PAWˇLUꞈ yonˍ peuˬ hkʼawꞈ nawˉ, yawˇ Gʼuiˬ sha ve mvuhˇ miˬ daꞈ ve awˬ lawn maˍ ve nyi ma pfuhˇ jaˇ. Yawˇ shu htaꞈ tawˍ jaw ve htawˇ, yaꞈ hkʼaˇ chi beuꞈ shu yawˇ htaꞈ tawˍ piˇ ve yoˬ. Heuˬ hkawˇ maˇ shiˍ ve tcuh yaˇ chi teˇ gʼaˇ lehˬ, awˬ hkuiˉ puiˍ htaˇ Gʼuiˬ sha chaw yaˇ htaꞈ dawˇ law taˍ ve Gʼuiˬ sha ve mvuhˇ miˬ awˬ lawn zuhˇ kʼai tuˬ vuiˇ kuiˬ lo laiˉ pawˆ ca hto toˇ ve yoˬ.

Awˉ lawˉ teˇ pawˆ ca hto toˇ htaˇ, Luˇtaˍraˆ venˇ hkʼaw lo hkui luˬ paˍ teˇ gʼaˇ htaꞈ Pawˇluꞈ gu na˗e piˇ ve yoˬ. Chaw moˍ lonˉ lehˬ, Pawˇluꞈ leh Baˍnaˍbaˆ gʼuiˬ sha hpehꞈ ve yoˬ tehꞈ, awˬ hkawˇ bvuhˬ chaweh kuˬ ve yoˬ. Chaw moˍ lonˉ yawˇ huiˉ maˬ htaꞈ tanˇ tuˬ maˇ gʼa tanˇ laˇ tuˬ, aˬ laˬ hkʼe tawˍ taˍ maˇ tanˇ. Pawˇluꞈ ve canˇ paˍ hui, chaw moˍ lonˉ chi htaꞈ juˆ piˇ leh yawˇ hui Pawˇluꞈ htaꞈ haˉ pui baˬ leh gʼawˬ baˬ ve yoˬ. Pawˇluꞈ maˇ suh. Yawˇ venˇ hkʼaw kʼawꞈ la leh awˬ laꞈ gʼawˇ hui htaꞈ awˬ gʼaˇ piˇ ve yoˬ.

Hkriꞈ yaˇ awˬ moˍ hkʼaw Yuˇdaꞈ chaw teˇ hpaˍ hpaˍ lehˬ yonˍ peuˬ ve buiˇ shaˆ aˉ naˆ chaw htaꞈ Moˉseˍ ve Awˬ liˇ tawˇ hkawˇ gʼaꞈ te tuˬ, yawˇ hui htaꞈ coˇ caˇ leh nyiˉ ve yoˬ. Pawˇluꞈ lehˬ awˬ lawn chi Yeˍruˆsaˍlehnˍ venˇ lo tcuh yaˇ leh chaw mawˇ chaw kehˉ hui geh ca na nyi ve yoˬ. Hawˉ hkʼaˆ oˇ ve teˇ hpaˍ htaꞈ Gʼuiˬ sha ve daꞈ kehˬ ve awˬ ha hpu beˆ maˍ piˇ leh, Liꞈ hpu awˬ tawn teˇ hpaˍ htaꞈ dawˇ nyi peuˬ hkʼawꞈ nawˉ, Hkriꞈ yaˇ awˬ moˍ hui htaꞈ liꞈ bvuhꞈ feu piˇ ve yoˬ. Liꞈ oˇ ve lehˬ, shaˉ hoꞈ htaꞈ tanˇ ve, awˬ suhˍ leh kʼawˍ peˍ nyiˉ pehˍ ve awˬ shaˍ htaꞈ caˇ ve, leh haˉ chawˇ haˉ paˆ te ve htaꞈ jaw kʼai tuˬ “loˍ jaˇ” ve yoˬ tehꞈ, Hkriꞈ yaˇ awˬ moˍ htaꞈ shaˍ tiꞈ piˇ ve yoˬ. Yaꞈ hkʼaˇ, Moˉseˍ ve Awˬ liˇ tawˇ hkawˇ htaꞈ gʼa gʼaꞈ te ve yoˬ tehꞈ, kʼoˆ gaˇ ve maˇ heˆ. (Tcuh yaˇ 15:28, 29)

