YEˍSUˆ mvuhˇ naw ma hkʼoˆ taˆ˗e peuˬ hkʼawꞈ nawˉ 10 nyi htaˇ, Yuˇdaꞈ chaw ve Peˍteˍkoˆteˍ pawehˇ awˬ nyi 33 hkʼawꞈ, yawˇ ve awˬ laꞈ gʼawˇ aˬ laˬ hkʼe 120 gʼaˇ Yeˍruˆsaˍlehnˍ venˇ lo yehˬ teˇ yehˬ hkʼaw hpawnˬ daꞈ chehˇ ve yoˬ. Teˇ pawˆ tiˉ mvuhˇ haw hkawˇ hkʼa shuˍ yehˬ oˇ ve teˇ yehˬ hkʼaw biˇ sheˬ ve yoˬ. Awˬ laꞈ gʼawˇ hui maˇ shiˍ jaw ve tawˇ hkawˇ htaꞈ anˇ lawꞈ lawꞈ ve hkʼaw yaw tawˆ la ve yoˬ. Aˬ htoꞈ ma pa taw, anˇ lawꞈ lawꞈ ve awˬ ceuˬ chi hpehꞈ la ve le. Awˬ laꞈ gʼawˇ hui htaꞈ Gʼuiˬ sha daꞈ kehˬ ve awˬ ha hpu piˇ ve yoˬ.

Pawehˇ chi ve hkʼaw laˬ ve laiˉ mvuhˇ miˬ ve chaw awˬ baˬ hpawˇ lo chehˇ taˍ ve yoˬ. A shu yawˇ hui ve tawˇ hkawˇ Yeˍsuˆ ve awˬ laꞈ gʼawˇ yaw leˆ ve htaꞈ gʼa kaˇ ve teˇ yanˇ, anˇ ve yoˬ. Chi ve lehˬ, tcuh kaˍ paˍ Yawˇlaˆ kʼoˆ taˍ ve hkʼe hpehꞈ la ve yoˬ tehꞈ Peˍtruˆ kʼaoˍ leh kʼoˆ ve, Gʼuiˬ sha yawˇ ve awˬ ha hpu “ngeuˍ pfuhˍ” piˇ taˍ ve chaw lehˬ, anˇ tuˬ uiˍ ve laꞈ shawnˍ htaꞈ gʼa ve yoˬ. (Yawˇlaˆ 2:28, 29) A yeˇ uiˍ jaˇ ve teˇ ceuˬ hpehꞈ la ve yoˬ tehꞈ, daꞈ kehˬ ve awˬ ha hpu shaˉ hkiˆ hkʼa tawˍ lehˆ maw laˇ ve oˇ ve lehˬ, Iˉsaˍreˍlaˆ chaw awˬ tan Hkriꞈ yaˇ awˬ moˍ awˬ suhˉ chi htaꞈ Gʼuiˬ sha nyi ma cawˇ ve yoˬ. Chi beuꞈ tanˬ leh, oˉ kʼoˍ pui ve hkʼaw Gʼuiˬ sha haꞈ yuˬ ve chaw hpehꞈ gaˇ ve kʼo, Hkriꞈ awˬ hkʼaˇ suh gʼa gʼaꞈ te ve yoˬ.

Awˬ yanˇ chi hkʼaw canˇ paˍ teˇ hpaˍ fawˉ mehˍ jaˇ, leh awˬ laꞈ gʼawˇ hui htaꞈ htawnˍ hkʼaw lo yuˬ keu ve yoˬ. Oˇ ve teˇ haˉ, Yaˬhoˉvaˬ ve mvuhˇ naw ma tcuh yaˇ htawnˍ yehˬ miˉ hpaw piˇ leh ca kʼawꞈ maˍ piˇ loˬ tehꞈ, awˬ laꞈ gʼawˇ hui htaꞈ kʼoˆ piˇ ve yoˬ. Mvuhˇ shawˉ teˇ naꞈ kaꞈ yawˇ hui oˇ hkʼe te ve yoˬ. Yawˇ hui bon yehˬ hkʼaw loꞈ˗e leh, Yeˍsuˆ htaꞈ caˉ daꞈ ve awˬ lawn maˍ ve yoˬ. Bon liˇ awˬ hoˉ awˬ naˬ nyi ma zuhˆ ve pa taw, taˇ maˍ taˇ hto tehꞈ, yawˇ hui htaꞈ tawˇ piˇ ve yoˬ. Tcuh yaˇ hui haꞈ hanˉ ve hkʼaw hkʼawꞈ piˇ ve, “Chaw yaˇ ve tawˇ hkawˇ aꞈ kehˉ Gʼuiˬ sha ve tawˇ hkawˇ htaꞈ ngaˬ hui gʼa na yuˬ ve yoˬ.” (Tcuh yaˇ 5:28, 29)

