IˉSAˍREˍLAˆ chaw Hkaˍnanˍ mvuhˇ miˬ lo maˇ loꞈ˗e sheˍ gʼuˇ suhˍ laiˉ ha hkʼawꞈ htaˇ, mvuhˇ miˬ oˇ ve Aˍbraˍhanˍ ve awˬ yaˇ awˬ duˬ ve hpehꞈ tuˬ yoˬ tehꞈ, Yaˬhoˉvaˬ ka tiꞈ te taˍ ve yoˬ. Chi teˇ hkui Yawˇsuˆ sheh kʼai ve awˬ hawˉ lo Ka tiꞈ te taˍ ve mvuhˇ miˬ hkʼaw loꞈ˗e tuˬ yawˇ hui gu hehnˇ taˍ˗oˬ.

Hkaˍnanˍ mvuhˇ miˬ chaw hui htaꞈ te luˬ tuˬ, Gʼuiˬ sha dawˇ cheˆ taˍ ve yoˬ. Mvuhˇ miˬ hkʼaw chehˇ ve chaw pehꞈ hkʼaˇ zuhˆ hkʼaˇ chaꞈ chiˆ ve hkʼa biˇ te chehˇ leh tiˇ pehˍ daꞈ ve yoˬ. Chi htaꞈ pa taw, Iˉsaˍreˍlaˆ chaw bawˆ gʼaˇ ve Hkaˍnanˍ mvuhˇ miˬ ve venˇ teˇ hpaˍ htaꞈ te luˬ piˇ ve yoˬ.

Mvuhˇ miˬ hkʼaw maˇ loꞈ˗e sheˍ gʼuˇ suhˍ htaˇ, Yawˇsuˆ chaw jaˆ nyiˇ gʼaˇ htaꞈ ca jaˆ nyi peu ve yoˬ. Yawˇ huiˉ maˬ Iˉsaˍreˍlaˆ chaw hpehꞈ ve yoˬ tehꞈ shiˍ ve htawˇ, Yeˍriˆhkoˇ venˇ hkʼaw Raˍhaˆ meh ve yaˇ miˇ yawˇ huiˉ maˬ htaꞈ aˉ hkʼaw lo haˉ tcuh leh ga piˇ ve yoˬ. Raˍhaˆ lehˬ, Iˉsaˍreˍlaˆ ve Gʼuiˬ sha htaꞈ yonˍ ve yoˬ. Awˬ lawn kʼo, Yaˬhoˉvaˬ yawˇ ve chaw htaꞈ ponˬ piˇ jaw ve awˬ lawn kaˇ jaw ve yoˬ. Yawˇ lehˬ chaw jaˆ htaꞈ yawˇ leh yawˇ yehˬ kʼa htaꞈ ponˬ laˇ tuˬ ka tiꞈ te tcuh ve yoˬ.

Oˇ ve hkʼawꞈ nawˉ, Iˉsaˍreˍlaˆ chaw Hkaˍnanˍ mvuhˇ miˬ hkʼaw gaˬ la htaˇ, Yeˍriˆhkoˇ venˇ htaꞈ loꞈ bawˆ leh Yaˬhoˉvaˬ anˇ lawꞈ lawꞈ Yeˍriˆhkoˇ lanˇ venˇ htaꞈ paˆ ce piˇ ve yoˬ. Yawˇsuˆ ve maꞈ yaˇ venˇ oˇ ve htaꞈ te luˬ piˇ ve yoˬ. Yaꞈ hkʼaˇ, Raˍhaˆ leh yawˇ ve yehˬ kʼa htaꞈ ponˬ piˇ ve yoˬ. Hkawꞈ hkʼawꞈ ceh tiˉ Yawˇsuˆ Ka tiꞈ te taˍ ve mvuhˇ miˬ maˇ˗awˍ ve venˇ htaꞈ bawˆ gʼaˇ vaiˇ jaˇ. Peuˬ leh, Iˉsaˍreˍlaˆ chaw ceuˬ teˇ hpaˍ htaꞈ mvuhˇ miˬ pehˬ piˇ ve yoˬ.

Yawˇsuˆ Iˉsaˍreˍlaˆ chaw hui htaꞈ maw chaweh sheh kʼai peuˬ hkʼawꞈ nawˉ, Yawˇsuˆ mvuhˇ miˬ yaˇ htaꞈ kuˬ hpawnˬ ve yoˬ. Awˬ puˍ awˬ pi hui htaꞈ Yaˬhoˉvaˬ te piˇ ve awˬ hkʼaˇ htaꞈ yawˇ gʼaꞈ dawˇ nyi leh Yaˬhoˉvaˬ hkawˇ htaꞈ na yuˬ tuˬ yawˇ hui htaꞈ awˬ gʼaˇ piˇ ve yoˬ. Yawˇsuˆ leh yawˇ geh teˇ geh kanˉ te ve chaw mawˇ chaw kehˉ suh peuˬ hkʼawꞈ nawˉ, Iˉsaˍreˍlaˆ chaw Yaˬhoˉvaˬ htaꞈ baˬ taˉ leh awˬ kaˍ awˬ nu gʼuiˬ sha shaˉ hoꞈ htaꞈ oˉ kʼoˍ ca pui ve yoˬ. Aˬ laˬ hkʼe 300 hkʼawꞈ, Yaˬhoˉvaˬ ve awˬ liˇ tawˇ hkawˇ htaꞈ hkʼaˬ htaˆ chi htaˆ kaꞈ maˇ na yuˬ. Awˬ yanˇ oˇ ve lehˬ, Iˉsaˍreˍlaˆ ve canˇ paˍ Hpiˇliˇtiˆ leh awˬ kaˍ awˬ nu chaw yawˇ hui htaꞈ fawˉ mehˍ ve teˇ yanˇ, Yaˬhoˉvaˬ maˇ ga piˇ. Yaꞈ hkʼaˇ, Iˉsaˍreˍlaˆ chaw hui Yaˬhoˉvaˬ htaꞈ kuˬ htaˇ, yawˇ lehˬ Iˉsaˍreˍlaˆ chaw htaꞈ ponˬ piˇ tuˬ suhˉ jehˬ shehˍ hpaˇ hkʼa peu˗eˬ 12 gʼaˇ piˇ ve yoˬ.

Aˬ sho˗eˬ htaˇ Suhˉ jehˬ shehˍ hpaˇ hui awˬ lawn Suhˉ jehˬ ve liꞈ hkʼaw bvuhꞈ keu taˍ ve yoˬ. Awˉ lawˉ peuˇ teˇ gʼaˇ Awˇtanˍyeˍlaˆ te leh Sanˍsonˍ gaˬ la ve yoˬ. Sanˍsonˍ lehˬ miˬ guiˬ hkʼoˆ shu aꞈ kehˉ awˬ to awˬ gʼaˇ uiˍ jaˇ ve chaw teˇ gʼaˇ hpehꞈ ve yoˬ. Yaˬhoˉvaˬ htaꞈ na yuˬ ve teˇ ceuˬ awˬ bon cawˬ ve, leh maˇ na yuˬ ve teˇ ceuˬ luˬ kuiˬ hkʼaw gaˬ ve yoˬ tehꞈ, Suhˉ jehˬ ve liꞈ hkʼaw teˇ pawˆ peuˬ teˇ pawˆ awˬ hkʼaˇ lonˉ chi ve htaꞈ gʼa mawˬ ve yoˬ.

—Yawˇsuˆ liꞈ; Suhˉ jehˬ ve liꞈ; Oˉ kʼoˍ pui ve 18:24, 25 hkʼaw yuˬ laˬ ve yoˬ.