Nyiˇ pawˆ teˇ pawˆ ca hto toˇ htaˇ, chi teˇ hkui Heˍlaˍsaˆ mvuhˇ miˬ lo cawˬ ve Beˍriˆ venˇ hkʼaw Pawˇluꞈ kʼai ve yoˬ. Oˇ kaˬ lo chehˇ ve Yuˇdaꞈ chaw Gʼuiˬ sha ve tawˇ hkawˇ htaꞈ yonˍ la leh nyi ma pfuhˇ ve yoˬ. Yawˇ hui lehˬ, Pawˇluꞈ maˍ ve awˬ ceuˬ cawˇ maˇ cawˇ ve htaꞈ shiˍ tuˬ, Liꞈ hpu htaꞈ teˇ nyi le le chaˬ nyi ve yoˬ. Tawˍ ve htaꞈ pa taw, yawˇ awˬ nu teˇ kaˬ lo kʼai ve yoˬ. Chi teˇ pawˆ lehˬ, Aˍhtenˍ venˇ lo kʼai ve yoˬ. Liꞈ henˇ mvuh ve Aˍhtenˍ chaw mehˆ gʼuˇ suhˍ Pawˇluꞈ bon maˍ ve awˬ hkʼaˇ nyi ma htaꞈ heuˆ ve yoˬ. Bon maˍ htaˇ, tawˇ yaw shaˉ yaw ve, cuˇ yiˍ cawˬ ve, leh tawˇ yaw puiˉ ve pa taw henˇ yuˬ tuˬ hpehꞈ ve yoˬ.

Shehˆ pawˆ teˇ pawˆ ca hto toˇ peuˬ hkʼawꞈ nawˉ, Pawˇluꞈ Yeˍruˆsaˍlehnˍ venˇ hkʼaw kʼai ve yoˬ. Oˇ kaˬ lo bon yehˬ hkʼaw loꞈ˗e ve teˇ yanˇ, Yuˇdaꞈ chaw teˇ hpaˍ duiˆ˗ehˍ shaˇ˗ehˍ te leh yawˇ htaꞈ tiˇ pehˍ gaˇ ve yoˬ. Roˉmaꞈ maꞈ yaˇ loꞈ la leh Pawˇluꞈ htaꞈ na nyi ve yoˬ. Pawˇluꞈ Roˉmaꞈ chaw hpehꞈ ve pa taw, jawˇ mawˇ Hpeˍliˆ mehˆ gʼuˇ suhˍ yawˇ gʼa hkanˍ ve awˬ lawn kʼaoˍ maˍ piˇ ve yoˬ. Yuˇdaꞈ chaw hui shaˉ hkiˆ maˇ cawˬ ve pa taw, Pawˇluꞈ htaꞈ venˇ baˆ taˍ maˇ gʼa. Jawˇmawˇ Hpeˍtuˆ yawˇ htaꞈ Yuˇdaꞈ chaw hui laꞈ hkʼaw lo maˇ gʼa chiˇ aꞈ piˇ tuˬ awˬ pon Pawˇluꞈ kʼoˆ ve, “Jawˇmawˇ Kehˉsaˍ geh kʼai tuˬ ngaˬ lawˬ ve yoˬ.” Hpeˍtuˆ hkʼawꞈ piˇ ve “jawˇ mawˇ Kehˉsaˍ geh nawˬ gʼa kʼai tuˬ yoˬ”. (Tcuh yaˇ 25:11, 12)

Iˉtaˍliˍ mvuhˇ miˬ lo suhˉ taˆ tuˬ awˬ pon, Pawˇluꞈ haw loꞈ kʼoˍ ciˇ kʼai ve yoˬ. Kʼai chehˇ ve teˇ yanˇ haw loꞈ kʼoˍ luˬ kʼai ve pa taw, mvuhˇ kaˆ yanˇ peuˬ htaˇ hkʼa gaˬ Meˍleˍteˍ conˇ hkʼaw chehˇ taˍ ve yoˬ. Yawˇ Roˉmaꞈ mvuhˇ miˬ gaˬ ve teˇ yanˇ, ngaˍ taˍ ve yehˬ hkʼaw nyiˇ hkʼawꞈ chehˇ ve yoˬ. Maꞈ yaˇ shaw taˍ ve htawˇ, yaꞈ hkʼaˇ nyi ma pfuhˇ ve tcuh yaˇ chi teˇ gʼaˇ lehˬ, yawˇ geh ca guiˇ la ve chaw teˇ gʼaˇ le le htaꞈ Gʼuiˬ sha ve mvuhˇ miˬ awˬ lawn hto maˍ piˇ ve yoˬ.

—Tcuh yaˇ 11:22-28:31 hkʼaw yuˬ laˬ ve yoˬ.