1-3. Suh ve htaꞈ chaw laiˉ g’aˇ aˬ htoꞈ ma na nyi ve le? Bon liˇ teˇ hpaˍ hk’aˬ hk’e hk’awꞈ ve le?

Liꞈ hpu ngaˬ hui htaꞈ ka tiꞈ te laˇ ve teˇ nyi k’o, “suh ve teˇ ceuˬ maˇ k’awꞈ cawˬ.” (Hpeuꞈ maˍ ve 21:4) Awˬ lawn 5 hk’aw g’a henˇ ve htaiˍ hk’awꞈ laˇ ve pa taw, ngaˬ hui co co taiˍ taiˍ a shaꞈ g’a hpehꞈ ve yoˬ. Yaꞈ hk’aˇ, chaw yaˇ g’a suh chehˇ sheˍ ve yoˬ. (Cuˇ yiˍ piˇ ve 9:5) Chi htaꞈ pa taw, ngaˬ hui suh peuˬ k’o hk’aˬ hk’e k’ai ve le tehꞈ, na nyi chehˇ ve yoˬ.

² Ngaˬ hui haꞈ ve chaw suh ve teˇ yanˇ, na hkawˇ chi ve a yeˇ k’awꞈ uiˍ jaˇ ve yoˬ. Ngaˬ hui htawˇ dawˇ nawˬ dawˇ cawˬ ve, ‘yawˇ hk’aˬ kaˬ lo k’ai ve le? Yawˇ ngaˬ hui htaꞈ nyi chehˇ ve laˇ? Yawˇ ngaˬ hui htaꞈ ga laˇ g’a-aw laˇ? Ngaˬ hui yawˇ htaꞈ g’a k’awꞈ mawˬ daꞈ tuˬ laˇ?’

³ Laiˉ bon liˇ na hkawˇ chi ve htaꞈ hk’awꞈ laˇ ve maˇ shuˍ daꞈ. Chaw teˇ hpaˍ maˍ ve, daꞈ ve chaw mvuhˇ naw ma hk’oˆ taˆ-e leh haiˬ ve chaw moˬ naˆ hoꞈ hk’aw loꞈ-e ve yoˬ. Teˇ hpaˍ k’oˆ ve, nawˬ suh ve teˇ yanˇ nawˬ ve awˬ ha ku suh k’ai peuˬ ve awˬ viˉ awˬ nyi geh ca chehˇ ve yoˬ. Awˬ nu teˇ hpaˍ k’oˆ ve, suh peuˬ hk’awꞈ nawˉ chaw awˬ suhˉ maˇ heˆ leh to nuˇ to shaˆ teˇ pawˆ k’awꞈ paw la ve yoˬ.

4. Suh ve htaꞈ bon liˇ teˇ hpaˍ maˍ ve shuˍ daꞈ ve hk’aˬ hk’e ve le?

⁴ Bon liˇ teˇ hpaˍ maˍ ve awˬ ceuˬ peun daꞈ jaˇ ve yoˬ. Yaꞈ hk’aˇ, yawˇ hui maˍ ve shuˍ daꞈ ve awˬ lawn teˇ ceuˬ cawˬ ve yoˬ. Chaw yaˇ suh ve k’o, teˇ ceuˬ ceuˬ k’awꞈ caˉ teꞈ chehˇ sheˍ ve yoˬ. Awˬ tehˬ laˇ?

5, 6. Ngaˬ hui suh peuˬ k’o, hk’aˬ hk’e hpehꞈ ve le?

⁵ Ngaˬ hui suh peuˬ k’o, hk’aˬ hk’e hpehꞈ tuˬ Yaˬhoˉvaˬ shiˍ ve yoˬ. G’uiˬ sha ngaˬ hui htaꞈ k’oˆ laˇ ve, chaw yaˇ suh peuˬ k’o, yawˇ ve a shaꞈ leh peuˬ ve yoˬ. Hk’e te leh, chaw yaˇ suh ve k’o, dawˇ hk’aˇ maˇ k’awꞈ cawˬ. Yawˇ ve awˬ ha ku teˇ kaˬ kaˬ k’ai ve maˇ heˆ. * Ngaˬ hui suh ve k’o, maˇ mawˬ puiˉ, maˇ kaˇ puiˉ, teꞈ chiˉ kaꞈ maˇ dawˇ nyi puiˉ ve yoˬ.

