CHAW yaˇ teˇ gʼaˇ hpu shi mawˇ jeˬ hpawˇ awˬ bon maˇ gʼa leh hkʼa dehꞈ lawˇ nyi piˇ ve kʼo, Gʼuiˬ sha htaꞈ ka tiꞈ yeˬ tuˬ laˇ. Yawˇbaˆ na hkawˇ chi htaꞈ hkʼawꞈ laˇ ve yoˬ.

Iˉsaˍreˍlaˆ chaw Eˇjiˇtuꞈ mvuhˇ miˬ hkʼaw chehˇ htaˇ, Aˍbraˍhanˍ ve awˬ viˉ awˬ nyi Yawˇbaˆ lehˬ chi beuꞈ teˇ co˗e Aˍraˆ tehꞈ kʼoˆ ve mvuhˇ miˬ lo chehˇ ve yoˬ. Awˬ yanˇ chi ve hkʼaw mvuhˇ naw ma tcuh yaˇ leh hpfuhˆ paˍ Saˍtanˍ htawˇ, mvuhˇ naw ma hkʼoˆ lo Gʼuiˬ sha mehˆ gʼuˇ suhˍ hpawnˬ la ve yoˬ. Yawˇbaˆ hkʼa shuˍ ka tiꞈ yeˬ ve chaw teˇ gʼaˇ kaꞈ maˇ cawˬ tehꞈ mvuhˇ naw ma hkʼoˆ hpawnˬ daꞈ kuiˬ lo Yaˬhoˉvaˬ kʼoˆ ve yoˬ. Yaꞈ hkʼaˇ, Saˍtanˍ kʼoˆ ve, Yawˇbaˆ Gʼuiˬ sha htaꞈ oˉ kʼoˍ pui ve lehˬ, Gʼuiˬ sha haꞈ shaˉ leh awˬ bon naꞈ piˇ ve pa taw yoˬ. Saˍtanˍ kʼoˆ ve, Yawˇbaˆ hkʼa cawˬ ve mawˇ hkʼa peu˗eˬ luˬ kʼai ve kʼo, yawˇ Gʼuiˬ sha htaꞈ hkeu tuˬ yoˬ.

Yawˇbaˆ ve hpu shi mawˇ jeˬ leh yaˇ hkʼa peu˗eˬ htaꞈ Saˍtanˍ te luˬ tuˬ Gʼuiˬ sha a hkaw˗anˬ piˇ ve yoˬ. Peuˬ leh Saˍtanˍ yawˇ htaꞈ naˬ jaˇ tuˬ te piˇ ve yoˬ. Hpehꞈ la ve hkʼa peu˗eˬ Saˍtanˍ te taˍ ve yoˬ tehꞈ Yawˇbaˆ maˇ shiˍ. Aˬ htoꞈ ma pa taw yawˇ gʼa hpuˇ ve awˬ lawn Gʼuiˬ sha hpehꞈ tcuh ve htaꞈ kaꞈ yawˇ maˇ shiˍ. Yaꞈ hkʼaˇ, Yawˇbaˆ Gʼuiˬ sha htaꞈ maˇ chiˇ baˬ jaw.

Awˬ chawˇ awˬ kehˆ shehˆ gʼaˇ Yawˇbaˆ geh laˬ leh Yawˇbaˆ venˇ baˆ hkʼawˇ te ve pa taw Gʼuiˬ sha ciˍ yanˍ ve yoˬ tehꞈ, Yawˇbaˆ htaꞈ kʼoˆ piˇ ve awˬ lawn Yawˇbaˆ liꞈ hkʼaw bvuhꞈ taˍ ve yoˬ. Chi awˬ hkʼoˆ, Gʼuiˬ sha ve chaw hui htaꞈ Gʼuiˬ sha yonˍ maˇ gʼa leh yawˇ nyi hkʼaˇ maˇ suh tehꞈ yawˇ hui kʼoˆ ve yoˬ. Maˇ cawˇ ve dawˇ hkʼaˇ chi htaꞈ Yawˇbaˆ a ciˉ kaꞈ maˇ haꞈ yuˬ. Suh htaˇ hkʼa gaˬ ka tiꞈ yeˬ tuˬ yoˬ tehꞈ, Yawˇbaˆ kʼoˆ ve yoˬ.

