YEˍSUˆ suh ve shehˆ nyi gaˬ leh, yawˇ ve awˬ laꞈ gʼawˇ yaˇ miˇ teˇ hpaˍ hpaˍ lehˬ, tuˍ hpfuh awˬ hkʼoˇ meuˇ lo tsuhˇ taˍ ve haˉ pui hpfuhˆ baˬ taˍ ve htaꞈ gʼa mawˬ ve yoˬ. Oˇ ve awˬ hkʼoˆ kaꞈ, tuˍ hpfuh hkʼaw teꞈ chiˉ maˇ mawˬ law.

Yawˇ hui mvuhˇ naw ma tcuh yaˇ nyiˇ gʼaˇ htaꞈ gʼa mawˬ ve yoˬ. Mvuhˇ naw ma tcuh yaˇ teˇ gʼaˇ kʼoˆ ve, “Naˍzaˍrehˆ chaw Yeˍsuˆ htaꞈ nawˬ hui ca ve yoˬ. Yawˇ kʼawꞈ teꞈ tu la peuˬ.” (Maˍkuˆ 16:6) Yaˇ miˇ oˇ ve teˇ hpaˍ tcuh yaˇ hui htaꞈ haˆ haˆ guiˇ hto piˇ ve yoˬ. Yaꞈ kʼaw kʼaˉ lo yawˇ hui Yeˍsuˆ htaꞈ gʼa mawˬ ve yoˬ. Yawˇ kʼoˆ ve, “Taˇ kawˆ. Ngaˬ ve awˬ viˉ awˬ nyi teˇ hpaˍ htaꞈ Gaˍliˍlehˇ mvuhˇ miˬ lo kʼai tuˬ ca hto piˇ˗oˆ. Oˇ kaˬ lo yawˇ hui ngaˬ htaꞈ gʼa mawˬ tuˬ yoˬ”. (Maꞈhtehˍ 28:10)

Peuˬ leh, awˬ laꞈ gʼawˇ nyiˇ gʼaˇ Yeˍruˆsaˍlehnˍ venˇ lo tawˆ˗e leh, Eˇmawꞈ hkʼaˆ hkʼaw lo juˇ kʼai chehˇ ve yoˬ. Chaw teˇ gʼaˇ yawˇ huiˉ maˬ geh kʼai chehˇ ve teˇ yanˇ, yawˇ na piˇ ve, nawˬ huiˉ maˬ aˬ htoꞈ ma awˬ lawn naꞈ uˉ te daꞈ chehˇ ve le. Awˉ lawˉ htaˇ lehˬ, chaw chi teˇ gʼaˇ, teꞈ tu la peuˬ ve Yeˍsuˆ yoˬ tehꞈ, yawˇ huiˉ maˬ laꞈ haˉ maˇ shiˍ. Yawˇ huiˉ maˬ mehˆ hpfuhˇ nawˍ lehˍ te leh hkʼawꞈ piˇ ve, Yeˍsuˆ awˬ lawn kʼoˆ daꞈ chehˇ ve yoˬ. Chaw chi teˇ gʼaˇ lehˬ, Liꞈ hpu hkʼaw Meˍsiˉyaꞈ awˬ lawn tanˬ kʼaoˍ maˍ piˇ ve yoˬ. Yeˍsuˆ lehˬ, tcuh kaˍ paˍ ve tawˇ hkawˇ Meˍsiˉyaꞈ awˬ lawn hkʼa peu˗eˬ awˬ tehˬ awˬ na biˇ la piˇ ve yoˬ. a Maˇ mawˬ jaw ve chaw chi teˇ gʼaˇ awˬ ha ve awˬ to kʼawꞈ teꞈ tu la peuˬ ve Yeˍsuˆ hpehꞈ ve yoˬ tehꞈ, awˬ laꞈ gʼawˇ nyiˇ gʼaˇ shiˍ la htaˇ, yawˇ mehˉ kʼai ve yoˬ.

