YEˍSUˆ miˬ guiˬ hkʼoˆ aˬ htoꞈ ma te tuˬ laˬ ve le. Yawˇ kʼoˆ ve, “Gʼuiˬ sha ve mvuhˇ miˬ awˬ lawn ha lehˬ ve bon hkawˇ htaꞈ” “ngaˬ gʼa ca maˍ piˇ tuˬ yoˬ. Awˬ lawn kʼo, chi hkʼe te tuˬ awˬ pon Gʼuiˬ sha ngaˬ htaꞈ peu laˇ ve yoˬ”. (Luˉkaꞈ 4:43) Yeˍsuˆ maˍ ve Gʼuiˬ sha ve mvuhˇ miˬ htaꞈ caˉ daꞈ ve awˇ lawn htaꞈ dawˇ nyi sheˍ.

1. Yeˍsuˆ Hkunˉ hawˉ hkanˇ hpehꞈ tuˬ yoˬ. Yeˍsuˆ kʼoˆ ve yawˇ Meˍsiˉyaꞈ hpehꞈ ve yoˬ. (Yoˇhanˬ 4:25, 26) Yeˍsuˆ kʼawꞈ hpeuꞈ maw piˇ ve, yawˇ lehˬ tcuh kaˍ paˍ Daˍyeˍlaˆ zuhꞈ maˆ mawˬ taˍ ve Hkunˉ hawˉ hkanˇ hpehꞈ ve yoˬ. Yeˍsuˆ yawˇ ve tcuh yaˇ hui htaꞈ kaꞈ kʼoˆ piˇ ve, teˇ nyi kʼo yawˇ ve tcuh yaˇ leh yawˇ “awˬ meꞈ awˬ hponˇ cawˬ ve kʼaw jaw” lo gʼa mui tuˬ yoˬ. (Maꞈhtehˍ 19:28) Uˉ peunˍ shehˍ hpaˇ chi teˇ moˍ htaꞈ Yeˍsuˆ kʼoˆ ve, “i ve yawˬ teˇ moˍ” hpehꞈ ve yoˬ. Yawˇ kʼawꞈ kʼoˆ ve, yawˬ chi teˇ moˍ hkʼaw maˇ chehˇ ve “awˬ kaˍ awˬ nu yawˬ teˇ hpaˍ” cawˬ ve yoˬ. (Luˉkaꞈ 12:32; Yoˇhanˬ 10:16)

2. Gʼuiˬ sha ve mvuhˇ miˬ hteˇ ve cawˇ ve teˇ ceuˬ cawˬ tuˬ yoˬ. Yeˍsuˆ kʼoˆ maˍ laˇ ve Gʼuiˬ sha ve mvuhˇ miˬ lehˬ, hteˇ ve cawˇ ve teˇ ceuˬ tiˉ cawˬ tcuh ve yoˬ. Awˬ lawn kʼo, Yaˬhoˉvaˬ Gʼuiˬ sha ve awˬ meh htaꞈ yawˆ yan piˇ lawˬ leh Saˍtanˍ Eˍdenˍ hko hkʼaw lo hpfuhˆ hkʼawꞈ nawˉ awˬ meh oˇ ve htaꞈ she ve awˬ ceuˬ htaꞈ maˇ kʼawꞈ cawˬ tcuh. (Maꞈhtehˍ 6:9, 10) Yeˍsuˆ chaw mehˆ hpfuhˇ htaꞈ maˇ nyi leh, teˇ nyi le le hawˉ hkʼaˆ leh yaˇ miˇ, chaw uiˍ chaw i htaꞈ maˍ piˇ ve yoˬ. Yawˇ Iˉsaˍreˍlaˆ chaw htaꞈ ceh tiˉ maˍ piˇ tuˬ laˬ ve htawˇ, yawˇ Buiˇ shaˆ aˉ naˆ chaw leh Saˍmaˍriˆ chaw htaꞈ kaꞈ ga piˇ ve yoˬ. Yeˍsuˆ lehˬ, awˬ nu ve bon liˇ maˍ paˍ htaꞈ maˇ shuˍ. Yawˇ a ciˉ kaꞈ maˇ fuiˍ maˇ pehˬ ve yoˬ.

