1, 2. (a) Nawˬ ha lehˬ jaˇ ve laꞈ shawnˍ hk’aˬ hk’e ve le? (b) Aˬ htoꞈ ma te htaiˍ hk’awꞈ ve lehˬ daꞈ jaˇ ve laꞈ shawnˍ hpehꞈ ve le?

Nawˬ aˬ htoꞈ ma daꞈ jaˇ ve laꞈ shawnˍ g’a jaw ve le? Laꞈ shawnˍ oˇ ve awˬ hpfuhˇ hk’aˆ tuˬ maˇ loˍ. Laꞈ shawnˍ oˇ ve htaꞈ nawˬ dawˇ cawˇ leh loˍ ve mawˇ hpehꞈ ve k’o, nawˬ ha lehˬ jaˇ ve yoˬ.

² Yaˬhoˉvaˬ ngaˬ hui htaꞈ laiˉ ceuˬ peꞈ laˇ ve awˬ hk’aw lo a yeˇ uiˍ jaˇ ve teˇ ceuˬ cawˬ ve yoˬ. Chi lehˬ G’uiˬ sha chaw yaˇ htaꞈ peꞈ laˇ ve daꞈ jaˇ ve laꞈ shawnˍ hpehꞈ ve yoˬ. Ngaˬ hui co co taiˍ taiˍ g’a teꞈ chehˇ tuˬ, Yaˬhoˉvaˬ yawˇ ve Yaˇ paˍ Yeˍsuˆ Hkriꞈ htaꞈ miˬ guiˬ hk’oˆ peu laˇ ve, chi teˇ lawn hk’aw ngaˬ hui henˇ tuˬ yoˬ. (Maꞈhtehˍ 20:28 g’aw ve.) Chi lehˬ, Yaˬhoˉvaˬ ngaˬ hui htaꞈ haꞈ jaˇ ve yoˬ tehꞈ hpeuꞈ maw laˇ ve yoˬ.

3. Aˬ htoꞈ ma te chaw yaˇ g’a suh ve le?

³ Chaw yaˇ htaꞈ venˇ baˆ leh suh ve htaꞈ ponˬ laˇ tuˬ, htaiˍ hk’awꞈ ve teˇ ceuˬ Yaˬhoˉvaˬ peꞈ laˇ ve yoˬ. (Eˇfeˇsuꞈ 1:7) Aˬ htoꞈ ma pa taw ngaˬ hui htaiˍ hk’awꞈ laˇ tuˬ loˍ ve le? Awˬ lawn chi na g’a tuˬ, laiˉ hinˉ hk’awꞈ htaˇ Eˍdenˍ hko hk’aw aˬ htoꞈ ma hpehꞈ la ve g’a shiˍ cawˇ ve yoˬ. Ngaˬ hui ve awˬ pa awˬ e awˉ lawˉ teˇ ca Aˍdanˍ Eˇvaꞈ venˇ baˆ te ve pa taw, g’a suh ve yoˬ. Ngaˬ hui kaꞈ Aˍdanˍ Eˇvaꞈ ve venˇ baˆ awˬ shinˉ awˬ ka htaꞈ g’a ve pa taw, g’a suh ve yoˬ.—K’oˆ maˍ ve awˬ lawn 9 htaꞈ nyi sheˍ.

4. Aˍdanˍ a shu le? Yawˇ aˬ htoꞈ ma g’a ve le?

⁴ Yaˬhoˉvaˬ Aˍdanˍ hawˉ hk’aˆ awˉ lawˉ htaꞈ te hpanˍ htaˇ, awˬ hpfuhˇ hk’aˆ ve teˇ ceuˬ piˇ ve yoˬ. Oˇ ve lehˬ biˇ ve a shaꞈ hpehꞈ ve yoˬ. Aˍdanˍ awˬ to leh dawˇ hk’aˇ biˇ ve yoˬ. Yawˇ lehˬ maˇ naˬ maˇ gawˬ, maˇ mawˇ, maˇ suh puiˉ. Yaˬhoˉvaˬ Aˍdanˍ htaꞈ hpanˍ  taˍ ve pa taw, yawˇ lehˬ Aˍdanˍ ve awˬ pa hk’a shuˍ hpehꞈ ve yoˬ. (Luˉkaꞈ 3:38) Yaˬhoˉvaˬ yawˇ geh hk’aˬ htaˆ kaꞈ tawˇ yaw daꞈ chehˇ ve yoˬ. G’uiˬ sha Aˍdanˍ htaꞈ aˬ htoꞈ ma te tcuh gaˇ ve hk’a tawˍ lehˆ k’oˆ piˇ leh, Aˍdanˍ ha lehˬ tuˬ kanˉ piˇ ve yoˬ.—Awˬ hkuiˉ puiˍ 1:28-30; 2:16, 17.