Awˬ laꞈ gʼawˇ chi nyiˇ gʼaˇ, Yeˍruˆsaˍlehnˍ venˇ lo laꞈ haˉ haˆ kʼoꞈ˗e ve yoˬ. Oˇ kaˬ lo, yehˬ miˉ kʼawˍ taˍ ve bawehˇ hkʼaw tcuh yaˇ hui hpawnˬ daꞈ chehˇ ve htaꞈ yawˇ huiˉ maˬ gʼa mawˬ ve yoˬ. Yawˇ huiˉ maˬ gʼa hpuˇ laˬ ve awˬ lawn htaꞈ kʼaoˍ maˍ chehˇ ve teˇ yanˇ, yawˇ hui Yeˍsuˆ htaꞈ gʼa mawˬ ve yoˬ. Awˬ laꞈ gʼawˇ hui anˇ jaˇ leh, maˇ yonˍ gaˇ shaˉ˗ehˍ kʼai ve yoˬ. Yeˍsuˆ na piˇ ve, “Aˬ htoꞈ ma pa taw nawˬ hui ve nyi ma hkʼaw lo htawˇ dawˇ nawˬ dawˇ te chehˇ ve le.” “Liꞈ hpu hkʼaw chi hkʼe bvuhꞈ taˍ ve, Hkriꞈ lehˬ gʼa hkanˍ suh leh shehˆ nyi gaˬ kʼo gʼa kʼawꞈ teꞈ tu la tuˬ yoˬ.” (Luˉkaꞈ 24:38, 46)

Yeˍsuˆ teꞈ tu la peuˬ hkʼawꞈ nawˉ 40 nyi ve awˬ yanˇ hkʼaw, awˬ laꞈ gʼawˇ hui htaꞈ yawˇ awˬ to laiˉ pawˆ laiˉ yanˇ maw piˇ ve yoˬ. Teˇ pawˆ htaˇ, chaw 500 gʼaˇ yawˇ htaꞈ mawˬ ve yoˬ. Yawˇ lehˬ yawˇ hui htaꞈ a yeˇ uiˍ ve kanˉ aꞈ piˇ leh kʼoˆ ve, “kʼai leh, chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o.” “Ngaˬ nawˬ hui htaꞈ piˇ taˍ ve tawˇ hkawˇ hkʼa peu˗eˬ na yuˬ leh te tuˬ, yawˇ hui htaꞈ maˍ piˇ˗oˆ. Miˬ guiˬ chi awˬ yanˇ leh htaˇ hkʼa gaˬ, ngaˬ nawˬ hui geh hkʼaˬ htaˆ kaꞈ chehˇ tuˬ yoˬ”. (Maꞈhtehˍ 28:19, 20)

Ka tiꞈ yeˬ ve tcuh yaˇ 11 gʼaˇ geh hpawnˬ daꞈ ve awˬ leh meuˇ teˇ pawˆ, Yeˍsuˆ ka tiꞈ te piˇ ve, “daꞈ ve kehˬ ve Awˬ ha hpu nawˬ hui awˬ hkʼoˆ lo yaꞈ la htaˇ, nawˬ hui kanˇ paˆ gʼa tuˬ yoˬ.” “Mvuhˇ leh miˬ leh hkʼa gaˬ, nawˬ hui ngaˬ ve shaˉ hkiˆ hkanˍ shehˍ hpaˇ gʼa hpehꞈ tuˬ yoˬ”. (Tcuh yaˇ 1:8) Peuˬ leh, yawˇ htaꞈ chiˇ taˆ˗e leh, moˬ koˍ piˇ ve pa taw yawˇ hui Yeˍsuˆ htaꞈ maˇ kʼawꞈ mawˬ.

—Maꞈhtehˍ liꞈ 28; Maˍkuˆ liꞈ 16; Luˉkaꞈ liꞈ 24; Yoˇhanˬ liꞈ 20 leh 21; 1 Kawˇrenˍhtuˆ 15:5, 6 hkʼaw yuˬ laˬ ve yoˬ.