3. Gʼuiˬ sha ve mvuhˇ miˬ lehˬ, miˬ guiˬ yaˇ ve te hkʼaˇ dawˇ hkʼaˇ htaꞈ maˇ caˉ daꞈ. Yeˍsuˆ awˬ co˗e kaꞈ mvuhˇ miˬ hpawˇ maˇ cawˇ maˇ hawˍ daꞈ. Yeˍsuˆ paw ve mvuhˇ miˬ awˬ nu ve mvuhˇ miˬ kanˇ paˆ awˬ hawˉ lo chehˇ taˍ ve yoˬ. Yaꞈ hkʼaˇ, chaw yaˇ Yeˍsuˆ htaꞈ coˇ caˇ leh uˉ peunˍ paˍ te tcuh ve teˇ yanˇ, yawˇ hpaw˗e ve yoˬ. (Yoˇhanˬ 6:14, 15) Yawˇ mvuhˇ miˬ hpawˇ ve kanˉ te paˍ chaw uiˍ teˇ gʼaˇ htaꞈ kʼoˆ piˇ ve, yawˇ ve mvuhˇ miˬ lehˬ, miˬ guiˬ yaˇ ve te hkʼaˇ dawˇ hkʼaˇ htaꞈ maˇ caˉ daꞈ. (Yoˇhanˬ 18:36) Yawˇ ve awˬ laꞈ gʼawˇ htaꞈ Yeˍsuˆ kʼoˆ piˇ ve, yawˇ hui htawˇ miˬ guiˬ yaˇ ve te hkʼaˇ dawˇ hkʼaˇ htaꞈ maˇ caˉ daꞈ. (Yoˇhanˬ 15:19) Yeˍsuˆ yawˇ awˬ to htaꞈ fanˬ taˍ tuˬ ceh kaꞈ yawˇ hui htaꞈ laꞈ caˉ maˇ yehˇ tcuh. (Maꞈhtehˍ 26:51, 52)

4. Hkriꞈ uˉ peunˍ ve teˇ ceuˬ haꞈ pehnˇ ve hkʼa biˇ cawˬ ve yoˬ. Yeˍsuˆ ka tiꞈ te piˇ ve, dawˇ haˍ ve chaw hui nyi ma sha la tuˬ te piˇ tuˬ yoˬ. (Maꞈhtehˍ 11:28-30) Yawˇ ka tiꞈ oˇ ve htaꞈ haꞈ shaˉ taˍ ve yoˬ. Dawˇ haˍ dawˇ hkiˉ ve htaꞈ hkanˍ gʼaˇ ve, cawˇ daꞈ hawˍ daꞈ puiˉ ve, hpu shi mawˇ jeˬ htaꞈ ceh maˇ dawˇ nyi ve, leh dawˇ sha ve awˬ hkʼaˇ htaꞈ yawˇ haꞈ pehnˇ ve hkʼaw beˆ maˍ laˇ ve chi teˇ hpaˍ yehˇ gʼa tehˬ tehˬ yoˬ. (Maꞈhtehˍ liꞈ 5-7) Yawˇ shu htaꞈ haꞈ ve pa taw, hkʼaˬ hkʼe ve chaw htawˇ, yawˇ geh gʼa chehˇ ve kʼo dawˇ sha ve yoˬ. Shu maˇ shawˍ maˇ caˆ te piˇ ve chaw htawˇ yawˇ geh laˬ ve yoˬ. Awˬ lawn kʼo, yawˇ nyi ma daꞈ ve yoˬ tehꞈ yawˇ hui shiˍ ve yoˬ. Yeˍsuˆ daꞈ jaˇ ve Uˉ peunˍ shehˍ hpaˇ hpehꞈ tuˬ yoˬ.

Yeˍsuˆ Gʼuiˬ sha ve mvuhˇ miˬ awˬ lawn kʼawꞈ maˍ tuˬ, yawˇ anˇ tuˬ laiˉ ceuˬ te ve yoˬ. Aˬ htoꞈ ma pa taw le, teˇ geh nyi sheˍ.

—Maꞈhtehˍ liꞈ, Maˍkuˆ liꞈ, Luˉkaꞈ liꞈ, leh Yoˇhanˬ liꞈ hkʼaw yuˬ laˬ ve yoˬ.