YEˍRUˆSAˍLEHNˍ venˇ leh bon yehˬ lonˉ awˬ paˇ lo cawˬ ve Shaˍlonˍ hkʼaw hkʼoˆ lo Yeˍsuˆ kʼoˆ jaw ve awˬ lawn htaꞈ awˬ laꞈ gʼawˇ awˇ gʼaˇ yawˇ geh ca na la ve yoˬ. Yeˍruˆsaˍlehnˍ venˇ hkʼaw ve bon yehˬ lonˉ htaꞈ shu te luˬ la tuˬ yoˬ tehꞈ, Yeˍsuˆ kʼoˆ peuˬ gehˇ sheˍ ve yoˬ. Leh chi teˇ co˗e “leh ve awˬ yanˇ” yawˇ awˬ laꞈ gʼawˇ htaꞈ maˍ piˇ jaw ve yoˬ. (Maꞈhtehˍ 13:40, 49) Chi teˇ hkui awˬ laꞈ gʼawˇ na piˇ ve, “nawˬ chehˇ taˍ tuˬ ve awˬ heˆ, leh chi teˇ co˗e awˬ yanˇ leh tuˬ ve awˬ heˆ, aˬ htoꞈ ma hpehꞈ tawˆ la tuˬ ve le.” (Maꞈhtehˍ 24:3, MGS)

Yeˍruˆsaˍlehnˍ venˇ htaꞈ te luˬ la paˇ neˇ htaˇ, hpehꞈ la tuˬ ve awˬ ceuˬ htaꞈ Yeˍsuˆ hkʼawꞈ piˇ ve yoˬ. Yaꞈ hkʼaˇ, yawˇ kʼoˆ ve tawˇ hkawˇ lehˬ, chi aꞈ kehˉ tcuhˉ kuiˬ cawˬ ve yoˬ. Yawˇ kʼoˆ taˍ ve tawˇ hkawˇ miˬ guiˬ hkʼa peu˗eˬ hkʼoˆ biˇ la tuˬ yoˬ. Yeˍsuˆ kʼoˆ ve hkʼe hpehꞈ la ve awˬ ceuˬ awˬ heˆ hpehꞈ ve yoˬ. Awˬ heˆ chi, mvuhˇ naw ma hkʼoˆ Yeˍsuˆ Hkunˉ hawˉ hkanˇ tanˬ hpehꞈ chehˇ taˍ peuˬ tehꞈ, miˬ guiˬ chaw yaˇ htaꞈ maˍ piˇ ve yoˬ. Awˬ heˆ chi hpeuꞈ maw laˇ ve, aˬ sho˗eˬ htaˇ ka tiꞈ te taˍ ve Meˍsiˉyaꞈ ve mvuhˇ miˬ hkʼaw Yaˬhoˉvaˬ Gʼuiˬ sha Yeˍsuˆ htaꞈ Hkunˉ hawˉ hkanˇ te tcuh ve awˬ hkʼoˆ kaꞈ maˇ maw kʼo, mvuhˇ miˬ oˇ ve haiˬ ve awˬ ceuˬ htaꞈ yuˬ baˬ leh, dawˇ sha gawˬ lehˍ ve teˇ ceuˬ chaw yaˇ geh gaˬ la piˇ tuˬ yoˬ. Yeˍsuˆ kʼoˆ taˍ ve awˬ ceuˬ chi teˇ hpaˍ kʼawꞈ hpeuꞈ maw laˇ ve, chi teˇ co˗e htaꞈ caˉ daꞈ ve bon liˇ hpawˇ, mvuhˇ miˬ hpawˇ, chaw yaˇ hkʼaw hpehꞈ chehˇ ve awˬ lawn leh˗e leh, awˬ suhˉ teˇ co˗e hkʼaw loꞈ˗e tuˬ yoˬ.

Mvuhˇ naw ma hkʼoˆ yawˇ Hkunˉ hawˉ hkanˇ hpehꞈ chehˇ htaˇ, miˬ guiˬ hkʼoˆ hpehꞈ la tuˬ ve awˬ ceuˬ htaꞈ kaꞈ Yeˍsuˆ kʼaoˍ maˍ ve yoˬ. Teˇ mvuhˇ miˬ leh teˇ mvuhˇ miˬ bawˆ daꞈ ve, meuꞈ ve kaˆ ve, miˬ hiˆ hehnˇ ve, naˬ beuˬ gaˬ ve, chi teˇ hpaˍ cawˬ tuˬ yoˬ. Awˬ liˇ htaꞈ maˇ na yuˬ ve teˇ ceuˬ cawˬ maˇ la tuˬ yoˬ. Yeˍsuˆ ve awˬ tehˬ ve awˬ laꞈ gʼawˇ hui Gʼuiˬ sha ve mvuhˇ miˬ awˬ lawn miˬ guiˬ hkʼa peu˗eˬ hkʼoˆ hto maˍ toˇ tuˬ yoˬ. Awˬ ceuˬ chi hkʼa peu˗eˬ lehˬ, maˇ mawˬ jaw ve “tuꞈ jaˇ hkanˍ jaˇ” ve awˬ yanˇ hkʼaw gaˬ˗e tuˬ yoˬ. (Maꞈhtehˍ 24:21)

Yeˍsuˆ ve awˬ laꞈ gʼawˇ hui tuꞈ jaˇ hkanˍ jaˇ ve awˬ yanˇ gaˬ la paˇ neˇ ve htaꞈ hkʼaˬ hkʼe te shiˍ ve le. Yeˍsuˆ kʼoˆ ve, “Maˉ nawˆ cehˬ htaꞈ” nyi˗oꞈ. (Maꞈhtehˍ 24:32) Maˉ nawˆ cehˬ awˬ caˍ caˍ la ve teˇ yanˇ, mvuhˇ cha hkui yanˇ gaˬ la paˇ neˇ ve awˬ heˆ hpehꞈ ve yoˬ. Chi hkʼa shuˍ shuˍ, Yeˍsuˆ kʼoˆ taˍ ve awˬ ceuˬ teˇ yanˇ tiˉ hpehꞈ la ve kʼo, awˬ leh meuˇ gaˬ la paˇ neˇ peuˬ ve awˬ heˆ hpehꞈ ve yoˬ. Tuꞈ jaˇ hkanˍ jaˇ ve tanˬ ve awˬ yanˇ, Awˬ pa teˇ gʼaˇ ceh tiˉ hkʼa dehꞈ shiˍ ve yoˬ. Chi htaꞈ pa taw, Yeˍsuˆ yawˇ ve awˬ laꞈ gʼawˇ hui htaꞈ awˬ gʼaˇ piˇ leh kʼoˆ ve, “Awˬ yanˇ oˇ ve hkʼaˬ htaˆ gaˬ la tuˬ ve htaꞈ nawˬ hui maˇ shiˍ ve pa taw, shaˍ tiꞈ te leh shaw taˍ˗oꞈ.” (Maˍkuˆ 13:33)

—Maꞈhtehˍ liꞈ 24 leh 25; Maˍkuˆ liꞈ 13; Luˉkaꞈ liꞈ 21 hkʼaw yuˬ laˬ ve yoˬ.