’a hpehꞈ leh Yaˬhoˉvaˬ ve kanˉ htaꞈ teˇ geh te ve yoˬ.—Yawˇbaˆ 38:4-7.

4. Mvuhˇ naw ma tcuh yaˇ chaw yaˇ htaꞈ a yeˇ yuˬ laˇ ve yoˬ tehꞈ ngaˬ hui hk’aˬ hk’e te shiˍ ve le?

⁴ Mvuhˇ naw ma tcuh yaˇ chaw yaˇ htaꞈ a yeˇ yuˬ laˇ ve yoˬ. Miˬ guiˬ leh chaw yaˇ htaꞈ G’uiˬ sha hk’aˬ hk’e hpehꞈ tcuh gaˇ ve, mvuhˇ naw ma tcuh yaˇ shiˍ gaˇ ve yoˬ. (Tawˇ naˉ ve 8:30, 31;  1 Peˍtruˆ 1:11, 12) Aˍdanˍ Eˇvaꞈ G’uiˬ sha htaꞈ hpfuhˆ htaˇ mvuhˇ naw ma tcuh yaˇ nyi ma luˬ jaˇ ve yoˬ hehˉ. Chi teˇ hkui, chaw yaˇ maˇ-awˍ ve Yaˬhoˉvaˬ hkawˇ maˇ na yuˬ ve pa taw, yawˇ hui nyi ma k’awꞈ luˬ jaˇ ve yoˬ. Yaꞈ hk’aˇ, chaw teˇ hpaˍ dawˇ hpfuhˆ leh Yaˬhoˉvaˬ geh k’awꞈ la ve k’o, yawˇ hui ha lehˬ jaˇ ve yoˬ. (Luˉkaꞈ 15:10) Mvuhˇ naw ma tcuh yaˇ G’uiˬ sha kanˉ te ve chaw htaꞈ a yeˇ yuˬ jaˇ. Yawˇ hui htaꞈ ga piˇ leh haꞈ shaˉ piˇ tuˬ, Yaˬhoˉvaˬ mvuhˇ naw ma tcuh yaˇ htaꞈ yehˇ ve yoˬ. (Heˍbrehˇ 1:7, 14) Hpehꞈ la taˍ peuˬ ve awˬ lawn teˇ hpaˍ teˇ geh nyi sheˍ.

5. Aˬ sho-eˬ htaˇ mvuhˇ naw ma tcuh yaˇ G’uiˬ sha ve chaw htaꞈ hk’aˬ hk’e te ga piˇ ve le?

⁵ Yaˬhoˉvaˬ Sawˉdonˍ leh Gawˇmawˇraꞈ venˇ htaꞈ te luˬ htaˇ, mvuhˇ naw ma tcuh yaˇ 2 g’aˇ Lawˇtaˍ ve yehˬ k’a htaꞈ ga piˇ tcuh ve yoˬ. (Awˬ hkuiˉ puiˍ 19:15, 16) Laiˉ ha hk’awꞈ gaˬ leh Daˍyeˍlaˆ htaꞈ laˇ caˬ shiˉ hkawˆ hk’aw baˬ keu piˇ ve yoˬ. Yaꞈ hk’aˇ, ‘G’uiˬ sha laˇ caˬ shiˉ teˇ hpaˍ ve mawꞈ k’aw htaꞈ hoˆ taˍ piˇ ve’ pa taw, yawˇ teꞈ chiˉ maˇ hpehꞈ. (Daˍyeˍlaˆ 6:22) Awˬ hk’awꞈ nawˉ htaˇ, Yaˬhoˉvaˬ mvuhˇ naw ma tcuh yaˇ htaꞈ peu laˇ leh Peˍtruˆ htaꞈ htawˍ hk’aw hpehˇ tawˆ piˇ ve yoˬ. (Tcuh yaˇ 12:6-11) Yeˍsuˆ miˬ guiˬ hk’oˆ chehˇ htaˇ kaꞈ mvuhˇ naw ma tcuh yaˇ yawˇ htaꞈ ga piˇ ve yoˬ. Tawˇ pa haˉ te k’o, Yeˍsuˆ Baˆtiˆsaˬ haꞈ yuˬ peuˬ hk’awꞈ nawˉ, “mvuhˇ naw ma tcuh yaˇ teˇ hpaˍ yawˇ loˍ ve htaꞈ ga piˇ ve yoˬ.” (Maˍkuˆ 1:13) Yeˍsuˆ maˇ suh sheˍ htaˇ, mvuhˇ naw ma tcuh yaˇ “yawˇ htaꞈ awˬ g’aˇ piˇ ve yoˬ.”—Luˉkaꞈ 22:43.