5. Liꞈ hpu hk’aw k’oˆ ve Aˍdanˍ htaꞈ ‘G’uiˬ sha ve awˬ hoꞈ awˬ han’ hk’a shuˍ hpanˍ taˍ ve aˬ htoꞈ ma k’oˆ gaˇ ve le?

⁵ Aˍdanˍ htaꞈ ‘G’uiˬ sha ve awˬ hoꞈ awˬ han’ hk’a shuˍ te hpanˍ taˍ ve yoˬ. (Awˬ hkuiˉ puiˍ 1:27) K’oˆ gaˇ ve lehˬ, Aˍdanˍ Yaˬhoˉvaˬ htaꞈ shuˍ ve laiˉ ceuˬ cawˬ ve yoˬ. Tawˇ pa haˉ te k’o, haꞈ pehnˇ ve, cuˇ yiˍ, hteˇ ve cawˇ ve, kanˇ paˆ chi teˇ hpaˍ hpehꞈ ve yoˬ. Aˍdanˍ yawˇ hk’aˇ yawˇ leuˆ yuˬ g’a tuˬ, G’uiˬ sha a hkaw-anˬ piˇ ve yoˬ. Aˍdanˍ lehˬ caꞈ hk’eun hk’a shuˍ hpehꞈ ve maˇ heˆ. G’uiˬ sha yawˇ cawˇ maˇ cawˇ ve htaꞈ leuˆ yuˬ puiˉ tuˬ hpanˍ taˍ ve yoˬ. Aˍdanˍ G’uiˬ sha hkawˇ na yuˬ tuˬ leuˆ yuˬ ve k’o, Paˍraˍdiˇsuˆ hk’aw co co taiˍ taiˍ g’a chehˇ ve yoˬ.

6. Aˍdanˍ G’uiˬ sha hkawˇ maˇ na yuˬ ve teˇ yanˇ, yawˇ aˬ htoꞈ ma shonˇ k’ai ve le? Ngaˬ hui htaꞈ hk’aˬ hk’e heuˆ la ve le?

⁶ Aˍdanˍ G’uiˬ sha hkawˇ maˇ na yuˬ ve teˇ yanˇ, yawˇ suh tuˬ G’uiˬ sha suhˉ jehˬ piˇ ve yoˬ. Yawˇ lehˬ awˬ hpfuhˇ hk’aˆ jaˇ ve awˬ ceuˬ shonˇ k’ai ve yoˬ. Yawˇ Yaˬhoˉvaˬ htaꞈ meuˆ daꞈ maˇ g’a, biˇ ve a shaꞈ maˇ cawˬ, Paˍraˍdiˇsuˆ hk’aw maˇ g’a chehˇ. (Awˬ hkuiˉ puiˍ 3:17-19) Aˍdanˍ Eˇvaꞈ G’uiˬ sha hkawˇ maˇ na yuˬ tuˬ leuˆ yuˬ ve pa taw, yawˇ hui teꞈ chiˉ dawˇ law kuiˬ maˇ cawˬ. Aˍdanˍ te ve awˬ ceuˬ htaꞈ pa taw, “miˬ guiˬ hk’oˆ lo venˇ baˆ loꞈ la leh, venˇ baˆ htaꞈ pa taw suh ve teˇ ceuˬ cawˬ la ve yoˬ. Hk’e te leh, chaw hk’a peu-eˬ venˇ baˆ te peuˬ ve pa taw, chaw hk’a peu-eˬ awˬ hk’oˆ htaꞈ suh ve teˇ ceuˬ gaˬ la ve yoˬ.” (Roˉmaꞈ 5:12) Aˍdanˍ venˇ baˆ te ve teˇ yanˇ, yawˇ awˬ to leh ngaˬ hui htaꞈ kaꞈ venˇ baˆ leh suh ve awˬ ceˬ hpehꞈ tuˬ hawˇ piˇ ve yoˬ. (Roˉmaꞈ 7:14) Ngaˬ hui dawˇ law kuiˬ cawˬ sheˍ laˇ? Cawˬ sheˍ ve yoˬ.

