YEˍSUˆ anˇ tuˬ te puiˉ tuˬ Gʼuiˬ sha kanˇ paˆ piˇ ve yoˬ. Yeˍsuˆ chaw awˬ moˍ lonˉ mehˆ gʼuˇ suhˍ anˇ tuˬ laiˉ ceuˬ htaꞈ laiˉ pawˆ te maˍ ve yoˬ. Maˇ biˇ ve chaw yaˇ gʼaˇ maˇ hpehꞈ ve canˇ paˍ leh tawˍ taˍ tsuhˇ taˍ ve htaꞈ Yeˍsuˆ gʼaˇ ve yoˬ tehꞈ anˇ tuˬ oˇ ve teˇ hpaˍ maw laˇ ve yoˬ. Awˬ lawn chi teˇ hpaˍ hpaˍ htaꞈ dawˇ nyi sheˍ.

Meuꞈ ve awˬ ceuˬ. Yeˍsuˆ anˇ tuˬ awˉ lawˉ te ve lehˬ iˉ kaˆ htaꞈ a pehˉ meuˇ gʼuiˬ hpehꞈ la piˇ ve yoˬ. Yeˍsuˆ hkaoˍ monˇ leh ngaˇ a ciˉ yuˬ leh meuꞈ chehˇ ve chaw laiˉ hinˉ gʼaˇ htaꞈ caˍ piˇ ve nyiˇ pawˆ cawˬ ve yoˬ. Nyiˇ pawˆ pawˆ kaꞈ teˇ gʼaˇ le le awˬ pon caˇ tuˬ awˬ leuˉ cawˬ ve yoˬ.

Naˬ ve gawˬ ve awˬ ceuˬ. Yeˍsuˆ chaw yaˇ ve “a naˍ teˇ ceuˬ le le leh naˬ ve gawˬ ve teˇ ceuˬ le le” htaꞈ gu na˗e piˇ ve yoˬ. (Maꞈhtehˍ 4:23) Mehˆ cuˉ ve chaw, naˍ paw pawˇ ve chaw, hkiˬ tuꞈ keuˆ ve chaw leh pawꞈ hpeuˆ ve chaw htaꞈ Yeˍsuˆ gu na˗e piˇ ve yoˬ. Hkui luˬ laꞈ luˬ ve chaw hui htaꞈ kaꞈ yawˇ gu na˗e piˇ ve yoˬ. Yawˇ gu na˗e maˇ gʼa ve teˇ ceuˬ kaꞈ maˇ cawˬ.

Kawˆ tuˬ uiˍ ve mvuhˇ haw. Yeˍsuˆ leh yawˇ ve awˬ laꞈ gʼawˇ hui Gaˍliˍlehˇ gʼuiˬ po hkʼaw haw loꞈ kʼoˍ ciˇ kʼai ve teˇ yanˇ, teˇ pawˆ tiˉ mvuhˇ haw lonˉ meuˆ laˬ ve yoˬ. Awˬ laꞈ gʼawˇ hui kawˆ jaˇ. Yeˍsuˆ mvuhˇ haw htaꞈ nyi leh “Taꞈ iˉ gawˬ lehˍ chehˇ˗oˆ” tehꞈ tawˇ piˇ ve teˇ yanˇ, laꞈ haˉ gawˬ la ve yoˬ. (Maˍkuˆ 4:37-39) Teˇ pawˆ htaˇ, mvuhˇ haw hehnˇ jaˇ chehˇ ve hkʼaw yawˇ iˉ kaˆ hkʼoˆ juˇ toˇ gʼa ve yoˬ. (Maꞈhtehˍ 14:24-33)

