LIꞈ HPU hkʼaw zuhˬ jaˇ ve liꞈ teˇ kʼoˆ co ha hpawˇ ve kʼa muiˬ hkawˇ hpehꞈ ve yoˬ. Liꞈ chi teˇ kʼoˆ bvuhꞈ peuˬ ve awˬ yanˇ aˬ laˬ hkʼe 1,000 hkʼawꞈ yehˇ ve yoˬ. Teˇ puˆ puˆ kʼo, bvuhꞈ laˬ jaw ve aꞈ kehˉ nyi ma awˬ tawˬ hkʼa gaˬ heuˆ jaˇ leh yonˍ jaˇ ve hkʼaw bvuhꞈ taˍ ve yoˬ. Choˬ kaˬ lo, chaw yaˇ ve nyi ma taˍ hkʼaˇ laiˉ ceuˬ hpeuꞈ maw laˇ ve yoˬ. Ha lehˬ ve, chiˇ mvuh ve htaꞈ tanˬ te leh nyi ma luˬ ve, dawˇ hpfuhˆ ve hkʼa gaˬ cawˬ taˍ ve yoˬ. Chiˇ mvuh ve liꞈ bvuhꞈ shehˍ hpaˇ hui lehˬ, Gʼuiˬ sha htaꞈ awˬ chawˇ muiˬ daꞈ leh gʼaˇ va ve htaꞈ gʼa mawˬ ve yoˬ. Kʼa muiˬ hkawˇ chi ve awˬ lawn teˇ hpaˍ hpaˍ htaꞈ dawˇ nyi sheˍ.

Yaˬhoˉvaˬ uˉ peunˍ keunˍ leh yawˇ htaꞈ oˉ kʼoˍ pui cawˇ leh chiˇ mvuh cawˇ ve yoˬ. Chiˇ mvuh ve liꞈ 83:18 (MGS) hkʼaw kʼoˆ ve “Nawˬ Yaˬhoˉvaˬ meh leh nawˬ teˇ gʼaˇ tiˉ miˬ guiˬ hkʼa peu˗eˬ hkʼoˆ uˉ peunˍ ve Uiˍ jaˇ mvuh jaˇ shehˍ hpaˇ hpehꞈ ve yoˬ.” Yaˬhoˉvaˬ lehˬ, hkʼa peu˗eˬ htaꞈ hpanˍ taˍ ve pa taw kʼa muiˬ hkawˇ laiˉ puˆ yawˇ htaꞈ chiˇ mvuh ve yoˬ. Tawˇ pa haˉ te kʼo, meuꞈ keu shiˍ hkʼa biˇ cawˬ ve mvuhˇ naw ma, miˬ guiˬ hkʼoˆ teꞈ chehˇ ve awˬ ceuˬ, leh chaw yaˇ awˬ to hkʼaw anˇ lawꞈ lawꞈ cawˬ ve awˬ hkʼeun chi teˇ hpaˍ yoˬ. (Chiˇ mvuh ve liꞈ 8, 19, 139, 148) Awˬ nu ve kʼa muiˬ hkawˇ yawˇ htaꞈ ka tiꞈ yeˬ ve chaw hui htaꞈ ponˬ piˇ leh haꞈ shaˉ piˇ ve Gʼuiˬ sha hpehꞈ ve pa taw Yaˬhoˉvaˬ htaꞈ awˬ meꞈ awˬ hponˇ cawˬ piˇ ve yoˬ. (Chiˇ mvuh ve liꞈ 18, 97, 138) Hteˇ cawˇ ve Gʼuiˬ sha hpehꞈ ve, shu fawˉ mehˍ ve chaw htaꞈ nyi ma sha la piˇ ve, leh haiˬ ve chaw htaꞈ ciˍ yanˍ piˇ ve pa taw kʼa muiˬ hkawˇ laiˉ puˆ yawˇ htaꞈ taˍ uiˍ taˍ mvuh ve yoˬ. (Chiˇ mvuh ve liꞈ 11, 68, 146)

