1, 2. (a) Nawˬ awˬ meh bvuhˬ ve chaw teˇ g’aˇ htaꞈ shiˍ ve k’o, yawˇ htaꞈ awˬ tehˬ awˬ na shiˍ daꞈ ve laˇ? K’aoˍ maˍ laˇ sheˍ. (b) Yeˍsuˆ htaꞈ chaw yaˇ hk’aˬ hk’e dawˇ ve le?

Miˬ guiˬ chi hk’oˆ awˬ meh bvuhˬ ve chaw laiˉ g’aˇ cawˬ ve yoˬ. Nawˬ yawˇ hui ve awˬ meh teˇ g’aˇ g’aˇ htaꞈ shiˍ tuˬ yoˬ hehˉ. Yaꞈ hk’aˇ, yawˇ hui ve awˬ meh ceh shiˍ ve lehˬ yawˇ htaꞈ awˬ tehˬ awˬ na shiˍ ve maˇ heˆ. Yawˇ hui a shaꞈ teꞈ hk’aˇ leh hk’aˬ hk’e ve chaw hpehꞈ ve hk’a dehꞈ maˇ shiˍ.

² Yeˍsuˆ Hkriꞈ miˬ guiˬ hk’oˆ teꞈ chehˇ ve 2,000 hk’awꞈ gaˬ peuˬ ve htawˇ, nawˬ yawˇ ve awˬ lawn g’a kaˇ jaw ve yoˬ hehˉ. Yaꞈ hk’aˇ, chaw maˇ-awˍ ve Yeˍsuˆ hk’aˬ hk’e ve chaw hpehꞈ ve maˇ shiˍ. Teˇ g’aˇ g’aˇ k’oˆ ve, yawˇ daꞈ ve chaw hpehꞈ ve yoˬ. Awˬ nu ve chaw k’oˆ ve, yawˇ tcuh kaˍ paˍ hpehꞈ ve yoˬ. Yawˇ G’uiˬ sha hpehꞈ ve yoˬ tehꞈ chaw teˇ hpaˍ yonˍ ve yoˬ. Nawˬ hk’aˬ hk’e dawˇ ve le?—K’oˆ maˍ ve awˬ lawn 12 htaꞈ nyi sheˍ.

3. Ngaˬ hui Yaˬhoˉvaˬ G’uiˬ sha leh Yeˍsuˆ Hkriꞈ ve awˬ lawn shiˍ tuˬ, aˬ htoꞈ ma te a yeˇ uiˍ ve le?

³ Nawˬ Yeˍsuˆ ve awˬ lawn awˬ tehˬ shiˍ ve a yeˇ uiˍ ve yoˬ. Aˬ htoꞈ ma pa taw le? Liꞈ hpu hk’aw k’oˆ ve, “co tiꞈ ha tiꞈ teˇ ceuˬ lehˬ, awˬ tehˬ awˬ na ve G’uiˬ sha nawˬ teˇ g’aˇ tiˉ htaꞈ maˇ k’oˆ, nawˬ peu laˇ ve Yeˍsuˆ Hkriꞈ htaꞈ maˇ k’oˆ, yawˇ hui shiˍ ve teˇ ceuˬ hpehꞈ ve yoˬ.” (Yoˇhanˬ 17:3) Yaˬhoˉvaˬ leh Yeˍsuˆ ve awˬ lawn awˬ tehˬ shiˍ ve k’o, nawˬ miˬ guiˬ hk’oˆ Paˍraˍdiˇsuˆ hk’aw co co taiˍ taiˍ g’a chehˇ tuˬ yoˬ. (Yoˇhanˬ 14:6) Yeˍsuˆ a shaꞈ teꞈ hk’aˇ leh shu htaꞈ te piˇ ve daꞈ jaˇ ve henˇ yuˬ tuˬ hpehꞈ ve yoˬ. Chi htaꞈ pa taw, yawˇ ve awˬ lawn shiˍ maˇ la ve k’o, ngaˬ hui htaꞈ ga laˇ g’a ve yoˬ. (Yoˇhanˬ 13:34, 35) Awˬ lawn 1 hk’aw ngaˬ hui G’uiˬ sha ve awˬ tehˬ ve awˬ lawn g’a henˇ peuˬ. Chi teˇ hkui  Yeˍsuˆ ve awˬ lawn Liꞈ hpu hk’aw hk’aˬ hk’e maˍ ve ngaˬ hui g’a henˇ tuˬ yoˬ.

4. “Meˍsiˉyaꞈ” leh “Hkriꞈ” k’oˆ ve tawˇ hkawˇ chi aˬ htoꞈ ma k’oˆ gaˇ ve le?

