SANˍSONˍ teˇ co˗e peuˬ hkʼawꞈ nawˉ, Saˍmo˗eˍlaˆ Iˉsaˍreˍlaˆ mvuhˇ miˬ hkʼaw tcuh kaˍ paˍ leh suhˉ jehˬ paˍ hpehꞈ ve yoˬ. Awˬ kaˍ awˬ nu chaw ceuˬ hkʼa shuˍ shuˍ jawˇ mawˇ cawˬ tuˬ Iˉsaˍreˍlaˆ chaw yawˇ geh teˇ hkui teˇ hkui lawˬ ve yoˬ. Chi hkʼe lawˬ ve htaꞈ Yaˬhoˉvaˬ nyi hkʼaˇ maˇ suh, yaꞈ hkʼaˇ lawˬ ve hkʼe piˇ tuˬ Saˍmo˗eˍlaˆ htaꞈ yawˇ awˬ hkʼaˇ beˆ maˍ piˇ ve yoˬ. Gʼuiˬ sha lehˬ nyi ma nuˇ nehˬ ve Sawˉluꞈ htaꞈ leuˆ yuˬ leh jawˇ mawˇ te tcuh ve yoˬ. Yaꞈ hkʼaˇ, Jawˇmawˇ Sawˉluꞈ nyi ma uiˍ leh maˇ na yuˬ ve chaw hpehꞈ la ve yoˬ. Yaˬhoˉvaˬ lehˬ, Jawˇmawˇ Sawˉluꞈ htaꞈ maˇ kʼawꞈ haꞈ yuˬ piˇ˗o. Yawˇ Saˍmo˗eˍlaˆ htaꞈ kʼoˆ piˇ ve, awˬ suhˉ teˇ gʼaˇ htaꞈ kʼawꞈ teh piˇ˗oˆ. Oˇ ve teˇ gʼaˇ yaˇ nehˬ Daˍviˆ hpehꞈ ve yoˬ. Laiˉ hkʼawꞈ hkʼawꞈ nawˉ Daˍviˆ jawˇ mawˇ gʼa te ve yoˬ.

Awˬ viˉ paˍ hui Sawˉluꞈ ve maꞈ yaˇ hpehꞈ htaˇ, chaw haˉ paˍ Daˍviˆ lehˬ yawˇ hui geh ca guiˇ kʼai ve yoˬ. Maꞈ yaˇ teˇ gʼaˇ le le yawˇ hui ve canˇ paˍ Gawˇliˇyaꞈ meh ve maꞈ yaˇ teˇ gʼaˇ awˬ to uiˍ jaˇ ve htaꞈ kawˆ ve yoˬ. Yawˇ lehˬ, Iˉsaˍreˍlaˆ ve Gʼuiˬ sha leh maꞈ yaˇ htaꞈ hkʼaˬ htaˆ kaꞈ maˇ shawˍ maˇ caˆ kʼoˆ chehˇ ve yoˬ. Daˍviˆ nyi ma zuhˆ leh awˬ to uiˍ ve canˇ paˍ chi teˇ gʼaˇ htaꞈ vaˇ daꞈ tuˬ yawˇ tanˬ daꞈ ve yoˬ. Chaw haˉ paˍ chi teˇ gʼaˇ yawˇ ve laꞈ caˉ hawˉ ma leh haˉ pui shiˍ teˇ hpaˍ htaꞈ ceh tiˉ yuˬ veu leh yawˇ ve canˇ paˍ hkawꞈ jaˆ hpaˆ mvuh ve chaw htaꞈ ca hpuˇ daꞈ ve yoˬ. Daˍviˆ htaꞈ Gawˇliˇyaꞈ kʼoˆ guiˇ gʼuiˬ guiˇ piˇ htaˇ, Daˍviˆ kʼawꞈ yaw hkʼawꞈ piˇ ve, yawˇ ve laꞈ caˉ lehˬ awˬ to uiˍ ve chaw laꞈ caˉ aꞈ kehˉ daꞈ ve yoˬ. Awˬ lawn kʼo, yawˇ Yaˬhoˉvaˬ Gʼuiˬ sha ve awˬ meh hkʼaw bawˆ ve yoˬ. Daˍviˆ lehˬ, haˉ pui teˇ shiˍ yuˬ leh Gawˇliˇyaꞈ htaꞈ tiˇ pehˍ leh Gawˇliˇyaꞈ ve aˉ htaw yuˬ leh yawˇ ve oˉ kʼoˍ htaꞈ tawˆ cheˆ piˇ ve yoˬ. Hpiˇliˇtiˆ ve maꞈ yaˇ kawˆ jaˇ leh hpaw kʼai ve yoˬ.

