YAˍKOˆ leh Yuˇdaꞈ lehˬ, Yeˍsuˆ awˬ nyi paˍ hpehꞈ ve yoˬ. Peˍtruˆ leh Yoˇhanˬ kʼo, Yeˍsuˆ ve tcuh yaˇ 12 gʼaˇ hkʼaw chehˇ taˍ ve yoˬ. Heˍlaˍsaˆ Liꞈ hpu hkʼaw 7 kʼoˆ lehˬ, hawˉ hkʼaˆ chi 4 gʼaˇ bvuhꞈ taˍ ve yoˬ. Liꞈ teˇ kʼoˆ leh teˇ kʼoˆ bvuhꞈ ve chaw awˬ meh awˬ hkʼaˇ suh gʼaꞈ kuˬ ve yoˬ. Hkriꞈ yaˇ lehˬ, Yaˬhoˉvaˬ htaꞈ ka tiꞈ yeˬ leh Gʼuiˬ sha ve mvuhˇ miˬ htaꞈ gʼaˇ va tuˬ, dawˇ pawnˍ piˇ ve liꞈ chi teˇ hpaˍ hkʼaw shaˍ tiꞈ piˇ taˍ ve yoˬ.

Yonˍ ve teˇ ceuˬ. Yonˍ ve yoˬ tehꞈ kʼoˆ ve ceh tiˉ maˇ lawꞈ. Awˬ tehˬ yonˍ ve teˇ ceuˬ lehˬ, yonˍ ve awˬ hkʼaˇ suh gʼa te tawˆ la ve yoˬ. Yaˍkoˆ bvuhꞈ taˍ ve, “yonˍ ve teˇ ceuˬ htawˇ kanˉ maˇ te ve kʼo, suh taˍ ve yoˬ.” (Yaˍkoˆ 2:26) Yonˍ ve htaꞈ gʼaꞈ te ve pa taw, beˬ ve lawˇ ve htaꞈ gʼa hpuˇ htaˇ, yeunˇ hkanˍ puiˉ la ve yoˬ. Yeunˇ hkanˍ gʼaˇ tuˬ awˬ pon, Gʼuiˬ sha cuˇ yiˍ peꞈ laˇ tuˬ yoˬ tehꞈ, yonˍ ve hkʼaw Hkriꞈ yaˇ Gʼuiˬ sha geh gʼa lawˬ ve yoˬ. Yeunˇ hkanˍ puiˉ ve teˇ ceuˬ Gʼuiˬ sha nyi hkʼaˇ suh ve yoˬ. (Yaˍkoˆ 1:2-6, 12) Oˉ kʼoˍ pui ve chaw yonˍ ve hkʼaw ka tiꞈ yeˬ ve kʼo, Yaˬhoˉvaˬ Gʼuiˬ sha te hkʼawꞈ piˇ tuˬ yoˬ. Yaˍkoˆ kʼoˆ ve, “Gʼuiˬ sha geh jiˆ laˬ˗oꞈ. Hkʼe te kʼo, yawˇ nawˬ hui geh jiˆ laˬ tuˬ yoˬ.” (Yaˍkoˆ 4:8)

Chaꞈ chiˆ ve awˬ liˇ awˬ hkʼaˇ teˇ hpaˍ beˬ ve lawˇ ve htaꞈ tawˍ daꞈ gʼaˇ tuˬ, Hkriꞈ yaˇ ve yonˍ hkʼaˇ awˬ gʼaˇ gʼa uiˍ ve yoˬ. Miˬ guiˬ hkʼoˆ chaꞈ chiˆ ve awˬ liˇ awˬ hkʼaˇ zuhˇ kʼai ve pa taw, awˬ viˉ awˬ nyi Hkriꞈ yaˇ htaꞈ Yuˇdaꞈ awˬ gʼaˇ piˇ ve, “yonˍ ve teˇ ceuˬ awˬ pon nawˬ hui gʼaˇ hteꞈ” te˗oˆ tehꞈ kʼoˆ piˇ ve yoˬ. (Yuˇdaꞈ 3)

