IˉSAˍREˍLAˆ chaw Eˇjiˇtuꞈ mvuhˇ miˬ hkʼaw chehˇ leh shaˬ paw sha leh awˬ yaˇ awˬ duˬ kaꞈ shaˬ maˇ la ve yoˬ. Jawˇmawˇ Hpaˍrawˇ awˬ suhˉ teˇ gʼaˇ Yoˇsehꞈ htaꞈ maˇ shiˍ. Iˉsaˍreˍlaˆ chaw hui maˇ la ve pa taw, uˉ peunˍ paˍ fawˉ shehˍ hpaˇ chi teˇ gʼaˇ kawˆ leh yawˇ hui htaꞈ awˬ ceˬ nyiˉ te ve yoˬ. Yawˇ hui paw la gehˇ ve yaˇ paˍ teˇ gʼaˇ le le Niˍlaˆ iˉ kaˆ lawˬ hkʼaw baˬ keu ve yoˬ. Yaꞈ hkʼaˇ, haꞈ hanˉ ve awˬ e teˇ gʼaˇ yaˇ paˍ ehˉ htaꞈ paw kʼoˍ hkʼaw keu taˍ leh lo de hkʼaw faˉ taˍ ve yoˬ. Hpaˍrawˇ ve yaˇ miˇ yaˇ ehˉ htaꞈ gʼa mawˬ htaˇ, Moˉseˍ tehꞈ meh piˇ leh Eˇjiˇtuꞈ jawˇ mawˇ ve awˬ ceuˬ awˬ hkʼaˇ geh hu piˇ ve yoˬ.

Moˉseˍ a shaꞈ 40 hkʼawꞈ gaˬ htaˇ, Iˉsaˍreˍlaˆ chaw teˇ gʼaˇ htaꞈ ga piˇ tuˬ Eˇjiˇtuꞈ chaw kanˉ nyi paˍ teˇ gʼaˇ htaꞈ vaˇ daꞈ ve yoˬ. Moˉseˍ vuiˇ kuiˬ lo hpaw chehˇ taˍ ve yoˬ. Moˉseˍ a shaꞈ 80 hkʼawꞈ gaˬ htaˇ, Yaˬhoˉvaˬ yawˇ htaꞈ Eˇjiˇtuꞈ mvuhˇ miˬ lo kʼawꞈ kʼoꞈ˗e tcuh leh Gʼuiˬ sha ve chaw htaꞈ hpehˇ piˇ tuˬ Hpaˍrawˇ geh kʼai tcuh ve yoˬ.

Hpaˍrawˇ maˇ na htaˇ, Gʼuiˬ sha kawˆ tuˬ 10 ceuˬ Eˇjiˇtuꞈ mvuhˇ miˬ hkʼaw gaˬ la piˇ ve yoˬ. Teˇ pawˆ leh teˇ pawˆ kawˆ tuˬ htaꞈ Hpaˍrawˇ jaw kʼai gʼa tuˬ Moˉseˍ awˬ yanˇ piˇ ve yoˬ. Yaꞈ hkʼaˇ, Hpaˍrawˇ oˉ kʼoˍ heh leh Moˉseˍ leh Gʼuiˬ sha Yaˬhoˉvaˬ tawˇ piˇ ve htaꞈ maˇ gʼaꞈ te. Awˬ leh meuˇ gaˬ leh, kawˆ tuˬ 10 ceuˬ teˇ ceuˬ gaˬ leh mvuhˇ miˬ oˇ ve hkʼaw ve yaˇ paˍ uiˍ hkʼa peu˗eˬ suh peuˬ ve yoˬ. Yaꞈ hkʼaˇ, Yaˬhoˉvaˬ hkawˇ na yuˬ ve yehˬ kʼa yaˇ paˍ uiˍ maˇ suh. Awˬ lawn kʼo, yawˬ ehˉ awˬ suhˍ yehˬ miˉ hpeꞈ hkʼoˆ shehˆ taˍ ve yoˬ. Yaˇ paˍ uiˍ htaꞈ ca tiˇ pehˍ la ve Gʼuiˬ sha ve mvuhˇ naw ma tcuh yaˇ lehˬ, Gʼuiˬ sha hkawˇ na yuˬ ve yehˬ kʼa hkʼaw maˇ loꞈ˗e. Anˇ lawꞈ lawꞈ ponˬ laˇ ve chi htaꞈ Iˉsaˍreˍlaˆ chaw dawˇ nawˇ leh teˇ hkʼawꞈ teˇ pawˆ Paˍsaˍhkaˍ tehꞈ kuˬ ve pawehˇ tanˬ te ve yoˬ.