6. (a) Chi beuꞈ mvuhˇ naw ma tcuh yaˇ G’uiˬ sha ve chaw htaꞈ hk’aˬ hk’e te ga piˇ ve le? (b) Chi teˇ lawn hk’aw aˬ htoꞈ ma na hkawˇ teˇ hpaˍ cawˬ ve le?

⁶ Chi beuꞈ chaw yaˇ mvuhˇ naw ma tcuh yaˇ htaꞈ maˇ mawˬ g’a. Yaꞈ hk’aˇ, G’uiˬ sha yawˇ hui htaꞈ yehˇ leh yawˇ ve kanˉ te ve chaw htaꞈ ga piˇ ve yoˬ. Liꞈ hpu hk’aw k’oˆ ve, “G’uiˬ sha htaꞈ yawˆ yan ve chaw hui htaꞈ yawˇ ve mvuhˇ naw ma tcuh yaˇ haꞈ shaˉ piˇ chehˇ leh, kawˆ kuiˬ awˬ hk’aw lo yawˇ hui htaꞈ ponˬ piˇ  ve yoˬ.” (Chiˇ mvuh ve 34:7) Aˬ htoꞈ ma pa taw ngaˬ hui yawˇ hui ve ga laˇ tuˬ loˍ ve le? Kanˇ paˆ uiˍ ve canˇ paˍ ngaˬ hui htaꞈ nyi leh paiˍ tuˬ te chehˇ ve pa taw yoˬ. Yawˇ hui a shu le? Hk’aˬ kaˬ lo laˬ ve le? Ngaˬ hui htaꞈ aˬ htoꞈ ma te gaˇ ve le? Na hkawˇ chi htaꞈ hk’awꞈ laˇ tuˬ Aˍdanˍ Eˇvaꞈ htaꞈ hpanˍ peuˬ hk’awꞈ nawˉ, aˬ htoꞈ ma hpehꞈ la ve teˇ geh nyi sheˍ.

7. Saˍtanˍ chaw yaˇ htaꞈ aˬ htoꞈ ma te tcuh gaˇ ve le?

⁷ Mvuhˇ naw ma tcuh yaˇ teˇ g’aˇ G’uiˬ sha htaꞈ hpfuhˆ leh chaw yaˇ htaꞈ uˉ peunˍ gaˇ ve yoˬ tehꞈ, awˬ lawn 3 hk’aw g’a henˇ peuˬ. Yawˇ htaꞈ Liꞈ hpu hk’aw Neˇ haiˬ Saˍtanˍ tehꞈ k’oˆ ve yoˬ. (Hpeuꞈ maˍ ve 12:9) Saˍtanˍ lehˬ chaw yaˇ G’uiˬ sha htaꞈ hpfuhˆ tcuh gaˇ ve yoˬ. Eˇvaꞈ htaꞈ heˍ g’a htaˇ tanˬ leh miˬ guiˬ yaˇ maˇ-awˍ ve htaꞈ heˍ chehˇ ve yoˬ. Yaꞈ hk’aˇ, Aˍbeˍlaˆ, Eˇnawˆ, Noˉaꞈ leh awˬ nu ve chaw teˇ hpaˍ hk’aˬ htaˆ kaꞈ Yaˬhoˉvaˬ htaꞈ ka tiꞈ yeˬ g’a ve yoˬ.—Heˍbrehˇ 11:4, 5, 7.

8. (a) Mvuhˇ naw ma tcuh yaˇ teˇ hpaˍ hk’aˬ hk’e te neˇ hpehꞈ k’ai ve le? (b) Iˉ kaˆ htonˍ htaˇ, neˇ hui hk’aˬ hk’e te ponˬ ve le?