⁴ Yeˍsuˆ maˇ paw la sheˍ laiˉ hk’awꞈ htaˇ, Liꞈ hpu hk’aw Yaˬhoˉvaˬ ka tiꞈ te taˍ ve, Meˍsiˉyaꞈ maˇ heˆ k’o Hkriꞈ htaꞈ peu laˇ tuˬ yoˬ. “Meˍsiˉyaꞈ” Heˍbrehˇ hkawˇ hpehꞈ leh “Hkriꞈ” Heˍlaˍsaˆ (Ga-riˆ) hkawˇ hpehꞈ ve yoˬ. Tawˇ hkawˇ chi 2 hkawˇ k’oˆ gaˇ ve lehˬ G’uiˬ sha ka tiꞈ te taˍ ve hk’e, Meˍsiˉyaꞈ htaꞈ leuˆ yuˬ leh daꞈ jaˇ ve aˉ yaˇ piˇ tuˬ yoˬ. Meˍsiˉyaꞈ lehˬ G’uiˬ sha ve ka tiꞈ hk’a peu-eˬ htaꞈ te biˇ la piˇ tuˬ yoˬ. Chi teˇ hkui kaꞈ Yeˍsuˆ nawˬ htaꞈ ga laˇ g’a ve yoˬ. Yaꞈ hk’aˇ, Yeˍsuˆ maˇ paw la sheˍ htaˇ chaw yaˇ laiˉ g’aˇ na hkawˇ cawˬ ve, ‘Meˍsiˉyaꞈ a shu hpehꞈ ve le?’

5. Yeˍsuˆ Meˍsiˉyaꞈ hpehꞈ ve yawˇ ve awˬ laꞈ g’awˇ hui yonˍ-aw laˇ?

⁵ Ka tiꞈ te taˍ ve hk’e, Yeˍsuˆ lehˬ Meˍsiˉyaꞈ hpehꞈ ve yoˬ tehꞈ yawˇ ve awˬ laꞈ g’awˇ hui hk’a dehꞈ yonˍ ve yoˬ. (Yoˇhanˬ 1:41) Siˉmonˍ Peˍtruˆ Yeˍsuˆ htaꞈ k’oˆ piˇ ve, “nawˬ lehˬ Hkriꞈ” hpehꞈ ve yoˬ. (Maꞈhtehˍ 16:16) Yeˍsuˆ Meˍsiˉyaꞈ hpehꞈ ve ngaˬ hui hk’aˬ hk’e te yonˍ g’a ve le?

6. Meˍsiˉyaꞈ htaꞈ shiˍ tuˬ hteˇ ve chaw htaꞈ Yaˬhoˉvaˬ hk’aˬ hk’e te ga piˇ ve le?

⁶ Yeˍsuˆ maˇ paw la sheˍ laiˉ hk’awꞈ htaˇ, chaw yaˇ Meˍsiˉyaꞈ htaꞈ ca mawˬ tuˬ, G’uiˬ sha ve tcuh kaˍ paˍ hk’a dehꞈ bvuhꞈ keu taˍ ve yoˬ. Chi ve hk’aˬ hk’e ga laˇ ve le? Tawˇ pa haˉ te k’o, kaˇ ciˇ kuiˬ awˬ ti lo chaw maˇ jaˇ ve nawˬ maˇ mawˬ daꞈ jaw ve chaw htaꞈ ca haꞈ yuˬ htaˇ, chaw teˇ g’aˇ yawˇ ve awˬ lawn hk’a dehꞈ k’oˆ maˍ laˇ ve k’o, ca mawˬ g’a ve yoˬ. Chi hk’a shuˍ shuˍ, Meˍsiˉyaꞈ aˬ htoꞈ ma te tuˬ ve, yawˇ aˬ htoꞈ ma g’a hpuˇ tuˬ ve htaꞈ ngaˬ hui shiˍ tuˬ, Yaˬhoˉvaˬ tcuh kaˍ paˍ htaꞈ bvuhꞈ tcuh taˍ ve yoˬ. Tcuh kaˍ paˍ tawˇ hkawˇ oˇ ve hk’a peu-eˬ biˇ la htaˇ, hteˇ ve chaw Yeˍsuˆ Meˍsiˉyaꞈ hpehꞈ ve tehꞈ g’a shiˍ ve yoˬ.