Hpaˍrawˇ yaˇ paˍ uiˍ suh peuˬ hkʼawꞈ nawˉ, yawˇ lehˬ Moˉseˍ leh Iˉsaˍreˍlaˆ chaw hkʼa peu˗eˬ htaꞈ Eˇjiˇtuꞈ mvuhˇ miˬ hkʼaw tawˆ˗e tuˬ tawˇ piˇ ve yoˬ. Yawˇ hui tanˬ tawˆ kʼai ve yoˬ. Yaꞈ hkʼaˇ, Hpaˍrawˇ nyi ma kʼawꞈ pa leh iˉ mvuhˇ lawˬ maꞈ yaˇ maˇ maˇ awˬ hkʼaˇ suh gʼaꞈ yuˬ kʼai ve yoˬ. Yawˇ hui Laˇ tsuhˇ gʼuiˬ nyi pfuhˍ lo gaˬ leh kʼai maˇ gaˬ˗o. Yaˬhoˉvaˬ Laˇ tsuhˇ gʼuiˬ nyi htaꞈ nyiˇ hkoˇ pehˬ piˇ leh nyiˇ paˉ paˉ kaꞈ gʼoꞈ pa ko taˍ ve hkʼe Iˉsaˍreˍlaˆ chaw goˇ lehˍ ve miˬ guiˬ hkʼoˆ juˇ kʼai ve yoˬ. Eˇjiˇtuꞈ chaw gʼaꞈ mi la paˇ neˇ htaˇ, Gʼuiˬ sha lehˬ iˉ kaˆ paˆ ce la piˇ leh Hpaˍrawˇ leh maꞈ yaˇ hkʼa peu˗eˬ kʼa suh ve yoˬ.

Oˇ ve hkʼawꞈ nawˉ, Siˉnaˆ hkʼaw hkuiˉ puiˍ lo Yaˬhoˉvaˬ Iˉsaˍreˍlaˆ chaw hui geh teˇ geh ka tiꞈ te daꞈ ve yoˬ. A shaꞈ teꞈ chehˇ ve teˇ hpawˇ le le haꞈ shaˉ piˇ leh beˆ maˍ piˇ tuˬ, Gʼuiˬ sha Moˉseˍ htaꞈ cuˇ leh yawˇ hui htaꞈ awˬ liˇ tawˇ hkawˇ piˇ ve yoˬ. Yawˇ hui Gʼuiˬ sha uˉ peunˍ ve htaꞈ ka tiꞈ yeˬ ve kʼo, Yaˬhoˉvaˬ yawˇ hui geh chehˇ leh chaw ceuˬ chi ve lehˬ, awˬ kaˍ awˬ nu chaw ceuˬ htaꞈ kaꞈ awˬ bon yuˬ veu laˇ ve yoˬ.

Sheˉ lai jaˇ, Iˉsaˍreˍlaˆ chaw maˇ˗awˍ ve Gʼuiˬ sha htaꞈ hkʼa dehꞈ maˇ yonˍ. Yaˬhoˉvaˬ yawˇ hui htaꞈ heh puiˉ hkʼaw 40 hkʼawꞈ hkʼa gaˬ chehˇ tcuh hkʼawꞈ nawˉ, Moˉseˍ lehˬ ka tiꞈ yeˬ ve Yawˇsuˆ htaꞈ sheh kʼai tcuh ve yoˬ. Awˬ leh meuˇ gaˬ leh, Aˍbraˍhanˍ htaꞈ Gʼuiˬ sha ka tiꞈ te taˍ ve mvuhˇ miˬ hkʼaw loꞈ˗e tuˬ Iˉsaˍreˍlaˆ chaw hui gu hehnˇ taˍ peuˬ ve yoˬ.

—Tawˆ kʼai ve liꞈ; Oˉ kʼoˍ pui ve liꞈ; Heh puiˉ hkʼaw ve liꞈ; Bon maˍ ve liꞈ; Chiˇ mvuh ve 136:10-15; Tcuh yaˇ 7:17-36 hkʼaw yuˬ laˬ ve yoˬ.