⁸ Noˉaꞈ awˬ co-e htaˇ, mvuhˇ naw ma tcuh yaˇ teˇ hpaˍ Yaˬhoˉvaˬ htaꞈ hpfuhˆ leh yawˇ hui ve chehˇ kuiˬ baˬ taˉ leh miˬ guiˬ hk’oˆ chaw yaˇ awˬ to te chehˇ la ve yoˬ. Aˬ htoꞈ ma pa taw le? Liꞈ hpu hk’aw k’oˆ ve, yawˇ hui awˬ miˇ ma heuˆ gaˇ ve yoˬ. (Awˬ hkuiˉ puiˍ 6:2 g’aw ve.) Chi hk’e te ve lehˬ maˇ cawˇ. (Yuˇdaꞈ 6) Oˇ htaˇ chaw maˇ-awˍ ve haiˬ ve mvuhˇ naw ma tcuh yaˇ hui hk’a shuˍ, heˍ ve leh haiˬ ve chaw hpehꞈ la ve yoˬ. Hk’e te leh, Yaˬhoˉvaˬ haiˬ ve chaw htaꞈ iˉ kaˆ htonˍ piˇ leh ka tiꞈ yeˬ ve chaw htaꞈ ponˬ piˇ ve yoˬ. (Awˬ hkuiˉ puiˍ 7:17, 23) Haiˬ ve mvuhˇ naw ma tcuh yaˇ yawˇ hui ponˬ tuˬ, mvuhˇ naw ma hk’oˆ taˆ k’oꞈ-e ve yoˬ. Liꞈ hpu hk’aw yawˇ hui htaꞈ neˇ tehꞈ kuˬ ve yoˬ. Yawˇ hui Saˍtanˍ hpawˇ lo chehˇ k’ai ve yoˬ. Saˍtanˍ yawˇ hui ve awˬ hoˉ hpehꞈ ve yoˬ.—Maꞈhtehˍ 9:34.

9. (a) Neˇ hui mvuhˇ naw ma hk’oˆ k’oꞈ-e htaˇ, aˬ hto ma hpehꞈ la ve le? (b) Aˬ htoꞈ ma awˬ lawn henˇ tuˬ le?

 ⁹ Yaˬhoˉvaˬ htaꞈ hpfuhˆ ve neˇ hui mvuhˇ naw ma hk’oˆ k’oꞈ-e htaˇ, G’uiˬ sha yawˇ hui htaꞈ yawˇ ve yehˬ k’a hk’aw maˇ k’awꞈ chehˇ tcuh. (2 Peˍtruˆ 2:4) Neˇ hui chaw yaˇ ve awˬ to hk’e k’awꞈ pa maˇ g’a htawˇ, “miˬ guiˬ yaˇ hk’a peu-eˬ htaꞈ heˍ” chehˇ sheˍ ve yoˬ. (Hpeuꞈ maˍ ve 12:9; 1 Yoˇhanˬ 5:19) Chaw yaˇ maˇ maˇ htaꞈ heˍ g’a ve awˬ hk’aˇ htaꞈ nyi sheˍ.—2 Kawˇrenˍhtuˆ 2:11 g’aw ve.

10. Chaw yaˇ htaꞈ heˍ yuˬ tuˬ neˇ hui aˬ htoꞈ ma awˬ hk’aˇ htaꞈ yehˇ ve le?

¹⁰ Chaw yaˇ htaꞈ heˍ yuˬ tuˬ neˇ hui awˬ hk’aˇ laiˉ hk’aˇ yehˇ ve yoˬ. Neˇ hui htaꞈ caˉ daꞈ tuˬ, chaw teˇ hpaˍ mawˉ nyi paˍ leh shaˉ meuˆ paˍ htaꞈ cuˇ ve yoˬ. Teˇ hpaˍ hpaˍ neˇ hui htaꞈ a shu yawˇ hk’aˇ yawˇ caˉ daꞈ g’a ve yoˬ. Yaꞈ hk’aˇ, Liꞈ hpu hk’aw k’oˆ ve, neˇ htaꞈ caˉ daꞈ ve hk’aˬ ve teˇ ceuˬ maˇ k’oˆ taˇ te. (Gaˍlaˍtiˆ 5:19-21) Aˬ htoꞈ ma pa taw le? Awˬ lawn k’o, shaˍ bawˆ paˍ va htaꞈ yehˇ leh shaˍ yaw la ve hk’a shuˍ, neˇ hui awˬ hk’aˇ chi teˇ hpaˍ htaꞈ yehˇ leh chaw yaˇ htaꞈ heˍ ve yoˬ.—K’oˆ maˍ ve awˬ lawn 26 htaꞈ nyi sheˍ.

