LIꞈ HPU hkʼaw awˬ hkuiˉ puiˍ tawˇ hkawˇ lehˬ, chaw laiˉ gʼaˇ gʼa kaˇ jaw ve yoˬ. “Awˬ hkuiˉ puiˍ htaˇ, Gʼuiˬ sha miˬ guiˬ leh mvuhˇ naw ma htaꞈ te hpanˍ ve yoˬ.” (Awˬ hkuiˉ puiˍ 1:1) Liꞈ hpu hkʼaw Awˬ gʼaˇ uiˍ shehˍ hpaˇ Yaˬhoˉvaˬ Gʼuiˬ sha htaꞈ shiˍ tuˬ, tawˇ cawˆ chi beˆ maˍ laˇ ve yoˬ. Awˬ hkuiˉ puiˍ ve liꞈ 1:1 hpeuꞈ maw laˇ ve, Gʼuiˬ sha lehˬ mvuhˇ naw ma miˬ naˆ ma leh miˬ guiˬ htaꞈ Te hpanˍ shehˍ hpaˇ hpehꞈ ve yoˬ. Liꞈ hpu hkʼaw awˬ nyi tehꞈ kuˬ ve awˬ yanˇ teˇ yanˇ leh teˇ yanˇ lehˬ, ngaˬ hui chehˇ kuiˬ miˬ guiˬ htaꞈ Gʼuiˬ sha gu taˍ leh a shaꞈ teꞈ ve awˬ ceuˬ htaꞈ te hpanˍ ve yoˬ tehꞈ Awˬ hkuiˉ puiˍ ve liꞈ hkʼaw kʼaoˍ maˍ laˇ ve yoˬ.

Miˬ guiˬ hkʼoˆ Gʼuiˬ sha hpanˍ taˍ ve daꞈ jaˇ ve teˇ ceuˬ lehˬ, chaw yaˇ yoˬ. Chaw yaˇ htaꞈ Gʼuiˬ sha ve awˬ hoꞈ awˬ han te hkʼaˇ dawˇ hkʼaˇ hkʼa shuˍ hpanˍ taˍ leh Yaˬhoˉvaˬ hkʼa shuˍ haꞈ pehnˇ ve, leh cuˇ yiˍ cawˬ ve yoˬ. Gʼuiˬ sha jeꞈ htaꞈ yuˬ leh chaw yaˇ htaꞈ te hpanˍ ve yoˬ. Gʼuiˬ sha yawˇ htaꞈ Aˍdanˍ tehꞈ meh piˇ leh Eˍdenˍ tehꞈ kʼoˆ ve paˍraˍdiˇsuˆ hko hkʼaw chehˇ tcuh ve yoˬ. Gʼuiˬ sha lehˬ hko hkʼaw nyi sha ve iˉ shiˍ cehˬ hkʼa biˇ cawˬ la piˇ ve yoˬ.

Chaw yaˇ awˬ ceh cawˬ cawˇ ve yoˬ tehꞈ, Gʼuiˬ sha gʼa mawˬ htaˇ Aˍdanˍ ve nyi kuˇ teˇ maˬ htaꞈ yuˬ leh yaˇ miˇ te hpanˍ peuˬ hkʼawꞈ nawˉ yawˇ awˬ miˇ ma hpehꞈ tuˬ shiˍ laˬ piˇ ve yoˬ. Yawˇ htaꞈ Eˇvaꞈ tehꞈ meh piˇ ve yoˬ. Aˍdanˍ ha lehˬ jaˇ leh kʼoˆ ve, “Chi lehˬ ngaˬ ve awˬ muꞈ ku teˇ hpaˍ awˬ hkʼaw lo ve awˬ muꞈ ku, ngaˬ ve awˬ shaˍ awˬ hkʼaw lo ve awˬ shaˍ” hpehꞈ ve yoˬ. Gʼuiˬ sha kʼoˆ ve, “Chi htaꞈ pa taw, hawˉ hkʼaˆ lehˬ yawˇ ve awˬ pa awˬ e htaꞈ hpaˆ daꞈ taˉ leh, yawˇ ve awˬ miˇ ma htaꞈ caˉ daꞈ ve awˬ hkʼaw lo yawˇ huiˉ maˬ teˇ suhˍ teˇ shaˍ tiˉ hpehꞈ la tuˬ yoˬ.” (Awˬ hkuiˉ puiˍ 2:22-24; 3:20)

Aˍdanˍ leh Eˇvaꞈ htaꞈ Gʼuiˬ sha awˬ liˇ nyiˇ maˬ piˇ ve yoˬ. Awˉ lawˉ teˇ maˬ lehˬ, hko chi htaꞈ haꞈ shaˉ leh, miˬ guiˬ hkʼoˆ yaˇ biˇ la tuˬ yoˬ. Nyiˇ maˬ teˇ maˬ, kʼehˬ jaˇ ve hko hkʼaw lo “daꞈ ve maˇ daꞈ ve htaꞈ shiˍ puiˉ ve suhˆ cehˬ” ve iˉ shiˍ htaꞈ taˇ caˇ tehꞈ kʼoˆ ve yoˬ. (Awˬ hkuiˉ puiˍ 2:17) Yawˇ huiˉ maˬ maˇ na yuˬ kʼo, suh tuˬ yoˬ. Awˬ liˇ chi nyiˇ maˬ htaꞈ na yuˬ kʼo, Gʼuiˬ sha yawˇ hui ve Uˉ peunˍ shehˍ hpaˇ hpehꞈ leh awˬ bon htaꞈ dawˇ nawˇ leh haꞈ ve teˇ ceuˬ hpeuꞈ maw piˇ ve yoˬ. Yawˇ huiˉ maˬ ha kʼaˉ puiˉ ve hkʼa biˇ cawˬ ve uˉ peunˍ ve chi htaꞈ haꞈ yuˬ cawˇ ve yoˬ. Yawˇ huiˉ maˬ biˇ jaˇ leh yaꞈ kuiˬ maˇ cawˬ. Liꞈ hpu kʼoˆ ve, “Gʼuiˬ sha lehˬ, yawˇ hkʼa te hpanˍ taˍ ve awˬ ceuˬ teˇ hpaˍ htaꞈ nyi leh daꞈ jaˇ ve htaꞈ gʼa mawˬ ve yoˬ.” (Awˬ hkuiˉ puiˍ 1:31)

—Awˬ hkuiˉ puiˍ liꞈ 1 leh 2 hkʼaw yuˬ laˬ ve yoˬ.