Yaˬhoˉvaˬ lehˬ yawˇ htaꞈ haꞈ ve chaw htaꞈ awˬ gʼaˇ piˇ leh ga piˇ ve yoˬ. Awˬ meh bvuhˬ ve kʼa muiˬ hkawˇ Chiˇ mvuh ve liꞈ 23 hpehꞈ ve yoˬ. Oˇ kaˬ lo Daˍviˆ kʼoˆ ve, ha kʼaˉ puiˉ ve hkʼa biˇ cawˬ ve Yawˬ hawˉ shehˍ hpaˇ Yaˬhoˉvaˬ lehˬ, yawˇ ve yawˬ htaꞈ haꞈ shaˉ piˇ leh beˆ maˍ piˇ ve yoˬ. Chiˇ mvuh ve liꞈ 65:2 hkʼaw kʼoˆ maˍ piˇ ve, Yaˬhoˉvaˬ lehˬ “bon lawˬ hkawˇ htaꞈ na yuˬ laˇ ve yoˬ.” Uiˍ jaˇ ve venˇ baˆ te jaw ve chaw laiˉ gʼaˇ Chiˇ mvuh ve liꞈ 39 leh 51 hkʼaw gʼaw htaˇ nyi ma sha ve yoˬ. Awˬ lawn kʼo, Daˍviˆ yawˇ venˇ baˆ htaꞈ dawˇ hpfuhˆ leh Yaˬhoˉvaˬ venˇ baˆ hpehˇ laˇ ve htaꞈ yonˍ ve awˬ lawn nyi ma awˬ tawˬ hkʼa gaˬ kʼaoˍ maˍ laˇ ve yoˬ. Chiˇ mvuh ve liꞈ 55:22 hkʼaw a shu yawˇ ve dawˇ haˍ tuˬ Yaˬhoˉvaˬ geh teh taˉ leh Yawˇ htaꞈ hkʼa dehꞈ gʼaˇ va tuˬ awˬ gʼaˇ piˇ ve yoˬ.

Meˍsiˉyaꞈ uˉ peunˍ ve htaꞈ Yaˬhoˉvaˬ cuˇ leh miˬ guiˬ chi ve htaꞈ pa piˇ tuˬ yoˬ. Hkunˉ hawˉ hkanˇ Meˍsiˉyaꞈ awˬ lawn Chiˇ mvuh ve liꞈ teˇ tawn tawn hkʼaw kʼoˆ taˍ ve yoˬ. Chiˇ mvuh ve liꞈ 2 hkʼaw Uˉ peunˍ shehˍ hpaˇ chi teˇ gʼaˇ lehˬ, yawˇ htaꞈ tawˍ daꞈ ve haiˬ ve mvuhˇ miˬ teˇ hpaˍ htaꞈ te luˬ tuˬ yoˬ tehꞈ kʼoˆ taˍ ve yoˬ. Chiˇ mvuh ve liꞈ 72 hkʼaw hpeuꞈ maw laˇ ve, meuꞈ ve kaˆ ve, maˇ hteˇ maˇ cawˇ ve, leh fawˉ ve mehˍ ve htaꞈ peuˬ kʼai tuˬ Hkunˉ hawˉ hkanˇ chi teˇ gʼaˇ te tuˬ yoˬ. Chiˇ mvuh ve liꞈ 46:9 hkʼaw kʼoˆ taˍ ve hkʼe, Meˍsiˉyaꞈ ve mvuhˇ miˬ hkʼaw bawˆ daꞈ ve teˇ ceuˬ, maꞈ hkʼaw yehˇ ve laꞈ caˉ hkʼa peu˗eˬ htaꞈ Gʼuiˬ sha maˇ kʼawꞈ cawˬ tcuh. Chiˇ mvuh ve liꞈ 37 hkʼaw kʼoˆ taˍ ve, haiˬ ve chaw maˇ kʼawꞈ cawˬ. Yaꞈ hkʼaˇ, hteˇ ve cawˇ ve chaw miˬ guiˬ hkʼoˆ co co taiˍ taiˍ chehˇ tuˬ yoˬ. Hkʼaˬ ti chi ti lo cawˇ daꞈ hawˍ daꞈ leh gawˬ lehˍ cawˬ ve pa taw ha lehˬ chehˇ ve yoˬ.

—Chiˇ mvuh ve liꞈ hkʼaw yuˬ laˬ ve yoˬ.