YAˬHOˉVAˬ cuˇ yiˍ cawˬ ve Uˉ peunˍ shehˍ hpaˇ hpehꞈ ve laˇ. Chi ve awˬ lawn hkʼa dehꞈ shiˍ hpehꞈ tuˬ, yawˇ beˆ maˍ laˇ hkawˇ htaꞈ dawˇ nyi cawˇ ve yoˬ. Beˆ maˍ laˇ ve oˇ ve htaꞈ yuˬ yehˇ gʼa˗aw laˇ. Yuˬ yehˇ ve kʼo, a shaꞈ teꞈ chehˇ kuiˬ daꞈ la leh tcuhˉ kuiˬ cawˬ maˇ la ve laˇ. Cuˇ yiˍ cawˬ ve Jawˇmawˇ Sawˉlaꞈmonˍ lehˬ, tawˇ naˉ ve tawˇ hkawˇ laiˉ ha hkawˇ bvuhꞈ ve yoˬ. Tawˇ naˉ ve tawˇ hkawˇ oˇ ve teˇ hpaˍ a shaꞈ teꞈ chehˇ ve laiˉ hpawˇ lo kʼoˆ taˍ ve yoˬ. Teˇ lawn lawn htaꞈ dawˇ nyi sheˍ.

Gʼuiˬ sha htaꞈ gʼaˇ va ve teˇ ceuˬ. Yaˬhoˉvaˬ htaꞈ awˬ chawˇ muiˬ daꞈ tuˬ kʼo, yawˇ htaꞈ gʼaˇ va ve teˇ ceuˬ a yeˇ uiˍ jaˇ. Sawˉlaꞈmonˍ bvuhꞈ taˍ ve, “Nawˬ ve nyi ma awˬ tawˬ hkʼa gaˬ Gʼuiˬ sha htaꞈ gʼaˇ va˗o. Nawˬ ve cuˇ yiˍ htaꞈ a ciˉ kaꞈ taˇ gʼaˇ va. Nawˬ hkʼa te ve kanˉ teˇ ceuˬ le le awˬ hkʼaw lo Gʼuiˬ sha htaꞈ dawˇ nawˇ˗oˆ. Oˇ hkʼe te ve kʼo, yawˇ nawˬ htaꞈ cawˇ ve yaꞈ kʼaw beˆ maˍ laˇ tuˬ yoˬ.” (Tawˇ naˉ ve 3:5, 6) Gʼuiˬ sha htaꞈ gʼaˇ va ve lehˬ, yawˇ beˆ maˍ laˇ ve tawˇ hkawˇ htaꞈ gʼaꞈ ca leh gʼa na yuˬ ve yoˬ. Oˇ hkʼe te ve kʼo, a shaꞈ teꞈ chehˇ kuiˬ hkʼaw tcuhˉ kuiˬ cawˬ tehˬ ve yoˬ. Leh Gʼuiˬ sha ha lehˬ tuˬ yoˬ. Yawˇ ve canˇ paˍ Saˍtanˍ she ve awˬ lawn htaꞈ Yaˬhoˉvaˬ hkʼawꞈ piˇ tuˬ tawˇ cawˬ tuˬ yoˬ. (Tawˇ naˉ ve 27:11)

