Beˍlaˍshaˍzaˍ lehˬ Baˍbuˍlonˍ mvuhˇ miˬ hkʼaw Neˍbuˍhkaˍneˍzaˍ ve awˬ tan jawˇ mawˇ te ve yoˬ. Teˇ haˉ htaˇ, Beˍlaˍshaˍzaˍ ve pawehˇ hti caˇ hti dawˬ ve hkʼaw laˬ tuˬ, Baˍbuˍlonˍ mvuhˇ miˬ hkʼaw ve chaw uiˍ chaw mvuh teˇ 1,000 gʼaˇ htaꞈ yawˇ kuˬ piˇ ve yoˬ. Leh Neˍbuˍhkaˍneˍzaˍ Yaˬhoˉvaˬ ve bon yehˬ hkʼaw yuˬ laˬ taˍ ve shi kʼawˆ yawˇ ve awˬ ceˬ paˍ htaꞈ yuˬ tawˆ la tcuh ve yoˬ. Hkʼe te leh, Beˍlaˍshaˍzaˍ leh pawehˇ hkʼaw laˬ ve hkehˉ chaw kawˆ oˇ ve htaꞈ yuˬ leh a pehˉ meuˇ gʼuiˬ keu dawˬ leh yawˇ hui ve gʼuiˬ sha htaꞈ chiˇ mvuh chehˇ htaˇ, hti caˇ hti dawˬ ve pawehˇ hkʼaw laꞈ sheh teˇ paˉ tawˆ la leh, awˬ gʼeuˆ ba daꞈ jaˇ ve gʼoꞈ pa hkʼoˆ lo liꞈ bvuhꞈ sheˬ ve htaꞈ chaw teˇ gʼaˇ kaꞈ gʼaw maˇ gʼa.

Beˍlaˍshaˍzaˍ kawˆ jaˇ. Yawˇ cuˇ yiˍ cawˬ paˍ leh mawˇ paˍ hui htaꞈ kuˬ laˬ leh ka tiꞈ te piˇ ve, ‘a shu teˇ gʼaˇ tcuhˉ kuiˬ yuˬ tawˆ gʼa ve kʼo, Baˍbuˍlonˍ mvuhˇ miˬ hkʼaw awˬ hoˉ 3 gʼaˇ teˇ gʼaˇ te tcuh laˇ tuˬ yoˬ.’ Yawˇ hui coˇ caˇ leh tcuhˉ kuiˬ yuˬ tawˆ ve yoˬ. Yaꞈ hkʼaˇ, teˇ gʼaˇ kaꞈ yuˬ tawˆ maˇ gʼa. Oˇ htaˇ jawˇ mawˇ ma loꞈ la leh kʼoˆ ve, ‘Daˍyeˍlaˆ meh ve hawˉ hkʼaˆ teˇ gʼaˇ cawˬ ve yoˬ. Yawˇ nawˬ pa Neˍbuˍhkaˍneˍzaˍ ve haˍ ve awˬ lawn kʼoˆ maˍ piˇ gʼa ve yoˬ. Liꞈ mehˆ chi ve tcuhˉ kuiˬ yawˇ kʼoˆ laˇ gʼa tuˬ yoˬ.’

Daˍyeˍlaˆ lehˬ jawˇ mawˇ Beˍlaˍshaˍzaˍ geh laˬ leh jawˇ mawˇ yawˇ htaꞈ kʼoˆ piˇ ve, ‘nawˬ liꞈ oˇ ve htaꞈ gʼaw leh tcuhˉ kuiˬ yuˬ tawˆ gʼa ve kʼo, ngaˬ shi caˆ pfuhˍ laˇ leh Baˍbuˍlonˍ mvuhˇ miˬ hkʼaw chaw uiˍ 3 gʼaˇ teˇ gʼaˇ te tcuh laˇ tuˬ yoˬ.’ Daˍyeˍlaˆ yaw hkʼawꞈ piˇ ve, ‘ngaˬ laꞈ shawnˍ maˇ heuˆ gaˇ. Yaꞈ hkʼaˇ, tcuhˉ kuiˬ chi ve kʼoˆ maˍ laˇ tuˬ yoˬ. Nawˬ pa Neˍbuˍhkaˍneˍzaˍ caˆ muiˬ puiˉ ve htaꞈ Yaˬhoˉvaˬ nyi ma nuˇ nehˬ la tcuh ve yoˬ. Nawˬ pa aˬ ma hpehꞈ la ve nawˬ shiˍ taˍ ve yoˬ. Yaꞈ hkʼaˇ, nawˬ Yaˬhoˉvaˬ htaꞈ maˇ yawˆ yan sheˍ. Yaˬhoˉvaˬ ve bon yehˬ hkʼaw yuˬ laˬ taˍ ve shi kawˆ htaꞈ nawˬ a pehˉ meuˇ gʼuiˬ keu dawˬ ve yoˬ. Meˍneˍ, meˍneˍ, teˍkeˍlaˆ uˆpaˍsenˍ, tehꞈ Gʼuiˬ sha liꞈ chi hkʼe bvuhꞈ tawˆ la ve tcuhˉ kuiˬ lehˬ, Miˍdiˆ leh Paˇshaˆ Baˍbuˍlonˍ htaꞈ bawˆ gʼaˇ leh nawˬ kaꞈ jawˇ mawˇ maˇ kʼawꞈ gʼa te tuˬ yoˬ.’

