YAˬHOˉVAˬ kʼoˆ taˍ ve hkʼe, Sawˉlaꞈmonˍ awˬ tehˬ oˉ kʼoˍ pui ve teˇ ceuˬ htaꞈ baˬ taˉ hkʼawꞈ nawˉ, Iˉsaˍreˍlaˆ mvuhˇ miˬ nyiˇ peˆ pehˬ kʼai ve yoˬ. Yawˇ ve yaˇ Yawˇbaoˍ Jawˇmawˇ kʼawꞈ caˉ te leh, fawˉ shehˍ hpaˇ hpehꞈ ve yoˬ. Chi htaꞈ pa taw, Iˉsaˍreˍlaˆ chaw teˇ chi ceuˬ hpfuhˆ leh, awˬ na hpawˇ Iˉsaˍreˍlaˆ mvuhˇ miˬ tanˬ cawˬ la ve yoˬ. Yeˍruˆsaˍlehnˍ venˇ lo Daˍviˆ ve awˬ ceuˬ awˬ hkʼaˇ ve jawˇ mawˇ htaꞈ Iˉsaˍreˍlaˆ chaw nyiˇ ceuˬ ka tiꞈ yeˬ chehˇ sheˬ ve yoˬ. Chi ve lehˬ, awˬ hawˉ hpawˇ ve Yuˇdaꞈ mvuhˇ miˬ hpehꞈ ve yoˬ.

Ka tiꞈ maˇ yeˬ leh maˇ na yuˬ ve jawˇ mawˇ chi teˇ hpaˍ pa taw, mvuhˇ miˬ chi nyiˇ peˆ shoꞈ shaꞈ jaˇ. Iˉsaˍreˍlaˆ jawˇ mawˇ teˇ hpaˍ tanˬ uˉ peunˍ htaˇ kaꞈ maˇ cawˇ ve oˉ kʼoˍ pui ve hpawˇ lo chehˇ ve pa taw, awˬ hawˉ hpawˇ ve Yuˇdaꞈ mvuhˇ miˬ aꞈ kehˉ hpehꞈ haˍ ve yoˬ. Tcuh kaˍ paˍ Eˇliˇyaꞈ leh Eˇliˇshehˇ anˇ tuˬ laiˉ ceuˬ te leh suh taˍ ve chaw htaꞈ teꞈ tu la piˇ htawˇ, yaꞈ hkʼaˇ Iˉsaˍreˍlaˆ chaw haiˬ ve htaꞈ kʼawꞈ te chehˇ ve yoˬ. Awˬ leh meuˇ htaˇ Aˍsuˇriˆ mvuhˇ miˬ awˬ na hpawˇ Iˉsaˍreˍlaˆ mvuhˇ miˬ htaꞈ te luˬ ve teˇ yanˇ, Gʼuiˬ sha yawˇ hui htaꞈ maˇ ponˬ piˇ.

Yuˇdaꞈ mvuhˇ miˬ Iˉsaˍreˍlaˆ mvuhˇ miˬ aꞈ kehˉ teˇ ha hkʼawꞈ hpaˆ yeˬ chehˇ ve yoˬ. Yaꞈ hkʼaˇ, Yuˇdaꞈ mvuhˇ miˬ htaꞈ htawˇ Gʼuiˬ sha ciˍ yanˍ piˇ ve yoˬ. Gʼuiˬ sha ve tcuh kaˍ paˍ shaˍ tiꞈ piˇ hkawˇ na ve jawˇ mawˇ hkʼaˬ nyiˇ gʼaˇ maˇ cawˬ. Na yuˬ ve jawˇ mawˇ hui lehˬ, yawˇ ve chaw ceuˬ htaꞈ Yaˬhoˉvaˬ geh coˇ caˇ leh shiˍ kʼawꞈ la ve yoˬ. Tawˇ pa haˉ te kʼo, Jawˇmawˇ Yawˇshiˆ Yuˇdaꞈ mvuhˇ miˬ hkʼaw maˇ cawˇ ve oˉ kʼoˍ pui ve hkʼa peu˗eˬ htaꞈ tanˬ gʼaꞈ baˬ leh, Yaˬhoˉvaˬ ve bon yehˬ htaꞈ gu te ve yoˬ. Gʼuiˬ sha Moˉseˍ htaꞈ piˇ taˍ ve awˬ liˇ tawˇ hkawˇ liꞈ daw htaꞈ mawˬ htaˇ, Yawˇshiˆ nyi ma htaꞈ heuˆ ve pa taw, awˬ tehˬ oˉ kʼoˍ pui ve hpawˇ lo kanˉ gʼaˇ hteꞈ gu te ve yoˬ.