7. Yeˍsuˆ Meˍsiˉyaꞈ hpehꞈ ve tehꞈ hpeuꞈ maw laˇ ve tcuh kaˍ paˍ tawˇ hkawˇ 2 maˬ aˬ htoꞈ ma le?

 ⁷ Tcuh kaˍ paˍ tawˇ hkawˇ chi 2 hkawˇ htaꞈ teˇ geh nyi sheˍ. Awˉ lawˉ teˇ maˬ, Yeˍsuˆ maˇ paw la sheˍ 700 hk’awꞈ htaˇ, Miˆhkaˍ k’oˆ ve, Meˍsiˉyaꞈ lehˬ Behˍlehˍhehnˍ venˇ ehˉ lo paw la tuˬ yoˬ. (Miˆhkaˍ 5:2) Yeˍsuˆ venˇ oˇ ve hk’aw awˬ tehˬ awˬ na paw la ve yoˬ! (Maꞈhtehˍ 2:1, 3-9) Nyiˇ maˬ teˇ maˬ, Daˍyeˍlaˆ k’oˆ ve, Meˍsiˉyaꞈ C.E. 29 hk’awꞈ htaˇ tawˆ la tuˬ yoˬ. (Daˍyeˍlaˆ 9:25) Meˍsiˉyaꞈ htaꞈ caˉ daꞈ ve tcuh kaˍ paˍ tawˇ hkawˇ 2 lawn ceh tiˉ henˇ sheˍ ve yoˬ. Yaꞈ hk’aˇ, ka tiꞈ te taˍ ve hk’e, Yeˍsuˆ Meˍsiˉyaꞈ hpehꞈ ve yoˬ tehꞈ shiˍ tuˬ, tcuh kaˍ paˍ tawˇ hkawˇ laiˉ hkawˇ cawˬ sheˍ ve yoˬ.—K’oˆ maˍ ve awˬ lawn 13 htaꞈ nyi sheˍ.

8, 9. Yeˍsuˆ Meˍsiˉyaꞈ hpehꞈ ve yoˬ tehꞈ shiˍ tuˬ Baˆtiˆsaˬ haꞈ yuˬ htaˇ aˬ htoꞈ ma hpehꞈ la ve le?

⁸ Yaˬhoˉvaˬ lehˬ Yeˍsuˆ Meˍsiˉyaꞈ hpehꞈ ve htaꞈ hk’a tawˍ lehˆ hpeuꞈ maw laˇ ve yoˬ. Meˍsiˉyaꞈ a shu hpehꞈ ve awˬ heˆ maˍ laˇ tuˬ yoˬ tehꞈ, Baˆtiˆsaˬ piˇ paˍ Yoˇhanˬ htaꞈ G’uiˬ sha ka tiꞈ te piˇ ve yoˬ. C.E. 29 hk’awꞈ Yawˇdanˍ g’uiˬ ma lo Baˆtiˆsaˬ piˇ paˍ Yoˇhanˬ geh Yeˍsuˆ k’ai leh Baˆtiˆsaˬ haꞈ yuˬ htaˇ, Yoˇhanˬ awˬ heˆ htaꞈ g’a mawˬ ve yoˬ. Liꞈ hpu hk’aw k’oˆ ve, “Yeˍsuˆ Baˆtiˆsaˬ hkanˍ yuˬ peuˬ leh iˉ kaˆ awˬ hk’aw lo teˇ cawˬ haˉ tawˆ la htaˇ, mvuhˇ naw ma hpaw taˍ ve yoˬ. Oˇ htaˇ, G’uiˬ sha ve awˬ ha hpu lehˬ, aˉ pui k’aˍ hk’e yaꞈ la leh yawˇ awˬ hk’oˆ lo mui la ve htaꞈ, Yeˍsuˆ g’a mawˬ ve yoˬ. Mvuhˇ naw ma hk’oˆ lo awˬ hkawˇ bvuhˬ la leh k’oˆ ve, ‘chaw chi lehˬ, ngaˬ haꞈ jaˇ ve yaˇ hpu yoˬ. Yawˇ htaꞈ ngaˬ nyi hk’aˇ suh jaˇ ve yoˬ.” (Maꞈhtehˍ 3:16, 17) Yoˇhanˬ awˬ heˆ chi htaꞈ g’a mawˬ g’a kaˇ htaˇ, Yeˍsuˆ Meˍsiˉyaꞈ hpehꞈ ve htaꞈ shiˍ ve yoˬ.  (Yoˇhanˬ 1:32-34) Oˇ ve teˇ nyi, Yaˬhoˉvaˬ awˬ ha hpu yawˇ htaꞈ ngeuˍ pfuhˍ piˇ htaˇ, Yeˍsuˆ Meˍsiˉyaꞈ hpehꞈ la ve yoˬ. G’uiˬ sha yawˇ htaꞈ leuˆ yuˬ leh Sheh k’ai shehˍ hpaˇ kaꞈ Jawˇ mawˇ kaꞈ hpehꞈ la tcuh ve yoˬ.—Iˉsaˍyaˆ 55:4.

