LIꞈ HPU awˬ leh meuˇ teˇ kʼoˆ Hpeuꞈ maˍ ve liꞈ chaw yaˇ htaꞈ dawˇ law kuiˬ piˇ ve yoˬ. Tcuh yaˇ Yoˇhanˬ bvuhꞈ taˍ ve liꞈ chi teˇ kʼoˆ hkʼaw Yaˬhoˉvaˬ dawˇ law taˍ ve awˬ hkʼehꞈ awˬ hkʼehꞈ biˇ la tuˬ ve awˬ hkʼaˇ htaꞈ yawˇ gʼa mawˬ ve yoˬ.

Yoˇhanˬ mawˬ ve awˉ lawˉ teˇ maˬ hkʼaw lo, teꞈ tu la peuˬ ve Yeˍsuˆ lehˬ, Hkriꞈ yaˇ awˬ moˍ laiˉ moˍ htaꞈ chiˇ mvuh piˇ leh dawˇ hkʼaˇ gu piˇ ve yoˬ. Peuˬ hkʼawꞈ nawˉ, mvuhˇ naw ma hkʼoˆ Gʼuiˬ sha ve kʼaw jaw htaꞈ Yoˇhanˬ gʼa mawˬ ve yoˬ. Oˇ kaˬ lo, mvuhˇ naw ma tcuh yaˇ hui Gʼuiˬ sha htaꞈ chiˇ mvuh piˇ chehˇ ve yoˬ.

Gʼuiˬ sha ve dawˇ law kuiˬ biˇ la chehˇ ve teˇ yanˇ, Yawˬ ehˉ Yeˍsuˆ lehˬ yinˉ 7 maˬ tcuhˉ taˍ ve liꞈ htaꞈ yuˬ ve yoˬ. Yinˉ 4 maˬ awˉ lawˉ hpaw htaˇ, faˉ taˍ ve tcuhˉ kuiˬ cawˬ ve iˉ mvuhˇ ciˇ shehˍ hpaˇ miˬ guiˬ hkʼoˆ tawˆ la ve yoˬ. Iˉ mvuhˇ hpuˇ˗ehˍ ve ciˇ shehˍ hpaˇ awˉ lawˉ teˇ gʼaˇ lehˬ Yeˍsuˆ yoˬ. Yawˇ Hkunˉ hawˉ hkanˇ ve shi uˉ tcuhˍ gʼa hkʼawˆ ve yoˬ. Peuˬ leh, awˬ sheuˉ cawˬ ve iˉ mvuhˇ leh ciˇ shehˍ hpaˇ 3 gʼaˇ ve tcuhˉ kuiˬ lehˬ, maꞈ hpehꞈ ve, meuꞈ ve kaˆ ve, naˬ beuˬ gaˬ ve, awˬ heˆ chi teˇ hpaˍ miˬ guiˬ chi awˬ yanˇ leh htaˇ hpehꞈ la tuˬ yoˬ. Yinˉ 7 maˬ teˇ maˬ hpeuꞈ hkʼawꞈ nawˉ, behˬ heh ma 7 maˬ htaꞈ meuˆ ve teˇ yanˇ, Gʼuiˬ sha suhˉ jehˬ tuˬ hto piˇ ve yoˬ. Chi teˇ hpaˍ lehˬ, Gʼuiˬ sha nyi ma zuhˆ ve faˉ taˍ ve tcuhˉ kuiˬ cawˬ ve kawˆ tuˬ 7 ceuˬ hkʼaw loꞈ˗e ve yoˬ.

Mvuhˇ naw ma hkʼoˆ Gʼuiˬ sha ve mvuhˇ miˬ teh taˍ ve lehˬ, paw la gehˇ sheˬ ve yaˇ paˍ hkʼa shuˍ tehˆ taˍ ve yoˬ. Maꞈ keuˆ la leh Saˍtanˍ leh maˇ daꞈ ve mvuhˇ naw ma tcuh yaˇ miˬ guiˬ hkʼoˆ yuˬ baˬ ve yoˬ. Awˬ hkawˇ bvuhˬ la leh kʼoˆ ve, “Miˬ guiˬ” “lehˬ, gʼa dawˇ haˍ jaˇ tuˬ yoˬ.” Awˬ lawn kʼo, Neˇ haiˬ ve awˬ yanˇ a ciˉ ceh tiˉ cawˬ ve htaꞈ shiˍ leh nyi ma zuhˆ jaˇ. (Hpeuꞈ maˍ ve 12:12)