Awˉ lawˉ htaˇ lehˬ, Sawˉluꞈ Daˍviˆ haꞈ hanˉ ve htaꞈ dawˇ cawˇ jaˇ leh yawˇ htaꞈ maꞈ poˍ te tcuh ve yoˬ. Yaꞈ hkʼaˇ, Daˍviˆ te gʼa ve awˬ ceuˬ, Sawˉluꞈ hkawehˉ ve nyi ma cawˬ la ve yoˬ. Daˍviˆ gʼa hpaw˗e leh yawˇ a shaꞈ ponˬ tuˬ laiˉ hkʼawꞈ ca vaꞈ toˇ chehˇ ve yoˬ. Yaꞈ hkʼaˇ, yawˇ htaꞈ tiˇ pehˍ gaˇ ve Jawˇmawˇ Sawˉluꞈ htaꞈ Daˍviˆ ka tiꞈ yeˬ chehˇ sheˬ ve yoˬ. Awˬ lawn kʼo, Yaˬhoˉvaˬ Gʼuiˬ sha Jawˇmawˇ Sawˉluꞈ htaꞈ teh taˍ piˇ ve chaw hpehꞈ ve yoˬ. Awˬ leh meuˇ gaˬ leh Sawˉluꞈ lehˬ, maꞈ bawˆ daꞈ kuiˬ lo suh ve yoˬ. Maˇ maw maw gaˬ leh, Yaˬhoˉvaˬ ka tiꞈ te taˍ ve hkʼe Daˍviˆ jawˇ mawˇ gʼa te ve yoˬ.

Daˍviˆ jawˇ mawˇ hpehꞈ htaˇ, Yaˬhoˉvaˬ awˬ pon bon yehˬ te piˇ gaˇ jaˇ ve yoˬ. Yaꞈ hkʼaˇ, Yaˬhoˉvaˬ Daˍviˆ htaꞈ kʼoˆ piˇ ve, yawˇ ve awˬ ceuˬ awˬ hkʼaˇ teˇ gʼaˇ te tuˬ yoˬ. Oˇ ve teˇ gʼaˇ lehˬ, Daˍviˆ ve yaˇ paˍ Sawˉlaꞈmonˍ hpehꞈ ve yoˬ. Gʼuiˬ sha Daˍviˆ htaꞈ ka tiꞈ te leh hkʼawꞈ piˇ ve, awˬ kaˍ awˬ nu chaw ceuˬ htaꞈ maˇ shuˍ ve jawˇ mawˇ ve awˬ ceuˬ awˬ hkʼaˇ yawˇ geh tawˆ la tuˬ yoˬ tehꞈ kʼoˆ piˇ ve yoˬ. Eˍdenˍ hko hkʼaw lo ka tiꞈ te taˍ ve hkʼe awˬ ceuˬ awˬ hkʼaˇ chi Htaiˍ hkʼawꞈ laˇ shehˍ hpaˇ paw la tuˬ yoˬ. Chaw oˇ ve teˇ gʼaˇ lehˬ, Meˍsiˉyaꞈ hpehꞈ ve yoˬ. Kʼoˆ gaˇ ve tcuhˉ kuiˬ lehˬ Gʼuiˬ sha “leuˆ yuˬ taˍ ve chaw teˇ gʼaˇ” hpehꞈ ve yoˬ. Yaˬhoˉvaˬ ka tiꞈ te taˍ ve Meˍsiˉyaꞈ lehˬ, Gʼuiˬ sha ve mvuhˇ miˬ hkʼaw co co taiˍ taiˍ yeˬ ve Hkunˉ hawˉ hkanˇ hpehꞈ tuˬ yoˬ.

Nyi ma awˬ tawˬ hkʼa gaˬ Gʼuiˬ sha ve bon htaꞈ Daˍviˆ dawˇ nawˇ leh, bon yehˬ te tuˬ awˬ pon awˬ hpfuhˇ hkʼaˆ jaˇ ve sho, leh mawˇ teˇ hpaˍ shaw hpoˆ ve yoˬ. Yawˇ lehˬ, dawˇ pawnˍ piˇ ve kʼa muiˬ hkawˇ laiˉ hkawˇ htaꞈ bvuhꞈ tawˆ ve yoˬ. Yawˇ suh la paˇ neˇ htaˇ Daˍviˆ kʼoˆ ve, “Gʼuiˬ sha ve Awˬ ha hpu lehˬ, ngaˬ awˬ hkʼaw lo chehˇ leh tawˇ yaw chehˇ ve yoˬ. Yawˇ ve tawˇ hkawˇ ngaˬ ve meuˇ guiˬ hkʼoˆ lo cawˬ taˍ ve yoˬ.” (2 Saˍmo˗eˍlaˆ 23:2)

—1 leh 2 Saˍmo˗eˍlaˆ liꞈ; 1 Raˍsaˍvanˍ liꞈ; Iˉsaˍyaˆ 9:7; Maꞈhtehˍ 21:9; Luˉkaꞈ 1:32; Yoˇhanˬ 7:42 hkʼaw yuˬ laˬ ve yoˬ.