Ka teꞈ te ve Meˍsiˉyaꞈ a shu hpehꞈ ve htaꞈ shiˍ tuˬ Yaˬhoˉvaˬ chaw yaˇ htaꞈ ga piˇ ve yoˬ. Gʼuiˬ sha hkʼaˬ hkʼe te piˇ ve htaꞈ dawˇ nyi sheˍ. Heˍbrehˇ Liꞈ hpu bvuhꞈ peuˬ hkʼawꞈ nawˉ 400 hkʼawꞈ hpaˆ htaˇ, Gaˍliˍlehˇ mvuhˇ miˬ awˬ na hpawˇ cawˬ ve Naˍzaˍrehˆ venˇ lo Maˍriˆ tehꞈ meh ve yaˇ miˇ haˉ maˇ dawˇ maˇ gaˇ leh ca gʼuiˇ la ve mvuhˇ naw ma tcuh yaˇ Gaˍbeˍlaˆ htaꞈ haꞈ yuˬ ve yoˬ. Yawˇ daꞈ kehˬ ve yaˇ haˉ hpehꞈ htawˇ, Gʼuiˬ sha ve awˬ gʼaˇ awˬ shaˉ awˬ ha hpu hkʼaw lo, nawˬ yaˇ paˍ paw la tuˬ yoˬ tehꞈ Gaˍbeˍlaˆ yawˇ htaꞈ kʼoˆ piˇ ve yoˬ. Yaˇ paˍ chi teˇ gʼaˇ aˬ sho˗eˬ htaˇ ka tiꞈ te taˍ ve Hkunˉ hawˉ hkanˇ hpehꞈ leh co co taiˍ taiˍ uˉ peunˍ tuˬ yoˬ. Yawˇ lehˬ Gʼuiˬ sha ve yaˇ hpu hpehꞈ ve yoˬ. Mvuhˇ naw ma hkʼoˆ lo yawˇ ve a shaꞈ htaꞈ Gʼuiˬ sha jiˆ yaꞈ la leh Maˍriˆ gʼoˇ peˬ hkʼaw keu piˇ ve yoˬ.

Awˬ meꞈ awˬ hponˇ cawˬ jaˇ ve awˬ vuiˬ chi ve htaꞈ Maˍriˆ nyi ma nuˇ nehˬ hkʼaw haꞈ yuˬ ve yoˬ. Yawˇ htaꞈ leuˆ daꞈ tuˬ ka tiꞈ te daꞈ ve Yoˇsehꞈ laꞈ shaˉ maˉ hpehꞈ ve yoˬ. Gʼuiˬ sha mvuhˇ naw ma tcuh yaˇ teˇ gʼaˇ htaꞈ peuˬ laˇ leh Maˍriˆ yaˇ hu la ve awˬ hkʼaˇ Yoˇsehꞈ htaꞈ htawˆ hkanˍ piˇ peuˬ hkʼawꞈ nawˉ, Yoˇsehꞈ Maˍriˆ htaꞈ leuˆ ve yoˬ. Yaꞈ hkʼaˇ, Behˍlehˍhehnˍ venˇ lo Maˍriˆ yaˇ paw la tuˬ yoˬ tehꞈ kʼoˆ taˍ ve hkʼe hkʼaˬ hkʼe hpehꞈ la gʼa tuˬ le. (Miˆhkaˍ 5:2) I ve venˇ oˇ ve leh aˬ laˬ hkʼe 140 kiˇ loˇ vuiˇ ve yoˬ.

Roˉmaꞈ mvuhˇ miˬ ve uˉ peunˍ paˍ miˬ guiˬ yaˇ awˬ shenˍ yuˬ tuˬ tawˇ piˇ ve yoˬ. A shu yawˇ ve paw kuiˬ lo caˇ lanˇ awˬ meh ca bvuhꞈ keu tuˬ loˍ ve yoˬ. Yoˇsehꞈ leh Maˍriˆ ve awˬ puˍawˬ pi Behˍlehˍhehnˍ venˇ lo chehˇ taˍ ve htaꞈ shuˍ ve yoˬ. Chi htaꞈ pa taw, Yoˇsehꞈ yawˇ awˬ miˇ ma yaˇ hu taˍ ve htaꞈ oˇ kaˬ lo shiˍ kʼai ve yoˬ. (Luˉkaꞈ 2:3) Maˍriˆ lehˬ, to nuˇ to shaˆ hkawˆ hkʼaw yaˇ paw la leh yaˇ ehˉ htaꞈ nuˇ loꞈ kʼoˍ hkʼaw iˉ taˍ ve yoˬ. Peuˬ leh, paw taˍ ve yaˇ ehˉ ka tiꞈ te taˍ ve Meˍsiˉyaꞈ leh Hkriꞈ hpehꞈ ve yoˬ tehꞈ, hkʼaw hkuiˉ peuˍ lo yawˬ hawˉ chehˇ ve chaw htaꞈ kʼoˆ piˇ tuˬ, Gʼuiˬ sha mvuhˇ naw ma tcuh yaˇ htaꞈ peuˬ piˇ ve yoˬ.