Oˇ ve teˇ yanˇ, Baˍbuˍlonˍ venˇ htaꞈ bawˆ gʼaˇ paˍ maˇ cawˬ hehˉ. Awˬ lawn kʼo, laˇ venˇ htu jaˇ leh uiˍ jaˇ ve yoˬ. Laˇ venˇ awˬ jaˇ lo kaꞈ iˉ  kaˆ hkʼa caw zuhˇ cawˬ leh naˉ jaˇ ve yoˬ. Yaꞈ hkʼaˇ, oˇ ve teˇ haˉ Miˍdiˆ chaw leh Paˉshaˆ chaw Baˍbuˍlonˍ htaꞈ ca bawˆ la ve yoˬ. Paˉshaˆ ve jawˇ mawˇ Kuˇruˆ lehˬ venˇ awˬ jaˇ lo ve iˉ kaˆ lawˬ teˇ hpawˇ lo kʼai tuˬ te tcuh ve yoˬ. Yawˇ ve maꞈ yaˇ laˇ venˇ yehˬ miˇ lo kʼai gaˬ ve teˇ yanˇ, laˇ venˇ yehˬ miˉ kaꞈ hpaw baˍ taˍ ve yoˬ! Kuˇruˆ ve maꞈ yaˇ venˇ htaꞈ hoˆ yuˬ leh jawˇ mawˇ Beˍlaˍshaˍzaˍ htaꞈ tiˇ pehˍ ve yoˬ. Hkʼe te leh, Kuˇruˆ Baˍbuˍlonˍ ve jawˇ mawˇ hpehꞈ la ve yoˬ.

Kuˇruˆ kʼoˆ ve teˇ hkʼawꞈ ve awˬ yanˇ hkʼaw, ‘Yeˍruˆsaˍlehnˍ venˇ hkʼaw Yaˬhoˉvaˬ yawˇ ve bon yehˬ awˬ suhˉ kʼawꞈ gu te tuˬ ngaˬ htaꞈ kʼoˆ laˇ ve yoˬ. Gʼuiˬ sha ve mvuhˇ miˬ yaˇ hkʼaˬ ve teˇ gʼaˇ maˇ kʼoˆ, bon yehˬ awˬ suhˉ kʼawꞈ gu te tuˬ ga piˇ gʼa ve yoˬ.’ Chi lehˬ Yaˬhoˉvaˬ ka tiꞈ te taˍ ve hkʼe awˬ tehˬ biˇ la ve yoˬ. Yeˍruˆsaˍlehnˍ venˇ te luˬ ve 70 hkʼawꞈ biˇ la peuˬ hkʼawꞈ nawˉ, Yuˇdaꞈ chaw a shu yawˇ ve mvuhˇ miˬ lo gʼa kʼoꞈ˗e ve yoˬ. Yaˬhoˉvaˬ ve bon yehˬ hkʼaw Neˍbuˍhkaˍneˍzaˍ yuˬ veu laˇ taˍ ve mawˇ yehˇ hkui, hpu kawˆ, shi kawˆ teˇ hpaˍ kaꞈ yuˬ kʼoꞈ˗e tuˬ Kuˇruˆ tawˇ piˇ ve yoˬ. Nawˬ mawˬ˗aw laˇ? Yaˬhoˉvaˬ Kuˇruˆ htaꞈ yehˇ leh yawˇ ve mvuhˇ miˬ yaˇ htaꞈ hkʼaˬ hkʼe ga piˇ ve le?