11. Awˬ g’uˇ suhˍ hpawˇ shiˍ tuˬ mawˉ nyi ve lehˬ hk’aˬ hk’e cawˬ ve le? Ngaˬ hui aˬ htoꞈ ma te jaw k’ai cawˇ ve le?

¹¹ Yawˇ hui ve va teˇ ceuˬ lehˬ awˬ g’uˇ suhˍ hpawˇ shiˍ ve mawˉ paˍ hpehꞈ ve yoˬ. Chaw teˇ hpaˍ awˬ nyi daꞈ ve htaꞈ ca ve, hpaiˇ nyi ve, laꞈ hk’aˇ nyi ve, zuhꞈ maˆ mawˉ nyi ve, awˬ bon daꞈ maˇ daꞈ ve htaꞈ nyi ve, ha pa tawˬ ha pa cheˆ htaꞈ nyi ve yoˬ. Laiˉ g’aˇ dawˇ ve chi hk’e te ve lehˬ teꞈ chiˉ kawˆ tuˬ maˇ cawˬ. Awˬ tehˬ k’o, kawˆ tuˬ uiˍ jaˇ ve yoˬ. Tawˇ pa haˉ te k’o, Liꞈ hpu hk’aw k’oˆ ve mawˉ nyi paˍ leh neˇ geh kanˉ te ve yoˬ. Tcuh yaˇ liꞈ 16:16-18 hk’aw k’oˆ ve, “mawˉ te puiˉ ve” awˬ ceˬ ma ehˉ teˇ g’aˇ kuˇ puiˉ k’aoˍ puiˉ ve yoˬ. Tcuh yaˇ Pawˇluꞈ yaˇ miˬ ehˉ hk’aw neˇ htaꞈ g’aꞈ  tawˆ peuˬ hk’awꞈ nawˉ, yawˇ teꞈ chiˉ maˇ k’awꞈ mawˉ nyi g’a ve yoˬ.

12. (a) Aˬ htoꞈ ma pa taw suh peuˬ ve chaw htaꞈ caˉ daꞈ ve kawˆ tuˬ cawˬ ve le? (b) Aˬ htoꞈ ma pa taw ngaˬ hui suh peuˬ ve chaw htaꞈ awˬ liˇ te piˇ ve shaˍ tiꞈ g’a te ve le?