Mvuhˇ naw ma hkʼoˆ Yeˍsuˆ awˬ tan yawˬ ehˉ htaꞈ Yoˇhanˬ gʼa mawˬ ve yoˬ. Chaw yaˇ hkʼaw leuˆ yuˬ taˍ ve chaw 144,000 gʼaˇ Yeˍsuˆ geh chehˇ taˍ ve yoˬ. Chaw chi teˇ hpaˍ lehˬ, Yeˍsuˆ geh “uˉ peunˍ tuˬ yoˬ.” Chi htaꞈ pa taw, Hpeuꞈ maˍ ve liꞈ hpeuꞈ maw laˇ ve, Yeˍsuˆ awˬ hawˉ lo chehˇ ve awˬ ceuˬ awˬ hkʼaˇ oˇ ve 144,000 gʼaˇ cawˬ tuˬ yoˬ. (Hpeuꞈ maˍ ve 14:1; 20:6)

Miˬ guiˬ hkʼoˆ hkunˉ hawˉ hkanˇ teˇ hpaˍ Aˍmaˍgeˍdonˍ tehꞈ kuˬ ve “Kanˇ paˆ uiˍ ve Gʼuiˬ sha ve awˬ nyi uiˍ ve teˇ nyi awˬ hkʼaw lo maꞈ bawˆ tuˬ” hpawnˬ la ve yoˬ. Yawˇ hui lehˬ, iˉ mvuhˇ hpuˇ˗ehˍ ve ciˇ shehˍ hpaˇ Yeˍsuˆ leh yawˇ sheh kʼai chehˇ ve mvuhˇ naw ma maꞈ moˍ htaꞈ bawˆ daꞈ ve yoˬ. Miˬ guiˬ hkʼoˆ hkunˉ hawˉ hkanˇ hkʼa peu˗eˬ htaꞈ te luˬ piˇ ve yoˬ. Saˍtanˍ htaꞈ hpeh tiˍ taˍ leh, Yeˍsuˆ leh 144,000 gʼaˇ miˬ guiˬ hkʼoˆ “teˇ hinˉ hkʼawꞈ hkʼa gaˬ uˉ peunˍ ve yoˬ.” Teˇ hinˉ hkʼawꞈ peuˬ hkʼawꞈ nawˉ Saˍtanˍ htaꞈ kaꞈ te luˬ piˇ ve yoˬ. (Hpeuꞈ maˍ ve 16:14; 20:4)

Hkriꞈ leh yawˇ geh uˉ peunˍ ve chaw teˇ hinˉ hkʼawꞈ uˉ peunˍ htaˇ, na yuˬ ve chaw yaˇ aˬ htoꞈ ma awˬ bon gʼa tuˬ le. Yoˇhanˬ bvuhꞈ taˍ ve, “[Yaˬhoˉvaˬ] lehˬ, yawˇ hui ve mehˆ gʼuiˬ hkʼa peu˗eˬ htaꞈ shiˆ baˬ piˇ tuˬ yoˬ. Suh ve teˇ ceuˬ maˇ kʼawꞈ cawˬ. Dawˇ haˍ ve, paˆ hawˬ ve, naˬ ve, awˬ ceuˬ chi teˇ hpaˍ htawˇ maˇ kʼawꞈ cawˬ. Awˬ lawn kʼo, awˉ lawˉ htaˇ cawˬ ve awˬ ceuˬ teˇ hpaˍ mehˉ kʼai peuˬ”. (Hpeuꞈ maˍ ve 21:4) Miˬ guiˬ hkʼa peu˗eˬ paˍraˍdiˇsuˆ kʼawꞈ hpehꞈ la ve yoˬ.

Chi htaꞈ pa taw, Liꞈ hpu ve awˬ lawn Hpeuꞈ maˍ ve liꞈ hkʼaw biˇ la ve yoˬ. Meˍsiˉyaꞈ mvuhˇ miˬ htaꞈ cuˇ leh Yaˬhoˉvaˬ awˬ meh htaꞈ yawˆ yawˆ yan yan te piˇ lawˬ tuˬ yoˬ. Yawˇ uˉ peunˍ ve awˬ hkʼaˇ ceh tiˉ hteˇ ve cawˇ ve yoˬ tehꞈ co co shiˍ la tuˬ yoˬ.

—Hpeuꞈ maˍ ve liꞈ hkʼaw yuˬ laˬ ve yoˬ.