IˉSAˍREˍLAˆ leh Yuˇdaꞈ jawˇ mawˇ awˬ co˗e htaˇ, shu htaꞈ maˇ shuˍ ve hawˉ hkʼaˆ teˇ moˍ cawˬ ve yoˬ. Oˇ ve lehˬ tcuh kaˍ paˍ yoˬ. Yawˇ hui yonˍ jaˇ leh haꞈ hanˉ jaˇ ve hkʼaw Gʼuiˬ sha ve tawˇ hkawˇ hto toˇ ve yoˬ. Gʼuiˬ sha ve tcuh kaˍ paˍ hto ve tawˇ hkawˇ awˬ hkʼaˇ lonˉ awˇ lawn htaꞈ dawˇ nyi sheˍ.

1. Yeˍruˆsaˍlehnˍ venˇ htaꞈ te luˬ tuˬ yoˬ. Yeˍruˆsaˍlehnˍ venˇ htaꞈ te luˬ leh awˬ kʼawˇ lehˍ baˬ taˉ tuˬ yoˬ tehꞈ, Gʼuiˬ sha ve tcuh kaˍ paˍ Iˉsaˍyaˆ leh Yeˍraˍmiˆ kʼoˆ taˍ ve laiˉ hkʼawꞈ gaˬ peuˬ. Venˇ oˇ ve htaꞈ aˬ htoꞈ ma pa taw, Gʼuiˬ sha nyi ma zuhˆ ve le tehꞈ yawˇ huiˉ maˬ hkʼa tawˍ lehˆ hpeuꞈ maw piˇ ve yoˬ. Yeˍruˆsaˍlehnˍ ve chaw lehˬ, Yaˬhoˉvaˬ awˬ tan hpehꞈ ve yoˬ tehꞈ kʼoˆ ve awˬ tehˬ maˇ heˆ, awˬ lawn kʼo yawˇ hui lehˬ haiˬ ve awˬ ceuˬ, nyi ma maˇ hteˇ ve, bon liˇ awˬ kehˆ awˬ hkʼaˇ suh gʼaꞈ te ve yoˬ. (2 Jawˇmawˇ 21:10-15; Iˉsaˍyaˆ 3:1-8, 16-26; Yeˍraˍmiˆ 2:1–3:13)

2. Daꞈ kehˬ ve oˉ kʼoˍ pui ve htaꞈ kʼawꞈ gu te tuˬ yoˬ. Gʼuiˬ sha ve chaw Baˍbuˍlonˍ venˇ lo 70 hkʼawꞈ chehˇ peuˬ hkʼawꞈ nawˉ hpehˇ piˇ ve yoˬ. Yawˇ hui ve mvuhˇ miˬ awˬ kʼawˇ lehˍ ve hkʼaw gʼa kʼawꞈ la leh, Yeˍruˆsaˍlehnˍ venˇ hkʼaw Yaˬhoˉvaˬ ve bon yehˬ awˬ suhˉ kʼawꞈ gu te ve yoˬ. (Yeˍraˍmiˆ 46:27; Aˍmoˆ 9:13-15) Baˍbuˍlonˍ venˇ htaꞈ bawˆ gʼaˇ tuˬ ve jawˇ mawˇ ve awˬ meh lehˬ, Kuˇruˆ yoˬ tehꞈ Iˉsaˍyaˆ kʼoˆ taˍ ve yoˬ. Aˬ laˬ hkʼe 200 hkʼawꞈ hkʼawꞈ nawˉ, Kuˇruˆ tehꞈ meh ve jawˇ mawˇ lehˬ, daꞈ kehˬ ve oˉ kʼoˍ pui ve htaꞈ kʼawꞈ gu te tuˬ, Gʼuiˬ sha ve chaw htaꞈ Baˍbuˍlonˍ venˇ lo hpehˇ piˇ ve yoˬ. Chi ve awˬ hkʼoˆ bawˆ daꞈ tuˬ Kuˇruˆ gu teh taˍ ve awˬ hkʼaˇ htaꞈ kaꞈ Iˉsaˍyaˆ kʼoˆ taˍ ve yoˬ. (Iˉsaˍyaˆ 44:24–45:3)