7, 8. Htaiˍ hk’awꞈ ve tcuhˉ kuiˬ aˬ htoꞈ ma le?

⁷ Htaiˍ hk’awꞈ ve tcuhˉ kuiˬ aˬ htoꞈ ma le? Chi htaꞈ caˉ daꞈ ve  2 ceuˬ cawˬ ve yoˬ. (1) Htaiˍ hk’awꞈ ve lehˬ chaw teˇ g’aˇ htaꞈ hpehˇ laˇ tuˬ, maˇ heˆ leh mawˇ teˇ ceuˬ ceuˬ vuiˬ hk’awꞈ tuˬ awˬ hpfuhˇ hpehꞈ ve yoˬ. (2) Htaiˍ hk’awꞈ ve lehˬ, mawˇ luˬ k’ai ve shaiˍ piˇ tuˬ awˬ hpfuhˇ hpehꞈ ve yoˬ.

⁸ Aˍdanˍ venˇ baˆ te ve pa taw, ngaˬ hui g’a suh ve yoˬ. Aˍdanˍ te shonˇ k’ai taˍ ve htaꞈ chaw yaˇ teˇ g’aˇ kaꞈ vuiˬ hk’awꞈ laˇ maˇ g’a. Yaꞈ hk’aˇ, venˇ baˆ leh suh ve htaꞈ ngaˬ hui ponˬ tuˬ awˬ hk’aˇ Yaˬhoˉvaˬ gu teh taˍ laˇ ve yoˬ. Hk’aˬ hk’e htaiˍ hk’awꞈ laˇ ve le? Ngaˬ hui aˬ htoꞈ ma awˬ bon g’a ve le? Teˇ geh henˇ sheˍ.

9. Htaiˍ hk’awꞈ g’a tuˬ aˬ htoꞈ ma g’a cawˬ ve le?

⁹ Aˍdanˍ biˇ ve a shaꞈ te luˬ k’ai taˍ ve htaꞈ chaw teˇ g’aˇ kaꞈ htaiˍ hk’awꞈ laˇ maˇ g’a. Aˬ htoꞈ ma pa taw le? Awˬ lawn k’o, teˇ g’aˇ le le maˇ biˇ ve chaw hpehꞈ ve yoˬ. (Chiˇ mvuh ve 49:7, 8) Htaiˍ hk’awꞈ g’a tuˬ biˇ ve chaw teˇ g’aˇ g’a cawˬ ve yoˬ. (1 Tiˆmoˉseˍ 2:6) Aˍdanˍ te luˬ k’ai taˍ ve a shaꞈ g’a hk’awꞈ tuˬ, awˬ hpfuhˇ hk’a ma-ehˬ ve g’a htaiˍ hk’awꞈ ve yoˬ.

10. Htaiˍ hk’awꞈ ve Yaˬhoˉvaˬ hk’aˬ hk’e gu teh taˍ ve le?

¹⁰ Htaiˍ hk’awꞈ ve chi Yaˬhoˉvaˬ hk’aˬ hk’e gu teh taˍ ve le? Yaˬhoˉvaˬ lehˬ awˬ hpfuhˇ hk’aˆ jaˇ ve Yaˇ paˍ miˬ guiˬ hk’oˆ peu laˇ ve yoˬ. Yaˇ paˍ chi teˇ g’aˇ lehˬ Yeˍsuˆ yoˬ. G’uiˬ sha yawˇ htaꞈ awˉ lawˉ te hpanˍ ve yoˬ. (1 Yoˇhanˬ 4:9, 10) Mvuhˇ naw ma hk’oˆ ve chehˇ kuiˬ leh Awˬ pa htaꞈ g’a hpaˆ daꞈ ve htawˇ, Yeˍsuˆ ha lehˬ ve hk’aw yaꞈ la ve yoˬ. (Hpiˇliˇpiˆ 2:7) Yaˬhoˉvaˬ Yeˍsuˆ ve a shaꞈ htaꞈ miˬ guiˬ hk’oˆ jiˆ yaꞈ la leh Yeˍsuˆ paw la htaˇ, yawˇ venˇ baˆ maˇ cawˬ leh biˇ ve chaw hpehꞈ ve yoˬ.—Luˉkaꞈ 1:35.

