Chi teˇ hkui Iˉsaˍreˍlaˆ chaw maˇ˗awˍ ve Yeˍruˆsaˍlehnˍ venˇ hkʼaw kʼoꞈ˗e ve aˬ laˬ hkʼe 70 hkʼawꞈ gaˬ peuˬ. Yaꞈ hkʼaˇ, Paˇshaˇ mvuhˇ miˬ laiˉ kaˬ lo Iˉsaˍreˍlaˆ chaw chehˇ taˍ leh Gʼuiˬ sha ve awˬ liˇ tawˇ hkawˇ maˍ paˍ paw hkuˇ Eˇzaˍraˆ kaꞈ chehˇ taˍ sheˍ ve yoˬ. Yeˍruˆsaˍlehnˍ venˇ hkʼaw kʼoꞈ˗e ve chaw Gʼuiˬ sha ve awˬ liˇ tawˇ hkawˇ htaꞈ maˇ gʼaꞈ te ve, Eˇzaˍraˆ gʼa kaˇ leh yawˇ yawˇ hui htaꞈ ga piˇ gaˇ ve yoˬ. Paˇshaˇ mvuhˇ miˬ jawˇ mawˇ Aˍtaˍyeˍziˆ yawˇ htaꞈ kʼoˆ piˇ ve, ‘Gʼuiˬ sha nawˬ htaꞈ cuˇ yiˍ peꞈ laˇ leh yawˇ ve awˬ liˇ tawˇ hkawˇ maˍ piˇ gʼa tuˬ yoˬ. Nawˬ kʼai lo. Nawˬ geh kʼai gaˇ ve chaw htaꞈ shiˍ kʼai˗o.’ Yeˍruˆsaˍlehnˍ venˇ lo kʼoꞈ˗e gaˇ ve chaw htaꞈ Eˇzaˍraˆ kuˬ hpawnˬ leh kʼoˆ piˇ ve ngaˬ hui kʼoꞈ˗e tuˬ vuiˇ jaˇ ve pa taw, Yaˬhoˉvaˬ haꞈ shaˉ laˇ tuˬ bon lawˬ˗oꞈ. Peuˬ hkʼawꞈ nawˉ, yawˇ hui tawˆ kʼai ve yoˬ.

4 ha pa peuˬ hkʼawꞈ nawˉ, yawˇ hui Yeˍruˆsaˍlehnˍ venˇ lo gaˬ˗e ve yoˬ. Oˇ kaˬ lo ve awˬ hoˉ awˬ naˬ Eˇzaˍraˆ htaꞈ kʼoˆ piˇ ve, ‘Iˉsaˍreˍlaˆ chaw Yaˬhoˉvaˬ ve awˬ liˇ tawˇ hkawˇ maˇ na yuˬ leh maˇ heˆ heˆ ve gʼuiˬ sha htaꞈ oˉ kʼoˍ pui ve yaˇ miˇ htaꞈ heuˆ ve yoˬ.’ Oˇ hkʼe gʼa kaˇ htaˇ, Eˇzaˍraˆ lehˬ mvuhˇ miˬ yaˇ mehˆ gʼuˇ suhˍ hkui tcuhˉ teh leh bon lawˬ leh kʼoˆ ve, ‘Yaˬhoˉvaˬ˗oˬ nawˬ ngaˬ hui htaꞈ laiˉ ceuˬ te laˇ ve htawˇ, ngaˬ hui nawˬ htaꞈ te yaꞈ ve yoˬ.’ Iˉsaˍreˍlaˆ chaw dawˇ hpfuhˆ ve htawˇ, yawˇ hui maˇ cawˇ ve awˬ ceuˬ te chehˇ sheˍ ve yoˬ. Eˇzaˍraˆ awˬ lawn chi ve htaꞈ gu tuˬ awˬ hoˉ awˬ naˬ leh suhˉ jehˬ shehˍ hpaˇ teˇ hpaˍ htaꞈ leuˆ yuˬ ve yoˬ. Yaˬhoˉvaˬ htaꞈ oˉ kʼoˍ maˇ pui ve buiˇ shaˆ aˉ naˆ chaw hui htaꞈ kʼoꞈ˗e tcuh tuˬ, yawˇ hui awˬ yanˇ 3 ha pa piˇ ve yoˬ.