Cuˇ yiˍ cawˬ ve hkʼaw shu htaꞈ te piˇ ve yoˬ. Gʼuiˬ sha beˆ maˍ laˇ ve tawˇ hkawˇ lehˬ awˬ hpawˇ, awˬ miˇ ma, leh awˬ yaˇ hui awˬ pon chi beuꞈ teˇ co˗e keunˍ jaˇ ve yoˬ. Gʼuiˬ sha lehˬ, awˬ hpawˇ htaꞈ beˆ maˍ piˇ ve, “nawˬ miˇ ma geh ceh tiˉ ha lehˬ chehˇ˗oˆ.” Kʼoˆ gaˇ ve lehˬ, a shu yawˇ miˇ ma htaꞈ hkʼaˬ htaˆ kaꞈ ka tiꞈ gʼa yeˬ ve yoˬ. (Tawˇ naˉ ve 5:18-20) Awˬ hpawˇ heuˆ peuˬ ve yaˇ miˇ kʼo, Tawˇ naˉ ve liꞈ hkʼaw kaiˬ ve awˬ miˇ ma htaꞈ taˍ uiˍ taˍ mvuh taˍ ve yoˬ. Yawˇ ve awˬ hpawˇ leh yawˇ ve awˬ yaˇ kaꞈ yawˇ htaꞈ chiˇ mvuh ve yoˬ. (Tawˇ naˉ ve liꞈ 31) Leh awˬ pa awˬ e hkawˇ htaꞈ na tuˬ yaˇ teˇ hpaˍ htaꞈ beˆ maˍ piˇ ve yoˬ. (Tawˇ naˉ ve 6:20) Liꞈ chi teˇ kʼoˆ hpeuꞈ maw laˇ ve, awˬ chawˇ te daꞈ ve teˇ ceuˬ a yeˇ uiˍ ve yoˬ. Shu htaꞈ awˬ chawˇ maˇ te ve chaw a shu yawˇ awˬ to htaꞈ ceh dawˇ nyi chehˇ ve yoˬ. (Tawˇ naˉ ve 18:1) Awˬ chawˇ lehˬ, daꞈ maˇ daꞈ ve kaꞈ heuˆ la kuiˬ cawˬ ve yoˬ. Chi htaꞈ pa taw, awˬ chawˇ leuˆ ve teˇ ceuˬ cuˇ yiˍ gʼa cawˬ ve yoˬ. (Tawˇ naˉ ve 13:20; 17:17)

A shu yawˇ awˬ to haꞈ shaˉ tuˬ cuˇ yiˍ yehˇ ve yoˬ. Dawˬ ponˬ dawˬ leuˉ ve htaꞈ jaw kʼai ve, maˇ daꞈ ve nyi ma htaꞈ baˬ taˉ leh daꞈ ve nyi ma htaꞈ uiˍ la mvuh la piˇ ve, leh kanˉ te kaiˬ ve chaw hpehꞈ ve, chi teˇ hpaˍ, Tawˇ naˉ ve liꞈ hkʼaw awˬ hpfuhˇ hkʼaˆ jaˇ ve beˆ maˍ laˇ hkawˇ cawˬ ve yoˬ. (Tawˇ naˉ ve 6:6; 14:30; 20:1) Gʼuiˬ sha beˆ maˍ laˇ ve htaꞈ peun daꞈ ve chaw yaˇ ve dawˇ hkʼaˇ htaꞈ gʼaˇ va ve teˇ ceuˬ luˬ kuiˬ lo gaˬ ve yoˬ tehꞈ, Tawˇ naˉ ve liꞈ hkʼaw shaˍ tiꞈ piˇ taˍ ve yoˬ. (Tawˇ naˉ ve 14:12) Maˇ daꞈ ve awˬ ceuˬ ngaˬ hui ve nyi ma hkʼaw maˇ loꞈ la tuˬ, nyi ma htaꞈ gʼa haꞈ shaˉ ve yoˬ tehꞈ liꞈ chi teˇ kʼoˆ awˬ gʼaˇ piˇ laˇ leh kʼoˆ ve, “a shaꞈ teꞈ ve awˬ hkuiˉ puiˍ lehˬ nyi ma hkʼaw keuˆ tawˆ la ve yoˬ.” (Tawˇ naˉ ve 4:23, MGS)

Beˆ maˍ laˇ ve chi awˬ hkʼaˇ suh a shaꞈ teꞈ chehˇ ve teˇ ceuˬ daꞈ la ve yoˬ tehꞈ miˬ guiˬ hkʼoˆ lo chaw laiˉ lanˬ gʼaˇ gʼa mawˬ ve yoˬ. Chi htaꞈ pa taw, Yaˬhoˉvaˬ lehˬ yawˇ hui ve Uˉ peunˍ shehˍ hpaˇ hpehꞈ ve tehꞈ haꞈ yuˬ keunˍ ve yoˬ.

—Tawˇ naˉ ve liꞈ hkʼaw yuˬ laˬ ve yoˬ.