11. Chaw teˇ g’aˇ hk’aˬ hk’e te chaw hk’a peu-eˬ htaꞈ htaiˍ hk’awꞈ laˇ g’a ve le?

¹¹ Aˍdanˍ chaw yaˇ awˉ lawˉ teˇ g’aˇ Yaˬhoˉvaˬ hkawˇ maˇ na yuˬ ve yoˬ. Hk’e te leh, chaw yaˇ hk’a peu-eˬ biˇ ve a shaꞈ ma cawˬ ve yoˬ. Aˍdanˍ ve awˬ yaˇ awˬ duˬ suh ve htaꞈ te mehˉ laˇ g’a tuˬ, teˇ g’aˇ g’aˇ cawˬ-aw laˇ? Cawˬ ve yoˬ. (Roˉmaꞈ 5:19 g’aw ve.) Chaw  oˇ ve lehˬ Yeˍsuˆ yoˬ. Yeˍsuˆ venˇ baˆ maˇ te jaw, yawˇ biˇ ve a shaꞈ htaiˍ hk’awꞈ laˇ ve yoˬ. (1 Kawˇrenˍhtuˆ 15:45) Yawˇ biˇ ve a shaꞈ peꞈ laˇ ve pa taw, Aˍdanˍ ve awˬ yaˇ awˬ duˬ suh ve htaꞈ te mehˉ laˇ g’a ve yoˬ.—1 Kawˇrenˍhtuˆ 15:21, 22.

12. Aˬ htoꞈ ma pa taw Yeˍsuˆ g’a tuꞈ hkanˍ jaˇ ve le?

¹² Yeˍsuˆ maˇ suh sheˍ htaˇ, hk’aˬ hk’e taw g’a tuꞈ hkanˍ ve Liꞈ hpu hk’aw k’oˆ taˍ ve yoˬ. Shu yawˇ htaꞈ jawꞈ piˇ ve, suhˆ hkuiˉ daw hk’oˆ htaꞈ keu piˇ ve, tuꞈ hkanˍ suh ve yoˬ. (Yoˇhanˬ 19:1, 16-18, 30) Aˬ htoꞈ ma pa taw Yeˍsuˆ g’a tuꞈ hkanˍ jaˇ ve le? Awˬ lawn k’o, Saˍtanˍ k’oˆ ve chaw yaˇ tuꞈ hkanˍ jaˇ ve htaꞈ g’a hpuˇ ve teˇ yanˇ, chaw teˇ g’aˇ kaꞈ G’uiˬ sha htaꞈ ka tiꞈ yeˬ tuˬ ve maˇ heˆ. Yaꞈ hk’aˇ, biˇ ve chaw hehnˇ chaweh lawˇ nyi ve htaꞈ g’a hpu htaˇ, G’uiˬ sha htaꞈ ka tiꞈ yeˬ chehˇ g’a sheˍ tehꞈ Yeˍsuˆ te g’a peuˬ. Yaˬhoˉvaˬ hk’aˬ hk’e taw ha lehˬ jaˇ ve dawˇ nyi sheˍ!—Tawˇ naˉ ve 27:11; K’oˆ maˍ ve awˬ lawn 15 htaꞈ nyi sheˍ.

13. Htaiˍ hk’awꞈ ve awˬ hpfuhˇ hk’aˬ hk’e te piˇ ve le?

¹³ Htaiˍ hk’awꞈ ve awˬ hpfuhˇ hk’aˬ hk’e te piˇ ve le? Yeˍsuˆ yawˇ ve a shaꞈ Awˬ pa htaꞈ chiˇ aꞈ piˇ ve yoˬ. Yuˇdaꞈ chaw ha pa liꞈ hk’aw 33 hk’awꞈ Niˆsanˍ ha pa 14 nyi htaˇ, Yaˬhoˉvaˬ Yeˍsuˆ ve canˇ paˍ yawˇ htaꞈ tiˇ pehˍ tcuh ve yoˬ. (Heˍbrehˇ 10:10) Shehˆ nyi hk’awꞈ nawˉ, Yaˬhoˉvaˬ Yeˍsuˆ htaꞈ k’awꞈ teꞈ tu la piˇ ve yoˬ. Yaꞈ hk’aˇ, chaw yaˇ ve awˬ to maˇ heˆ, awˬ ha ve awˬ to hpehꞈ ve yoˬ. Yeˍsuˆ lehˬ mvuhˇ naw ma hk’oˆ Awˬ pa geh k’oꞈ-e leh htaiˍ hk’awꞈ tuˬ, biˇ ve chaw a shaꞈ Yaˬhoˉvaˬ htaꞈ chiˇ aꞈ piˇ ve yoˬ. (Heˍbrehˇ 9:24) Chi lehˬ htaiˍ hk’awꞈ laˇ peuˬ. Ngaˬ hui venˇ baˆ leh suh ve htaꞈ ponˬ ve yoˬ.—Roˉmaꞈ 3:23, 24 g’aw ve.