Yaꞈ hkʼaˇ, Yawˇbaˆ yawˇ venˇ baˆ maˇ cawˬ tehꞈ kʼoˆ ponˬ kʼoˆ leuˉ ve yoˬ. Tawˇ gʼawˬ daꞈ ve hkʼa peu˗eˬ htaꞈ a shaꞈ a ciˉ i ve hawˉ hkʼaˆ paˍ Eˇliˇhuˆ gʼa kaˇ leh kʼoˆ ve, chaw yaˇ teˇ gʼaˇ venˇ baˆ taˍ kuiˬ maˇ cawˬ tehꞈ shaˉ hkiˆ te ve aꞈ kehˉ Yaˬhoˉvaˬ Gʼuiˬ sha uˉ peunˍ ve awˬ hkʼaˇ venˇ baˆ taˍ kuiˬ maˇ cawˬ tehꞈ shaˉ hkiˆ te ve lehˬ a yeˇ uiˍ ve yoˬ. Yawˇbaˆ awˬ lawn chi htaꞈ maˇ dawˇ nyi puiˉ ve pa taw, Eˇliˇhuˆ gu maˍ piˇ ve yoˬ. Eˇliˇhuˆ lehˬ, Yawˇbaˆ ve awˬ chawˇ awˬ kehˆ htaꞈ kaꞈ hehnˇ chaweh deˇ maˍ piˇ ve yoˬ.

Oˇ ve hkʼawꞈ nawˉ, Yaˬhoˉvaˬ Gʼuiˬ sha Yawˇbaˆ geh tawˇ yaw daꞈ leh yawˇ ve dawˇ hkʼaˇ htaꞈ gu piˇ ve yoˬ. Anˇ lawꞈ lawꞈ cawˬ ve hpanˍ taˍ ve awˬ ceuˬ htaꞈ gʼa mawˬ htaˇ, uiˍ jaˇ ve Gʼuiˬ sha chaw yaˇ aꞈ kehˉ uiˍ jaˇ mvuh jaˇ ve yoˬ tehꞈ, Yaˬhoˉvaˬ Yawˇbaˆ htaꞈ maˍ piˇ ve yoˬ. Yawˇbaˆ nyi ma nuˇ nehˬ ve hkʼaw haꞈ yuˬ ve yoˬ. “Haꞈ leh ha kʼaˉ puiˉ ve” Yaˬhoˉvaˬ lehˬ, Yawˇbaˆ htaꞈ gu na˗e piˇ ve, hpu shi mawˇ jeˬ oˇ htaˇ aꞈ kehˉ nyiˇ pun cawˬ la ve, awˬ bon naꞈ piˇ leh yawˇ ve yaˇ teˇ chi gʼaˇ kʼawꞈ cawˬ la ve yoˬ. (Yaˍkoˆ 5:11) Chaw yaˇ htaꞈ lawˇ nyi piˇ kʼo, Yaˬhoˉvaˬ htaꞈ ka tiꞈ yeˬ tuˬ maˇ heˆ tehꞈ Saˍtanˍ kʼoˆ ve yoˬ. Yaꞈ hkʼaˇ, Yawˇbaˆ Gʼuiˬ sha htaꞈ hkʼaˬ htaˆ kaꞈ ka tiꞈ yeˬ ve pa taw, Saˍtanˍ kʼoˆ ve tawˇ hkawˇ htaꞈ hkʼa dehꞈ hkʼawꞈ piˇ gʼa ve yoˬ.

—Yawˇbaˆ liꞈ hkʼaw yuˬ laˬ ve yoˬ.