Yaꞈ hkʼaˇ, Yawˇshiˆ htaꞈ caˉ leh uˉ peunˍ ve chaw laiˉ gʼaˇ lehˬ, daꞈ ve jawˇ mawˇ chi teˇ gʼaˇ htaꞈ maˇ henˇ yuˬ. Chi htaꞈ pa taw, Baˍbuˍlonˍ chaw Yuˇdaꞈ mvuhˇ miˬ htaꞈ bawˆ gʼaˇ leh Yeˍruˆsaˍlehnˍ venˇ leh bon yehˬ htaꞈ te luˬ piˇ ve teˇ yanˇ, Yaˬhoˉvaˬ maˇ haꞈ shaˉ piˇ. Leuˉ taˍ ve chaw hui lehˬ, Baˍbuˍlonˍ mvuhˇ miˬ lo hpeh kʼai ve yoˬ. Gʼuiˬ sha kʼoˆ taˍ ve hkʼe, oˇ kaˬ lo 70 hkʼawꞈ hkʼa gaˬ gʼa chehˇ ve yoˬ. Oˇ teˇ yanˇ, Yuˇdaꞈ mvuhˇ miˬ awˬ kʼawˇ lehˍ hpehꞈ taˍ ve yoˬ. Peuˬ leh, ka tiꞈ te taˍ ve hkʼe, yawˇ hui ve chehˇ kuiˬ mvuhˇ miˬ hkʼaw kʼawꞈ kʼoꞈ˗e tuˬ a hkaw˗anˬ gʼa ve yoˬ.

Ka tiꞈ te taˍ ve Htaiˍ hkʼawꞈ laˇ shehˍ hpaˇ Meˍsiˉyaꞈ tanˬ uˉ peunˍ ve awˬ yanˇ gaˬ la htaˇ hkʼa gaˬ, Daˍviˆ ve awˬ ceuˬ awˬ hkʼaˇ jawˇ mawˇ maˇ cawˬ. Yeˍruˆsaˍlehnˍ venˇ hkʼaw uˉ peunˍ ve maˇ˗awˍ ve jawˇ mawˇ hpeuꞈ maw laˇ ve, maˇ biˇ ve chaw yaˇ maˇ uˉ peunˍ keunˍ, Meˍsiˉyaꞈ ceh tiˉ keunˍ ve yoˬ. Chi htaꞈ pa taw, Yaˬhoˉvaˬ lehˬ Daˍviˆ ve awˬ ceuˬ awˬ hkʼaˇ awˬ leh meuˇ ve jawˇ mawˇ htaꞈ kʼoˆ piˇ ve, “shi uˉ tcuhˍ leh uˉ nyiˉ htaꞈ yuˬ baˬ˗oꞈ.” “Ngaˬ leuˆ yuˬ taˍ ve chaw teˇ gʼaˇ maˇ gaˬ la sheˍ ve ceh ceh, chi hkʼe hpehꞈ la tuˬ ve maˇ heˆ. Oˇ ve hkʼawꞈ nawˉ, ngaˬ yawˇ htaꞈ oˇ hkʼe te tcuh tuˬ yoˬ.” (Yeˍsaˍkeˍlaˆ 21:26, 27)

—1 leh 2 Jawˇmawˇ liꞈ; 2 Raˍsaˍvanˍ liꞈ 10 te leh 36; Yeˍraˍmiˆ 25:8-11 hkʼaw yuˬ laˬ ve yoˬ.