¹² Chaw yaˇ va yaw tuˬ neˇ hui teˇ ceuˬ htaꞈ k’awꞈ yehˇ ve yoˬ. Suh peuˬ ve chaw teˇ kaˬ lo chehˇ taˍ leh ngaˬ hui htaꞈ tawˇ yaw daꞈ g’a ve, gaˇ laˇ ve maˇ heˆ k’o ca yaꞈ laˇ ve yoˬ tehꞈ yonˍ ve yoˬ. Tawˇ pa haˉ te k’o, chaw teˇ hpaˍ awˬ viˉ awˬ nyi, awˬ chawˇ suh ve k’o, mawˉ paˍ sheˍ paˍ geh k’ai ve yoˬ. Neˇ hui teˇ g’aˇ g’aˇ suh peuˬ ve chaw tawˇ yaw hkawˇ hk’a shuˍ te yaw piˇ g’a ve yoˬ. (1 Saˍmo-eˍlaˆ 28:3-19) Suh peuˬ ve chaw htaꞈ caˉ daꞈ ve kawˆ tuˬ uiˍ jaˇ. Awˬ tehˬ k’o, ngaˬ hui neˇ htaꞈ caˉ daꞈ chehˇ ve yoˬ. Chaw suh kuiˬ lo awˬ liˇ te ve htaꞈ kaꞈ shaˍ tiꞈ g’a te ve yoˬ. Laiˉ g’aˇ dawˇ ve, suh peuˬ ve chaw teˇ kaˬ lo chehˇ taˍ ve yoˬ. Yawˇ hui bon lawˬ piˇ ve, suh ve awˬ nyi biˇ ve pawehˇ te ve, tuˍ hpfuh gu piˇ ve, awˍ caˍ leh mawˇ feu piˇ ve yoˬ. Awˬ liˇ chi teˇ hpaˍ neˇ htaꞈ caˉ daꞈ ve yoˬ. Chaw teˇ g’aˇ awˬ liˇ chi teˇ hpaˍ htaꞈ maˇ te ve teˇ yanˇ, awˬ viˉ awˬ nyi leh awˬ paˇ awˬ kuiˬ chehˇ ve chaw k’oˆ guiˇ g’uiˬ guiˇ laˇ leh awˬ chawˇ maˇ te laˇ tuˬ yoˬ hehˉ. Yaꞈ hk’aˇ yawˇ shiˍ ve, suh peuˬ ve chaw teꞈ chiˉ maˇ shiˍ leh teˇ kaˬ kaˬ lo ca chehˇ ve maˇ heˆ. Yawˇ ngaˬ hui htaꞈ ga laˇ maˇ g’a leh ca yaꞈ la maˇ g’a. (Chiˇ mvuh ve 115:17) Shaˍ tiꞈ te mehˍ. Suh peuˬ ve chaw htaꞈ maˇ k’oˆ, neˇ hui ve awˬ liˇ htaꞈ maˇ k’oˆ, taˇ caˉ daꞈ.—Bon maˍ ve 18:10, 11 g’aw ve; Iˉsaˍyaˆ 8:19.

13. Neˇ htaꞈ kawˆ jaw ve chaw laiˉ g’aˇ chi teˇ hkui hk’aˬ hk’e hpehꞈ ve le?

¹³ Neˇ hui chaw htaꞈ heˍ ve ceh tiˉ maˇ heˆ, kawˆ tuˬ kaꞈ te piˇ ve yoˬ. Chi te hkui Saˍtanˍ leh yawˇ ve tcuh yaˇ “awˬ yanˇ a ciˉ ceh tiˉ cawˬ ve” htaꞈ shiˍ ve pa taw, oˇ htaˇ aꞈ kehˉ haiˬ jaˇ ve yoˬ. (Hpeuꞈ maˍ ve 12:12, 17) Yaꞈ hk’aˇ, neˇ htaꞈ kawˆ jaw ve chaw laiˉ g’aˇ lehˬ chi teˇ hkui maˇ k’awꞈ kawˆ ve yoˬ. Yawˇ hui hk’aˬ hk’e te ve le?

14. Eˇfeˇsuꞈ Hkriꞈ yaˇ hk’a shuˍ, ngaˬ hui neˇ htaꞈ maˇ k’awꞈ caˉ daꞈ tuˬ, hk’aˬ hk’e te g’a ve le?

¹⁴ Neˇ htaꞈ tawˍ daꞈ g’aˇ leh maˇ k’awꞈ kawˆ tuˬ awˬ hk’aˇ Liꞈ hpu hk’aw k’oˆ laˇ taˍ ve yoˬ. Tawˇ pa haˉ te k’o, Eˇfeˇsuꞈ venˇ hk’aw chehˇ ve chaw teˇ hpaˍ hpaˍ awˬ tehˬ ve htaꞈ maˇ henˇ sheˍ g’uˇ suhˍ htaˇ, neˇ htaꞈ caˉ daꞈ jaw ve yoˬ. Yawˇ hui maˇ k’awꞈ caˉ daꞈ tuˬ, hk’aˬ hk’e te g’a ve le? Liꞈ hpu hk’aw k’oˆ ve, “faˍ te paˍ laiˉ g’aˇ htawˇ, yawˇ hui ve liꞈ teˇ hpaˍ htaꞈ yuˬ laˬ leh, chaw hk’a peu-eˬ mehˆ g’uˇ suhˍ tuˉ baˬ ve yoˬ.” (Tcuh yaˇ 19:19) Yawˇ hui Hkriꞈ yaˇ hpehꞈ gaˇ ve pa taw, faˍ htaꞈ caˉ daꞈ ve liꞈ hk’a peu-eˬ te luˬ te sheˆ ve yoˬ. Chi beuꞈ teˇ co-e htawˇ, hk’aˬ ve teˇ g’aˇ Yaˬhoˉvaˬ htaꞈ oˉ k’oˍ pui gaˇ ve k’o, neˇ htaꞈ caˉ daꞈ ve faˍ te shaˉ te ve hk’a peu-eˬ htaꞈ g’a te luˬ ve yoˬ. Liꞈ k’oˆ, liꞈ hkawˇ, leˍ guiˇ tuˬ, awˬ han, awˬ han kuˉ, shehnˉ cawˬ ve awˬ hk’eun awˬ hk’aˇ teˇ hpaˍ nyi-a k’o teꞈ chiˉ awˬ tawꞈ ma maˇ cawˬ ve htawˇ, g’a te luˬ ve yoˬ.—1 Kawˇrenˍhtuˆ 10:21.