⁶ Jawˇ mawˇ Sawˉlaꞈmonˍ bvuhꞈ taˍ ve, “suh peuˬ ve chaw lehˬ, teꞈ chiˉ maˇ shiˍ.” Yawˇ hui maˇ haꞈ puiˉ, maˇ nyi bawˬ puiˉ, “kanˉ te ve, dawˇ nyi ve, leh cuˇ yiˍ henˇ ve maˇ k’awꞈ cawˬ.” (Cuˇ yiˍ piˇ ve 9:5, 6, 10 g’aw ve.) Chiˇ mvuh ve liꞈ hk’aw k’oˆ ve, chaw teˇ g’aˇ suh ve k’o, ‘yawˇ ve dawˇ hk’aˇ’ kaꞈ suh peuˬ ve yoˬ.

7. Suh ve awˬ lawn htaꞈ Yeˍsuˆ hk’aˬ hk’e k’oˆ taˍ ve le?

⁷ Yawˇ haꞈ ve awˬ chawˇ Laˍzaˍruˆ suh htaˇ, Yeˍsuˆ awˬ laꞈ g’awˇ htaꞈ k’oˆ piˇ ve, “ngaˬ hui ve awˬ chawˇ Laˍzaˍruˆ zuhꞈ muiˉ k’a peuˬ.” Yaꞈ hk’aˇ, Laˍzaˍruˆ g’aˇ jehˇ chehˇ ve tehꞈ Yeˍsuˆ k’oˆ gaˇ ve maˇ heˆ. Yawˇ k’awꞈ k’oˆ ve, “Laˍzaˍruˆ suh peuˬ.” (Yoˇhanˬ 11:11-14) Chi htaꞈ pa taw, suh ve htaꞈ zuhꞈ muiˉ k’a ve hk’a shuˍ yoˬ tehꞈ Yeˍsuˆ tehˆ maˍ ve yoˬ. Laˍzaˍruˆ mvuhˇ naw ma hk’oˆ taˆ-e ve, suh k’ai peuˬ ve awˬ viˉ awˬ nyi geh ca chehˇ ve tehꞈ Yeˍsuˆ maˇ k’oˆ. Yawˇ Laˍzaˍruˆ moˬ naˆ hoꞈ hk’aw tuꞈ hkanˍ chehˇ ve, chaw awˬ suhˉ maˇ heˆ leh to nuˇ to shaˆ k’awꞈ paw la tuˬ yoˬ tehꞈ kaꞈ maˇ g’a k’oˆ. Laˍzaˍruˆ zuhꞈ miˇ taˍ ve hk’a shuˍ yoˬ. Suh ve htaꞈ zuhꞈ muiˉ k’a taˍ ve hk’a shuˍ yoˬ tehꞈ, awˬ nu ve awˬ yanˇ htaˇ kaꞈ Yeˍsuˆ tehˆ maˍ ve yoˬ. Yeˍsuˆ Yaˍiˉruˆ yaˇ miˇ  htaꞈ teꞈ tu la piˇ-a tehꞈ te htaˇ, yawˇ k’oˆ ve, “yawˇ suh ve maˇ heˆ. Zuhꞈ muiˉ k’a chehˇ ve yoˬ.”—Luˉkaꞈ 8:52.

8. Chaw yaˇ suh puiˉ tuˬ G’uiˬ sha te hpanˍ ve maˇ heˆ tehꞈ, ngaˬ hui hk’aˬ hk’e te shiˍ ve le?

⁸ G’uiˬ sha Aˍdanˍ Eˇvaꞈ htaꞈ suh puiˉ tuˬ te hpanˍ ve laˇ? Maˇ heˆ! Yawˇ hui co co taiˍ taiˍ chehˇ sha cawˬ sha tuˬ, Yaˬhoˉvaˬ te hpanˍ piˇ ve yoˬ. Yaˬhoˉvaˬ chaw yaˇ htaꞈ te hpanˍ htaˇ, co tiꞈ ha tiꞈ heuˆ gaˇ ve keu piˇ ve yoˬ. (Cuˇ yiˍ piˇ ve 3:11) Yaˬhoˉvaˬ hk’a shuˍ, awˬ pa awˬ e a shu yawˇ ve yaˇ mawˇ la leh suh ve htaꞈ maˇ mawˬ gaˇ. Yaꞈ hk’aˇ, G’uiˬ sha co tiꞈ ha tiꞈ te hpanˍ laˇ ve k’o, aˬ htoꞈ ma pa taw ngaˬ hui suh ve le?

