CHAW yaˇ htaꞈ maˇ hpanˍ sheˍ htaˇ Gʼuiˬ sha lehˬ, mawˬ maˇ hpehꞈ ve mvuhˇ naw ma tcuh yaˇ hui htaꞈ hpanˍ taˍ ve maw jaˇ peuˬ. Eˍdenˍ hko hkʼaw mvuhˇ naw ma tcuh yaˇ teˇ gʼaˇ hpfuhˆ ve yoˬ. Oˇ ve hkʼawꞈ nawˉ, yawˇ htaꞈ Neˇ haiˬ Saˍtanˍ tehꞈ meh piˇ ve yoˬ. Gʼuiˬ sha taˇ caˇ tehꞈ kʼoˆ ve iˉ shiˍ cehˬ oˇ ve htaꞈ caˇ tuˬ Eˇvaꞈ htaꞈ beˬ ve yoˬ.

Saˍtanˍ vuiˬ tawˇ yaw ve hkʼa shuˍ te leh, Gʼuiˬ sha lehˬ daꞈ ve awˬ ceuˬ yaˇ miˇ leh yawˇ awˬ hpawˇ htaꞈ maˇ piˇ gaˇ tehꞈ dawˇ tcuh gaˇ ve yoˬ. Saˍtanˍ Eˇvaꞈ htaꞈ kʼoˆ piˇ ve, taˇ caˇ tehꞈ kʼoˆ ve iˉ shiˍ cehˬ oˇ ve htaꞈ caˇ ve kʼo, yawˇ leh yawˇ awˬ hpawˇ suh tuˬ ve maˇ heˆ. Chi hkʼe kʼoˆ ve lehˬ, Gʼuiˬ sha chaw yaˇ htaꞈ heˍ chehˇ ve yoˬ tehꞈ, Saˍtanˍ Gʼuiˬ sha htaꞈ she ve yoˬ. Gʼuiˬ sha hkawˇ maˇ na yuˬ kʼo, shiˍ cehnˍ leh leuˆ yuˬ puiˉ tuˬ yoˬ tehꞈ Heˍ paˍ chi teˇ gʼaˇ maˍ ve yoˬ. Yaꞈ hkʼaˇ, hkʼa peu˗eˬ kaꞈ heˍ ve awˬ lawn deˇ deˇ yoˬ. Miˬ guiˬ hkʼoˆ heˍ ve awˉ lawˉ teˇ hkawˇ chi ve lehˬ Gʼuiˬ sha uˉ peunˍ ve awˬ hkʼaˇ cawˇ˗aw laˇ, leh yawˇ uˉ peunˍ ve awˬ hawˉ lo chehˇ ve chaw awˬ bon gʼa ve laˇ tehꞈ tanˬ daꞈ ve yoˬ.

Eˇvaꞈ Saˍtanˍ heˍ ve hkawˇ htaꞈ na ve yoˬ. Yawˇ iˉ shiˍ oˇ ve htaꞈ heuˆ gaˇ leh caˇ ve yoˬ. Peuˬ hkʼawꞈ nawˉ awˬ hpawˇ htaꞈ piˇ leh yawˇ htawˇ caˇ ve yoˬ. Hkʼe te leh yawˇ huiˉ maˬ venˇ baˆ yaˇ hpehꞈ la ve yoˬ. Gʼuiˬ sha ve awˬ liˇ htaꞈ maˇ na yuˬ tuˬ leuˆ yuˬ ve pa taw, yawˇ huiˉ maˬ hpfuhˆ ve yoˬ. Te hpanˍ shehˍ hpaˇ yawˇ huiˉ maˬ htaꞈ biˇ jaˇ ve a shaꞈ leh teˇ ceuˬ le le piˇ ve htawˇ, yawˇ uˉ peunˍ ve htaꞈ Aˍdanˍ leh Eˇvaꞈ chiˇ baˬ ve yoˬ.

Gʼuiˬ sha lehˬ, hpfuhˆ paˍ hui htaꞈ suhˉ jehˬ ve yoˬ. Awˬ gʼuˇ suhˍ hpawˇ Htaiˍ hkʼawꞈ laˇ shehˍ hpaˇ Awˬ ceuˬ awˬ hkʼaˇ teˇ gʼaˇ laˬ leh vuiˬ tehꞈ kʼoˆ ve Saˍtanˍ htaꞈ te luˬ tuˬ yoˬ tehꞈ yawˇ ka tiꞈ te ve yoˬ. Gʼuiˬ sha Aˍdanˍ leh Eˇvaꞈ htaꞈ laꞈ haˉ maˇ tiˇ pehˍ. Yaꞈ hkʼaˇ, yawˇ huiˉ maˬ a shaꞈ a ciˉ kʼawꞈ teꞈ chehˇ tcuh ve yoˬ. Chi hkʼe te ve lehˬ, maˇ paw la sheˍ ve yawˇ ve awˬ yaˇ awˬ duˬ htaꞈ ha kʼaˉ piˇ leh dawˇ law kuiˬ piˇ ve yoˬ. Awˬ lawn kʼo, Gʼuiˬ sha peu laˇ ve chaw oˇ ve teˇ gʼaˇ lehˬ, Eˍdenˍ hko hkʼaw lo hpfuhˆ paˍ te luˬ te sheˆ taˍ ve awˬ ceuˬ htaꞈ gu piˇ tuˬ yoˬ. Gʼuiˬ sha dawˇ law taˍ ve chi teˇ ceuˬ hkʼaˬ hkʼe biˇ la tuˬ le. Htaiˍ hkʼawꞈ laˇ shehˍ hpaˇ a shu hpehꞈ tuˬ le. Liꞈ hpu hkʼaw chi teˇ hpaˍ awˬ meuˇ awˬ meuˇ hpeuꞈ maw laˇ ve yoˬ.

Gʼuiˬ sha lehˬ, Aˍdanˍ leh Eˇvaꞈ htaꞈ Paˍraˍdiˇsuˆ hkʼaw gʼaꞈ tawˆ piˇ ve yoˬ. Yawˇ huiˉ maˬ Eˍdenˍ hko awˬ baˬ lo ti caˇ muiˬ caˇ tuˬ awˬ pon kanˉ hkeuꞈ jaˇ. Eˇvaꞈ yaˇ hu la leh Kaˍiˉnaˆ htaꞈ paw la ve yoˬ. Yawˇ huiˉ maˬ awˬ kaˍ awˬ nu yaˇ hawˉ hkʼaˆ leh yaˇ miˇ laiˉ gʼaˇ cawˬ ve yoˬ. Aˍbeˍlaˆ kaꞈ teˇ gʼaˇ hpehꞈ leh Sheˍtaˆ kʼo Noˉaꞈ ve awˬ puˍ hpehꞈ ve yoˬ.

—Awˬ hkuiˉ puiˍ liꞈ 3 te leh 5; Hpeuꞈ maˍ ve 12:9 hkʼaw yuˬ laˬ ve yoˬ.