⁹ Liꞈ hpu hk’aw tcuh kaˍ paˍ tawˇ hkawˇ, Yaˬhoˉvaˬ ve awˬ hkawˇ, leh awˬ heˆ Yeˍsuˆ Baˆtiˆsaˬ haꞈ yuˬ htaˇ, Yeˍsuˆ Meˍsiˉyaꞈ hpehꞈ ve yoˬ tehꞈ hk’a dehꞈ g’a shiˍ ve yoˬ. Yaꞈ hk’aˇ, Yeˍsuˆ hk’aˬ  kaˬ lo laˬ ve le? Yawˇ hk’aˬ hk’e ve chaw hpehꞈ ve le? Liꞈ hpu hk’aw hk’aˬ hk’e k’oˆ ve ngaˬ hui teˇ geh nyi sheˍ.

10. Yeˍsuˆ miˬ guiˬ hk’oˆ maˇ laˬ sheˍ htaˇ, Liꞈ hpu hk’aw aˬ htoꞈ ma maˍ laˇ ve le?

¹⁰ Yeˍsuˆ miˬ guiˬ hk’oˆ maˇ laˬ sheˍ htaˇ, mvuhˇ naw ma hk’oˆ chehˇ maw jaˇ tehꞈ Liꞈ hpu hk’aw maˍ laˇ ve yoˬ. Miˆhkaˍ k’oˆ ve, Meˍsiˉyaꞈ lehˬ “aˬ sho-eˬ htaˇ ve chaw” hpehꞈ ve yoˬ. (Miˆhkaˍ 5:2) Yeˍsuˆ yawˇ hk’aˇ yawˇ kaꞈ laiˉ pawˆ k’oˆ ve, yawˇ chaw yaˇ maˇ hpehꞈ la sheˍ htaˇ, mvuhˇ naw ma hk’oˆ chehˇ jaw ve yoˬ. (Yoˇhanˬ 3:13; 6:38, 62; 17:4, 5 g’aw ve.) Yeˍsuˆ miˬ guiˬ chi hk’oˆ maˇ laˬ sheˍ htaˇ kaꞈ, Yaˬhoˉvaˬ htaꞈ meuˆ daꞈ jaˇ ve yoˬ.

11. Aˬ htoꞈ ma te Yaˬhoˉvaˬ Yeˍsuˆ htaꞈ haꞈ jaˇ ve le?

¹¹ Yaˬhoˉvaˬ Yeˍsuˆ htaꞈ haꞈ jaˇ. Aˬ htoꞈ ma pa taw le? Awˬ lawn k’o, teˇ ceuˬ le le maˇ hpanˍ sheˍ htaˇ, G’uiˬ sha yawˇ htaꞈ awˉ lawˉ hpanˍ taˍ ve yoˬ. Chi htaꞈ pa taw, Yeˍsuˆ lehˬ “hpanˍ taˍ ve hk’a peu-eˬ awˬ hk’aw lo yaˇ kaoˬ hpehꞈ ve yoˬ.” * (Kawˇlawˇsehˇ 1:15) Yaˬhoˉvaˬ Yeˍsuˆ teˇ g’aˇ ceh tiˉ yawˇ laꞈ sheh hk’aw hpanˍ taˍ ve pa taw, yawˇ awˬ pon Yeˍsuˆ awˬ hpfuhˇ hk’aˆ jaˇ ve yoˬ. Hk’e te leh, yawˇ htaꞈ “Yaˇ hpu tiˍ” tehꞈ k’oˆ taˍ ve yoˬ. (Yoˇhanˬ 3:16) Yaˬhoˉvaˬ Yeˍsuˆ teˇ g’aˇ tiˉ htaꞈ yehˇ leh teˇ ceuˬ le le te hpanˍ tcuh ve yoˬ. (Kawˇlawˇsehˇ 1:16) Yeˍsuˆ htaꞈ ceh tiˉ “Tawˇ hkawˇ” tehꞈ k’oˆ taˍ ve yoˬ. Awˬ lawn k’o, awˬ lawn sha tanˇ leh tawˇ hkawˇ mvuhˇ naw ma tcuh yaˇ leh chaw yaˇ htaꞈ hto piˇ tuˬ, Yaˬhoˉvaˬ yawˇ htaꞈ yehˇ ve yoˬ.—Yoˇhanˬ 1:14.