9. Aꞈ htoꞈ ma pa taw Aˍdanˍ Eˇvaꞈ Yaˬhoˉvaꞈ hkawˇ na yuˬ cawˇ ve le?

⁹ Eˍdenˍ hko hk’aw lo, Yaˬhoˉvaˬ Aˍdanˍ htaꞈ k’oˆ piˇ ve, “hko chi hk’aw cawˬ taˍ ve iˉ shiˍ hk’a peu-eˬ htaꞈ nawˬ caˇ hpehꞈ ve yoˬ. Yaꞈ hk’aˇ, daꞈ ve maˇ daꞈ ve htaꞈ shiˍ puiˉ ve suhˆ cehˬ oˇ ve teˇ cehˬ ve awˬ shiˍ htaꞈ nawˬ taˇ caˇ. Nawˬ lehˬ suhˆ cehˬ oˇ ve teˇ cehˬ ve awˬ shiˍ htaꞈ caˇ ve k’o, awˬ tehˬ awˬ na g’a suh tuˬ yoˬ.” (Awˬ hkuiˉ puiˍ 2:9, 16, 17) Aˍdanˍ Eˇvaꞈ Yaˬhoˉvaˬ hkawˇ chi htaꞈ na yuˬ tuˬ, maˇ haˍ. Aˬ htoꞈ ma daꞈ maˇ daꞈ ve yawˇ hui htaꞈ k’oˆ piˇ tuˬ, Yaˬhoˉvaˬ a hkaw-anˬ cawˬ ve yoˬ. Yawˇ hui Yaˬhoˉvaˬ hkawˇ na yuˬ ve k’o, yawˇ uˉ peunˍ ve htaꞈ yawˆ yan leh yawˇ hui g’a taˍ ve awˬ ceuˬ htaꞈ ha lehˬ ve yoˬ tehꞈ, hpeuꞈ maw piˇ g’a ve yoˬ.

10, 11. (a) Aˍdanˍ Eˇvaꞈ G’uiˬ sha hkawˇ maˇ na yuˬ tuˬ, Saˍtanˍ hk’aˬ hk’e te ve le? (b) Aˬ htoꞈ ma pa taw Aˍdanˍ Eˇvaꞈ venˇ baˆ hpehˇ piˇ maˇ keunˍ ve le?

¹⁰ Aˍdanˍ Eˇvaꞈ Yaˬhoˉvaꞈ hkawˇ maˇ na yuˬ ve pa taw, nyi ma luˬ tuˬ cawˬ ve yoˬ. Saˍtanˍ Eˇvaꞈ htaꞈ k’oˆ piˇ ve, “iˉ shiˍ teˇ hpaˍ htaꞈ maˇ g’a caˇ tehꞈ G’uiˬ sha k’oˆ laˇ taˍ ve laˇ?” Eˇvaꞈ hk’awꞈ piˇ ve, “hko awˬ k’aw ji lo cawˬ ve iˉ shiˍ oˇ ve maˇ heˆ k’o, awˬ nu ve iˉ shiˍ hk’a peu-eˬ htaꞈ ngaˬ hui caˇ hpehꞈ ve yoˬ. G’uiˬ sha lehˬ, iˉ shiˍ oˇ ve teˇ ceuˬ htaꞈ htawˇ kaꞈ taˇ htawˇ, caˇ kaꞈ taˇ caˇ tehꞈ k’oˆ laˇ taˍ ve yoˬ. Ngaˬ hui oˇ hk’e te ve k’o g’a suh tuˬ yoˬ.”—Awˬ hkuiˉ puiˍ 3:1-3.