14, 15. Venˇ baˆ htaꞈ hpehˇ laˇ g’a tuˬ, ngaˬ hui aˬ htoꞈ ma te cawˇ ve le?

¹⁴ G’uiˬ sha ve daꞈ jaˇ ve laꞈ shawnˍ htaꞈ pa taw, ngaˬ hui awˬ bon g’a chehˇ ve yoˬ. Chi teˇ hkui leh awˬ g’uˇ suhˍ hpawˇ awˬ bon chi ve htaꞈ g’a tuˬ, hk’aˬ hk’e g’a te ve le? Teˇ geh nyi sheˍ.

 ¹⁵ Ngaˬ hui ve venˇ baˆ htaꞈ hpehˇ laˇ ve. Hk’aˬ htaˆ kaꞈ cawˇ ve te tuˬ haˍ jaˇ ve yoˬ. Teˇ pawˆ pawˆ k’o, ngaˬ hui tawˇ yaw ve leh te hk’aˇ te yaꞈ ve yoˬ. (Kawˇlawˇsehˇ 1:13, 14) Ngaˬ hui ve venˇ baˆ htaꞈ hk’aˬ hk’e te hpehˇ laˇ g’a ve le? Ngaˬ hui te yaꞈ htaˇ, awˬ tehˬ awˬ na nyi ma luˬ jaˇ ve k’o, nyi ma nuˇ nehˬ te leh Yaˬhoˉvaˬ geh venˇ baˆ htaꞈ hpehˇ laˇ tuˬ g’a lawˬ cawˇ ve yoˬ. Chi hk’e te ve k’o, ngaˬ hui ve venˇ baˆ htaꞈ hpehˇ laˇ ve yoˬ tehꞈ yonˍ g’a ve yoˬ.—1 Yoˇhanˬ 1:8, 9.

16. Daꞈ ve dawˇ shiˍ puiˉ ve nyi ma cawˬ tuˬ, ngaˬ hui aˬ htoꞈ ma g’a te ve le?

¹⁶ Ngaˬ hui daꞈ ve dawˇ shiˍ puiˉ ve nyi ma cawˬ g’a ve. Ngaˬ hui te yaꞈ ve yoˬ tehꞈ dawˇ shiˍ puiˉ ve nyi ma shoꞈ shaꞈ laˇ ve k’o, nyi ma luˬ ve, dawˇ law kuiˬ maˇ cawˬ, ngaˬ hui teꞈ chiˉ awˬ bon maˇ cawˬ tehꞈ dawˇ la tuˬ yoˬ. Yaꞈ hk’aˇ, awˬ g’aˇ taˇ nuˇ. Ngaˬ hui ve venˇ baˆ htaꞈ hpehˇ laˇ tuˬ Yaˬhoˉvaˬ geh lawˬ ve k’o, yawˇ na yuˬ laˇ ve yoˬ tehꞈ yonˍ g’a ve yoˬ. (Heˍbrehˇ 9:13, 14) Ngaˬ hui dawˇ haˍ leh awˬ g’aˇ nuˇ ve teˇ yanˇ, Yaˬhoˉvaˬ geh tawˇ yaw daꞈ g’a ve yoˬ. (Heˍbrehˇ 4:14-16) Chi hk’e te k’o, ngaˬ hui G’uiˬ sha geh dawˇ sha gaˇ sha g’a ve yoˬ.