Daꞈ kehˬ ve awˬ liˇ awˬ hkʼaˇ. Yaˬhoˉvaˬ htaꞈ oˉ kʼoˍ pui ve chaw hui teˇ hpawˇ le le daꞈ kehˬ tuˬ yawˇ dawˇ law ve yoˬ. Peˍtruˆ bvuhꞈ taˍ ve, “nawˬ hui hkʼa te ve awˬ liˇ awˬ hkʼaˇ hkʼa peu˗eˬ awˬ hkʼaw lo daꞈ kehˬ piˇ˗oˆ. Ngaˬ [Yaˬhoˉvaˬ] daꞈ kehˬ ve pa taw, nawˬ hui htawˇ daꞈ kehˬ piˇ˗oˆ tehꞈ, Liꞈ hpu hkʼaw bvuhꞈ taˍ ve yoˬ.” (1 Peˍtruˆ 1:15, 16) Hkriꞈ yaˇ hui lehˬ keunˍ ve henˇ yuˬ tuˬ cawˬ ve yoˬ. Peˍtruˆ kʼoˆ ve, “Hkriꞈ htawˇ nawˬ hui awˬ pon gʼa tuꞈ gʼa hkanˍ leh, nawˬ hui yawˇ ve hkui ha awˬ hkʼaˇ suh gʼaꞈ kʼai tuˬ, nawˬ hui awˬ pon henˇ kuiˬ jawˬ kuiˬ yawˇ te taˉ peuˬ.” (1 Peˍtruˆ 2:21) Hkriꞈ yaˇ Gʼuiˬ sha ve awˬ liˇ tawˇ hkawˇ htaꞈ vawˆ tiˍ ve pa taw, gʼa tuꞈ hkanˍ puiˉ ve htawˇ, yawˇ hui “shiˍ puiˉ ve nyi ma htaꞈ kehˬ lehˍ cawˬ piˇ” ve yoˬ. (1 Peˍtruˆ 3:16, 17) Gʼuiˬ sha ve suhˉ jehˬ ve awˬ nyi leh ka tiꞈ te taˍ ve, “hteˇ ve cawˇ ve awˬ ceuˬ ceh tiˉ cawˬ” ve miˬ guiˬ awˬ suhˉ htaꞈ law taˍ leh dawˇ law chehˇ ve teˇ yanˇ, Hkriꞈ yaˇ Gʼuiˬ sha htaꞈ yawˆ yan ve hkʼaw daꞈ kehˬ ve awˬ liˇ awˬ hkʼaˇ hkʼa biˇ gʼa te ve yoˬ tehꞈ, Peˍtruˆ awˬ gʼaˇ piˇ ve yoˬ. (2 Peˍtruˆ 3:11-13)

Haꞈ pehnˇ ve. Yoˇhanˬ bvuhꞈ taˍ ve, “Gʼuiˬ sha lehˬ haꞈ pehnˇ ve teˇ ceuˬ hpehꞈ ve yoˬ.” Gʼuiˬ sha haꞈ pehnˇ uiˍ ve teˇ ceuˬ lehˬ, “ngaˬ hui ve venˇ baˆ htaꞈ hpehˇ hkʼa laˇ tuˬ awˬ pon” yawˇ Yeˍsuˆ htaꞈ peu laˇ ve yoˬ tehꞈ tcuh yaˇ chi teˇ gʼaˇ beˆ maˍ laˇ ve yoˬ. Hkriꞈ yaˇ hkʼaˬ hkʼe te hkʼawꞈ piˇ cawˇ ve le. Yoˇhanˬ kʼaoˍ maˍ laˇ ve, “Haꞈ ve chaw teˇ hpaˍ˗oˬ, Gʼuiˬ sha lehˬ ngaˬ hui htaꞈ chi taw taw haꞈ ve kʼo, ngaˬ hui htawˇ teˇ gʼaˇ leh teˇ gʼaˇ haꞈ daꞈ cawˇ ve yoˬ.” (1 Yoˇhanˬ 4:8-11) Haꞈ pehnˇ ve chi teˇ ceuˬ lehˬ, awˬ viˉ awˬ nyi Hkriꞈ yaˇ htaꞈ ha lehˬ ha kʼa haꞈ yuˬ ve teˇ ceuˬ yoˬ. (3 Yoˇhanˬ 5-8)

Yaꞈ hkʼaˇ, Yaˬhoˉvaˬ htaꞈ oˉ kʼoˍ pui ve chaw yawˇ htaꞈ hkʼaˬ hkʼe haꞈ gʼa tuˬ le. Yoˇhanˬ hkʼawꞈ piˇ ve, “Gʼuiˬ sha htaꞈ haꞈ ve tehꞈ kʼoˆ ve lehˬ, yawˇ piˇ taˍ ve tawˇ hkawˇ teˇ hpaˍ htaꞈ ngaˬ hui na yuˬ leh te ve htaꞈ kʼoˆ ve yoˬ. Chi hkʼoˆ kaꞈ, yawˇ piˇ taˍ ve tawˇ hkawˇ teˇ hpaˍ lehˬ, haˍ jaˇ ve teˇ ceuˬ hpehꞈ ve maˇ heˆ.” (1 Yoˇhanˬ 5:3; 2 Yoˇhanˬ 6) Gʼuiˬ sha hkawˇ htaꞈ na yuˬ ve chaw hui Gʼuiˬ sha haꞈ ve chaw hpehꞈ leh “co tiꞈ ha tiꞈ gʼa” tuˬ yoˬ tehꞈ yonˍ gʼa ve yoˬ. (Yuˇdaꞈ 21)

—Yaˍkoˆ liꞈ; 1 leh 2 Peˍtruˆ liꞈ; 1, 2, leh 3 Yoˇhanˬ liꞈ; Yuˇdaꞈ liꞈ hkʼaw yuˬ laˬ ve yoˬ.