¹¹ Saˍtanˍ k’awꞈ k’oˆ ve, “nawˬ hui maˇ suh taˬ. Nawˬ hui awˬ shiˍ oˇ ve htaꞈ caˇ ve k’o, nawˬ hui ve mehˆ shiˍ teˇ cawˬ haˉ hpaw la leh G’uiˬ sha hk’e hpehꞈ la ve awˬ hk’oˆ daꞈ ve maˇ daꞈ ve awˬ ceuˬ htaꞈ shiˍ la tuˬ ve htaꞈ G’uiˬ sha shiˍ taˍ ve yoˬ.” (Awˬ hkuiˉ puiˍ 3:4-6) Saˍtanˍ Eˇvaꞈ htaꞈ dawˇ tcuh gaˇ ve, aˬ htoꞈ ma daꞈ maˇ daꞈ ve htaꞈ yawˇ hk’aˇ yawˇ dawˇ cheˆ puiˉ leh G’uiˬ sha hkawˇ maˇ na yuˬ kaꞈ teꞈ chiˉ maˇ heˆ. G’uiˬ sha k’oˆ ve hk’e yawˇ suh tuˬ ve maˇ heˆ tehꞈ Saˍtanˍ Eˇvaꞈ htaꞈ heˍ piˇ ve pa taw, Eˇvaꞈ iˉ shiˍ oˇ ve htaꞈ shaˉ caˇ leh awˬ hpawˇ htaꞈ kaꞈ caˍ piˇ ve yoˬ. Yaˬhoˉvaˬ iˉ  shiˍ oˇ ve htaꞈ taˇ caˇ tehꞈ, k’oˆ piˇ taˍ ve htaꞈ Aˍdanˍ Eˇvaꞈ hk’a dehꞈ shiˍ taˍ ve yoˬ. Yawˇ hui iˉ shiˍ shaˉ caˇ ve teˇ yanˇ, hk’a tawˍ lehˆ k’oˆ piˇ taˍ ve htaꞈ maˇ na yuˬ tuˬ, yawˇ hui leuˆ yuˬ ve yoˬ. Yawˇ hui lehˬ, mvuhˇ naw ma hk’oˆ chehˇ ve yawˇ hui ve Awˬ pa htaꞈ maˇ yawˆ yan ve yoˬ. Hk’e te leh, venˇ baˆ hpehˇ piˇ maˇ keunˍ ve yoˬ!

12. Aˬ htoꞈ ma pa taw Aˍdanˍ Eˇvaꞈ Yaˬhoˉvaˬ hkawˇ maˇ na yuˬ ve nyi ma luˬ tuˬ cawˬ ve le?

¹² Ngaˬ hui ve awˬ pa awˬ e awˉ lawˉ teˇ ca yawˇ hui ve Hpanˍ shehˍ hpaˇ htaꞈ maˇ yawˆ yan ve pa taw, nyi ma luˬ tuˬ cawˬ ve yoˬ! Nawˬ awˬ pa awˬ e hpehꞈ ve k’o, yaˇ htaꞈ coˇ caˇ leh hu piˇ ve teˇ yanˇ, nawˬ hkawˇ htaꞈ maˇ na yuˬ, teˇ ceuˬ k’oˆ piˇ k’o, teˇ ceuˬ te k’ai ve, nawˬ hk’aˬ hk’e dawˇ ve le? Nawˬ nyi ma luˬ jaˇ tuˬ yoˬ maˇ heˆ laˇ?

13. Yaˬhoˉvaˬ k’oˆ ve, “jeꞈ hk’aw lo nawˬ g’a k’awꞈ k’oꞈ-e” ve, aˬ htoꞈ ma k’oˆ gaˇ ve le?

¹³ Aˍdanˍ Eˇvaꞈ G’uiˬ sha hkawˇ maˇ na yuˬ ve teˇ yanˇ, yawˇ hui co co taiˍ taiˍ a shaꞈ g’a hk’aˇ maˇ cawˬ. Yaˬhoˉvaˬ Aˍdanˍ htaꞈ k’oˆ piˇ ve, “nawˬ htaꞈ jeꞈ yuˬ te taˍ ve pa taw, jeꞈ lo nawˬ g’a k’awꞈ k’oꞈ-e tuˬ yoˬ.” (Awˬ hkuiˉ puiˍ 3:19 g’aw ve.) Aˍdanˍ venˇ baˆ te peuˬ hk’awꞈ nawˉ, yawˇ suh ve yoˬ. K’oˆ gaˇ ve yawˇ lehˬ, jeꞈ hk’a shuˍ k’awꞈ hpehꞈ k’ai ve yoˬ. Yawˇ a shaꞈ kaꞈ awˬ ha ku kaꞈ maˇ cawˬ.—Awˬ hkuiˉ puiˍ 2:7.