3. Meˍsiˉyaꞈ laˬ leh yawˇ gʼa hpuˇ ve awˬ ceuˬ. Meˍsiˉyaꞈ Behˍlehˍhehnˍ venˇ lo paw la tuˬ yoˬ. (Miˆhkaˍ 5:2) Yawˇ nuˇ nehˬ ve hkʼaw piˉ laˬ ehˉ htaꞈ ciˇ leh Yeˍruˆsaˍlehnˍ venˇ lo loꞈ˗e tuˬ yoˬ. (Zaˍhkaˍriˆ 9:9) Yawˇ nuˇ˗ehˬ cawˬ leh ha kʼaˉ puiˉ ve htawˇ, yaꞈ hkʼaˇ laiˉ gʼaˇ yawˇ htaꞈ maˇ dawˇ cawˇ leh chiˇ baˬ piˇ tuˬ yoˬ. (Iˉsaˍyaˆ 42:1-3; 53:1, 3) Yawˇ lehˬ suh maˇ daꞈ. Yawˇ ve a shaꞈ chi hkʼe ceh leh ve laˇ. Maˇ heˆ, yawˇ ve a shaꞈ tanˇ laˇ ve pa taw, laiˉ gʼaˇ venˇ baˆ htaꞈ hpehˇ laˇ tuˬ yaꞈ kʼaw hpaw taˍ ve yoˬ. (Iˉsaˍyaˆ 53:4, 5, 9-12) Yawˇ teꞈ tu la ve teˇ ceuˬ ceh tiˉ venˇ baˆ hpehˇ laˇ gʼa ve yoˬ.

4. Miˬ guiˬ hkʼoˆ Meˍsiˉyaꞈ uˉ peunˍ tuˬ yoˬ. Awˬ tehˬ kʼo, chaw yaˇ maˇ biˇ ve pa taw a shu yawˇ hkʼaˇ yawˇ gawˬ lehˍ uˉ peunˍ maˇ gʼa. Yaꞈ hkʼaˇ, Hkunˉ hawˉ hkanˇ Meˍsiˉyaꞈ lehˬ Gawˬ lehˍ ve Jawˇmawˇ tehꞈ kʼoˆ tuˬ yoˬ. (Iˉsaˍyaˆ 9:6, 7; Yeˍraˍmiˆ 10:23) Yawˇ uˉ peunˍ ve awˬ hawˉ lo hkʼa chehˇ ve chaw yaˇ leh to nuˇ to shaˆ teˇ ceuˬ le le htawˇ, gawˬ lehˍ teˇ geh hpoˆ chehˇ tuˬ yoˬ. (Iˉsaˍyaˆ 11:3-7) Naˬ ve gawˬ ve maˇ kʼawꞈ cawˬ. (Iˉsaˍyaˆ 33:24) Suh ve teˇ ceuˬ htawˇ co co taiˍ taiˍ mehˉ kʼai tuˬ yoˬ. (Iˉsaˍyaˆ 25:8) Meˍsiˉyaꞈ teˇ hinˉ hkʼawꞈ uˉ peunˍ ve teˇ co˗e miˬ guiˬ hkʼoˆ teꞈ chehˇ tuˬ awˬ pon, suh peuˬ ve chaw htaꞈ teꞈ tu la piˇ tuˬ yoˬ. (Daˍyeˍlaˆ 12:13)

—Iˉsaˍyaˆ liꞈ, Yeˍreˍmiˆ liꞈ, Daˍyeˍlaˆ liꞈ, Aˍmoˆ liꞈ, Miˆhkaˍ liꞈ leh Zaˍhkaˍriˆ liꞈ hkʼaw yuˬ laˬ ve yoˬ.