YEˍSUˆ shehˆ hkʼawꞈ hpaˆ hto maˍ toˇ peuˬ hkʼawꞈ nawˉ, miˬ guiˬ hkʼoˆ chehˇ ve awˬ yanˇ peuˬ la paˇ neˇ ve htaꞈ yawˇ shiˍ ve yoˬ. Yawˇ htaꞈ tiˇ pehˍ tuˬ, Yuˇdaꞈ chaw ve bon liˇ awˬ hoˉ awˬ naˬ hui awˬ hkʼaˇ gu chehˇ ve yoˬ. Yaꞈ hkʼaˇ, yawˇ hui mvuhˇ miˬ yaˇ hui htaꞈ kawˆ ve yoˬ. Awˬ lawn kʼo, Yeˍsuˆ lehˬ tcuh kaˍ paˍ yoˬ tehꞈ, mvuhˇ miˬ yaˇ shawˍ taˍ ve yoˬ. Yeˍsuˆ ve tcuh yaˇ 12 gʼaˇ hkʼaw teˇ gʼaˇ Yuˇdaꞈ Iˉsaˍkaˍriˍoˆ htaꞈ Saˍtanˍ beˬ piˇ leh Yeˍsuˆ htaꞈ hpfuhˆ ve yoˬ. Yeˍsuˆ htaꞈ hpfuhˆ tuˬ awˬ pon, bon liˇ awˬ hoˉ awˬ naˬ hui Yuˇdaꞈ htaꞈ hpu 30 htehꞈ na peꞈ piˇ ve yoˬ.

Yeˍsuˆ a shaꞈ teꞈ chehˇ ve awˬ leh meuˇ teˇ haˉ htaˇ, Paˍsaˍhkaˍ pawehˇ caˇ tuˬ awˬ pon yawˇ tcuh yaˇ geh hpawnˬ daꞈ ve yoˬ. Yuˇdaꞈ htaꞈ tawˆ kʼai tcuh peuˬ hkʼawꞈ nawˉ, Yeˍsuˆ lehˬ Mvuhˇ hpeuꞈ Jawˇmawˇ Yeˍsuˆ ve Caˇ tuˬ tehꞈ meh ve pawehˇ awˬ suhˉ teˇ maˬ kʼawꞈ te ve yoˬ. Yawˇ hkaoˍ monˇ htaꞈ yuˬ leh bon lawˬ peuˬ hkʼawꞈ nawˉ, leuˉ taˍ ve tcuh yaˇ 11 gʼaˇ htaꞈ hkaoˍ monˇ oˇ ve caˍ piˇ ve yoˬ. Yawˇ kʼoˆ ve, “Chi lehˬ, nawˬ hui awˬ pon tanˇ piˇ ve ngaˬ ve awˬ to yoˬ. Ngaˬ htaꞈ dawˇ nawˇ tuˬ chi hkʼe te˗o”. Chi hkʼa shuˍ shuˍ, a pehˉ meuˇ gʼuiˬ keu taˍ ve kawˆ htaꞈ yawˇ yuˬ leh kʼoˆ ve, “Kawˆ chi lehˬ,” “ngaˬ ve awˬ suhˍ awˬ hkʼaw lo te taˍ ve ka tiꞈ shaˉ caˆ awˬ suhˉ hpehꞈ ve yoˬ.” (Luˉkaꞈ 22:19, 20)

Oˇ ve teˇ haˉ, tcuh yaˇ hui htaꞈ Yeˍsuˆ laiˉ lawn kʼoˆ piˇ ve yoˬ. Teˇ gʼaˇ leh teˇ gʼaˇ awˬ tehˬ awˬ na haꞈ daꞈ tuˬ yawˇ yawˇ hui htaꞈ awˬ liˇ tawˇ hkawˇ awˬ suhˉ piˇ ve yoˬ. “Nawˬ hui teˇ gʼaˇ leh teˇ gʼaˇ haꞈ daꞈ ve kʼo,” “nawˬ hui ngaˬ ve awˬ laꞈ gʼawˇ hpehꞈ ve htaꞈ chaw hkʼa peu˗eˬ gʼa shiˍ tuˬ yoˬ” tehꞈ yawˇ kʼoˆ piˇ ve yoˬ. (Yoˇhanˬ 13:34, 35) Hpehꞈ la tuˬ ve awˬ ceuˬ htaꞈ nyi ma maˇ luˬ tuˬ Yeˍsuˆ yawˇ hui htaꞈ awˬ gʼaˇ piˇ ve yoˬ. Yawˇ hui awˬ pon Yeˍsuˆ bon gʼaˇ hteꞈ lawˬ ve yoˬ. Yawˇ hui teˇ geh kʼa muiˬ hkawˇ kʼa peuˬ hkʼawꞈ nawˉ, tawˆ kʼai ve yoˬ.