14. Aˬ htoꞈ ma pa taw ngaˬ hui suh ve le?

¹⁴ Aˍdanˍ Eˇvaꞈ G’uiˬ sha hkawˇ na yuˬ ve k’o, chi teˇ hkui hk’a gaˬ a shaꞈ teꞈ  chehˇ sheˍ ve yoˬ. Yaꞈ hk’aˇ, yawˇ hui maˇ na yuˬ ve pa taw, venˇ baˆ te leh awˬ leh meuˇ htaˇ g’a suh ve yoˬ. Venˇ baˆ lehˬ naˬ beuˬ hk’a shuˍ yawˇ ve awˬ yaˇ awˬ duˬ htaꞈ nehˉ k’ai ve yoˬ. Ngaˬ hui hk’a peu-eˬ paw la htaˇ kaꞈ venˇ baˆ cawˬ taˍ ve pa taw, g’a suh ve yoˬ. (Roˉmaꞈ 5:12) Yaꞈ hk’aˇ, G’uiˬ sha chi hk’e maˇ hpehꞈ tcuh gaˇ ve yoˬ. Chaw yaˇ suh tuˬ yawˇ maˇ dawˇ jaw, Liꞈ hpu hk’aw suh ve htaꞈ “canˇ paˍ” tehꞈ k’oˆ ve yoˬ.—1 Kawˇrenˍhtuˆ 15:26.

15. Suh ve htaꞈ awˬ tehˬ g’a shiˍ ve k’o, ngaˬ hui aˬ htoꞈ ma awˬ bon g’a ve le?

¹⁵ Suh ve htaꞈ awˬ tehˬ shiˍ ve teˇ ceuˬ yonˍ yaꞈ chehˇ ve htaꞈ ponˬ laˇ ve yoˬ. Liꞈ hpu hk’aw k’oˆ ve suh peuˬ ve chaw teꞈ chiˉ maˇ shiˍ. Ngaˬ hui yawˇ htaꞈ tawˇ yaw daꞈ maˇ g’a leh ga daꞈ kaꞈ maˇ g’a. Yawˇ ngaˬ hui htaꞈ naˬ tuˬ te laˇ maˇ g’a ve pa taw, kawˆ tuˬ maˇ loˍ. Yaꞈ hk’aˇ, laiˉ bon liˇ maˍ ve, suh peuˬ ve chaw teˇ kaˬ lo k’awꞈ teꞈ chehˇ sheˍ ve yoˬ. Yawˇ hui htaꞈ ga piˇ gaˇ ve k’o, awˬ bon g’a te piˇ ve yoˬ. Yaꞈ hk’aˇ, suh ve htaꞈ awˬ tehˬ g’a shiˍ ve pa taw, ngaˬ hui htaꞈ heˍ yuˬ maˇ g’a.

16. Suh peuˬ ve chaw awˬ lawn laiˉ bon liˇ hk’aˬ hk’e heˍ maˍ ve le?

¹⁶ Saˍtanˍ maˇ heˆ heˆ ve bon liˇ htaꞈ yehˇ leh suh peuˬ ve chaw teꞈ chehˇ sheˍ tehꞈ, heˍ laˇ ve yoˬ. Tawˇ pa haˉ te k’o, bon liˇ teˇ hpaˍ maˍ ve ngaˬ hui suh peuˬ hk’awꞈ nawˉ, awˬ ha ku tawˆ-e leh teˇ kaˬ kaˬ lo ca chehˇ taˍ ve yoˬ. Nawˬ ve bon liˇ chi hk’e maˍ laˇ ve laˇ? Maˇ heˆ leh Liꞈ hpu hk’aw maˍ ve hk’e maˍ laˇ ve laˇ? Chaw yaˇ Yaˬhoˉvaˬ htaꞈ maˇ shiˍ daꞈ tuˬ, Saˍtanˍ heˍ ve htaꞈ yehˇ ve yoˬ.