15. Saˍtanˍ leh neˇ hui htaꞈ tawˍ daꞈ g’aˇ tuˬ ngaˬ hui aˬ htoꞈ ma g’a k’awꞈ te ve le?

¹⁵ Eˇfeˇsuꞈ ve chaw neˇ htaꞈ caˉ daꞈ ve liꞈ te luˬ ve laiˉ hk’awꞈ gaˬ ve htawˇ, Tcuh yaˇ Pawˇluꞈ liꞈ bvuhꞈ piˇ ve, “haiˬ ve awˬ ha teˇ hpaˍ htaꞈ” yawˇ hui g’a “tawˍ daꞈ” tcuhˉ taˍ ve yoˬ. (Eˇfeˇsuꞈ 6:12) Yawˇ hui ve liꞈ tuˉ baˬ peuˬ ve htawˇ, neˇ k’awꞈ shoꞈ shaꞈ laˇ chehˇ ve yoˬ. Yawˇ hui aˬ htoꞈ ma g’a te ve le? Pawˇluꞈ k’oˆ ve, “haiˬ ve awˬ shehˍ hpaˇ teˇ g’aˇ bawˆ laˇ ve aˬ miˍ toꞈ chehˇ ve hk’aˆ ce teˇ hpaˍ htaꞈ tiˇ pehˍ [htanˬ] g’a tuˬ, htanˬ tuˬ htaꞈ pfuhˇ ve hk’e, yonˍ ve teˇ ceuˬ htaꞈ pfuhˇ taˍ-oꞈ.” (Eˇfeˇsuꞈ 6:16) Aˬ sho-eˬ htaˇ maꞈ yaˇ htanˬ tuˬ htaꞈ ka taˍ ve hk’a shuˍ, yonˍ ve teˇ ceuˬ cawˬ ve k’o, neˇ shoꞈ shaꞈ laˇ ve htaꞈ fanˬ taˍ g’a ve yoˬ. Yaˬhoˉvaˬ ngaˬ hui htaꞈ fanˬ laˇ g’a ve yoˬ tehꞈ hk’a dehꞈ yonˍ ve k’o, Saˍtanˍ leh neˇ hui htaꞈ tawˍ daꞈ g’aˇ ve yoˬ.—Maꞈhtehˍ 17:20.

16. Ngaˬ hui hk’aˬ hk’e te leh Yaˬhoˉvaˬ htaꞈ yonˍ maˇ la g’a tuˬ le?

 ¹⁶ Ngaˬ hui hk’aˬ hk’e te leh Yaˬhoˉvaˬ htaꞈ yonˍ maˇ la g’a tuˬ le? Teˇ nyi le le Liꞈ hpu g’aw leh G’uiˬ sha htaꞈ g’aˇ va tuˬ g’a coˇ caˇ ve yoˬ. Ngaˬ hui Yaˬhoˉvaˬ htaꞈ awˬ tehˬ awˬ na yonˍ ve k’o, Saˍtanˍ leh neˇ hui te luˬ laˇ maˇ g’a.—1 Yoˇhanˬ 5:5.