Geˍseˍmaˍniˆ hko hkʼaw lo, Yeˍsuˆ hkui tcuhˉ teh leh nyi ma awˬ tawˬ hkʼa gaˬ bon lawˬ ve yoˬ. Maˇ maw maw kʼo, paw hkuˇ, maꞈ yaˇ leh chaw moˍ lonˉ Yeˍsuˆ htaꞈ hpeh tuˬ laˬ ve yoˬ. Yeˍsuˆ hkʼaˬ teˇ gʼaˇ hpehꞈ ve htaꞈ shiˍ tuˬ Yuˇdaꞈ yawˇ paˇ lo juˇ kʼai leh boˆ nu ve yoˬ. Maꞈ yaˇ Yeˍsuˆ htaꞈ hpeh taˍ htaˇ tcuh yaˇ hui hpaw kʼai ve yoˬ.

Yuˇdaꞈ chaw ve shaˉ nanˉ mehˆ gʼuˇ suhˍ lo Yeˍsuˆ huˉ chehˇ taˍ htaˇ, yawˇ Gʼuiˬ sha ve Yaˇ hpu yoˬ tehꞈ yawˇ hpeuꞈ maw piˇ ve yoˬ. Oˇ ve hkʼawꞈ nawˉ, yawˇ Gʼuiˬ sha htaꞈ maˇ shawˍ maˇ caˆ kʼoˆ ve pa taw, suh keunˍ ve yoˬ tehꞈ shaˉ nanˉ jehˬ cheˆ piˇ ve yoˬ. Yeˍsuˆ htaꞈ yuˬ leh Roˉmaꞈ Jawˇmawˇ Poˍtiˆ Piˉlaꞈ geh shiˍ kʼai ve yoˬ. Yeˍsuˆ yaꞈ kuiˬ maˇ mawˬ ve htawˇ, Yeˍsuˆ htaꞈ tiˇ pehˍ loˬ tehꞈ kuˬ chehˇ ve chaw moˍ lonˉ htaꞈ Piˉlaꞈ chiˇ aꞈ piˇ ve yoˬ.

Yeˍsuˆ Gawˇlaˍgawˇtaˆ lo shiˍ kʼai leh maꞈ yaˇ yawˇ htaꞈ suhˆ hkuiˉ daw hkʼoˆ lo htaꞈ keu piˇ ve yoˬ. Anˇ lawꞈ lawꞈ mvuhˇ nyi awˬ gʼeuˆ mehˉ kʼai leh naˆ hoꞈ hpehꞈ sheˬ ve yoˬ. Peuˬ hkʼawꞈ nawˉ, oˇ ve teˇ nyi mvuhˇ hpeuꞈ hpawˇ, Yeˍsuˆ suh leh miˬ hiˆ hehnˇ jaˇ ve yoˬ. Yawˇ hui Yeˍsuˆ awˬ to htaꞈ yuˬ leh haˉ pui htawˆ taˍ ve tuˍ hpfuh hkʼaw tuˍ piˇ ve yoˬ. Awˬ hkʼawꞈ nawˉ teˇ nyi gaˬ leh, paw hkuˇ tuˍ hpfuh htaꞈ hkʼa dehꞈ hoˆ tsuhˇ taˍ peuˬ hkʼawꞈ nawˉ, maꞈ yaˇ htaꞈ shaw tcuh taˍ ve yoˬ. Yeˍsuˆ tuˍ hpfuh hkʼaw chehˇ maˇ maw. Anˇ tuˬ uiˍ jaˇ ve teˇ ceuˬ hpehꞈ la˗a tehꞈ te chehˇ ve yoˬ.

—Maꞈhtehˍ liꞈ 26 leh 27; Maˍkuˆ liꞈ 14 leh 15; Luˉkaꞈ liꞈ 22 leh 23; Yoˇhanˬ liꞈ 12 te leh 19 hkʼaw yuˬ laˬ ve yoˬ.