12 hkʼawꞈ peuˬ hkʼawꞈ nawˉ, Yeˍruˆsaˍlehnˍ lanˇ venˇ te peuˬ˗oˬ. Gʼuiˬ sha ve awˬ liˇ tawˇ hkawˇ gʼaw maˍ piˇ tuˬ, Eˇzaˍraˆ mvuhˇ miˬ yaˇ htaꞈ kuˬ leh taˍ meuꞈ hpeꞈ lo hpawnˬ la tcuh ve yoˬ. Eˇzaˍraˆ liꞈ daw gʼaw htaˇ, mvuhˇ miˬ yaˇ na chehˇ ve yoˬ. Eˇzaˍraˆ Yaˬhoˉvaˬ htaꞈ chiˇ mvuh chehˇ htaˇ, mvuhˇ miˬ yaˇ laꞈ sheh chiˇ ve yoˬ. Eˇzaˍraˆ Gʼuiˬ sha ve awˬ liˇ tawˇ hkawˇ gʼaw leh kʼoˆ maˍ piˇ ve htaꞈ yawˇ hui hkʼa dehꞈ na yuˬ ve yoˬ. Iˉsaˍreˍlaˆ chaw Yaˬhoˉvaˬ hkawˇ maˇ na yuˬ ve htaꞈ shiˍ la htaˇ yawˇ hui hawˬ ve yoˬ. Oˇ ve hkʼawꞈ nawˉ, Eˇzaˍraˆ mvuhˇ miˬ yaˇ htaꞈ awˬ liˇ tawˇ hkawˇ laiˉ tawn gʼaw maˍ piˇ ve yoˬ. Aˉ po kʼo pawehˇ te tuˬ gaˬ la paˇ neˇ˗oˬ tehꞈ kʼoˆ piˇ leh, yawˇ hui pawehˇ chi te tuˬ laꞈ haˉ gu ve yoˬ.

 Iˉsaˍreˍlaˆ chaw aˉ po kʼo pawehˇ 7 nyi hti caˇ hti dawˬ ve yoˬ. Yawˇ hui htaꞈ Yaˬhoˉvaˬ awˬ bon naꞈ piˇ leh ti mi hkʼaw awˬ shiˍ awˬ nu hkʼa biˇ nawꞈ la leh ha lehˬ jaˇ ve pa taw, Yaˬhoˉvaˬ ve bon htaꞈ chiˇ mvuh ve yoˬ. Iˉsaˍreˍlaˆ chaw hui Yawˇsuˆ ve awˬ co˗e htaˇ tanˬ leh aˉ po kʼo pawehˇ chi hkʼe ve maˇ gʼa te jaw. Pawehˇ chi te peuˬ hkʼawꞈ nawˉ, mvuhˇ miˬ yaˇ hpawnˬ la leh bon lawˬ ve, ‘Yaˬhoˉvaˬ˗oˬ, ngaˬ hui shu ceˬ hpehꞈ chehˇ htaˇ nawˬ ponˬ laˇ ve yoˬ. Heh puiˉ hkʼaw nawˬ ngaˬ hui htaꞈ nyi haꞈ shaˉ laˇ leh daꞈ jaˇ ve miˬ guiˬ peꞈ laˇ ve yoˬ. Nawˬ tcuh kaˍ paˍ htaꞈ peu laˇ leh shaˍ tiꞈ peꞈ laˇ ve htawˇ, ngaˬ hui laiˉ pawˆ maˇ na yuˬ. Yaꞈ hkʼaˇ, nawˬ ngaˬ hui htaꞈ yeunˇ hkanˍ chehˇ leh Aˍbraˍhanˍ htaꞈ ka tiꞈ te piˇ ve nawˬ maˇ leunˇ. Chi teˇ hkui nawˬ hkawˇ na yuˬ tuˬ ngaˬ hui ka tiꞈ te ve yoˬ.’ Ka tiꞈ chi ve liꞈ hkʼaw bvuhꞈ keu taˍ leh awˬ hoˉ awˬ naˬ, Leˍviˆ chaw, leh paw hkuˇ laꞈ maꞈ nyiˉ taˍ ve yoˬ.