17. Moˬ naˆ hoꞈ ve awˬ lawn maˍ ve Yaˬhoˉvaˬ htaꞈ hk’aˬ hk’e te she pfuhˍ piˇ ve le?

¹⁷ Laiˉ bon liˇ maˍ ve awˬ ceuˬ kawˆ tuˬ cawˬ ve yoˬ. Tawˇ pa haˉ te k’o, bon liˇ teˇ hpaˍ maˍ ve haiˬ ve chaw moˬ naˆ hoꞈ hk’aw  co co taiˍ taiˍ g’a tuꞈ hkanˍ ve yoˬ. Heˍ ve tawˇ hkawˇ chi ve Yaˬhoˉvaˬ htaꞈ she pfuhˍ piˇ ve yoˬ. Awˬ lawn k’o, chaw yaˇ oˇ hk’e tuꞈ hkanˍ tuˬ, yawˇ maˇ dawˇ jaw! (1 Yoˇhanˬ 4:8 g’aw ve.) Awˬ pa awˬ e teˇ g’aˇ yawˇ ve yaˇ htaꞈ ciˍ yanˍ tuˬ, laꞈ sheh htaꞈ a miˬ hk’aw yuˬ chiˆ piˇ ve k’o, chaw oˇ ve teˇ g’aˇ htaꞈ nawˬ hk’aˬ hk’e dawˇ tuˬ le? Yawˇ haiˬ jaˇ leh maˇ shiˍ daꞈ gaˇ tehꞈ nawˬ dawˇ tuˬ yoˬ. Yaˬhoˉvaˬ oˇ hk’e hpehꞈ ve yoˬ tehꞈ, Saˍtanˍ ngaˬ hui htaꞈ dawˇ tcuh gaˇ ve yoˬ!

18. Aˬ htoꞈ ma te ngaˬ hui suh peuˬ ve chaw htaꞈ maˇ kawˆ cawˇ ve le?

¹⁸ Bon liˇ teˇ hpaˍ maˍ ve chaw yaˇ suh htaˇ, awˬ ha ku maˇ heˆ k’o neˇ hpehꞈ ve yoˬ. Yawˇ hui kanˇ paˆ cawˬ ve awˬ chawˇ maˇ heˆ leh kawˆ tuˬ cawˬ ve canˇ paˍ hpehꞈ ve pa taw, ngaˬ hui kawˆ leh yawˆ yan piˇ cawˇ ve yoˬ. Chaw yaˇ maˇ-awˍ ve heˍ ve tawˇ hkawˇ chi htaꞈ yonˍ leh Yaˬhoˉvaˬ htaꞈ oˉ k’oˍ pui ve aꞈ kehˉ suh peuˬ ve chaw htaꞈ oˉ k’oˍ pui ve yoˬ. Yaꞈ hk’aˇ, suh peuˬ ve chaw teꞈ chiˉ maˇ shiˍ ve pa taw, ngaˬ hui maˇ kawˆ cawˇ tehꞈ taˇ leunˇ. Yaˬhoˉvaˬ ngaˬ hui ve Hpanˍ shehˍ hpaˇ hpehꞈ ve yoˬ. Yawˇ awˬ tehˬ ve G’uiˬ sha hpehꞈ leh ngaˬ hui yawˇ htaꞈ ceh tiˉ oˉ k’oˍ pui cawˇ ve yoˬ.—Hpeuꞈ maˍ ve 4:11.

19. Suh ve htaꞈ awˬ tehˬ g’a shiˍ ve lehˬ ngaˬ hui htaꞈ hk’aˬ hk’e ga laˇ ve le?

¹⁹ Suh ve htaꞈ awˬ tehˬ g’a shiˍ ve lehˬ, laiˉ bon liˇ maˍ yaꞈ ve htaꞈ ponˬ laˇ ve yoˬ. Awˬ lawn chi ve lehˬ, awˬ g’uˇ suhˍ hpawˇ daꞈ jaˇ ve a shaꞈ htaꞈ caˉ daꞈ ve Yaˬhoˉvaˬ ka tiꞈ te taˍ ve hk’a peu-eˬ ngaˬ hui na g’a tuˬ ga laˇ ve yoˬ.

20. Awˬ g’uˇ suhˍ teˇ lawn hk’aw ngaˬ hui aˬ htoꞈ ma awˬ lawn henˇ tuˬ le?

²⁰ Teˇ pawˆ htaˇ, G’uiˬ sha ve awˬ ceˬ Yawˇbaˆ k’oˆ ve, “chaw teˇ g’aˇ suh-e ve k’o, yawˇ k’awꞈ teꞈ la hpehꞈ-aw laˇ?” (Yawˇbaˆ 14:14) Suh peuˬ ve chaw a shaꞈ k’awꞈ teꞈ la hpehꞈ-aw laˇ? Liꞈ hpu hk’aw G’uiˬ sha k’oˆ taˍ ve awˬ ceuˬ ha lehˬ tuˬ cawˬ ve yoˬ. Ngaˬ hui awˬ lawn chi ve awˬ g’uˇ suhˍ teˇ lawn hk’aw henˇ tuˬ yoˬ.