12. Yeˍsuˆ leh G’uiˬ sha teˇ g’aˇ tiˉ maˇ heˆ ve, ngaˬ hui hk’aˬ hk’e te shiˍ ve le?

¹² Chaw teˇ hpaˍ Yeˍsuˆ leh G’uiˬ sha teˇ g’aˇ tiˉ hpehꞈ ve tehꞈ yonˍ ve yoˬ. Yaꞈ hk’aˇ, chi ve lehˬ Liꞈ hpu maˍ ve awˬ ceuˬ maˇ heˆ.  Liꞈ hpu hk’aw k’oˆ ve, Yeˍsuˆ htaꞈ te hpanˍ taˍ ve yoˬ. Hk’e te leh, Yeˍsuˆ awˬ hkuiˉ puiˍ tanˬ kuiˬ cawˬ ve yoˬ. Yaꞈ hk’aˇ, Yaˬhoˉvaˬ lehˬ hk’a peu-eˬ htaꞈ Hpanˍ shehˍ hpaˇ hpehꞈ ve pa taw, awˬ hkuiˉ puiˍ tanˬ kuiˬ maˇ cawˬ. (Chiˇ mvuh ve 90:2) Yeˍsuˆ G’uiˬ sha ve Yaˇ hpehꞈ leh yawˇ G’uiˬ sha hk’e leˇ hpehꞈ gaˇ ve tehꞈ maˇ dawˇ jaw. Awˬ pa lehˬ Awˬ yaˇ aꞈ kehˉ kanˇ paˆ uiˍ ve yoˬ tehꞈ, Liꞈ hpu hk’aw maˍ ve yoˬ. (Yoˇhanˬ 14:28 g’aw ve; 1 Kawˇrenˍhtuˆ 11:3) Yaˬhoˉvaˬ ceh tiˉ “kanˇ paˆ uiˍ ve G’uiˬ sha” hpehꞈ ve yoˬ. (Awˬ hkuiˉ puiˍ 17:1) Mvuhˇ naw ma miˬ naˆ ma hk’aw yawˇ teˇ g’aˇ ceh tiˉ kanˇ paˆ uiˍ jaˇ ve yoˬ.—K’oˆ maˍ ve awˬ lawn 14 htaꞈ nyi sheˍ.

13. Aˬ htoꞈ ma te Yeˍsuˆ “chaw yaˇ mawˬ maˇ hpehꞈ ve G’uiˬ sha ve awˬ hoꞈ awˬ han hpehꞈ” ve tehꞈ, Liꞈ hpu hk’aw k’oˆ taˍ ve le?

¹³ Miˬ guiˬ leh mvuhˇ naw ma maˇ hpanˍ sheˍ htaˇ, laiˉ hinˉ lanˬ hk’awꞈ Yaˬhoˉvaˬ leh yawˇ ve Yaˇ Yeˍsuˆ teˇ geh kanˉ te ve yoˬ. Yawˇ huiˉ maˬ haꞈ daꞈ jaˇ ve yoˬ hehˉ! (Yoˇhanˬ 3:35; 14:31) Yeˍsuˆ yawˇ ve Awˬ pa hk’a shuˍ henˇ yuˬ ve pa taw, Liꞈ hpu hk’aw k’oˆ ve, yawˇ “chaw yaˇ mawˬ maˇ hpehꞈ ve G’uiˬ sha ve awˬ hoꞈ awˬ han hpehꞈ” ve yoˬ.—Kawˇlawˇsehˇ 1:15.

14. Yaˬhoˉvaˬ ve Yaˇ paˍ hk’aˬ hk’e te chaw yaˇ hpehꞈ la g’a ve le?

¹⁴ Yaˬhoˉvaˬ awˬ hpfuhˇ hk’aˆ jaˇ ve Yaˇ paˍ, miˬ guiˬ hk’oˆ chaw yaˇ hpehꞈ la tuˬ, mvuhˇ naw ma hk’oˆ ha lehˬ ha k’a yaꞈ la ve yoˬ. Hk’aˬ hk’e te hpehꞈ la g’a ve le? Yaˬhoˉvaˬ yawˇ anˇ tuˬ te ve awˬ hk’aw lo, Yeˍsuˆ ve a shaꞈ mvuhˇ naw ma hk’oˆ jiˆ yaꞈ la leh Maˍriˆ meh ve yaˇ miˇ haˉ g’oˇ peˬ hk’aw keu piˇ ve yoˬ. Chi htaꞈ pa taw, Yeˍsuˆ chaw yaˇ hpehꞈ ve awˬ pa cawˬ tuˬ maˇ loˍ. Maˍriˆ lehˬ biˇ jaˇ ve yaˇ paw la leh, yawˇ yawˇ htaꞈ Yeˍsuˆ meh piˇ ve yoˬ.—Luˉkaꞈ 1:30-35.

