YAˬHOˉVAˬ dawˇ law taˍ ve hkʼe biˇ la tuˬ, teh taˍ ve Hkriꞈ yaˇ awˬ moˍ awˬ suhˉ a yeˇ uiˍ ve kanˉ htaꞈ gʼa te tuˬ yoˬ. Yaꞈ hkʼaˇ, maˇ maw maw kʼo fawˉ mehˍ ve htaꞈ gʼa hkanˍ tuˬ yoˬ. Yawˇ hui lehˬ, awˬ baˬ hpawˇ fawˉ mehˍ ve maˇ kʼoˆ, awˬ hkʼaw hpawˇ kawˆ tuˬ htaꞈ maˇ kʼoˆ, gʼa hkanˍ htaˇ, Gʼuiˬ sha htaꞈ ka tiꞈ yeˬ tuˬ laˇ. Heˍlaˍsaˆ Liꞈ hpu hkʼaw bvuhꞈ taˍ ve liꞈ 21 kʼoˆ lehˬ, beˆ maˍ piˇ leh awˬ gʼaˇ piˇ ve yoˬ.

Roˉmaꞈ liꞈ te leh Heˍbrehˇ liꞈ hkʼa gaˬ tcuh yaˇ Pawˇluꞈ bvuhꞈ taˍ ve liꞈ 14 kʼoˆ cawˬ ve yoˬ. Liꞈ chi teˇ hpaˍ lehˬ, haꞈ yuˬ ve chaw awˬ meh leh Hkriꞈ yaˇ awˬ moˍ awˬ meh awˬ hkʼaˇ suh gʼaꞈ kuˬ ve yoˬ. Pawˇluꞈ bvuhꞈ taˍ ve liꞈ chi teˇ hpaˍ hkʼaw lo cawˬ ve teˇ lawn lawn htaꞈ dawˇ nyi sheˍ.

Awˬ liˇ awˬ hkʼaˇ awˬ lawn shaˍ tiꞈ piˇ ve yoˬ. Haˉ chawˇ haˉ paˆ te ve chaw, guiˇ yaꞈ ve chaw, leh awˬ nu ve uiˍ ve venˇ baˆ te ve chaw lehˬ, “Gʼuiˬ sha ve mvuhˇ miˬ awˬ hkʼaw lo maˇ gʼa loꞈ˗e”. (Gaˍlaˍtiˆ 5:19-21; 1 Kawˇrenˍhtuˆ 6:9-11) Gʼuiˬ sha htaꞈ oˉ kʼoˍ pui ve chaw laiˉ chaw ceuˬ cawˬ ve htawˇ, nyi ma teˇ shiˍ tiˉ gʼa cawˬ ve yoˬ. (Roˉmaꞈ 2:11; Eˇfeˇsuꞈ 4:1-6) Yawˇ hui lehˬ, yonˍ ve awˬ chawˇ loˍ ve hkʼe ha lehˬ ha kʼa ga piˇ ve yoˬ. (2 Kawˇrenˍhtuˆ 9:7) Pawˇluꞈ kʼoˆ ve, “Hkʼaˬ htaˆ kaꞈ bon lawˬ tcuhˉ taˍ˗oꞈ.” Oˉ kʼoˍ pui ve chaw yawˇ hui dawˇ haˍ tuˬ hkʼa peu˗eˬ bon lawˬ ve hkʼaw Yaˬhoˉvaˬ htaꞈ hto piˇ tuˬ yawˇ awˬ gʼaˇ piˇ ve yoˬ. (1 Hteˇsaˍlawˇniˆ 5:17; 2 Hteˇsaˍlawˇniˆ 3:1; Hpiˇliˇpiˆ 4:6, 7) Bon lawˬ hkawˇ htaꞈ Gʼuiˬ sha na yuˬ laˇ tuˬ awˬ pon, yawˇ hui yonˍ ve hkʼaw gʼa lawˬ ve yoˬ. (Heˍbrehˇ 11:6)