Fawˉ mehˍ ve teˇ ceuˬ cawˬ maˇ la ve yoˬ. Awˬ laꞈ gʼawˇ Saˍteˍhpanˍ lehˬ, Gʼuiˬ sha htaꞈ maˇ shawˍ maˇ caˆ kʼoˆ ve yoˬ tehꞈ, Yuˇdaꞈ chaw teˇ hpaˍ hpaˍ venˇ baˆ taˍ leh, yawˇ htaꞈ haˉ pui baˬ pehˍ piˇ ve yoˬ. Saˍteˍhpanˍ htaꞈ tiˇ pehˍ htaˇ, Taˍsuˆ venˇ hkʼaw laˬ ve Sawˉluꞈ meh ve chaw haˉ paˍ teˇ gʼaˇ nyi ma cawˇ ve yoˬ. Oˇ ve hkʼawꞈ nawˉ, Hkriꞈ ve awˬ laꞈ gʼawˇ htaꞈ hpeh yuˬ tuˬ awˬ pon Daˍmaˍsehˆ venˇ hkʼaw kʼai ve yoˬ. Sawˉluꞈ yaꞈ kʼaw toˇ kʼai chehˇ htaˇ, mvuhˇ naw ma lo awˬ gʼeuˆ yawˇ htaꞈ hti la ve yoˬ. Awˬ hkawˇ bvuhˬ la leh kʼoˆ ve, “Sawˉluꞈ˗oˬ, Sawˉluꞈ˗oˬ, aˬ htoꞈ ma pa taw nawˬ ngaˬ htaꞈ fawˉ mehˍ laˇ ve le”. Awˬ gʼeuˆ htaꞈ pa taw Sawˉluꞈ mehˆ maˇ mawˬ leh yawˇ na piˇ ve, “nawˬ a shu le”. Awˬ hkawˇ oˇ ve hkʼawꞈ piˇ ve, “Ngaˬ lehˬ” “Yeˍsuˆ yoˬ.” (Tcuh yaˇ 9:3-5)

Shehˆ nyi gaˬ leh, Sawˉluꞈ mehˆ kʼawꞈ mawˬ la tuˬ Yeˍsuˆ lehˬ, awˬ laꞈ gʼawˇ Aˍnaˍniˆ htaꞈ peu piˇ ve yoˬ. Sawˉluꞈ baˆtiˆsaˬ haꞈ yuˬ leh, haꞈ hanˉ ve hkʼaw Yeˍsuˆ ve awˬ lawn maˍ ve yoˬ. Sawˉluꞈ htaꞈ Pawˇluꞈ tehꞈ kuˬ leh yawˇ lehˬ, Hkriꞈ yaˇ awˬ moˍ hkʼaw lo nyi ma pfuhˇ ve chaw teˇ gʼaˇ hpehꞈ la ve yoˬ.

Yeˍsuˆ ve awˬ laꞈ gʼawˇ hui Yuˇdaꞈ chaw leh Saˍmaˍriˆ chaw htaꞈ ceh tiˉ Gʼuiˬ sha ve mvuhˇ miˬ awˬ lawn gʼa maˍ piˇ ve yoˬ. Gʼuiˬ sha htaꞈ kawˆ leh yawˆ yan puiˉ ve Roˉmaꞈ maꞈ poˍ Kawˍneˍliˆ mvuhˇ naw ma tcuh yaˇ teˇ gʼaˇ htaꞈ gʼa mawˬ ve yoˬ. Peˍtruˆ htaꞈ ca kuˬ˗oꞈ tehꞈ, mvuhˇ naw ma tcuh yaˇ Kawˍneˍliˆ htaꞈ kʼoˆ piˇ ve yoˬ. Peˍtruˆ leh yawˇ ve awˬ chawˇ lehˬ, Kawˍneˍliˆ leh yawˇ ve yehˬ hkʼaw chaw htaꞈ maˍ piˇ ve yoˬ. Peˍtruˆ kʼoˆ chehˇ ve teˇ yanˇ, yonˍ peuˬ ve buiˇ shaˆ aˉ naˆ chaw awˬ hkʼoˆ daꞈ kehˬ ve awˬ ha hpu yaꞈ la ve yoˬ. Yeˍsuˆ awˬ meh hkʼaw lo baˆtiˆsaˬ haꞈ yuˬ loˬ tehꞈ, yawˇ hui htaꞈ tcuh yaˇ Peˍtruˆ kʼoˆ piˇ ve yoˬ. Buiˇ shaˆ aˉ naˆ chaw awˬ pon, co co taiˍ taiˍ teꞈ ve yaꞈ kʼaw hpaw taˍ peuˬ. Hkriꞈ yaˇ awˬ moˍ lehˬ, daꞈ ve awˬ lawn ca hto zuhˇ kʼai tuˬ gu hehnˇ taˍ ve yoˬ.

—Tcuh yaˇ 1:1–11:21 hkʼaw yuˬ laˬ ve yoˬ.