17. Yeˍsuˆ ngaˬ hui awˬ pon hkanˍ suh laˇ ve pa taw, aˬ htoꞈ ma awˬ bon g’a tuˬ le?

¹⁷ Ngaˬ hui co co taiˍ taiˍ a shaꞈ dawˇ law kuiˬ cawˬ ve. “Venˇ baˆ te leh g’a ve awˬ hpfuhˇ lehˬ, suh ve teˇ ceuˬ yoˬ. Yaꞈ hk’aˇ, G’uiˬ sha ngaˬ hui htaꞈ hk’e leˇ peꞈ laˇ ve awˬ bon lehˬ, ngaˬ hui ve Jawˇ mawˇ Yeˍsuˆ Hkriꞈ htaꞈ pa taw, co co taiˍ taiˍ teꞈ ve teˇ ceuˬ yoˬ.” (Roˉmaꞈ 6:23) Yeˍsuˆ ngaˬ hui awˬ pon hkanˍ suh laˇ ve pa taw, ngaˬ hui co co taiˍ taiˍ a shaꞈ leh chehˇ sha cawˬ sha cawˬ g’a ve yoˬ. (Hpeuꞈ maˍ ve 21:3, 4) Yaꞈ hk’aˇ, awˬ bon oˇ ve htaꞈ g’a tuˬ, ngaˬ hui aˬ htoꞈ ma te cawˇ ve le?

18. Yaˬhoˉvaˬ ngaˬ hui htaꞈ haꞈ ve yoˬ tehꞈ, hk’aˬ hk’e te shiˍ ve le?

¹⁸ Chaw teˇ g’aˇ daꞈ jaˇ ve laꞈ shawnˍ nawˬ htaꞈ peꞈ laˇ ve k’o,  nawˬ hk’aˬ hk’e taw ha lehˬ ve dawˇ nyi sheˍ. Htaiˍ hk’awꞈ ve lehˬ awˬ hpfuhˇ hk’aˆ jaˇ ve laꞈ shawnˍ hpehꞈ leh, Yaˬhoˉvaˬ htaꞈ ngaˬ hui nyi ma awˬ tawˬ hk’a gaˬ chiˇ mvuh gaˇ ve yoˬ. Yoˇhanˬ liꞈ 3:16 hk’aw k’oˆ ve, “G’uiˬ sha miˬ guiˬ yaˇ htaꞈ haꞈ jaˇ ve pa taw, yawˇ ve Yaˇ hpu tiˍ piˇ laˇ ve yoˬ.” Yaˬhoˉvaˬ ngaˬ hui htaꞈ haꞈ jaˇ ve pa taw, awˬ hpfuhˇ hk’aˆ jaˇ ve yawˇ ve Yaˇ paˍ Yeˍsuˆ ngaˬ hui geh peu laˇ ve yoˬ. Yeˍsuˆ kaꞈ ngaˬ hui htaꞈ haꞈ ve pa taw, yawˇ ha lehˬ ve hk’aw ngaˬ hui awˬ pon hkanˍ suh laˇ ve yoˬ. (Yoˇhanˬ 15:13) Htaiˍ hk’awꞈ ve laꞈ shawnˍ lehˬ Yaˬhoˉvaˬ leh Yeˍsuˆ ngaˬ hui htaꞈ awˬ tehˬ awˬ na haꞈ ve hpeuꞈ maw laˇ ve awˬ hk’aˇ hpehꞈ ve yoˬ tehꞈ yonˍ cawˇ ve yoˬ.—Gaˍlaˍtiˆ 2:20.

19, 20. (a) Nawˬ Yaˬhoˉvaˬ htaꞈ awˬ chawˇ te g’a tuˬ, hk’aˬ hk’e g’a te ve le? (b) Yeˍsuˆ htaiˍ hk’awꞈ laˇ ve htaꞈ haꞈ yuˬ tuˬ, nawˬ hk’aˬ hk’e g’a te ve le?

¹⁹ G’uiˬ sha nawˬ htaꞈ hk’aˬ ma haꞈ ve nawˬ g’a henˇ k’ai peuˬ ve yoˬ. Nawˬ yawˇ htaꞈ awˬ chawˇ te g’a tuˬ, hk’aˬ hk’e g’a te ve le? Maˇ shiˍ daꞈ ve chaw htaꞈ haꞈ tuˬ maˇ sha ve yoˬ. Yoˇhanˬ liꞈ 17:3 hk’aw k’oˆ ve, ngaˬ hui Yaˬhoˉvaˬ htaꞈ shiˍ daꞈ hpehꞈ ve yoˬ. Nawˬ chi hk’e te ve k’o, nawˬ yawˇ htaꞈ haꞈ maˇ la tuˬ, yawˇ nyi hk’aˇ suh tuˬ te piˇ gaˇ leh, nawˬ yawˇ htaꞈ awˬ chawˇ te tuˬ yoˬ. Hk’e te leh, Yaˬhoˉvaˬ ve awˬ lawn shiˍ maˇ la tuˬ Liꞈ hpu henˇ tcuhˉ taˍ-oꞈ.—1 Yoˇhanˬ 5:3.