15. Yaˬhoˉvaˬ htaꞈ shiˍ daꞈ maˇ la tuˬ, nawˬ hk’aˬ hk’e g’a te ve le?

¹⁵ Nawˬ Yeˍsuˆ ve a shaꞈ teꞈ hk’aˇ leh awˬ liˇ awˬ hk’aˇ Liꞈ hpu  hk’aw Maꞈhtehˍ, Maˍkuˆ, Luˉkaꞈ, Yoˇhanˬ liꞈ htaꞈ g’aw leh maˇ maˇ henˇ hpehꞈ ve yoˬ. Liꞈ chi teˇ hpaˍ htaꞈ ha lehˬ ve bon hkawˇ tehꞈ k’oˆ ve yoˬ. Yeˍsuˆ yawˇ Awˬ pa htaꞈ shuˍ daꞈ jaˇ ve pa taw, nawˬ Yeˍsuˆ ve awˬ lawn g’aw ve k’o, Yaˬhoˉvaˬ htaꞈ kaꞈ shiˍ daꞈ maˇ la g’a ve yoˬ. Chi htaꞈ pa taw, “ngaˬ htaꞈ mawˬ ve chaw lehˬ Awˬ pa htaꞈ mawˬ peuˬ” tehꞈ, Yeˍsuˆ k’oˆ ve yoˬ.—Yoˇhanˬ 14:9.

16. Yeˍsuˆ aˬ htoꞈ ma awˬ lawn maˍ ve le? Yeˍsuˆ maˍ ve awˬ lawn hk’aˬ kaˬ lo laˬ ve le?

¹⁶ Laiˉ g’aˇ Yeˍsuˆ htaꞈ “Saˍ laꞈ” tehꞈ kuˬ ve yoˬ. (Yoˇhanˬ 1:38; 13:13) Yawˇ maˍ ve a yeˇ uiˍ ve teˇ lawn lehˬ, “G’uiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ” hpehꞈ ve yoˬ. G’uiˬ sha ve mvuhˇ miˬ aˬ htoꞈ ma le? G’uiˬ sha uˉ peunˍ ve mvuhˇ naw ma hk’oˆ cawˬ ve yoˬ. Mvuhˇ miˬ chi ve miˬ guiˬ hk’oˆ uˉ peunˍ leh G’uiˬ sha hkawˇ na yuˬ ve chaw htaꞈ awˬ bon piˇ tuˬ yoˬ. (Maꞈhtehˍ 4:23) Yeˍsuˆ maˍ ve hk’a peu-eˬ Yaˬhoˉvaˬ geh laˬ ve yoˬ. Yeˍsuˆ k’oˆ ve, “ngaˬ maˍ piˇ ve tawˇ hkawˇ lehˬ, ngaˬ ve tawˇ hkawˇ maˇ heˆ. Ngaˬ htaꞈ peu laˇ shehˍ hpaˇ ve tawˇ hkawˇ hpehꞈ ve yoˬ.” (Yoˇhanˬ 7:16) G’uiˬ sha ve mvuhˇ miˬ miˬ guiˬ hk’oˆ uˉ peunˍ tuˬ, Yaˬhoˉvaˬ chaw yaˇ htaꞈ awˬ lawn chi kaˇ tcuh gaˇ ve yoˬ tehꞈ, Yeˍsuˆ shiˍ ve yoˬ.

17. Yeˍsuˆ hk’aˬ kaˬ lo maˍ ve le? Aˬ htoꞈ ma pa taw chaw yaˇ htaꞈ maˍ tuˬ yawˇ chi taw taw te ve le?

¹⁷ Yeˍsuˆ hk’aˬ kaˬ lo maˍ ve le? Chaw chehˇ kuiˬ teˇ kaˬ le le maˍ ve yoˬ. Yawˇ venˇ hk’aw, hk’aˆ hk’aw, tcuh hk’aw, bon yehˬ hk’aw, leh yehˬ hk’aw kaꞈ maˍ ve yoˬ. Chaw yaˇ yawˇ geh laˬ tuˬ maˇ dawˇ law, yawˇ yawˇ hui geh k’ai ve yoˬ. (Maˍkuˆ 6:56; Luˉkaꞈ 19:5, 6) Yeˍsuˆ chaw yaˇ htaꞈ g’aˇ hteꞈ maˍ tuˬ, awˬ g’aˇ leh awˬ yanˇ maˇ maˇ yehˇ ve yoˬ. Aˬ ma te yawˇ chi hk’e te ve le? Awˬ lawn k’o, G’uiˬ sha yawˇ htaꞈ te tcuh gaˇ ve tehꞈ shiˍ leh, yawˇ Awˬ pa hkawˇ htaꞈ hk’a htaˆ kaꞈ na yuˬ ve yoˬ. (Yoˇhanˬ 8:28, 29) Yeˍsuˆ yawˇ hui htaꞈ mawˬ leh ha k’aˉ ve pa taw, hto piˇ maˍ piˇ ve yoˬ. (Maꞈhtehˍ 9:35, 36 g’aw ve.) Bon liˇ awˬ hoˉ hui G’uiˬ  sha ve awˬ lawn leh yawˇ ve mvuhˇ miˬ awˬ tehˬ ve awˬ lawn maˇ maˍ ve htaꞈ Yeˍsuˆ mawˬ ve yoˬ. Hk’e te leh, daꞈ ve awˬ lawn sha tanˇ laiˉ g’aˇ htaꞈ kaˇ tcuh gaˇ ve yoˬ.