Yeˍsuˆ Meˍsiˉyaꞈ hpehꞈ ve yoˬ tehꞈ awˬ nu ve shaˉ hkiˆ kʼawꞈ cawˬ sheˍ ve yoˬ. Tcuh kaˍ paˍ Iˉsaˍyaˆ kʼoˆ taˍ ve, Meˍsiˉyaꞈ te tuˬ ve kanˉ htaꞈ chaw teˇ gʼaˇ yaꞈ kʼaw ca gu la tuˬ yoˬ. (Iˉsaˍyaˆ 40:3) Chaw oˇ ve teˇ lehˬ, Baˆtiˆsaˬ piˇ paˍ Yoˇhanˬ yoˬ. Yawˇ Yeˍsuˆ htaꞈ mawˬ htaˇ yawˇ kʼoˆ ve, “Miˬ guiˬ yaˇ ve venˇ baˆ htaꞈ yuˬ baˬ shehˍ hpaˇ, Gʼuiˬ sha ve Yawˬ ehˉ htaꞈ nyi˗o.” Yoˇhanˬ ve awˬ laꞈ gʼawˇ teˇ hpaˍ hpaˍ Yeˍsuˆ hkʼaˇ suh laꞈ haˉ gʼaꞈ kʼai ve yoˬ. awˬ laꞈ gʼawˇ teˇ gʼaˇ kʼoˆ ve, “Ngaˬ huiˉ maˬ Meˍsiˉyaꞈ htaꞈ gʼa mawˬ peuˬ.” (Yoˇhanˬ 1:29, 36, 41)

Shaˉ hkiˆ chi aꞈ kehˉ cawˬ maˇ sheˍ ve yoˬ. Yoˇhanˬ Yeˍsuˆ htaꞈ Baˆtiˆsaˬ piˇ htaˇ, mvuhˇ naw ma hkʼoˆ lo Yaˬhoˉvaˬ tawˇ yaw tawˆ la ve yoˬ. Yawˇ lehˬ, awˬ ha hpu htaꞈ cuˇ ve hkʼaw Meˍsiˉyaꞈ hpehꞈ tuˬ, Yeˍsuˆ htaꞈ leuˆ teh piˇ leh kʼoˆ ve, “Chaw chi lehˬ, ngaˬ haꞈ jaˇ ve Yaˇ hpu yoˬ. Yawˇ htaꞈ ngaˬ nyi hkʼaˇ suh jaˇ ve yoˬ.” (Maꞈhtehˍ 3:16, 17) Aˬ sho˗eˬ htaˇ kaꞈ ka tiꞈ te taˍ ve hkʼe Meˍsiˉyaꞈ gaˬ la˗oˬ.

Awˬ lawn chi ve hkʼaˆ hpehꞈ la ve le. Daˍyeˍlaˆ kʼoˆ taˍ ve hkʼe C.E. 29 hkʼawꞈ gaˬ leh, 483 hkʼawꞈ biˇ la ve yoˬ. Yeˍsuˆ lehˬ, Meˍsiˉyaꞈ leh Hkriꞈ hpehꞈ ve yoˬ tehꞈ chi ve leh awˬ kaˍ awˬ un shaˉ hkiˆ laiˉ ceuˬ hpeuꞈ maw laˇ ve yoˬ. Yaꞈ hkʼaˇ, yawˇ miˬ guiˬ hkʼoˆ chehˇ htaˇ, aˬ htoꞈ ma awˬ lawn to maˍ ve le.

—Maꞈhtehˍ liꞈ 1 te leh 3; Maˍkuˆ liꞈ 1; Luˉkaꞈ liꞈ 2; Yoˇhanˬ liꞈ 1 hkʼaw yuˬ laˬ ve yoˬ.