NOˉAꞈ awˬ co˗e Iˉ kaˆ htonˍ peuˬ hkʼawꞈ nawˉ aˬ laˬ hkʼe 350 hkʼawꞈ Aˍbraˍhanˍ lehˬ, Uˇraˆ venˇ lo chehˇ ve yoˬ. Chi beuꞈ teˇ co˗e awˬ ti oˇ ve Iˬraˆ mvuhˇ miˬ hkʼaw cawˬ ve yoˬ. Aˍbraˍhanˍ yonˍ jaˇ. Yaꞈ hkʼaˇ, yawˇ yonˍ ve htaꞈ lawˇ nyi piˇ ve yoˬ.

Yaˬhoˉvaˬ Aˍbraˍhanˍ htaꞈ shu mvuhˇ miˬ lo ca chehˇ tuˬ kʼoˆ piˇ ve teˇ yanˇ, Aˍbraˍhanˍ na yuˬ ve yoˬ. Yawˇ lehˬ, yawˇ ve awˬ miˇ ma Saˍraˇ, yawˇ ve awˬ shaˍ paˍ Lawˇtaˍ, leh awˬ kaˍ awˬ nu yehˬ yaˇ kʼa yaˇ geh teˇ geh tawˆ kʼai ve yoˬ. Maw chaweh te toˇ peuˬ hkʼawꞈ nawˉ, Hkaˍnanˍ mvuhˇ miˬ lo aˉ po kʼo te chehˇ ve yoˬ. Yaˬhoˉvaˬ Aˍbraˍhanˍ htaꞈ ka tiꞈ shaˉ caˆ teˇ pawˆ kʼawꞈ te piˇ ve, yawˇ geh tawˆ la ve chaw chaw ceuˬ lonˉ hpehꞈ la tuˬ yoˬ. Yawˇ htaꞈ pa taw miˬ guiˬ chaw ceuˬ hkʼa peu˗eˬ awˬ bon gʼa tuˬ yoˬ. Leh yawˇ ve awˬ yaˇ awˬ duˬ Hkaˍnanˍ mvuhˇ miˬ htaꞈ uˉ peunˍ tuˬ yoˬ.

Yawˬ leh ceˇ caˬ teˇ hpaˍ htaꞈ shaw hpoˆ leh Aˍbraˍhanˍ leh Lawˇtaˍ paw sha ve yoˬ. Aˍbraˍhanˍ nyi ma daꞈ leh Lawˇtaˍ heuˆ gaˇ ve hkʼe miˬ guiˬ awˉ lawˉ leuˆ yuˬ tcuh ve yoˬ. Lawˇtaˍ lehˬ, hkuiˇ jaˇ daꞈ jaˇ ve Yawˇdanˍ guiˬ paˇ lo cawˬ ve miˬ tawˬ kuiˬ htaꞈ leuˆ yuˬ leh Sawˉdonˍ venˇ paˇ lo chehˇ ve yoˬ. Yaꞈ hkʼaˇ, Sawˉdonˍ chaw haiˬ jaˇ leh Yaˬhoˉvaˬ htaꞈ te yaꞈ ve venˇ baˆ uiˍ jaˇ ve yoˬ.

Yaˬhoˉvaˬ Aˍbraˍhanˍ htaꞈ ka tiꞈ te piˇ ve, yawˇ ve awˬ yaˇ awˬ duˬ mvuhˇ naw ma hkʼoˆ cawˬ ve meuꞈ keu shiˍ hkʼa shuˍ maˇ la tuˬ yoˬ. Aˍbraˍhanˍ yonˍ ve yoˬ. Yawˇ haꞈ jaˇ ve awˬ miˇ ma Saˍraˇ lehˬ chaw meh ma hpehꞈ ve htawˇ, Aˍbraˍhanˍ a shaꞈ 99 hkʼawꞈ leh Saˍraˇ a shaꞈ aˬ laˬ hkʼe 90 hkʼawꞈ gaˬ htaˇ, Gʼuiˬ sha kʼoˆ piˇ ve, yawˇ huiˉ maˬ yaˇ paˍ cawˬ la tuˬ yoˬ. Gʼuiˬ sha kʼoˆ ve hkʼa shuˍ Saˍraˇ Iˉcaˆ htaꞈ paw la ve yoˬ. Awˬ kaˍ awˬ nu yaˇ cawˬ la ve yoˬ. Yaꞈ hkʼaˇ, Eˍdenˍ hko hkʼaw lo ka tiꞈ te taˍ ve Htaiˍ hkʼawꞈ shehˍ hpaˇ Iˉcaˆ hpawˇ lo laˬ tuˬ yoˬ.

Lawˇtaˍ leh yawˇ ve yehˬ kʼa Sawˉdonˍ venˇ lo chehˇ ve yoˬ. Yaꞈ hkʼaˇ, hteˇ cawˇ ve Lawˇtaˍ lehˬ venˇ hkʼaw chehˇ ve chaw hkʼa shuˍ haiˬ ve awˬ ceuˬ maˇ te. Sawˉdonˍ venˇ htaꞈ ciˍ yanˍ tuˬ Yaˬhoˉvaˬ dawˇ cheˆ htaˇ, yawˇ mvuhˇ naw ma tcuh yaˇ htaꞈ peu leh Lawˇtaˍ htaꞈ shaˍ tiꞈ piˇ ve yoˬ. Mvuhˇ naw ma tcuh yaˇ lehˬ, Lawˇtaˍ leh yawˇ ve yehˬ kʼa Sawˉdonˍ venˇ lo tawˆ˗e leh, hkʼawꞈ nawˉ taˇ hpfuhˆ nyi tehꞈ kʼoˆ piˇ ve yoˬ. Peuˬ leh haiˬ jaˇ ve Sawˉdonˍ leh Gawˇmawˇraꞈ venˇ htaꞈ Gʼuiˬ sha mvuhˇ naw ma hkʼoˆ lo aˬ miˍ leh maꞈ shiˉ ce la piˇ ve yoˬ. Venˇ chi nyiˇ venˇ hkʼaw hkʼa chehˇ ve chaw yaˇ htaꞈ te luˬ ve yoˬ. Lawˇtaˍ leh yawˇ ve yaˇ miˇ nyiˇ gʼaˇ gʼa ponˬ ve yoˬ. Yaꞈ hkʼaˇ, yawˇ awˬ miˇ ma hkʼawꞈ nawˉ hpawˇ hpfuhˆ nyi ve yoˬ. Awˬ lawn kʼo, venˇ oˇ ve hkʼaw baˬ taˉ ve mawˇ htaꞈ sheˉ lai ve yoˬ hehˉ. Maˇ na yuˬ ve pa taw yawˇ gʼa suh ve yoˬ.

—Awˬ hkuiˉ puiˍ 11:10–19:38 hkʼaw yuˬ laˬ ve yoˬ.