Yehˬ kʼa hkʼaw uiˍ la mvuh la tuˬ aˬ htoꞈ ma teˇ ceuˬ ga laˇ gʼa tuˬ le. Awˬ hpawˇ lehˬ a shu yawˇ awˬ to htaꞈ haꞈ ve hkʼe, awˬ miˇ ma htaꞈ haꞈ cawˇ ve yoˬ. Awˬ miˇ ma kaꞈ a shu yawˇ awˬ hpawˇ htaꞈ nyi ma awˬ tawˬ hkʼa gaˬ yawˆ yan cawˇ ve yoˬ. Yaˇ teˇ hpaˍ, awˬ pa awˬ e hkawˇ htaꞈ na yuˬ cawˇ ve yoˬ. Awˬ lawn kʼo, chi hkʼe te tuˬ Gʼuiˬ sha nyi hkʼaˇ suh ve yoˬ. Awˬ pa awˬ e lehˬ, Gʼuiˬ sha ve awˬ liˇ htaꞈ cuˇ leh yaˇ teˇ hpaˍ htaꞈ haꞈ pehnˇ ve awˬ hkʼaw lo maˍ tuˬ loˍ ve yoˬ. (Eˇfeˇsuꞈ 5:22–6:4; Kawˇlawˇsehˇ 3:18-21)

Gʼuiˬ sha dawˇ law taˍ ve awˬ lawn hkʼa tawˍ lehˆ kʼaoˍ maˍ laˇ ve yoˬ. Hkriꞈ gaˬ la htaˇ hkʼa gaˬ, Iˉsaˍreˍlaˆ chaw htaꞈ Moˉseˍ ve Awˬ liˇ tawˇ hkawˇ laiˉ hpawˇ haꞈ shaˉ leh sheh kʼai piˇ ve yoˬ. (Gaˍlaˍtiˆ 3:24) Yaꞈ hkʼaˇ, Hkriꞈ yaˇ lehˬ Gʼuiˬ sha htaꞈ oˉ kʼoˍ pui tuˬ awˬ pon Awˬ liˇ tawˇ hkawˇ chi htaꞈ yehˇ tuˬ maˇ loˍ. Yuˇdaꞈ chaw Hkriꞈ yaˇ htaꞈ bvuhꞈ piˇ taˍ ve Heˍbrehˇ liꞈ awˬ hkʼaw lo, Awˬ liˇ tawˇ hkawˇ chi ve tcuhˉ kuiˬ leh, Gʼuiˬ sha dawˇ law taˍ ve hkʼe Hkriꞈ te biˇ la ve awˬ hkʼaˇ Pawˇluꞈ hkʼa tawˍ lehˆ kʼaoˍ maˍ piˇ ve yoˬ. Pawˇluꞈ kʼaoˍ maˍ piˇ ve, Awˬ liˇ tawˇ hkawˇ laiˉ hpawˇ lehˬ awˬ heˆ hpehꞈ ve yoˬ. Tawˇ pa haˉ te kʼo, to nuˇ to shaˆ tuˉ tanˇ ve teˇ ceuˬ Yeˍsuˆ a shaꞈ tanˇ laˇ tuˬ ve awˬ heˆ hpehꞈ ve yoˬ. Chi ve lehˬ, venˇ baˆ awˬ tehˬ hpehˇ laˇ gʼa ve yoˬ. (Heˍbrehˇ 10:1-4) Yeˍsuˆ suh ve teˇ ceuˬ htaꞈ cuˇ ve hkʼaw lo, ka tiꞈ shaˉ caˆ Awˬ liˇ tawˇ hkawˇ chi ve htaꞈ maˇ kʼawꞈ yehˇ tuˬ, Gʼuiˬ sha hkʼaˇ pehˍ ve yoˬ. (Kawˇlawˇsehˇ 2:13-17; Heˍbrehˇ 8:13)