17. Ngaˬ hui neˇ hui htaꞈ jaw k’ai g’a tuˬ, aˬ htoꞈ ma g’a k’awꞈ te sheˍ le?

¹⁷ Eˇfeˇsuꞈ Hkriꞈ yaˇ hk’aˬ hk’e g’a k’awꞈ te sheˍ le? Yawˇ hui neˇ htaꞈ caˉ daꞈ ve venˇ hk’aw chehˇ ve pa taw, Pawˇluꞈ k’oˆ piˇ ve, ‘hk’aˬ htaˆ kaꞈ bon lawˬ chehˇ-oˆ.’ (Eˇfeˇsuꞈ 6:18) Yaˬhoˉvaˬ hk’aˬ htaˆ kaꞈ haꞈ shaˉ laˇ tuˬ, yawˇ hui bon g’a lawˬ ve yoˬ. Ngaˬ hui kaꞈ neˇ htaꞈ caˉ daꞈ ve miˬ guiˬ hk’oˆ chehˇ taˍ ve yoˬ. Yaˬhoˉvaˬ haꞈ shaˉ laˇ tuˬ, ngaˬ hui bon g’a lawˬ leh yawˇ ve awˬ meh htaꞈ kaꞈ g’a kuˬ cawˇ ve yoˬ. (Tawˇ naˉ ve 18:10 g’aw ve.) Saˍtanˍ htaꞈ jaw k’ai g’a tuˬ, Yaˬhoˉvaˬ geh ngaˬ hui bon lawˬ tcuhˉ taˍ ve k’o, yawˇ ga laˇ tuˬ yoˬ.—Chiˇ mvuh ve 145:19; Maꞈhtehˍ 6:13.

18, 19. (a) Ngaˬ hui Saˍtanˍ leh neˇ hui htaꞈ hk’aˬ hk’e te g’aˇ tuˬ le? (b) Awˬ g’uˇ suhˍ teˇ lawn hk’aw aˬ htoꞈ ma henˇ tuˬ le?

¹⁸ Ngaˬ hui neˇ hui htaꞈ caˉ daꞈ ve mawˇ teˇ ceuˬ le le te luˬ leh Yaˬhoˉvaˬ htaꞈ g’aˇ va ve k’o, Saˍtanˍ leh neˇ hui htaꞈ tawˍ daꞈ g’aˇ tuˬ yoˬ. Ngaˬ hui yawˇ hui htaꞈ maˇ k’awꞈ kawˆ ve yoˬ. (Yaˍkoˆ 4:7, 8 g’aw ve.) Yaˬhoˉvaˬ lehˬ neˇ hui aꞈ kehˉ kanˇ paˆ cawˬ ve yoˬ. Noˉaꞈ awˬ co-e htaˇ, G’uiˬ sha neˇ hui htaꞈ ciˍ yanˍ piˇ jaw leh maˇ maw k’o hk’a peu-eˬ k’awꞈ te luˬ piˇ tuˬ yoˬ. (Yuˇdaꞈ 6) Ngaˬ hui hk’aˇ ngaˬ hui ceh yawˇ hui htaꞈ tawˍ daꞈ ve maˇ heˆ tehꞈ taˇ leunˇ. Yaˬhoˉvaˬ mvuhˇ naw ma tcuh yaˇ htaꞈ yehˇ leh haꞈ shaˉ laˇ chehˇ ve yoˬ. (2 Jawˇmawˇ 6:15-17) Yaˬhoˉvaˬ ga laˇ ve pa taw, ngaˬ hui Saˍtanˍ leh neˇ hui htaꞈ g’aˇ hpehꞈ ve yoˬ.—1 Peˍtruˆ 5:6, 7; 2 Peˍtruˆ 2:9.

¹⁹ Yaꞈ hk’aˇ, Saˍtanˍ leh neˇ hui htaꞈ pa taw chaw yaˇ tuꞈ hkanˍ jaˇ ve, aˬ htoꞈ ma pa taw G’uiˬ sha yawˇ hui htaꞈ maˇ te luˬ sheˍ ve le? Awˬ g’uˇ suhˍ teˇ lawn hk’aw hk’awꞈ laˇ tuˬ yoˬ.