Neˇ teˇ hpaˍ. Neˇ teˇ hpaˍ chaw yaˇ aꞈ kehˉ awˬ gʼaˇ uiˍ ve yoˬ. Chaw yaˇ laiˉ gʼaˇ, Gʼuiˬ sha ve canˇ paˍ chi teˇ hpaˍ ve kanˇ paˆ hkʼaw tawˆ la gaˇ ve htawˇ, tawˆ la maˇ gaˬ. Yaꞈ hkʼaˇ, laiˉ pawˆ laiˉ yanˇ Yeˍsuˆ neˇ htaꞈ tawˆ la˗o tehꞈ tawˇ piˇ htaˇ, chaw oˇ ve teˇ hpaˍ neˇ kanˇ paˆ awˬ hawˉ lo maˇ kʼawꞈ chehˇ. Yeˍsuˆ neˇ htaꞈ maˇ kawˆ. Yawˇ kanˇ paˆ cawˬ ve yoˬ tehꞈ shiˍ ve pa taw, neˇ teˇ hpaˍ kawˆ ve yoˬ.

Suh ve teˇ ceuˬ. Chaw yaˇ suh ve htaꞈ gʼaˇ maˇ hpehꞈ ve pa taw, “awˬ leh meuˇ” ve “canˇ paˍ” tehꞈ kʼoˆ ve yoˬ. (1 Kawˇrenˍhtuˆ 15:26) Yaꞈ hkʼaˇ, Yeˍsuˆ lehˬ suh peuˬ ve chaw htaꞈ teꞈ tu la piˇ ve yoˬ. Mehˇ chawˇ ma ve yaˇ paˍ leh, nyi ma luˬ chehˇ ve awˬ pa awˬ e ve yaˇ miˇ kaꞈ cawˬ ve yoˬ. Yeˍsuˆ haꞈ jaˇ ve awˬ chawˇ Laˍzaˍruˆ suh peuˬ ve awˇ nyi gaˬ peuˬ htawˇ, chaw awˬ moˍ lonˉ nyi ma luˬ chehˇ ve mehˆ gʼuˇ suhˍ Laˍzaˍruˆ htaꞈ teꞈ tu la piˇ ve yoˬ. Yeˍsuˆ anˇ tuˬ chi ve htaꞈ te ve yoˬ tehꞈ yawˇ ve canˇ paˍ htawˇ haꞈ yuˬ ve yoˬ. (Yoˇhanˬ 11:38-48; 12:9-11)

Aˬ htoꞈ ma pa taw Yeˍsuˆ anˇ tuˬ te ve le. Awˬ leh meuˇ gaˬ leh yawˇ ga piˇ ve chaw kʼawꞈ gʼa suh ve yoˬ. Yaꞈ hkʼaˇ, Yeˍsuˆ te ve anˇ tuˬ awˬ bon kʼawꞈ cawˬ sheˍ ve yoˬ. Hkunˉ hawˉ hkanˇ Meˍsiˉyaꞈ uˉ peunˍ ve teˇ ceuˬ htaꞈ caˉ daꞈ ve tcuh kaˍ paˍ tawˇ hkawˇ hkʼa peu˗eˬ awˬ tehˬ awˬ na biˇ la ve yoˬ tehꞈ, anˇ tuˬ chi teˇ hpaˍ maw laˇ ve yoˬ. Meuꞈ ve, naˬ ve gawˬ ve, kawˆ tuˬ uiˍ ve mvuhˇ haw, neˇ teˇ hpaˍ, leh suh ve htaꞈ Gʼuiˬ sha teh taˍ ve Hkunˉ hawˉ hkanˇ yuˬ baˬ gʼa ve yoˬ tehꞈ, hkʼa dehꞈ yonˍ gʼa ve yoˬ. Oˇ hkʼe te tuˬ yawˇ ve laꞈ sheh hkʼaw Gʼuiˬ sha kanˇ paˆ piˇ taˍ ve yoˬ.

—Maꞈhtehˍ liꞈ, Maˍkuˆ liꞈ, Luˉkaꞈ liꞈ, leh Yoˇhanˬ liꞈ hkʼaw yuˬ laˬ ve yoˬ.