²⁰ Yeˍsuˆ htaiˍ hk’awꞈ laˇ ve htaꞈ haꞈ yuˬ ve. Liꞈ hpu hk’aw k’oˆ ve, “Yaˇ hpu htaꞈ yonˍ ve chaw lehˬ, co tiꞈ ha tiꞈ cawˬ ve yoˬ.” (Yoˇhanˬ 3:36) Yonˍ ve chi teˇ ceuˬ aˬ htoꞈ ma k’oˆ gaˇ ve le? Yeˍsuˆ maˍ laˇ ve hk’e ngaˬ hui g’aꞈ te ve htaꞈ k’oˆ gaˇ ve yoˬ. (Yoˇhanˬ 13:15) Ngaˬ hui Yeˍsuˆ htaꞈ yonˍ ve k’oˆ ve ceh tiˉ maˇ lawꞈ. Ngaˬ hui htaiˍ hk’awꞈ laˇ ve htaꞈ haꞈ yuˬ tuˬ, teˇ ceuˬ ceuˬ g’a te ve yoˬ. Yaˍkoˆ liꞈ 2:26 hk’aw k’oˆ ve, “yonˍ ve teˇ ceuˬ htawˇ kanˉ maˇ te ve k’o, suh taˍ ve yoˬ.”

21, 22. (a) Aˬ htoꞈ ma te Yeˍsuˆ suh ve htaꞈ dawˇ nawˇ tuˬ hpawnˬ daꞈ ve ngaˬ hui teˇ hk’awꞈ le le k’ai cawˇ ve le? (b) Awˬ lawn 6 leh 7 hk’aw aˬ htoꞈ ma henˇ tuˬ le?

²¹ Yeˍsuˆ suh ve htaꞈ dawˇ nawˇ tuˬ hpawnˬ daꞈ kuiˬ lo k’ai  ve. Yeˍsuˆ maˇ suh sheˍ teˇ haˉ htaˇ, yawˇ suh ve htaꞈ dawˇ nawˇ tuˬ te-o tehꞈ, yawˇ ngaˬ hui htaꞈ maˍ laˇ ve yoˬ. Ngaˬ hui teˇ hk’awꞈ le le te ve yoˬ. Hpawnˬ daꞈ ve chi lehˬ Yeˍsuˆ suh ve htaꞈ dawˇ nawˇ tuˬ hpawnˬ daꞈ ve maˇ heˆ k’o, ‘Jawˇ mawˇ ve mvuhˇ haˉ caˇ tuˬ’ tehꞈ k’oˆ ve yoˬ. (1 Kawˇrenˍhtuˆ 11:20; Maꞈhtehˍ 26:26-28) Yeˍsuˆ biˇ ve a shaꞈ htaiˍ hk’awꞈ laˇ ve yoˬ tehꞈ, yawˇ ngaˬ hui htaꞈ dawˇ nawˇ tcuh gaˇ ve yoˬ. Yawˇ k’oˆ ve, “ngaˬ htaꞈ dawˇ nawˇ tuˬ chi hk’e te-o.” (Luˉkaꞈ 22:19 g’aw ve.) Yeˍsuˆ suh ve htaꞈ dawˇ nawˇ tuˬ hpawnˬ daꞈ kuiˬ lo k’ai ve teˇ yanˇ, Yaˬhoˉvaˬ leh Yeˍsuˆ ve haꞈ pehnˇ ve leh htaiˍ hk’awꞈ laˇ ve htaꞈ dawˇ nawˇ ve yoˬ tehꞈ, nawˬ hpeuꞈ maw piˇ g’a ve yoˬ.—K’oˆ maˍ ve awˬ lawn 16 htaꞈ nyi sheˍ.

²² Htaiˍ hk’awꞈ ve lehˬ daꞈ jaˇ ve laꞈ shawnˍ hpehꞈ ve yoˬ. (2 Kawˇrenˍhtuˆ 9:14, 15) Awˬ hpfuhˇ hk’aˆ jaˇ ve laꞈ shawnˍ chi htaꞈ suh peuˬ ve chaw laiˉ lanˬ g’aˇ htaꞈ kaꞈ ga piˇ g’a tuˬ yoˬ. Chi lehˬ awˬ lawn 6 leh 7 hk’aw henˇ tuˬ yoˬ.