YAˬHOˉVAˬ shiˍ ve, teˇ nyi kʼo, yawˇ haꞈ jaˇ ve chaw teˇ gʼaˇ tuꞈ hkanˍ leh suh tuˬ yoˬ. Awˬ hkuiˉ puiˍ ve liꞈ 3:15 hkʼaw oˇ hkʼe tawˇ jawꞈ kʼoˆ taˍ ve yoˬ. Yawˇ shu aꞈ kehˉ haꞈ jaˇ ve teˇ gʼaˇ suh ve lehˬ, awˬ hpfuhˇ hkʼaˬ ma hkʼaˆ ve le, Gʼuiˬ sha chaw yaˇ htaꞈ mawˬ tcuh laˇ gʼa˗aw laˇ. Chi hkʼe te tuˬ awˬ tehˬ hpehꞈ la ve tawˇ pa haˉ awˬ lawn Liꞈ hpu hkʼaw maˍ laˇ ve yoˬ. Aˍbraˍhanˍ haꞈ ve yaˇ paˍ Iˉcaˆ htaꞈ tuˉ tanˇ laˇ tuˬ Gʼuiˬ sha yawˇ geh lawˬ ve yoˬ.

Aˍbraˍhanˍ yonˍ ve teˇ ceuˬ uiˍ jaˇ. Awˬ gʼuˇ suhˍ hpawˇ Htaiˍ hkʼawꞈ laˇ shehˍ hpaˇ Iˉcaˆ awˬ ceuˬ awˬ hkʼaˇ hpawˇ laˬ tuˬ yoˬ tehꞈ, Gʼuiˬ sha ka tiꞈ te piˇ ve htaꞈ taˇ leunˇ piˇ. Gʼuiˬ sha Iˉcaˆ htaꞈ kʼawꞈ teꞈ tu la piˇ gʼa ve tehꞈ, Aˍbraˍhanˍ yonˍ ve yoˬ. Chi htaꞈ pa taw, yawˇ ve yaˇ paˍ tuˉ tanˇ piˇ tuˬ yoˬ. Yaꞈ hkʼaˇ, Gʼuiˬ sha mvuhˇ naw ma tcuh yaˇ htaꞈ peu laˇ leh Aˍbraˍhanˍ Iˉcaˆ htaꞈ maˇ gʼa tiˇ pehˍ. Awˬ hpfuhˇ hkʼaˆ jaˇ ve teˇ ceuˬ ha lehˬ ha kʼa tanˇ piˇ tuˬ ve pa taw, ka tiꞈ yeˬ ve Aˍbraˍhanˍ htaꞈ Gʼuiˬ sha chiˇ mvuh leh ka tiꞈ te peuˬ ve hkʼe teˇ pawˆ kʼawꞈ kʼoˆ piˇ ve yoˬ.

Oˇ ve hkʼawꞈ nawˉ, Iˉcaˆ yaˇ paˍ nyiˇ gʼaˇ Eˇsawˇ leh Yaˍkoˆ cawˬ la ve yoˬ. Eˇsawˇ htaꞈ maˇ shuˍ Yaˍkoˆ lehˬ, co ha hpawˇ awˬ hpfuhˇ shiˍ leh awˬ bon gʼa ve yoˬ. Yaˍkoˆ ve awˬ meh htaꞈ Iˉsaˍreˍlaˆ tehꞈ Gʼuiˬ sha pa piˇ leh Iˉsaˍreˍlaˆ chaw ceuˬ awˬ hkuiˉ puiˍ yawˇ ve yaˇ paˍ 12 gʼaˇ geh laˬ ve yoˬ. Yehˬ kʼa chi chaw ceuˬ lonˉ hpehꞈ la gʼa ve awˬ hkʼaˇ htaꞈ nyi sheˍ.

Maˇ˗awˍ ve yaˇ paˍ awˬ nyi paˍ Yoˇsehꞈ htaꞈ hkawehˉ ve yoˬ. Yawˇ hui Yoˇsehꞈ htaꞈ hawˇ baˬ leh Eˇjiˇtuꞈ mvuhˇ miˬ lo shiˍ kʼai ve yoˬ. Yaꞈ hkʼaˇ, ka tiꞈ yeˬ leh nyi ma haꞈ hanˉ ve yaˇ nehˬ chi teˇ gʼaˇ htaꞈ Gʼuiˬ sha awˬ bon naꞈ piˇ ve yoˬ. Teˇ tcuhˉ teˇ yanˇ tuꞈ hkanˍ haˍ gʼawˇ ve htawˇ, Eˇjiˇtuꞈ jawˇ mawˇ Hpaˍrawˇ yawˇ htaꞈ mvuh jaˇ ve aˉ yaˇ piˇ ve yoˬ. Chi lehˬ daꞈ ve yoˬ. Awˬ lawn kʼo, meuꞈ lonˉ kaˆ lonˉ hpehꞈ leh Eˇjiˇtuꞈ mvuhˇ miˬ lo caˇ tuˬ ca vuiˬ tuˬ awˬ yaˇ paˍ htaꞈ Yaˍkoˆ kʼai peu ve yoˬ. Awˬ yanˇ chi lehˬ, Yoˇsehꞈ caˇ tuˬ hkʼa peu˗eˬ htaꞈ nyi haꞈ shaˉ chehˇ ve yoˬ. Yawˇ ve awˬ viˉ paˍ hui dawˇ hpfuhˆ peuˬ ve htaꞈ gʼa hpuˇ daꞈ leh ha lehˬ daꞈ peuˬ hkʼawꞈ nawˉ, Yoˇsehꞈ yawˇ hui htaꞈ venˇ baˆ hpehˇ piˇ leh, yehˬ yaˇ kʼa yaˇ hkʼa peu˗eˬ Eˇjiˇtuꞈ mvuhˇ miˬ lo hpaw la tuˬ awˬ hkʼaˇ gu piˇ ve yoˬ. Yawˇ hui daꞈ jaˇ ve miˬ guiˬ lo gʼa chehˇ leh paw sha la ve yoˬ. Gʼuiˬ sha ve ka tiꞈ htaꞈ biˇ la piˇ ve awˬ hkʼaˇ hpehꞈ ve tehꞈ Yoˇsehꞈ shiˍ ve yoˬ.

Yaˍkoˆ lehˬ, Eˇjiˇtuꞈ mvuhˇ miˬ lo awˬ yaˇ awˬ duˬ maˇ maˇ geh gʼa chehˇ ve yoˬ. Yawˇ suh paˇ neˇ htaˇ yawˇ kʼoˆ ve, yawˇ ve yaˇ paˍ Yuˇdaꞈ hpawˇ lo, ka tiꞈ te taˍ ve Awˬ ceuˬ awˬ hkʼaˇ, Htaiˍ hkʼawꞈ laˇ shehˍ hpaˇ leh Uˉ peunˍ shehˍ hpaˇ kanˇ paˆ cawˬ ve chaw teˇ gʼaˇ paw la tuˬ yoˬ. Oˇ ve hkʼawꞈ nawˉ, Yoˇsehꞈ suh paˇ neˇ htaˇ yawˇ kʼoˆ ve, teˇ nyi kʼo Yaˍkoˆ ve awˬ yaˇ awˬ duˬ Eˇjiˇtuꞈ mvuhˇ miˬ hkʼaw Gʼuiˬ sha shiˍ tawˆ piˇ tuˬ yoˬ.

—Awˬ hkuiˉ puiˍ liꞈ 20 te leh 50; Heˍbrehˇ 11:17-22 hkʼaw yuˬ laˬ ve yoˬ.