18. Yeˍsuˆ ve te hk’aˇ htaꞈ nawˬ hk’aˬ teˇ maˬ dawˇ cawˇ jaˇ ve le?

¹⁸ Yeˍsuˆ shu htaꞈ haꞈ leh dawˇ nyi piˇ puiˉ ve chaw hpehꞈ ve yoˬ. Yawˇ nyi ma daꞈ leh yawˇ geh tawˇ yaw daꞈ sha ve yoˬ. Yaˇ ehˉ htawˇ yawˇ geh chehˇ gaˇ ve yoˬ. (Maˍkuˆ 10:13-16) Yeˍsuˆ chaw mehˆ hpfuhˇ htaꞈ maˇ nyi. Maˇ hteˇ maˇ cawˇ ve leh heˍ caˇ ve htaꞈ yawˇ nyi bawˬ jaˇ. (Maꞈhtehˍ 21:12, 13) Yawˇ teˇ co-e htaˇ, yaˇ miˇ hawˉ hk’aˆ hk’a shuˍ te tuˬ a hkaw-anˬ maˇ cawˬ leh, chaw maˇ-awˍ ve kaꞈ yaˇ miˇ htaꞈ maˇ shawˍ maˇ caˆ te piˇ ve yoˬ. Yaꞈ hk’aˇ, Yeˍsuˆ lehˬ yaˇ miˇ htaꞈ hk’aˬ htaˆ kaꞈ taˍ uiˍ ve yoˬ. (Yoˇhanˬ 4:9, 27) Yeˍsuˆ nyi ma kaꞈ nuˇ nehˬ jaˇ. Teˇ haˉ htaˇ, yawˇ ve tcuh yaˇ hui ve hkui sheh htaꞈ tsuhˇ piˇ ve yoˬ. Awˬ tehˬ k’o, chi lehˬ awˬ ceˬ ve kanˉ hpehꞈ ve yoˬ.—Yoˇhanˬ 13:2-5, 12-17.

19. Chaw yaˇ aˬ htoꞈ ma loˍ ve htaꞈ Yeˍsuˆ shiˍ leh ga piˇ gaˇ ve yoˬ tehꞈ, ngaˬ hui hk’aˬ hk’e te shiˍ ve le?

¹⁹ Chaw yaˇ aˬ htoꞈ ma loˍ ve htaꞈ Yeˍsuˆ shiˍ leh ga piˇ gaˇ ve yoˬ. Awˬ lawn chi yawˇ G’uiˬ sha ve kanˇ paˆ awˬ hk’aw lo chaw naˬ htaꞈ anˇ tuˬ te leh gu na-e piˇ htaˇ, hk’a tawˍ lehˆ g’a mawˬ ve yoˬ. (Maꞈhtehˍ 14:14) Tawˇ pa haˉ te k’o, hkiˬ tuꞈ paˍ teˇ g’aˇ Yeˍsuˆ geh laˬ leh k’oˆ ve, “nawˬ te gaˇ ve k’o, ngaˬ htaꞈ daꞈ la kehˬ la tuˬ nawˬ te hpehꞈ ve yoˬ.” Yawˇ naˬ leh tuꞈ hkanˍ ve htaꞈ Yeˍsuˆ shiˍ ve pa taw, yawˇ htaꞈ ha k’aˉ leh ga piˇ gaˇ ve yoˬ. Hk’e te leh, Yeˍsuˆ laꞈ sheh che leh yawˇ htaꞈ htawˇ leh k’oˆ ve, “ngaˬ te gaˇ ve yoˬ. Daꞈ la kehˬ la-o.” Hawˉ hk’aˆ oˇ ve hkiˬ tuꞈ a naˍ na-e ve yoˬ! (Maˍkuˆ 1:40-42) Hawˉ hk’aˆ oˇ ve hk’aˬ hk’e k’ai ve dawˇ nyi sheˍ.