Hkriꞈ yaˇ awˬ moˍ hkʼaw hteˇ˗ehˍ shawˇ˗ehˍ te tuˬ beˆ maˍ piˇ ve yoˬ. Hkriꞈ yaˇ awˬ moˍ hkʼaw ha lehˬ ha kʼa awˬ vuiˬ pfuhˇ ve chaw hawˉ hkʼaˆ lehˬ, daꞈ jaˇ ve awˬ liˇ awˬ hkʼaˇ leh co ha hpawˇ awˬ gʼaˇ gʼa cawˬ ve yoˬ. (1 Tiˆmoˉseˍ 3:1-10, 12, 13; Tiˇtuˆ 1:5-9) Yaˬhoˉvaˬ Gʼuiˬ sha htaꞈ oˉ kʼoˍ pui ve chaw, teˇ gʼaˇ leh teˇ gʼaˇ awˬ gʼaˇ piˇ daꞈ tuˬ hkʼaˬ htaˆ kaꞈ teˇ geh hpawnˬ daꞈ cawˇ ve yoˬ. (Heˍbrehˇ 10:24, 25) Oˉ kʼoˍ pui tuˬ hpawnˬ daꞈ ve teˇ ceuˬ uiˍ la daꞈ la kuiˬ leh awˬ bon gʼa kuiˬ hpehꞈ cawˇ ve yoˬ. (1 Kawˇrenˍhtuˆ 14:26, 31)

Pawˇluꞈ Tiˆmoˉseˍ htaꞈ liꞈ 2 kʼoˆ teˇ kʼoˆ bvuhꞈ piˇ htaˇ, tcuh yaˇ chi teˇ gʼaˇ Roˉmaꞈ venˇ hkʼaw chehˇ taˍ ve yoˬ. Yawˇ htaꞈ suhˉ taˆ tuˬ haw taˍ ve yoˬ. Yawˇ geh ca guiˇ la haˆ ve chaw hkʼaˬ nyiˇ gʼaˇ maˇ cawˬ. Yawˇ ve awˬ yanˇ ngeh jaˇ ve yoˬ tehꞈ Pawˇluꞈ shiˍ ve yoˬ. Yawˇ kʼoˆ ve, “Daꞈ jaˇ ve bawˆ daꞈ tuˬ htaꞈ ngaˬ bawˆ daꞈ peuˬ. Gʼuiˇ daꞈ ve teˇ ceuˬ htaꞈ awˬ leh hkʼa gaˬ ngaˬ gʼuiˇ peuˬ. Yonˍ ve teˇ ceuˬ htaꞈ ngaˬ hkʼa dehꞈ vawˆ taˍ peuˬ.” (2 Tiˆmoˉseˍ 4:7) Oˇ ve hkʼawꞈ nawˉ, maˇ maw maw Pawˇluꞈ yonˍ ve htaꞈ pa taw shu tiˇ pehˍ piˇ ve htaꞈ shuˍ ve yoˬ. Yaꞈ hkʼaˇ, chi beuꞈ hkʼa gaˬ tcuh yaˇ chi teˇ gʼaˇ ve liꞈ teˇ hpaˍ Gʼuiˬ sha htaꞈ awˬ tehˬ ve oˉ kʼoˍ pui ve chaw hui htaꞈ beˆ maˍ piˇ chehˇ sheˍ ve yoˬ.

—Roˉmaꞈ liꞈ; 1 leh 2 Kawˇrenˍhtuˆ liꞈ; Gaˍlaˍtiˆ liꞈ; Eˇfeˇsuꞈ liꞈ; Hpiˇliˇpiˆ liꞈ; Kawˇlawˇsehˇ liꞈ; 1 leh 2 Hteˇsaˍlawˇniˆ liꞈ; 1 leh 2 Tiˆmoˉseˍ liꞈ; Tiˇtuˆ liꞈ; Hpiˇleˍmonˍ liꞈ; Heˍbrehˇ liꞈ hkʼaw yuˬ laˬ ve yoˬ.