CHAW yaˇ maˇ la ve teˇ yanˇ, venˇ baˆ leh haiˬ ve awˬ ceuˬ miˬ guiˬ hkʼoˆ zuhˇ kʼai ve vaiˇ jaˇ. Haiˬ ve chaw htaꞈ Gʼuiˬ sha te luˬ tuˬ yoˬ tehꞈ, tcuh kaˍ paˍ Eˇnawˆ teˇ gʼaˇ tiˉ shaˍ tiꞈ piˇ ve yoˬ. Haiˬ ve awˬ ceuˬ kʼawꞈ maˇ la chehˇ ve yoˬ. Mvuhˇ naw ma tcuh yaˇ teˇ gʼaˇ gʼaˇ Yaˬhoˉvaˬ htaꞈ hpfuhˆ leh mvuhˇ naw ma hkʼoˆ yawˇ hui ve chehˇ kuiˬ htaꞈ baˬ taˉ hkʼawꞈ nawˉ, chaw yaˇ ve awˬ hoꞈ awˬ han pa leh, yaˇ miˇ htaꞈ awˬ miˇ ma te ve yoˬ. Chi hkʼe te ve lehˬ Gʼuiˬ sha a loˍ maˇ cawˇ leh, Neˍfiˍliˆ tehꞈ kuˬ ve yaˇ naˬ hpaˬ paw la ve yoˬ. Chaw lonˉ chi haiˬ jaˇ leh tiˇ pehˍ daꞈ ve teˇ ceuˬ cawˬ maˇ la ve yoˬ. Miˬ guiˬ hkʼoˆ Gʼuiˬ sha yawˇ te hpanˍ ve awˬ ceuˬ luˬ ve sheˆ ve pa taw nyi ma naˬ jaˇ ve yoˬ.

Eˇnawˆ hkʼawꞈ nawˉ haiˬ ve miˬ guiˬ yaˇ geh peun daꞈ ve chaw teˇ gʼaˇ Noˉaꞈ leh yawˇ ve yehˬ kʼa Gʼuiˬ sha mehˆ gʼuˇ suhˍ cawˇ ve htaꞈ coˇ caˇ leh te ve yoˬ. Oˇ teˇ co˗e haiˬ ve chaw htaꞈ te luˬ tuˬ Gʼuiˬ sha dawˇ cheˆ ve yoˬ. Noˉaꞈ leh to nuˇ to shaˆ teˇ ceuˬ le le htaꞈ Gʼuiˬ sha haꞈ shaˉ piˇ tuˬ, paw kʼoˍ htaꞈ shuˍ ve haw loꞈ kʼoˍ lonˉ te˗o tehꞈ Gʼuiˬ sha kʼoˆ piˇ ve yoˬ. Noˉaꞈ ve yehˬ kʼa, to nuˇ to shaˆ laiˉ ceuˬ iˉ kaˆ lonˉ htonˍ ve htaꞈ haw loꞈ kʼoˍ lonˉ hkʼaw ponˬ tuˬ yoˬ. Noˉaꞈ Gʼuiˬ sha hkawˇ na yuˬ ve yoˬ. Noˉaꞈ haw loꞈ kʼoˍ lonˉ htaꞈ laiˉ chi hkʼawꞈ te ve awˬ yanˇ hkʼaw lo “hteˇ ve cawˇ ve awˬ lawn” bon hto toˇ shehˍ hpaˇ kaꞈ hpehꞈ ve yoˬ. (2 Peˍtruˆ 2:5) Iˉ kaˆ htonˍ ve htaꞈ shu ponˬ tuˬ yawˇ shaˍ tiꞈ piˇ ve yoˬ. Yaꞈ hkʼaˇ, yawˇ hui shawˍ baˬ ve yoˬ. Noˉaꞈ ve yehˬ kʼa leh to nuˇ to shaˆ haw loꞈ kʼoˍ lonˉ hkʼaw loꞈ˗e ve awˬ yanˇ gaˬ peuˬ. Oˇ ve hkʼawꞈ nawˉ Gʼuiˬ sha yehˬ miˉ hoˆ piˇ leh mvuhˇ yeˬ tanˬ laˬ ve yoˬ.

40 nyi 40 haˉ mvuhˇ yeˬ lonˉ laˬ leh miˬ guiˬ hkʼa peu˗eˬ iˉ kaˆ hoˆ beh ve yoˬ. Haiˬ ve chaw yaˇ mehˉ kʼai ve yoˬ. Laiˉ ha pa gaˬ leh iˉ kaˆ tanˬ yawnˇ yaꞈ˗e leh haw loꞈ kʼoˍ hkʼaw pui hkʼoˆ lo kʼaˉ taˍ ve yoˬ. Yawˇ hui haw loꞈ kʼoˍ hkʼaw teˇ hkʼawꞈ chehˇ taˉ leh tawˆ la ve yoˬ. Noˉaꞈ Yaˬhoˉvaˬ htaꞈ chiˇ mvuh tuˬ awˬ pon tuˉ tanˇ piˇ ve yoˬ. Gʼuiˬ sha haꞈ yuˬ leh a shaꞈ teꞈ ve awˬ ceuˬ htaꞈ iˉ kaˆ maˇ kʼawꞈ htonˍ pehˍ tuˬ, ka tiꞈ te piˇ ve yoˬ. Yaˬhoˉvaˬ lehˬ, nyi ma sha ve ka tiꞈ chi ve htaꞈ dawˇ nawˇ ve shaˉ hkiˆ hpehꞈ tuˬ aˉ laˇ miˬ shiˉ jaw tawˆ la piˇ ve yoˬ.

Iˉ kaˆ htonˍ peuˬ hkʼawꞈ nawˉ, Gʼuiˬ sha chaw yaˇ htaꞈ awˬ liˇ tawˇ hkawˇ awˬ suhˉ piˇ ve yoˬ. Gʼuiˬ sha yawˇ hui htaꞈ shaˍ caˇ tuˬ a hkaw˗anˬ piˇ ve yoˬ. Yaꞈ hkʼaˇ, suhˍ caˇ tuˬ a hkaw˗anˬ maˇ piˇ. Noˉaꞈ ve awˬ yaˇ awˬ duˬ miˬ guiˬ hkʼoˆ zuhˇ kʼai tuˬ yawˇ tawˇ piˇ ve yoˬ. Yaꞈ hkʼaˇ, teˇ hpaˍ hpaˍ maˇ na yuˬ. Neˍyawˇdaˆ meh ve sheh kʼai shehˍ hpaˇ awˬ hawˉ lo yawˇ hui hpoˆ la leh Baˍbuˍlonˍ venˇ hkʼaw lo taˆ yehˬ lonˉ tanˬ te ve yoˬ. Chaw yaˇ miˬ guiˬ hkʼoˆ zuhˇ kʼai tuˬ Gʼuiˬ sha tawˇ piˇ ve hkawˇ htaꞈ te yaꞈ gaˇ ve yoˬ. Yaꞈ hkʼaˇ, Gʼuiˬ sha chaw hpfuhˆ hui ve tawˇ hkawˇ teˇ hkawˇ tiˉ ve htaꞈ laiˉ hkawˇ hpehꞈ la piˇ ve yoˬ. Yawˇ hui na maˇ gʼa daꞈ ve pa taw, taˆ yehˬ oˇ ve htaꞈ baˬ taˉ leh pehˉ tiˉ pehˉ shan kʼai ve yoˬ.

—Awˬ hkuiˉ puiˍ liꞈ 6 te leh 11; Yuˇdaꞈ liꞈ 14, 15 hkʼaw yuˬ laˬ ve yoˬ.