20, 21. Aˬ htoꞈ ma te Yeˍsuˆ G’uiˬ sha hkawˇ na yuˬ ve henˇ yuˬ tuˬ daꞈ jaˇ ve le?

²⁰ Yeˍsuˆ G’uiˬ sha hkawˇ na yuˬ ve henˇ yuˬ tuˬ te maˍ laˇ ve  daꞈ jaˇ. Aˬ htoꞈ ma hpehꞈ la ve maˇ k’oˆ, canˇ paˍ aˬ htoꞈ ma te piˇ ve maˇ k’oˆ, yawˇ Awˬ pa htaꞈ ka tiꞈ yeˬ chehˇ sheˍ ve yoˬ. Saˍtanˍ coˇ caˇ leh Yeˍsuˆ htaꞈ lawˇ nyi piˇ htaˇ yawˇ maˇ te yaꞈ. (Maꞈhtehˍ 4:1-11) Yawˇ Meˍsiˉyaꞈ hpehꞈ ve htaꞈ yawˇ ve awˬ viˉ awˬ nyi maˇ yonˍ leh k’oˆ ve, “yawˇ g’uˇ k’ai peuˬ.” Yaꞈ hk’aˇ, Yeˍsuˆ G’uiˬ sha ve kanˉ k’awꞈ caˉ te k’ai ve yoˬ. (Maˍkuˆ 3:21) Canˇ paˍ yawˇ htaꞈ hk’a mvuhˇ hk’a na te piˇ htaˇ, yawˇ maˇ te hk’awꞈ piˇ jaw. Yawˇ hk’aˬ htaˆ kaꞈ G’uiˬ sha htaꞈ ka tiꞈ yeˬ ve yoˬ.—1 Peˍtruˆ 2:21-23.

²¹ Yeˍsuˆ naˬ leh tuꞈ hkanˍ suh ve htawˇ, Yaˬhoˉvaˬ hkawˇ na yuˬ leh ka tiꞈ yeˬ chehˇ sheˍ ve yoˬ. (Hpiˇliˇpiˆ 2:8 g’aw ve.) Yawˇ ve a shaꞈ awˬ leh meuˇ htaˇ, hk’aˬ hk’e taw taw g’a yeunˇ hkanˍ ve dawˇ nyi sheˍ. Shu hpeh yuˬ ve, G’uiˬ sha htaꞈ maˇ shawˍ maˇ caˆ k’oˆ ve tehꞈ maˇ heˆ heˆ ve shaˉ hkiˆ she piˇ ve, maˇ hteˇ maˇ cawˇ ve hk’aw suhˉ jehˬ piˇ ve, chaw moˍ lonˉ k’oˆ  guiˇ g’uiˬ guiˇ piˇ ve, maꞈ yaˇ ciˍ yanˍ piˇ leh suhˆ hkuiˉ daw hk’oˆ htaꞈ keu piˇ ve yoˬ. Yeˍsuˆ suh-e yoˬ te htaˇ kuˬ ve, “kanˉ te peuˬ!” (Yoˇhanˬ 19:30) Yeˍsuˆ 3 nyi suh peuˬ hk’awꞈ nawˉ, Yaˬhoˉvaˬ yawˇ htaꞈ awˬ ha ve awˬ to k’awꞈ teꞈ tu la piˇ ve yoˬ. (1 Peˍtruˆ 3:18) Oˇ ve hk’awꞈ nawˉ, hk’aˬ nyi shinˉ maˇ gaˬ, Yeˍsuˆ mvuhˇ naw ma hk’oˆ taˆ-e leh, G’uiˬ sha yawˇ htaꞈ Jawˇ mawˇ te tcuh htaˇ hk’a gaˬ, “G’uiˬ sha ve laꞈ sha paˉ lo mui taˍ ve yoˬ.”—Heˍbrehˇ 10:12, 13.

22. Yeˍsuˆ Awˬ pa htaꞈ ka tiꞈ yeˬ ve pa taw, ngaˬ hui aˬ htoꞈ ma g’a hpehꞈ ve le?

²² Yeˍsuˆ Awˬ pa htaꞈ ka tiꞈ yeˬ ve pa taw, Yaˬhoˉvaˬ dawˇ taˍ ve hk’e Paˍraˍdiˇsuˆ hk’aw ngaˬ hui co co taiˍ taiˍ chehˇ g’a tuˬ yoˬ.Aˬ htoꞈ ma pa taw Yeˍsuˆ suh ve ngaˬ hui co co taiˍ taiˍ a shaꞈ g’a la tuˬ yoˬ tehꞈ, awˬ g’uˇ suhˍ teˇ lawn hk’aw shiˍ tuˬ yoˬ.