Eˍdenˍ meh ve awˬ ti lo Yaˬhoˉvaˬ hko teˇ hko te hpanˍ taˍ ve yoˬ. Hko chi ve hkʼaw suhˉ veˆ, suhˆ cehˬ, leh to nuˇ to shaˆ laiˉ ceuˬ cawˬ ve yoˬ. Oˇ ve hkʼawꞈ nawˉ, Gʼuiˬ sha jeꞈ yuˬ leh hawˉ hkʼaˆ awˉ lawˉ teˇ gʼaˇ Aˍdanˍ meh ve htaꞈ te hpanˍ leh, yawˇ shaˉ gʼawˬ gʼa tuˬ yawˇ ve naˍ hkʼawˇ hkʼaw meuˆ keu piˇ ve yoˬ. Aˬ htoꞈ ma hpehꞈ la ve le? Hawˉ hkʼaˆ chi teˇ gʼaˇ a shaꞈ teꞈ la ve yoˬ! Yaˬhoˉvaˬ Aˍdanˍ htaꞈ hko nyi haꞈ shaˉ tcuh leh to nuˇ to shaˆ htaꞈ awˬ meh meh piˇ tcuh ve yoˬ.

Yaˬhoˉvaˬ Aˍdanˍ htaꞈ a yeˇ uiˍ jaˇ ve awˬ liˇ tawˇ hkawˇ teˇ hkawˇ piˇ ve yoˬ. Yawˇ yawˇ htaꞈ kʼoˆ piˇ ve, ‘hko chi hkʼaw cawˬ ve iˉ shiˍ hkʼa peu˗eˬ htaꞈ nawˬ caˇ hpehꞈ ve yoˬ. Yaꞈ hkʼaˇ, teˇ cehˬ cawˬ ve htaꞈ taˇ caˇ. Awˬ shiˍ oˇ ve htaꞈ nawˬ caˇ ve kʼo, gʼa suh tuˬ yoˬ.’

Hkʼe te leh, Yaˬhoˉvaˬ kʼoˆ ve, ‘ngaˬ Aˍdanˍ htaꞈ ga piˇ shehˍ ma teˇ gʼaˇ te hpanˍ piˇ tuˬ yoˬ.’ Yawˇ Aˍdanˍ htaꞈ zuhꞈ muiˉ kʼa tcuh leh Aˍdanˍ ve nyi kuˇ teˇ maˬ yuˬ leh awˬ miˇ ma te hpanˍ piˇ ve yoˬ. Yawˇ Eˇvaꞈ meh ve yoˬ. Aˍdanˍ Eˇvaꞈ yehˬ kʼa  awˉ lawˉ teˇ yehˬ kʼa hpehꞈ la ve yoˬ. Aˍdanˍ yawˇ ve awˬ miˇ ma htaꞈ hkʼaˬ hkʼe dawˇ ve le? Yawˇ ha lehˬ jaˇ leh kʼoˆ ve, ‘Yaˬhoˉvaˬ ngaˬ ve awˬ muꞈ ku htaꞈ te hpanˍ taˍ ve yaˇ miˇ chi htaꞈ nyi sheˍ! Ngaˬ hkʼa shuˍ chaw yaˇ hpehꞈ ve yoˬ.’

Miˬ guiˬ hkʼoˆ awˬ yaˇ awˬ duˬ biˇ la piˇ˗oˆ tehꞈ Yaˬhoˉvaˬ Aˍdanˍ Eˇvaꞈ htaꞈ kʼoˆ piˇ ve yoˬ. Yawˇ yawˇ hui kanˉ te ve awˬ hkʼaw lo ha lehˬ tcuh gaˇ ve yoˬ. Miˬ guiˬ hkʼa peu˗eˬ Eˍdenˍ hko hkʼa shuˍ daꞈ jaˇ ve paˍraˍdiˇsuˆ hpehꞈ la tuˬ, Yaˬhoˉvaˬ yawˇ hui htaꞈ awˬ vuiˬ piˇ ve yoˬ. Yaꞈ hkʼaˇ, Gʼuiˬ sha dawˇ law taˍ ve hkʼe miˬ guiˬ chi ve daꞈ jaˇ ve hko maˇ hpehꞈ la ve aˬ htoꞈ ma pa taw le? Awˬ gʼuˇ suhˍ teˇ lawn hkʼaw ngaˬ hui gʼa shiˍ tuˬ yoˬ.